Oʻzbekiston Respublikasi Saylov kodeksining 14, 16 va 26-moddalariga muvofiq, Oʻzbekiston Respublikasi Markaziy saylov komissiyasi qaror qiladi:

1. Hududiy saylov komissiyasi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Markaziy saylov komissiyasining rasmiy veb-saytida eʼlon qilinsin.

3. Mazkur qarorning ijrosini nazorat qilish Oʻzbekiston Respublikasi Markaziy saylov komissiyasi Raisining oʻrinbosari B. Kuchkarov zimmasiga yuklansin.

Mazkur Nizom Oʻzbekiston Respublikasining Saylov kodeksiga (bundan buyon matnda Saylov kodeksi deb yuritiladi) hamda “Oʻzbekiston Respublikasining referendumi toʻgʻrisida”gi Qonunga muvofiq viloyatlar va Toshkent shahar hududiy saylov komissiyalarini (bundan buyon matnda hududiy saylov komissiyasi deb yuritiladi) tuzish va ularning faoliyatini tashkil etish tartibini belgilaydi.

1. Hududiy saylov komissiyasi aʼzoligiga nomzodlar tegishli xalq deputatlari viloyat, Toshkent shahar Kengashining reglamentida belgilangan tartibda uning majlisida muhokama qilinadi hamda Oʻzbekiston Respublikasi Markaziy saylov komissiyasiga (bundan buyon matnda Markaziy saylov komissiyasi deb yuritiladi) tasdiqlash uchun tavsiya etiladi.

Bunda xalq deputatlari viloyat, Toshkent shahar Kengashining hududiy saylov komissiyasi aʼzoligiga nomzodlarni tavsiya etish toʻgʻrisidagi qarori ikki ish kuni ichida Markaziy saylov komissiyasiga yuboriladi.

Hududiy saylov komissiyasi aʼzoligiga nomzodlarni tasdiqlash uchun Markaziy saylov komissiyasiga tavsiya etish jarayonlari “E-saylov” axborot tizimi orqali amalga oshirilishi mumkin.

2. Hududiy saylov komissiyasi Markaziy saylov komissiyasi tomonidan saylovga kamida sakson kun qolganida komissiya raisi, rais oʻrinbosari, kotibidan va komissiyaning oʻn ikki — oʻn sakkiz nafar boshqa aʼzolaridan iborat tarkibda besh yil muddatga tuziladi.

3. Hududiy saylov komissiyasining tarkibi va joylashgan manzili Markaziy saylov komissiyasining rasmiy veb-saytida eʼlon qilinadi.

4. Yangi tashkil etilgan maʼmuriy-hududiy birliklarda hududiy saylov komissiyasi Oʻzbekiston Respublikasi Oliy Majlisi Senatining (bundan buyon matnda Senat deb yuritiladi) tavsiyasiga binoan Markaziy saylov komissiyasi tomonidan saylovga kamida oltmish kun qolganida tuziladi hamda oʻz vakolatlarini keyingi saylov kampaniyasi boshlanganligi eʼlon qilinguniga qadar amalga oshiradi.

5. Hududiy saylov komissiyasi rasmiy veb-saytida va matbuot nashrlarida oʻz tarkibi, manzili va komissiyaning telefon raqamlari toʻgʻrisidagi maʼlumotlarni eʼlon qiladi.

6. Yigirma bir yoshga toʻlgan, oʻrta yoki oliy maʼlumotga, qoida tariqasida, saylovga hamda referendumga tayyorgarlik koʻrish va ularni oʻtkazish borasida ish tajribasiga ega boʻlgan, aholi oʻrtasida obroʻ-eʼtibor qozongan Oʻzbekiston Respublikasi fuqarolari hududiy saylov komissiyasining aʼzosi boʻlishi mumkin.

7. Quyidagilar hududiy saylov komissiyasining aʼzosi boʻlishi mumkin emas:

Oʻzbekiston Respublikasi Oliy Majlisi Qonunchilik palatasi (bundan buyon matnda Qonunchilik palatasi deb yuritiladi) deputati, xalq deputatlari viloyat, tuman va shahar Kengashlari (bundan buyon matnda mahalliy Kengashlar deb yuritiladi) deputati, Senat aʼzosi;

boshqa saylov komissiyasining aʼzolari;

siyosiy partiyalarning aʼzolari va vakolatli vakillari;

viloyat, tuman va shahar hokimlari hamda ularning oʻrinbosarlari;

prokuratura organlarining, sudlarning mansabdor shaxslari;

nomzodlar, nomzodlarning yaqin qarindoshlari (yaʼni ota-ona, tugʻishgan va oʻgay aka-uka va opa-singillar, er-xotin, farzand, shu jumladan farzandlikka olinganlar, bobo, buvi, nevaralar, shuningdek er-xotinning ota-onasi, tugʻishgan va oʻgay aka-uka va opa-singillari) va ishonchli vakillari;

nomzodlarga bevosita boʻysunuvchi shaxslar;

ogʻir yoki oʻta ogʻir jinoyatlar sodir etganligi uchun sudlanganlik holati tugallanmagan yoxud sudlanganligi olib tashlanmagan fuqarolar.

