Oʻzbekiston Respublikasi Saylov kodeksining 14, 16 va 26-moddalariga muvofiq, Oʻzbekiston Respublikasi Markaziy saylov komissiyasi qaror qiladi:

1. Okrug saylov komissiyasi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Markaziy saylov komissiyasining rasmiy veb-saytida eʼlon qilinsin.

3. Mazkur qarorning ijrosini nazorat qilish Oʻzbekiston Respublikasi Markaziy saylov komissiyasi Raisining oʻrinbosari B. Kuchkarov zimmasiga yuklansin.

Mazkur Nizom Oʻzbekiston Respublikasining Saylov kodeksiga (bundan buyon matnda Saylov kodeksi deb yuritiladi) muvofiq xalq deputatlari viloyat, Toshkent shahar Kengashiga saylov oʻtkazish boʻyicha okrug saylov komissiyalarini (bundan buyon matnda okrug saylov komissiyasi deb yuritiladi) tuzish va ularning faoliyatini tashkil etish tartibini belgilaydi.

1. Okrug saylov komissiyasi aʼzoligiga nomzodlar tegishli xalq deputatlari tuman, shahar Kengashining reglamentida belgilangan tartibda uning majlisida muhokama qilinadi hamda tegishli viloyat, Toshkent shahar hududiy saylov komissiyasiga (bundan buyon matnda hududiy saylov komissiyasi deb yuritiladi) tasdiqlash uchun tavsiya etiladi.

Bunda xalq deputatlari tuman, shahar Kengashining okrug saylov komissiyasi aʼzoligiga nomzodlarni tavsiya etish toʻgʻrisidagi qarori ikki ish kuni ichida hududiy saylov komissiyasiga yuboriladi.

2. Okrug saylov komissiyasi hududiy saylov komissiyasi tomonidan saylovga kamida yetmish kun qolganida komissiya raisi, rais oʻrinbosari, kotibidan va komissiyaning olti — sakkiz nafar boshqa aʼzolaridan iborat tarkibda tuziladi.

3. Okrug saylov komissiyasining tarkibi, joylashgan manzili va telefon raqamlari toʻgʻrisidagi maʼlumotlar hududiy saylov komissiyasining rasmiy veb-saytida va boshqa manbalarda eʼlon qilinadi.

4. Yigirma bir yoshga toʻlgan, oʻrta yoki oliy maʼlumotga, qoida tariqasida, saylovga tayyorgarlik koʻrish va ularni oʻtkazish borasida ish tajribasiga ega boʻlgan, aholi oʻrtasida obroʻ-eʼtibor qozongan Oʻzbekiston Respublikasi fuqarolari okrug saylov komissiyasining aʼzosi boʻlishi mumkin.

Qoraqalpogʻiston Respublikasi hududida ushbu Nizomda nazarda tutilgan saylovlarga tayyorgarlik koʻrish va ularni oʻtkazish bilan bogʻliq hududiy saylov komissiyasining vakolatlarini Qoraqalpogʻiston Respublikasi Markaziy saylov komissiyasi amalga oshiradi.

5. Quyidagilar okrug saylov komissiyasining aʼzosi boʻlishi mumkin emas:

Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) deputati, xalq deputatlari viloyat, tuman va shahar Kengashlari (bundan buyon matnda mahalliy Kengashlar deb yuritiladi) deputati, Oʻzbekiston Respublikasi Oliy Majlisi Senati (bundan buyon matnda Senat deb yuritiladi) aʼzosi;

boshqa saylov komissiyasining aʼzolari;

siyosiy partiyalarning aʼzolari va vakolatli vakillari;

viloyat, tuman va shahar hokimlari hamda ularning oʻrinbosarlari;

prokuratura organlarining, sudlarning mansabdor shaxslari;

nomzodlar, nomzodlarning yaqin qarindoshlari (yaʼni ota-ona, tugʻishgan va oʻgay aka-uka va opa-singillar, er-xotin, farzand, shu jumladan farzandlikka olinganlar, bobo, buvi, nevaralar, shuningdek er-xotinning ota-onasi, tugʻishgan va oʻgay aka-uka va opa-singillari) va ishonchli vakillari;

nomzodlarga bevosita boʻysunuvchi shaxslar;

ogʻir yoki oʻta ogʻir jinoyatlar sodir etganligi uchun sudlanganlik holati tugallanmagan yoxud sudlanganligi olib tashlanmagan fuqarolar.

6. Nomzodlarning yaqin qarindoshlari yoki bevosita nomzodlarga boʻysunuvchi shaxslar nomzod koʻrsatilgan saylov okrugidan boshqa saylov okrugidagi okrug saylov komissiyalari aʼzoligiga saylangan boʻlsa, ushbu shaxslar tegishli okrug saylov komissiyasi tarkibida oʻz faoliyatlarini davom ettirishlari mumkin.

Saylov kampaniyasi davomida nomzod roʻyxatga olingandan soʻng uning yaqin qarindoshlari yoki unga bevosita boʻysunuvchi shaxslar okrug saylov komissiyasi tarkibiga kiritilganligi aniqlansa, ushbu shaxslar okrug saylov komissiyasi tarkibidan belgilangan tartibda chiqariladi.

7. Okrug saylov komissiyasi aʼzolarining tarkibini shakllantirishda mazkur Nizomning 4-bandida koʻrsatilgan talablar bilan bir qatorda quyidagi fuqarolar orasidan boʻlishi tavsiya etiladi:

nodavlat notijorat tashkilotlari va fuqarolik jamiyatining boshqa institutlari vakillari;

huquqiy bilim va malakaga ega, shuningdek xorijiy tillarni biladigan mutaxassislar;

Saylov jarayonini boshqarish axborot tizimi (bundan buyon matnda SJBAT deb yuritiladi) va Saylovchilarning yagona elektron roʻyxati (bundan buyon matnda SYAER deb yuritiladi) bilan ishlash koʻnikmasiga ega boʻlgan, raqamli texnologiyalar sohasida bilim va amaliy koʻnikmaga ega fuqarolar.

Okrug saylov komissiyasi tarkibini shakllantirishda xotin-qizlar va erkaklar uchun teng huquq hamda imkoniyatlarni, shuningdek yoshlar hamda nogironligi boʻlgan ijtimoiy faol fuqarolarning ishtirokini taʼminlashga alohida eʼtibor beriladi. Bunda okrug saylov komissiyasi aʼzoligiga nomzodlardagi xotin-qizlarning ulushi kamida oʻttiz foiz boʻlishi tavsiya etiladi.

8. Okrug saylov komissiyasi aʼzolariga mazkur Nizomning 1-ilovasiga muvofiq shaklda guvohnoma beriladi.

Okrug saylov komissiyasining raisi, rais oʻrinbosari, kotibi va komissiya aʼzolarining guvohnomalari hududiy saylov komissiyasining raisi tomonidan imzolanadi va komissiya muhri bilan tasdiqlanadi.

Okrug saylov komissiyasining aʼzolariga guvohnomalar elektron shaklda “E-saylov” axborot tizimi orqali berilishi mumkin. Bunda “E-saylov” axborot tizimi orqali guvohnoma hududiy saylov komissiyasi raisi tomonidan elektron raqamli imzo bilan tasdiqlanadi.

9. Okrug saylov komissiyasi aʼzolari oʻz faoliyatini jamoatchilik asosida amalga oshiradi.

Okrug saylov komissiyasining aʼzosi saylovga tayyorgarlik koʻrish va uni oʻtkazish davrida ishlab chiqarish yoki xizmat vazifalarini bajarishdan hududiy saylov komissiyasi bilan kelishilgan holda okrug saylov komissiyasining qaroriga binoan oʻrtacha oylik ish haqi saqlangan holda ozod qilinishi mumkin.

10. Okrug saylov komissiyasining aʼzolari saylovga tayyorgarlik koʻrish va uni oʻtkazish davrida ish beruvchining tashabbusi bilan ishdan boʻshatilishi yoki ularning roziligisiz boshqa ishga oʻtkazilishi mumkin emas.

11. Okrug saylov komissiyasining Qonunchilik palatasi va mahalliy Kengash deputatligiga nomzod yoki ishonchli vakil etib roʻyxatga olingan aʼzosi saylov komissiyasi tarkibidan chiqib ketgan deb hisoblanadi. Bu haqda okrug saylov komissiyasi hududiy saylov komissiyasini xabardor etadi.