8. Nomzodlarning yaqin qarindoshlari yoki bevosita nomzodlarga boʻysunuvchi shaxslar nomzod koʻrsatilgan hududdan boshqa hududda hududiy saylov komissiyalari aʼzoligiga saylangan boʻlsa, ushbu shaxslar tegishli hududiy saylov komissiyasi tarkibida oʻz faoliyatlarini davom ettirishlari mumkin.

Saylov kampaniyasi davomida nomzod roʻyxatga olingandan soʻng uning yaqin qarindoshlari yoki unga bevosita boʻysunuvchi shaxslar hududiy saylov komissiyasi tarkibiga kiritilganligi aniqlansa, ushbu shaxslar hududiy saylov komissiyasi tarkibidan belgilangan tartibda chiqariladi.

9. Hududiy saylov komissiyasi aʼzolarining tarkibini shakllantirishda mazkur Nizomning 6-bandida nazarda tutilgan talablarni inobatga olgan holda quyidagilar orasidan boʻlishi tavsiya etiladi:

nodavlat notijorat tashkilotlari va fuqarolik jamiyatining boshqa institutlari vakillari;

huquqiy bilim va malakaga ega, shuningdek xorijiy tillarni biladigan mutaxassislar;

Saylov jarayonini boshqarish axborot tizimi (bundan buyon matnda SJBAT deb yuritiladi) va Saylovchilarning yagona elektron roʻyxati (bundan buyon matnda SYAER deb yuritiladi) bilan ishlash koʻnikmasiga ega boʻlgan, raqamli texnologiyalar sohasida bilim va amaliy koʻnikmaga ega fuqarolar.

Hududiy saylov komissiyasi tarkibini shakllantirishda xotin-qizlar va erkaklar uchun teng huquq hamda imkoniyatlarni, shuningdek yoshlar hamda nogironligi boʻlgan ijtimoiy faol fuqarolarning ishtirokini taʼminlashga alohida eʼtibor beriladi. Bunda hududiy saylov komissiyasi aʼzoligiga nomzodlardagi xotin-qizlarning ulushi kamida oʻttiz foiz boʻlishi tavsiya etiladi.

10. Hududiy saylov komissiyasi aʼzolariga mazkur Nizomning 1-ilovasiga muvofiq shaklda guvohnoma beriladi.

Hududiy saylov komissiyasi raisining, rais oʻrinbosarining, komissiya kotibi va komissiya aʼzolarining guvohnomalari Markaziy saylov komissiyasining Raisi tomonidan imzolanadi va Markaziy saylov komissiyasining muhri bilan tasdiqlanadi.

11. Markaziy saylov komissiyasining qaroriga asosan hududiy saylov komissiyasining uch nafargacha aʼzosi komissiyada doimiy asosda ishlaydi.

Hududiy saylov komissiyasining doimiy asosda ishlovchi aʼzolari ilmiy, ijodiy va pedagogik faoliyatdan tashqari haq toʻlanadigan boshqa turdagi faoliyat bilan shugʻullanishi mumkin emas.

12. Hududiy saylov komissiyasining jamoatchilik asosida ishlovchi aʼzosi saylovga hamda referendumga tayyorgarlik koʻrish va uni oʻtkazish davrida ishlab chiqarish yoki xizmat vazifalarini bajarishdan Markaziy saylov komissiyasi bilan kelishilgan holda hududiy saylov komissiyasining qaroriga binoan oʻrtacha oylik ish haqi saqlangan holda ozod qilinishi mumkin.

13. Hududiy saylov komissiyasining oʻz faoliyatini jamoatchilik asosida amalga oshiradigan aʼzolari saylovga hamda referendumga tayyorgarlik koʻrish va uni oʻtkazish davrida ish beruvchining tashabbusi bilan ishdan boʻshatilishi yoki ularning roziligisiz boshqa ishga oʻtkazilishi mumkin emas.

14. Hududiy saylov komissiyasining Oʻzbekiston Respublikasi Prezidentligiga, Qonunchilik palatasi va mahalliy Kengash deputatligiga nomzod yoki ishonchli vakil etib roʻyxatga olingan aʼzosi saylov komissiyasi tarkibidan chiqib ketgan deb hisoblanadi.

Hududiy saylov komissiyasi aʼzosi referendumda fuqarolar tashabbuskor guruhining aʼzosi boʻlishi mumkin emas.

15. Hududiy saylov komissiyasi aʼzosining vakolatlari Markaziy saylov komissiyasi tomonidan bevosita yoxud uni aʼzolikka tavsiya etgan organning taqdimnomasiga binoan quyidagi hollarda tugatilishi mumkin:

u oʻz vakolatlarini zimmasidan soqit qilish toʻgʻrisida yozma ariza berganda;

u sud tomonidan muomalaga layoqatsiz deb topilganda;

unga nisbatan sudning ayblov hukmi qonuniy kuchga kirganda;

u oʻz vazifalarini muntazam ravishda bajarmay kelganda;

qonunga koʻra u saylov komissiyasi aʼzosining vakolatlarini amalga oshirish bilan bir vaqtda shugʻullanib boʻlmaydigan lavozimga saylanganda yoki tayinlanganda;

u sudning qonuniy kuchga kirgan qaroriga asosan bedarak yoʻqolgan deb topilganda yoxud vafot etgan deb eʼlon qilinganda;

u Oʻzbekiston Respublikasi fuqaroligini yoʻqotganda yoki Oʻzbekiston Respublikasi fuqaroligidan chiqqanda;

u vafot etganda.

Komissiya aʼzosining oʻz vazifalarini muntazam ravishda bajarmay kelganligiga oid holat u aʼzo boʻlgan hududiy saylov komissiyasining dalolatnomasi bilan rasmiylashtiriladi.

16. Hududiy saylov komissiyasining aʼzosi komissiya tarkibidan chiqarilgan yoki hududiy saylov komissiyasi aʼzolarining soni koʻpaytirilgan hollarda hududiy saylov komissiyasining yangi aʼzosi Saylov kodeksida va mazkur Nizomda belgilangan tartibda tasdiqlanadi.

17. Hududiy saylov komissiyasi:

tegishli viloyat, Toshkent shahri hududida (bundan buyon matnda tegishli hudud deb yuritiladi) Oʻzbekiston Respublikasi Prezidenti, Qonunchilik palatasi, mahalliy Kengashlar deputatlari saylovlariga hamda Oʻzbekiston Respublikasi referendumiga tayyorgarlik koʻrish va ularni oʻtkazishni tashkil etadi;

tegishli hududda Saylov kodeksining, “Oʻzbekiston Respublikasining referendumi toʻgʻrisida”gi Qonunning ijrosi ustidan nazoratni amalga oshiradi, uning bir xil tarzda qoʻllanilishini taʼminlaydi hamda saylovni, referendumni tashkil etish va oʻtkazish masalalari yuzasidan tushuntirishlar beradi;

xalq deputatlari viloyat, Toshkent shahar Kengashiga saylov oʻtkazish boʻyicha saylov okruglarini tuzadi, ularga nom va tartib raqami beradi, chegaralarini, saylovchilar soni, saylov okruglarining roʻyxatini eʼlon qiladi;

tuman, shahar saylov komissiyalarini, shuningdek xalq deputatlari viloyat, Toshkent shahar Kengashiga saylov oʻtkazish boʻyicha okrug saylov komissiyalarini (bundan buyon matnda okrug saylov komissiyalari deb yuritiladi) tuzadi hamda ularning tarkibi va joylashgan yeri toʻgʻrisidagi maʼlumotlarni eʼlon qiladi;

tuman, shahar, okrug va uchastka saylov komissiyalari hamda referendum oʻtkazuvchi uchastka komissiyalari (bundan buyon matnda quyi saylov komissiyalari deb yuritiladi) faoliyatiga rahbarlik qiladi;

yangi tashkil etilgan tumanning, shaharning xalq deputatlari tuman, shahar Kengashiga saylov oʻtkazish boʻyicha saylov okruglarini tuzadi;

saylov (referendum) uchastkalarini tuzadi, hudud (okrug) boʻyicha ularning tartib raqamini belgilaydi, manzilini koʻrsatgan holda ularning roʻyxatini eʼlon qiladi;

saylov uchastkalarining joylashgan yeri haqida saylovchilarni xabardor qiladi;

uchastka saylov komissiyalarini va referendum oʻtkazuvchi uchastka komissiyalarini tuzadi hamda ularning tarkibi va joylashgan manzili, telefon raqami toʻgʻrisidagi maʼlumotlarni eʼlon qiladi;

quyi saylov komissiyalarining faoliyatini yoʻnaltirib boradi, agar ularning qarorlari Saylov kodeksiga, “Oʻzbekiston Respublikasining referendumi toʻgʻrisida”gi Qonunga zid boʻlsa, ushbu qarorlarni mustaqil ravishda yoki viloyat, tuman, shahar prokurorining taqdimnomasiga binoan bekor qiladi;

xalq deputatlari viloyat, Toshkent shahar Kengashi deputatligiga nomzodlar koʻrsatgan siyosiy partiyalardan tegishli hujjatlarni qabul qilib oladi;

xalq deputatlari viloyat, Toshkent shahar Kengashi deputatligiga koʻrsatilgan nomzodlarni belgilangan tartibda roʻyxatga oladi va ular haqidagi maʼlumotlar rasmiy eʼlon qilinishini tashkil etadi;

roʻyxatga olingan xalq deputatlari viloyat, Toshkent shahar Kengashi deputatligiga nomzodlarga guvohnomalar beradi;

nomzodlar va siyosiy partiyalarga saylov kampaniyasida ishtirok etishi uchun teng sharoitlarni taʼminlaydi;