12. Okrug saylov komissiyasi aʼzosining vakolatlari hududiy saylov komissiyasi tomonidan bevosita yoxud uni aʼzolikka tavsiya etgan organning taqdimnomasiga binoan quyidagi hollarda tugatilishi mumkin:

u oʻz vakolatlarini zimmasidan soqit qilish toʻgʻrisida yozma ariza berganda;

u sud tomonidan muomalaga layoqatsiz deb topilganda;

unga nisbatan sudning ayblov hukmi qonuniy kuchga kirganda;

u oʻz vazifalarini muntazam ravishda bajarmay kelganda;

qonunga koʻra u saylov komissiyasi aʼzosining vakolatlarini amalga oshirish bilan bir vaqtda shugʻullanib boʻlmaydigan lavozimga saylanganda yoki tayinlanganda;

u sudning qonuniy kuchga kirgan qaroriga asosan bedarak yoʻqolgan deb topilganda yoxud vafot etgan deb eʼlon qilinganda;

u Oʻzbekiston Respublikasi fuqaroligini yoʻqotganda yoki Oʻzbekiston Respublikasi fuqaroligidan chiqqanda;

u vafot etganda.

Komissiya aʼzosining oʻz vazifalarini muntazam ravishda bajarmay kelganligiga oid holat u aʼzo boʻlgan okrug saylov komissiyasining dalolatnomasi bilan rasmiylashtiriladi.

13. Okrug saylov komissiyasining aʼzosi komissiya tarkibidan chiqarilgan yoki okrug saylov komissiyasi aʼzolarining soni koʻpaytirilgan hollarda okrug saylov komissiyasining yangi aʼzosi Saylov kodeksida va mazkur Nizomda belgilangan tartibda tasdiqlanadi.

14. Okrug saylov komissiyasi:

xalq deputatlari viloyat, Toshkent shahar Kengashi sayloviga tayyorgarlik koʻrish va oʻtkazishni tashkil etadi;

saylov okrugi hududida Saylov kodeksi ijrosi ustidan nazoratni amalga oshiradi va uning bir xil tarzda qoʻllanilishini taʼminlaydi;

uchastka saylov komissiyalarining faoliyatini muvofiqlashtiradi;

deputatlikka nomzodlarning saylov kampaniyasida ishtirok etishi uchun teng sharoitlarni taʼminlaydi;

saylovchilar roʻyxatlarining tuzilishini va ularning hamma tanishib chiqishi uchun taqdim etilishini kuzatib boradi;

saylov okrugi boʻyicha saylov natijalarini aniqlaydi va ularni tegishli hududiy saylov komissiyasiga taqdim etadi;

takroriy saylov, shuningdek boʻshab qolgan oʻrinlarga deputatlar saylovi oʻtkazilishini tashkil etadi;

saylovchilarning va saylov jarayoni boshqa ishtirokchilarining murojaatlarini koʻrib chiqadi hamda ular yuzasidan qarorlar qabul qiladi, bundan saylov komissiyalarining harakatlari va qarorlari ustidan berilgan shikoyatlar mustasno.

15. Okrug saylov komissiyasi saylovga tayyorgarlik koʻrish va uni oʻtkazish bilan bogʻliq masalalar yuzasidan tegishli hududdagi davlat organlariga hamda jamoat birlashmalarining organlariga, korxonalarga, muassasalarga, tashkilotlarga, mansabdor shaxslarga murojaat qilish huquqiga ega. Ular qoʻyilgan masalani koʻpi bilan uch kunlik muddatda koʻrib chiqishi va okrug saylov komissiyasiga javob qaytarishi shart.

16. Davlat organlari va jamoat birlashmalarining organlari, korxonalar, muassasalar, tashkilotlar, mansabdor shaxslar okrug saylov komissiyasiga oʻz vakolatlarini amalga oshirishida koʻmaklashishi, uning ishi uchun zarur maʼlumotlarni taqdim etishi shart.

17. Okrug saylov komissiyasi raisi:

okrug saylov komissiyasining faoliyatiga rahbarlikni amalga oshiradi;

okrug saylov komissiyasi majlislarini chaqiradi, ularda raislik qiladi, komissiya aʼzolari oʻrtasida vazifalarni taqsimlaydi;

okrug saylov komissiyasining majlislarida ishtirok etish uchun davlat organlarining, siyosiy partiyalarning hamda boshqa jamoat birlashmalarining, tashkilotlarning vakillarini va mansabdor shaxslarini taklif etadi;

davlat organlari, xalqaro tashkilotlar, jamoat birlashmalari shu jumladan siyosiy partiyalar bilan munosabatlarda okrug saylov komissiyasi nomidan ish yuritadi;

okrug saylov komissiyasi joylashgan binoning jihozlanishini tashkil etadi;