Qonunchilik palatasi deputatligiga hamda xalq deputatlari viloyat, Toshkent shahar Kengashi deputatligiga nomzodlarning ishonchli vakillarini roʻyxatga oladi va ularga tegishli guvohnomalar beradi;

deputatlikka nomzod etib roʻyxatga olinganlarning tarjimai holi va dasturlarining asosiy yoʻnalishlarini chop etish hamda uchastkalarga yetkazib berishni taʼminlaydi;

saylovlarni va referendumni viloyat, Toshkent shahri miqyosida yorituvchi mahalliy ommaviy axborot vositalari vakillarini akkreditatsiyadan oʻtkazadi va tegishli guvohnoma beradi;

siyosiy partiyalarning, fuqarolarning oʻzini oʻzi boshqarish organlarining va referendumdagi fuqarolar tashabbuskor guruhlarining kuzatuvchilariga Markaziy saylov komissiyasi tomonidan belgilangan namunadagi mandatni beradi;

pul mablagʻlarini tegishli saylov komissiyalari va referendum oʻtkazuvchi uchastka komissiyalari oʻrtasida taqsimlaydi, quyi saylov komissiyalarining binolar, transport va aloqa vositalari bilan taʼminlanishini nazorat qiladi, tegishli hududda saylov va referendumni moddiy-texnik jihatdan taʼminlashga doir boshqa masalalarni koʻrib chiqadi;

xalq deputatlari viloyat, Toshkent shahar Kengashi sayloviga doir saylov byulletenlarining, saylov komissiyalari bayonnomalarining, oʻz muhrining, saylovga oid boshqa hujjatlarning tayyorlanishini taʼminlaydi;

siyosiy partiyalar, boshqa jamoat birlashmalari, mahalliy davlat hokimiyati organlari, fuqarolarning oʻzini oʻzi boshqarish organlari vakillarining hamda korxonalar, muassasalar va tashkilotlar rahbarlarining saylovga yoki referendumga tayyorgarlik koʻrish hamda uni oʻtkazish bilan bogʻliq masalalar yuzasidan axborotini eshitadi;

referendumga qoʻyilgan masalaning mazmunini tushuntirishga qaratilgan tadbirlarni oʻtkazishda ommaviy axborot vositalariga koʻmaklashadi;

ovoz beruvchi fuqarolarning hamda saylovchilarning roʻyxatlari tuzilishi va ularning hamma tanishib chiqishi uchun taqdim etilishini kuzatib boradi;

uchastka saylov komissiyalarini tuman, shahar saylov komissiyalari orqali Oʻzbekiston Respublikasi Prezidenti, Qonunchilik palatasi hamda tegishli viloyat, Toshkent shahar Kengashi deputatlari sayloviga doir saylov byulletenlari bilan taʼminlaydi;

referendum oʻtkazuvchi uchastka komissiyalarini ovoz berish byulletenlari bilan taʼminlaydi;

xalq deputatlari viloyat, Toshkent shahar Kengashiga oʻtkazilgan saylov yakunlarini chiqaradi, saylangan deputatlarni roʻyxatga oladi, saylov yakunlari toʻgʻrisidagi maʼlumotlarni va saylangan deputatlarning roʻyxatlarini ommaviy axborot vositalarida eʼlon qiladi;

deputatlarga viloyat, Toshkent shahar Kengashi deputati guvohnomasini va koʻkrak nishonini beradi;

Qonunchilik palatasi deputatlarining hamda viloyat, Toshkent shahar Kengashi deputatlarining takroriy saylovi, shuningdek boʻshab qolgan oʻrinlarga deputatlar saylovi oʻtkazilishini tashkil etadi;

saylovchilarning (ovoz beruvchi fuqarolarning) va saylov jarayoni (referendum) boshqa ishtirokchilarining murojaatlarini koʻrib chiqadi hamda ular yuzasidan qarorlar qabul qiladi, bundan saylov komissiyalarining yoki referendum oʻtkazuvchi uchastka komissiyalarining harakatlari va qarorlari ustidan berilgan shikoyatlar mustasno;

Saylov kodeksining va “Oʻzbekiston Respublikasining referendumi toʻgʻrisida”gi Qonun talablari buzilganligi toʻgʻrisidagi materiallarni sudga yoki tegishli huquqni muhofaza qiluvchi organlarga topshiradi;

saylovni, referendumni tashkil etish va oʻtkazish bilan bogʻliq hujjatlarning arxivlarga va idoraviy arxivlarga topshirilishini taʼminlaydi;

Oʻzbekiston Respublikasi Prezidenti, Qonunchilik palatasi deputatlari saylovida tegishli hudud (okrug) boʻyicha saylov natijalarini hamda referendumda tegishli hudud boʻyicha ovoz berish yakunlarini aniqlaydi va ularni Markaziy saylov komissiyasiga taqdim etadi;

xalq deputatlari viloyat, Toshkent shahar Kengashiga saylov yakunlari toʻgʻrisida tegishli xalq deputatlari viloyat, Toshkent shahar Kengashiga axborot beradi;

mahalliy Kengashlarga saylov yakunlari toʻgʻrisida Markaziy saylov komissiyasiga hisobot beradi;