okrug saylov komissiyasining bayonnomalarini, qarorlarini hamda boshqa hujjatlarini imzolaydi;

jismoniy va yuridik shaxslardan kelib tushgan murojaatlarni komissiya aʼzolari oʻrtasida koʻrib chiqish uchun taqsimlaydi;

okrug saylov komissiyasi aʼzolarining ovoz berish kunidagi vazifalarini belgilaydi;

siyosiy partiyalarning kuzatuvchilari, vakolatli vakillari, fuqarolarning oʻzini oʻzi boshqarish organlari, shuningdek, boshqa davlatlar va xalqaro tashkilotlarning kuzatuvchilari bilan komissiya nomidan ish olib boradi;

saylovga tayyorgarlik koʻrish va uni oʻtkazish jarayonida huquqbuzarliklar aniqlangan taqdirda, tegishli huquqni muhofaza qilish organlarini xabardor qiladi;

tegishli okrug boʻyicha saylov yakunlari toʻgʻrisida hududiy saylov komissiyasiga axborot beradi;

qonunchilik hujjatlarida, shuningdek okrug saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

Okrug saylov komissiyasi raisi oʻz vakolatlarini bajarishi imkoni boʻlmaganda, shuningdek, rais boʻlmagan taqdirda, raisning vazifalari rais oʻrinbosarining zimmasiga yuklatiladi.

18. Okrug saylov komissiyasi raisining oʻrinbosari:

okrug saylov komissiyasi raisi oʻz vakolatlarini bajarishi imkoni boʻlmaganda, shuningdek, rais boʻlmagan taqdirda, uning vazifalarini bajaradi;

okrug saylov komissiyasi aʼzolarining faoliyatini muvofiqlashtirib boradi;

okrug saylov komissiyasi aʼzolarining malakasini oshirish va ularning faoliyatini uslubiy jihatdan taʼminlashni tashkil etadi;

ommaviy axborot vositalari vakillari bilan aloqalar oʻrnatadi, ularda komissiya faoliyatini har tomonlama yoritilishini tashkillashtiradi;

jismoniy shaxslarni va yuridik shaxslarni vakillarini qabul qiladi va ularning murojaatlarini belgilangan tartibda koʻrib chiqilishini tashkil etadi;

okrug saylov komissiyasi aʼzolarini jalb etgan holda komissiya qarorlari ijrosini taʼminlaydi;

okrug saylov komissiyasi raisining topshiriqlarini bajaradi;

oʻz vakolatlari doirasida okrug saylov komissiyasining boshqa aʼzolariga topshiriqlar beradi;

qonunchilik hujjatlarida, shuningdek okrug saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

19. Okrug saylov komissiyasi kotibi:

okrug saylov komissiyasi majlislarini tashkillashtiradi, muhokama etiladigan masalalar boʻyicha qaror va boshqa hujjatlar loyihalarini tayyorlaydi;

okrug saylov komissiyasi aʼzolarini komissiya majlisi oʻtkazilishi vaqti va joyi haqida xabardor qiladi;

okrug saylov komissiyasi qarorlari va boshqa materiallar komissiya aʼzolari hamda uchastka saylov komissiyalariga, shuningdek, zaruratga qarab tegishli hududdagi davlat organlari, siyosiy partiyalar, boshqa jamoat birlashmalari, korxonalar, muassasalar va tashkilotlar hamda mansabdor shaxslarga yetkazilishini taʼminlaydi hamda komissiya majlislari haqidagi xabar va maʼlumotlarni ommaviy axborot vositalarida eʼlon qilinishini tashkillashtiradi;

okrug saylov komissiyasi raisi va rais oʻrinbosari topshiriqlarini bajaradi;

okrug saylov komissiyasining faoliyatiga taalluqli ish hujjatlarini nomenklatura asosida yuritib boradi;

okrug saylov komissiyasida SYAER va SJBATda ish yuritilishini taʼminlaydi;

qonunchilik hujjatlarida, shuningdek okrug saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

20. Okrug saylov komissiyasi raisining oʻrinbosari, kotibi oʻz vakolatlarini bajarishi imkoni boʻlmaganda, shuningdek rais oʻrinbosari, kotib boʻlmagan taqdirda, ularning vazifalari okrug saylov komissiyasi raisi tomonidan komissiya aʼzolari zimmasiga vaqtinchalik yuklatilishi mumkin.