tegishli hududda SJBAT hamda SYAERdan foydalanish faoliyati boʻyicha umumiy rahbarlikni va muvofiqlashtirishni amalga oshiradi hamda hududdagi saylov uchastkalari va saylovchilar soni haqidagi maʼlumotlarni SJBATda dolzarblashtirish ishlarini muvofiqlashtirib boradi;

saylov uchastkalari kesimida saylovchilar roʻyxati ilovasiga kiritilgan saylovchilar toʻgʻrisidagi maʼlumotlarni umumlashtiradi hamda mazkur saylovchilarni asosiy roʻyxatga kiritilmaganligi sabablarini oʻrgangan holda Markaziy saylov komissiyasiga axborot kiritadi;

saylangan viloyat, Toshkent shahar Kengashi deputatlarining guvohnomasi va koʻkrak nishoni hisobini yuritadi;

mahalliy Kengashlar deputatlarining monitoringini olib boradi, shuningdek, boʻshab qolgan oʻrinlar boʻyicha maʼlumotlarni shakllantiradi hamda boʻshab qolgan oʻrinlarga saylov oʻtkazish yuzasidan Markaziy saylov komissiyasiga takliflar kiritadi;

tegishli tuman, shahar saylov komissiyasi tomonidan boʻshab qolgan oʻringa tuman, shahar Kengashi deputati saylovini tashkil qilish va oʻtkazish masalalarini muvofiqlashtiradi;

zarur boʻlgan hollarda, yangi saylov uchastkalarini tashkil etish, qayta tuzish va amaldagi saylov uchastkalarining chegaralari oʻzgartirilishi yoki tugatilishi haqidagi tuman va shahar hokimliklarining taqdimnomasini koʻrib chiqadi;

saylov (referendum) uchastkalarining saylov jihozlari bilan taʼminlanganligi boʻyicha monitoringni yuritadi va bu haqida SJBATga tegishli maʼlumotlarni kiritadi;

saylov jihozlarining sifatli va yaroqli holda saqlanishini xatlovdan oʻtkazadi va Markaziy saylov komissiyasiga axborot kiritadi;

saylov uchastkalarining dislokatsiyalari asosida saylov uchastkalariga tegishli hudud chegaralari boʻyicha saylov okruglari va uchastkalarining geolokatsiyali elektron xaritasi tuzilishini taʼminlaydi;

saylov komissiyalari aʼzoligiga nomzodlar zaxirasini shakllantiradi;

uchastka saylov komissiyalari tarkibini shakllantirish uchun nomzod taklif etish huquqiga ega boʻlgan davlat va nodavlat tashkilotlar, muassasalar bilan oʻzaro hamkorlik oʻrnatadi;

saylovlar va referendumlar haqida aholining elektoral madaniyatini oshirish masalalari boʻyicha davlat organlari, nodavlat tashkilotlar va fuqarolik jamiyatining boshqa institutlari bilan oʻzaro hamkorlik qiladi;

Markaziy saylov komissiyasidan yuborilgan yoki bevosita hududiy saylov komissiyasiga kelib tushgan jismoniy va yuridik shaxslarning murojaatlarini (shu jumladan, joyiga chiqqan holda murojaat etuvchilar, mutasaddi tashkilotlar va masʼul shaxslar ishtirokida) qonunchilik talablari asosida koʻrib chiqilishini taʼminlaydi;

saylovga yoki referendumga tayyorgarlik koʻrish va uni oʻtkazish bilan bogʻliq tadbirlarni (oʻquv mashgʻulotlari, seminarlar, konferensiyalar, davra suhbatlari va hokazolarni) tashkil etadi;

Markaziy saylov komissiyasining ish rejalarida belgilangan hududiy saylov komissiyalariga taalluqli bandlarning va hududiy saylov komissiyasining ish rejalarida belgilangan vazifalarni oʻz vaqtida sifatli bajarilishini taʼminlaydi;

saylov qonunchiligi va amaliyotini takomillashtirish yuzasidan Markaziy saylov komissiyasiga takliflar (saylov jarayonlari yuzasidan uslubiy qoʻllanmalar loyihalarini) kiritadi;

har chorak yakuni boʻyicha amalga oshirilgan ishlar haqida Markaziy saylov komissiyasiga hisobot berib boradi.

Qoraqalpogʻiston Respublikasi hududida ushbu Nizomda nazarda tutilgan Oʻzbekiston Respublikasi Prezidenti va Qonunchilik palatasi deputatlari saylovlariga hamda Oʻzbekiston Respublikasining referendumiga tayyorgarlik koʻrish va ularni oʻtkazish bilan bogʻliq hududiy saylov komissiyasining vakolatlarini Qoraqalpogʻiston Respublikasi Markaziy saylov komissiyasi amalga oshiradi.

18. Hududiy saylov komissiyasi saylovga yoki referendumga tayyorgarlik koʻrish va uni oʻtkazish bilan bogʻliq masalalar yuzasidan tegishli hududdagi davlat organlariga hamda jamoat birlashmalarining organlariga, korxonalarga, muassasalarga, tashkilotlarga, mansabdor shaxslarga murojaat qilish huquqiga ega. Ular qoʻyilgan masalani koʻpi bilan uch kunlik muddatda koʻrib chiqishi va hududiy saylov komissiyasiga javob qaytarishi shart.