21. Okrug saylov komissiyasi aʼzosining majburiyatlari:

komissiya muhokamasiga kiritilgan masalalarni tayyorlashda ishtirok etadi;

komissiyaning barcha majlislarida, shu jumladan videokonferensaloqa tizimi orqali shaxsan ishtirok etadi, boshqa tadbirlarida qatnashadi;

oʻzi biriktirilgan hududda (saylov uchastkasida) saylovga tayyorgarlik koʻrish va uni oʻtkazish boʻyicha tadbirlarni oʻz vaqtida sifatli bajarilishini muvofiqlashtiradi;

uzrli sabablar bilan (kasalligi, mehnat taʼtilida boʻlishi va boshqalar) komissiya majlisida ishtirok eta olmasligi haqida okrug saylov komissiyasi raisini yoki komissiya kotibini xabardor qiladi;

okrug saylov komissiyasi raisining va rais oʻrinbosarining oʻz vakolatlari doirasida bergan topshiriqlarini bajaradi hamda ularning bajarilganligi toʻgʻrisida belgilangan muddatlarda axborot beradi;

koʻrib chiqish oʻziga yuklatilgan jismoniy va yuridik shaxslarning murojaatlarini belgilangan muddatlarda koʻrib chiqilishini taʼminlaydi;

okrug saylov komissiyasi raisi tomonidan ovoz berish kunidagi belgilangan vazifalarning oʻz vaqtida va sifatli bajarilishini taʼminlaydi;

saylovga tayyorgarlik koʻrish va uni oʻtkazish jarayonidagi huquqbuzarliklar aniqlangan taqdirda, ular toʻgʻrisida darhol rais yoki rais oʻrinbosarini xabardor qiladi;

manfaatlar toʻqnashuvi yuzaga kelganda, shuningdek yaqin qarindoshlari tegishli okrugda nomzod etib roʻyxatga olingan taqdirda hududiy saylov komissiyasini darhol xabardor qiladi;

qonunchilik hujjatlarida, shuningdek okrug saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

22. Okrug saylov komissiyasi aʼzosi quyidagi huquqlarga ega:

okrug saylov komissiyasi majlisining kun tartibi, muhokama qilinayotgan masalalarni koʻrib chiqish tartibi hamda bu masalalarning mohiyati yuzasidan takliflar kiritish va mulohazalar bildirish;

okrug saylov komissiyasi majlisida muhokamada qatnashish, majlisda soʻzga chiqish, takliflar kiritish;

okrug saylov komissiyasining majlisida qabul qilingan qarori yuzasidan alohida fikr bildirish;

okrug saylov komissiyasi faoliyatiga doir materiallar va hujjatlar bilan tanishib chiqish.

23. Okrug saylov komissiyasi oʻz faoliyatini mustaqillik, qonuniylik, kollegiallik, oshkoralik va adolatlilik prinsiplari asosida amalga oshiradi.

24. Okrug saylov komissiyasi ishining tashkiliy shakli uning zaruratga qarab oʻtkaziladigan majlisi hisoblanadi. Okrug saylov komissiyasining majlislari u joylashgan binoda, sayyor tarzda yoki videokonferensaloqa shaklida oʻtkaziladi.

25. Okrug saylov komissiyasining majlisi raisning tashabbusiga koʻra yoki komissiya aʼzolari umumiy tarkibining kamida uchdan bir qismi talabiga binoan chaqirilishi mumkin.

Okrug saylov komissiyasining majlisi, agar unda majlis oʻtkazilayotgan kundagi komissiya aʼzolari umumiy sonining kamida uchdan ikki qismi ishtirok etayotgan boʻlsa, vakolatli hisoblanadi.

Okrug saylov komissiyasining aʼzosi agar majlisda videokonferens aloqadan foydalangan holda ishtirok etayotgan boʻlsa, majlisda hozir boʻlgan hisoblanadi.

26. Okrug saylov komissiyasining qarori ochiq ovoz berish yoʻli orqali komissiya aʼzolari umumiy sonining koʻpchilik ovozi bilan qabul qilinadi. Ovozlar teng boʻlib qolgan taqdirda, raislik qiluvchining ovozi hal qiluvchi hisoblanadi.

27. Okrug saylov komissiyasi majlislarida masalalar ochiq va oshkora muhokama etiladi.

Okrug saylov komissiyasi majlisida bayonnoma yuritiladi.

Bayonnomada majlisning kun tartibi, unda qatnashgan okrug saylov komissiyasi aʼzolari va boshqa taklif etilgan shaxslar haqidagi maʼlumotlar, muhokamaga kiritilgan masalaning qisqacha mazmuni, soʻzga chiqqan va fikr bildirganlar toʻgʻrisida maʼlumotlar, koʻrib chiqilgan har bir masala yuzasidan ovoz berish natijalari, qabul qilingan qarorlar koʻrsatiladi.

Bayonnoma raislik qiluvchi va kotib tomonidan imzolanadi hamda unga qabul qilingan qaror, taalluqli hujjatlar, shuningdek, okrug saylov komissiyasi aʼzolarining muayyan masala yuzasidan yozma shakldagi alohida fikrlari (agar boʻlsa) ilova qilinadi.

Okrug boʻyicha saylov natijalari toʻgʻrisidagi bayonnoma okrug saylov komissiyasining majlisida ishtirok etgan barcha aʼzolari tomonidan imzolanadi.

28. Okrug saylov komissiyasining oʻz vakolatlari doirasida qabul qilgan qarori okrug hududida joylashgan uchastka saylov komissiyalari, shuningdek davlat organlari, siyosiy partiyalar va boshqa jamoat birlashmalari, mehnat jamoalari va harbiy qismlar, korxonalarning, muassasalarning va tashkilotlarning rahbarlari ijro etishi uchun majburiydir.

29. Okrug saylov komissiyasi majlislarida Markaziy saylov komissiyasi aʼzolari va Kotibiyati xodimlari, hududiy saylov komissiyasi aʼzolari, roʻyxatga olingan tegishli xalq deputatlari viloyat, Toshkent shahar Kengashi deputatligiga nomzodlar, ularning ishonchli vakillari, siyosiy partiyalarning kuzatuvchilari, ommaviy axborot vositalarining vakillari, fuqarolarning oʻzini oʻzi boshqarish organlaridan, boshqa davlatlardan, xalqaro tashkilotlardan kuzatuvchilar ishtirok etishi mumkin.

Majlislarga mahalliy davlat hokimiyati organlari, jamoat birlashmalari vakillari va boshqalar taklif etilishi mumkin.

30. Okrug saylov komissiyasi hududiy saylov komissiyasi tomonidan tuzilganidan soʻng quyidagi tadbirlarni amalga oshiradi:

okrug saylov komissiyasining birinchi tashkiliy majlisini oʻtkazadi;

okrug saylov komissiyasi joylashgan binoni belgilangan tartibda jihozlashga zarur boʻlgan tashkiliy ishlarni amalga oshiradi.

Okrug saylov komissiyasi birinchi tashkiliy majlisida quyidagi masalalar koʻrib chiqadi:

okrug saylov komissiyasining saylovga tayyorgarlik koʻrish va uni oʻtkazishga doir ish rejasini tasdiqlash;

okrug saylov komissiyasi aʼzolari oʻrtasida vazifalarni taqsimlash;

okrug saylov komissiyasi aʼzolari tomonidan fuqarolarning qabulini tashkil etish;

okrug saylov komissiyasi aʼzolarining navbatchiligini tashkil qilish.

Uchastka saylov komissiyalarining ishini tashkil qilish va binolarni jihozlashda amaliy yordam koʻrsatadi.

31. Okrug saylov komissiyasi 2-ilovaga muvofiq tasdiqlangan muhrga ega boʻladi.

32. Okrug saylov komissiyasi raisi yoki rais oʻrinbosari okrug saylov komissiyasiga tashrif buyurgan siyosiy partiyalarning kuzatuvchilari, vakolatli vakillari, nomzodning ishonchli vakillari, ommaviy axborot vositalari, fuqarolarning oʻzini oʻzi boshqarish organlaridan, shuningdek, boshqa davlatlar va xalqaro tashkilotlardan kuzatuvchilarni tegishli hujjatlar asosida roʻyxatga oladi va qabul qiladi.

33. Saylovga oid axborot tizimlaridan foydalanishni tashkillashtirish maqsadida okrug saylov komissiyasi aʼzolaridan birining (qoida tariqasida raqamli texnologiyalar sohasida maʼlum koʻnikmaga ega boʻlgan) zimmasiga quyidagi vazifalar yuklatiladi:

komissiya aʼzolarining axborot tizimlaridan samarali foydalanishini tashkil etish;

axborot tizimlaridan foydalanishda axborot xavfsizligini taʼminlash borasida nazorat olib borish;

uchastka saylov komissiyalari tomonidan SJBATda amalga oshiriladigan ishlarni muvofiqlashtirib borish.