19. Davlat organlari va jamoat birlashmalarining organlari, korxonalar, muassasalar, tashkilotlar, mansabdor shaxslar hududiy saylov komissiyasiga oʻz vakolatlarini amalga oshirishida koʻmaklashishi, uning ishi uchun zarur maʼlumotlarni taqdim etishi shart.

20. Hududiy saylov komissiyasining raisi:

hududiy saylov komissiyasining faoliyatiga rahbarlikni amalga oshiradi;

hududiy saylov komissiyasining majlislarini chaqiradi, ularda raislik qiladi, komissiya aʼzolari oʻrtasida vazifalarni taqsimlaydi;

hududiy saylov komissiyasining majlislarida ishtirok etish uchun davlat organlarining, siyosiy partiyalarning hamda boshqa jamoat birlashmalarining, tashkilotlarning vakillarini va mansabdor shaxslarini taklif etadi;

davlat organlari va jamoat birlashmalari, shu jumladan siyosiy partiyalar bilan munosabatlarda hududiy saylov komissiyasi nomidan ish yuritadi;

xalq deputatlari viloyat, Toshkent shahar Kengashiga saylov yakunlari toʻgʻrisida tegishli xalq deputatlari viloyat, Toshkent shahar Kengashiga axborot beradi;

hududiy saylov komissiyasining bayonnomalarini, qarorlarini va boshqa hujjatlarini imzolaydi;

hududiy saylov komissiyasi qarorlari ijrosi ustidan nazoratni amalga oshiradi;

fuqarolarni bevosita qabul qiladi va ularning murojaatlarini belgilangan tartibda koʻrib chiqilishini tashkil etadi;

quyi saylov komissiyalari aʼzolari va mahalliy ommaviy axborot vositalari vakillari guvohnomalarini, nomzod koʻrsatgan siyosiy partiyalar va fuqarolarning oʻzini oʻzi boshqarish organlari kuzatuvchilari, referendumdagi fuqarolar tashabbuskor guruhlarining kuzatuvchilari, siyosiy partiyalarning vakolatli vakillari mandatlarini imzolaydi;

saylovga hamda referendumga tayyorgarlik koʻrish va uni oʻtkazish jarayonida huquqbuzarliklar aniqlangan taqdirda, huquqbuzarlikka oid materiallarni toʻplab sudga yoki huquqni muhofaza qiluvchi organlarga taqdim qiladi;

tegishli hudud boʻyicha saylov hamda referendumda ovoz berish jarayoni va yakunlari toʻgʻrisida Markaziy saylov komissiyasiga hisobot beradi;

qonunchilik hujjatlarida, shuningdek hududiy saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

Hududiy saylov komissiyasi raisining oʻz vakolatlarini bajarishi imkoni boʻlmaganda, shuningdek rais boʻlmagan taqdirda, raisning vazifalari rais oʻrinbosari tomonidan amalga oshiriladi.

21. Hududiy saylov komissiyasi raisining oʻrinbosari:

hududiy saylov komissiyasi raisining oʻz vakolatlarini bajarishi imkoni boʻlmaganda, shuningdek rais boʻlmagan taqdirda uning vazifalarini bajaradi;

hududiy saylov komissiyasi aʼzolarining faoliyatini muvofiqlashtirib boradi;

tegishli hududda SYAERdan foydalanish va SJBATni yuritish masalalarini muvofiqlashtiradi;

hududiy va quyi saylov komissiyalari aʼzolarining malakasini oshirish va ularning faoliyatini uslubiy jihatdan taʼminlash ishlarni muvofiqlashtiradi;

ommaviy axborot vositalari vakillari bilan aloqalar oʻrnatadi, ommaviy axborot vositalari, shu jumladan ijtimoiy tarmoqlarda komissiya faoliyatini har tomonlama yoritilishini tashkillashtiradi;

siyosiy partiyalarning kuzatuvchilarini, vakolatli vakillarini, ommaviy axborot vositalari vakillarini, fuqarolarning oʻzini oʻzi boshqarish organlaridan, referendumdagi fuqarolar tashabbuskor guruhlaridan, shuningdek, boshqa davlatlar va xalqaro tashkilotlardan kuzatuvchilarni tegishli saylov komissiyasi tomonidan berilgan hujjatlar asosida roʻyxatga olishni tashkillashtiradi;

jismoniy shaxslarni va yuridik shaxslarni vakillarini qabul qiladi va ularning murojaatlarini belgilangan tartibda koʻrib chiqilishini tashkil etadi;

hududiy saylov komissiyasi aʼzolarini jalb etgan holda komissiya qarorlari ijrosini taʼminlaydi;

tashkiliy, tahliliy ishlarni va hududiy saylov komissiyasi moddiy-texnik taʼminoti (xizmat koʻrsatish) masalalarini nazorat qiladi;

hududiy saylov komissiyasi raisining topshiriqlarini bajaradi;

oʻz vakolatlari doirasida hududiy saylov komissiyasining boshqa aʼzolariga topshiriqlar beradi;

qonunchilik hujjatlarida, shuningdek hududiy saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

Hududiy saylov komissiyasi raisining oʻrinbosari oʻz vakolatlarini bajarishi imkoni boʻlmaganda, shuningdek rais oʻrinbosari boʻlmagan taqdirda, uning vazifalari vaqtinchalik hududiy saylov komissiyasi kotibi tomonidan amalga oshiriladi.