34. Okrug saylov komissiyasida yuritiladigan ish hujjatlari:

okrug saylov komissiyasining qarorlari, bayonnomalari, dalolatnomalar daftari va yigʻmajildi;

Markaziy saylov komissiyasining, hududiy va tuman, shahar saylov komissiyasining qarorlari yigʻmajildi;

xalq deputatlari viloyat, Toshkent shahar Kengashi deputatlari sayloviga oid hujjatlar yigʻmajildi;

kirish, chiqish hujjatlarini, shu jumladan jismoniy va yuridik shaxslarning murojaatlarini roʻyxatga olish daftari va yigʻmajildi;

kuzatuvchilarni roʻyxatga olish daftari.

35. Markaziy saylov komissiyasining koʻrsatmasiga koʻra okrug saylov komissiyasida yuritiladigan ish hujjatlari elektron shaklda amalga oshirilishi mumkin.

36. Saylovga tayyorgarlik koʻrish va uni oʻtkazish davrida tegishli hududda joylashgan davlat organlari, korxonalar, muassasalar, tashkilotlar okrug saylov komissiyasi ixtiyoriga saylovga tayyorgarlik koʻrish va uni oʻtkazish uchun zarur boʻlgan binolar, majlis zallari, xonalar hamda jihozlarni bepul berib turishi shart.

Okrug saylov komissiyalari viloyatlar va Toshkent shahar hokimliklari tomonidan kamida toʻrtta xonadan iborat bino bilan, shuningdek, transport, aloqa vositalari va internet tarmogʻiga ulanish imkoniyati bilan taʼminlanadi.

37. Saylovni oʻtkazish davrida okrug saylov komissiyalari joylashgan binolar tegishli tarzda jihozlanishi va quyidagilarga ega boʻlishi kerak:

Oʻzbekiston Respublikasining Davlat bayrogʻi (binoning ustida va ichida);

Oʻzbekiston Respublikasining Davlat gerbi (binoning ichida);

okrug saylov komissiyasining toʻliq nomi koʻrsatilgan peshlavha;

qulflanadigan seyf yoki metall shkaf;

zarur mebellar, konditsioner, orgtexnika vositalari (kompyuter, noutbuk, printer, skaner, nusxa koʻchiruvchi uskuna, UPS), telefon, televizor;

SJBAT talablariga javob beruvchi ikkitadan kam boʻlmagan kompyuter va ularga kerakli boʻlgan qurilmalar (printer, skaner, UPS va boshqalar) hamda uzluksiz (simsiz) internet aloqasi va h.k.;

muqobil elektr-energiyasi ishlab chiqaradigan generator qurilmasi;

yongʻinga qarshi vositalar.

Okrug saylov komissiyasi joylashgan bino va unga olib boruvchi yoʻlaklar ozoda va taʼmirlangan, yoritish moslamalari oʻrnatilgan boʻlishi kerak.

38. Saylovni oʻtkazish davrida okrug saylov komissiyasi binosida quyidagilar joylashtiriladi:

saylov sanasiga bagʻishlangan plakat;

okrug saylov komissiyasining tarkibi, manzili va telefon raqamlari;

tegishli okrug boʻyicha roʻyxatga olingan xalq deputatlari viloyat, Toshkent shahar Kengashi deputatligiga nomzodlarning tarjimai holi hamda dasturining asosiy yoʻnalishlari;

Markaziy saylov komissiyasining, hududiy saylov komissiyasining, tegishli tuman yoki shahar sudi, prokuraturasi va ichki ishlar boʻlimining ishonch telefonlari raqamlari.

39. Okrug saylov komissiyasi xonasida quyidagilar boʻlishi lozim:

Oʻzbekiston Respublikasi Konstitutsiyasi, Saylov kodeksi, saylovga oid qonunchilik hujjatlari toʻplami;

okrug saylov komissiyasi aʼzolarining tarkibi haqida maʼlumot;

okrug saylov komissiyasining ish rejasi va navbatchilik jadvali.

40. Stendlarda joylashtiriladigan materiallarda saylovoldi tashviqotiga oid nishon va alomatlar boʻlmasligi kerak.

41. Okrug saylov komissiyasi binosiga olib boruvchi yoʻllarda saylov okrugining koʻrsatkichlari koʻrinarli joylarga joylashtirilgan boʻlishi kerak.