22. Hududiy saylov komissiyasining kotibi:

hududiy saylov komissiyasi raisining oʻrinbosari oʻz vakolatlarini bajarish imkoni boʻlmaganda, shuningdek rais oʻrinbosari boʻlmagan taqdirda uning vazifalarini bajaradi;

hududiy saylov komissiyasi majlislarini tashkillashtiradi, muhokama etiladigan masalalar boʻyicha qaror va boshqa hujjatlar loyihalarini tayyorlaydi;

hududiy saylov komissiyasi aʼzolarini komissiya majlisi oʻtkaziladigan vaqt va joy haqida xabardor qiladi;

hududiy saylov komissiyasi qarorlari va boshqa materiallar komissiya aʼzolari hamda quyi saylov komissiyalariga, shuningdek, zaruratga qarab tegishli hududdagi davlat organlari, siyosiy partiyalar, boshqa jamoat birlashmalari, korxonalar, muassasalar va tashkilotlar hamda mansabdor shaxslarga yetkazilishini taʼminlaydi hamda komissiya majlislari haqidagi xabar va maʼlumotlarni ommaviy axborot vositalarida eʼlon qilinishini tashkillashtiradi;

hududiy saylov komissiyasi majlislarining, boshqa tadbirlarning bayonnomalari yuritilishini tashkil etadi hamda raislik qiluvchi bilan birga ularni imzolaydi;

xalq deputatlari viloyat, Toshkent shahar Kengashi deputatligiga nomzodlar koʻrsatgan siyosiy partiyalardan taqdim etilgan hujjatlarning toʻgʻri rasmiylashtirilganligini koʻrib chiqish ishlarini tashkil etadi;

xalq deputatlari viloyat, Toshkent shahar Kengashi deputatligiga nomzod etib roʻyxatga olingan shaxslarning roʻyxatini va ular haqidagi maʼlumotlarni ommaviy axborot vositalarida eʼlon qilinishini tashkillashtiradi;

hududiy saylov komissiyasi aʼzolari bilan hamkorlikda saylov qonunchiligini va amaliyotini takomillashtirish yuzasidan takliflar tayyorlaydi;

quyi saylov komissiyasi aʼzolarining SYAER va SJBATni yuritish bilan bogʻliq faoliyatini muvofiqlashtirib boradi;

hududiy saylov komissiyasi raisi va rais oʻrinbosari topshiriqlarini bajaradi;

hududiy saylov komissiyasining faoliyatiga taalluqli ish hujjatlarini nomenklatura asosida yuritib boradi;

“E-saylov” axborot tizimida ish yuritilishini taʼminlaydi;

hududiy saylov komissiyasining istiqboldagi va joriy ishlarni rejalashtirishni tashkil qiladi hamda rejalashtirilgan tadbirlarning ijrosini nazorat qiladi;

hududiy saylov komissiyasi qarorlari bajarilishi toʻgʻrisida komissiya raisiga doimiy maʼlumot kiritib boradi;

hududiy saylov komissiyasi muhrini, rasmiy blankasini saqlaydi;

boʻshab qolgan oʻrinlarga xalq deputatlari viloyat, Toshkent shahar Kengashi deputatlari sayloviga tayyorgarlik koʻrish va ularni oʻtkazish boʻyicha tashkiliy ishlarni amalga oshiradi;

quyi saylov komissiyalari aʼzolari tarkibining elektron bazasini muvofiqlashtirib boradi;

qonunchilik hujjatlarida, shuningdek hududiy saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

Hududiy saylov komissiyasi kotibi oʻz vakolatlarini bajarishi imkoni boʻlmaganda, shuningdek kotib boʻlmagan taqdirda, uning vazifalari vaqtinchalik hududiy saylov komissiyasi raisining oʻrinbosari tomonidan amalga oshiriladi.

23. Hududiy saylov komissiyasi aʼzosining majburiyatlari:

komissiya muhokamasiga kiritilgan masalalarni tayyorlashda ishtirok etadi;

komissiyaning barcha majlislarida, shu jumladan videokonferensaloqa orqali shaxsan ishtirok etadi, boshqa tadbirlarida qatnashadi;

oʻzi biriktirilgan hududda (okrugda) saylovga tayyorgarlik koʻrish va uni oʻtkazish boʻyicha tadbirlarni oʻz vaqtida sifatli bajarilishini muvofiqlashtiradi;

uzrli sabablar bilan (kasalligi, mehnat taʼtilida boʻlishi va boshqalar) komissiya majlisida ishtirok eta olmasligi haqida hududiy saylov komissiyasi raisini yoki komissiya kotibini xabardor qiladi;