42. Okrug saylov komissiyasi binosiga kirish joyida nogironligi boʻlgan shaxslar uchun oʻrindiqli aravachalarga moslashtirilgan nishab yoʻlaklari (panduslar) boʻlishi va ular belgilangan talablarga mos boʻlishi kerak.

Qoraqalpogʻiston Respublikasi Vazirlar Kengashi, viloyatlar, Toshkent shahar hamda tegishli tuman, shahar hokimliklari okrug saylov komissiyasi joylashgan binoni taʼmirlaydi va saylov jihozlari bilan taʼminlashga koʻmaklashadi.

43. Okrug saylov komissiyasi kompyuterlarini internet tarmogʻiga ulash Oʻzbekiston Respublikasi Raqamli texnologiyalari vazirligining hududiy boshqarmalari koʻmagida amalga oshiriladi.

44. Jismoniy va yuridik shaxslarning okrug saylov komissiyasiga kelib tushgan murojaatlari Saylov kodeksi, “Jismoniy va yuridik shaxslarning murojaatlari toʻgʻrisida”gi Qonun hamda boshqa qonunchilik hujjatlarida belgilangan tartibda koʻrib chiqiladi.

45. Kelib tushgan murojaatlar okrug saylov komissiyasi raisi tomonidan komissiya aʼzolari oʻrtasida koʻrib chiqish uchun taqsimlanadi.

Murojaatga javob xati okrug saylov komissiyasining raisi yoki rais oʻrinbosari tomonidan imzolanadi.

46. Murojaatda bayon etilgan masalalarni hal qilish okrug saylov komissiyasi vakolatiga kirmasa, qonunchilikda belgilangan tartibda tegishli organlarga yuboriladi.

47. Okrug saylov komissiyasi saylov kampaniyasini oʻtkazish davrida jismoniy va yuridik shaxslarning Saylov kodeksi talablari buzilganligi yoki saylovni tashkil etishning boshqa masalalari xususida oʻziga kelib tushgan murojaatlarini oʻz vakolatlari doirasida koʻrib chiqadi.

Ushbu murojaatlar boʻyicha tekshiruvlar oʻtkazilishi va uch kunlik muddatda ularga yozma javoblar berilishi, saylovga olti kundan kam vaqt qolganida yoki ovoz berish kuni kelib tushgan murojaatlar esa darhol koʻrib chiqilib, javob qaytarilishi shart. Bundan saylov komissiyalarining harakatlari va qarorlari ustidan berilgan shikoyatlar mustasno.

Zarur hollarda okrug saylov komissiyasi murojaatlarni koʻrib chiqish uchun tegishli mutaxassislarni jalb qilgan holda ishchi guruh tuzishi mumkin.

48. Saylov toʻgʻrisidagi qonunchilik hujjatlarini buzganlikda aybdor shaxslar belgilangan tartibda javobgar boʻladi.

49. Saylovga tayyorgarlik koʻrish va uni oʻtkazish jarayonidagi huquqbuzarliklar boʻyicha ish yuritish qonunchilikda belgilangan tartibda amalga oshiriladi.

50. Saylovga tayyorgarlik koʻrish va uni oʻtkazish bilan bogʻliq hujjatlar Markaziy saylov komissiyasi tomonidan tasdiqlanadigan tegishli hujjatga muvofiq saqlash uchun tayyorlanadi, topshiriladi hamda (yoki) yoʻq qilinadi.

51. Okrug saylov komissiyasi saylov jarayonida foydalanilgan komissiya muhrini hududiy saylov komissiyasiga topshiradi.

52. Okrug saylov komissiyasi tegishli saylov okrugidan saylangan deputatlar hududiy saylov komissiyasi tomonidan roʻyxatga olinganidan, oʻz foydalanishida boʻlgan jihozlarni, okrug saylov komissiyasi faoliyatiga oid hujjatlarni belgilangan tartibda masʼul shaxslarga yoki arxivga topshirganidan soʻng oʻz faoliyatini tugatadi.

Okrug saylov komissiyasining gerbli rezina muhri diametri 35 mm aylana shaklda boʻlib, markazdan 18,5 mm uzoqlikda asosiy aylana va undan 1 mm masofada yana bir aylana oʻtkazilgan. Ikkinchi aylana tagida aylana boʻyicha “________________” OKRUG SAYLOV KOMISSIYASI” * yozuvi bor. Ushbu matnning tagidan yana bir ichki aylana oʻtkazilgan boʻlib, aylananing ichida Oʻzbekiston Respublikasining Davlat gerbi tasvirlangan.