hududiy saylov komissiyasi raisining va rais oʻrinbosarining oʻz vakolatlari doirasida bergan topshiriqlarini bajaradi hamda ularning bajarilganligi toʻgʻrisida belgilangan muddatlarda axborot beradi;

koʻrib chiqish oʻziga yuklatilgan jismoniy va yuridik shaxslarning murojaatlarini belgilangan tartibda koʻrib chiqilishini taʼminlaydi;

hududiy saylov komissiyasi raisi tomonidan ovoz berish kunidagi belgilangan vazifalarning oʻz vaqtida va sifatli bajarilishini taʼminlaydi;

saylovga hamda referendumga tayyorgarlik koʻrish va uni oʻtkazish jarayonida huquqbuzarliklar aniqlangan taqdirda, ular toʻgʻrisida darhol rais yoki rais oʻrinbosarini xabardor qiladi;

qonunchilik hujjatlarida, shuningdek hududiy saylov komissiyasi aʼzolari oʻrtasidagi vazifalar taqsimotida nazarda tutilgan oʻz zimmasidagi boshqa vazifalarni ham amalga oshiradi.

24. Hududiy saylov komissiyasi aʼzosi quyidagi huquqlarga ega:

hududiy saylov komissiyasi majlisining kun tartibi, muhokama qilinayotgan masalalarni koʻrib chiqish tartibi hamda bu masalalarning mohiyati yuzasidan takliflar kiritish va mulohazalar bildirish;

hududiy saylov komissiyasi majlisida muhokamada qatnashish, majlisda soʻzga chiqish, takliflar kiritish, oʻz takliflarini ovozga qoʻyish masalasini koʻtarish;

majlis ishtirokchilariga hududiy saylov komissiyasining majlisida qabul qilingan qarori yuzasidan alohida fikr bildirish;

hududiy saylov komissiyasi faoliyatiga doir materiallar va hujjatlar bilan tanishib chiqish.

25. Hududiy saylov komissiyasining barcha aʼzolari odob-axloq qoidalariga qatʼiy rioya etadi, korrupsiyaga nisbatan murosasiz munosabatda boʻladi va korrupsiyaga olib kelishi mumkin boʻlgan harakatlarning (harakatsizlikning) oldini oladi, manfaatlar toʻqnashuvi yuzaga kelganda, shuningdek yaqin qarindoshlari tegishli hududda nomzod etib roʻyxatga olingan taqdirda, Markaziy saylov komissiyasini darhol xabardor qiladi.

26. Hududiy saylov komissiyasi oʻz faoliyatini mustaqillik, qonuniylik, kollegiallik, oshkoralik va adolatlilik prinsiplari asosida amalga oshiradi.

27. Hududiy saylov komissiyasi ishining tashkiliy shakli uning zaruratga qarab oʻtkaziladigan majlisi hisoblanadi. Hududiy saylov komissiyasining majlislari u joylashgan binoda, sayyor tarzda yoki videokonferensaloqa shaklida oʻtkaziladi.

28. Hududiy saylov komissiyasining majlisi raisning tashabbusiga koʻra yoki komissiya aʼzolari umumiy tarkibining kamida uchdan bir qismi talabiga binoan chaqirilishi mumkin.

Hududiy saylov komissiyasining majlisi, agar unda majlis oʻtkazilayotgan kundagi komissiya aʼzolari umumiy sonining kamida uchdan ikki qismi ishtirok etayotgan boʻlsa, vakolatli hisoblanadi.

Hududiy saylov komissiyasining aʼzosi agar majlisda videokonferensaloqadan foydalangan holda ishtirok etayotgan boʻlsa, majlisda hozir boʻlgan hisoblanadi.

29. Hududiy saylov komissiyasining qarori ochiq ovoz berish yoʻli orqali komissiya aʼzolari umumiy sonining koʻpchilik ovozi bilan qabul qilinadi. Ovozlar teng boʻlib qolgan taqdirda, raislik qiluvchining ovozi hal qiluvchi hisoblanadi.

30. Hududiy saylov komissiyasi majlislarida masalalar ochiq va oshkora muhokama etiladi.

Hududiy saylov komissiyasi majlisida bayonnoma yuritiladi.

Bayonnomada majlisning kun tartibi, unda qatnashgan hududiy saylov komissiyasi aʼzolari va boshqa taklif etilgan shaxslar haqidagi maʼlumotlar, muhokamaga kiritilgan masalaning qisqacha mazmuni, soʻzga chiqqan va fikr bildirganlar toʻgʻrisida maʼlumotlar, koʻrib chiqilgan har bir masala yuzasidan ovoz berish natijalari, qabul qilingan qarorlar koʻrsatiladi.

Bayonnoma raislik qiluvchi va kotib tomonidan imzolanadi hamda unga qabul qilingan qaror, taalluqli hujjatlar, shuningdek, hududiy saylov komissiyasi aʼzolarining muayyan masala yuzasidan yozma shakldagi alohida fikrlari (agar boʻlsa) ilova qilinadi.

Hudud (okrug) boʻyicha saylov (ovoz berish) natijalari toʻgʻrisidagi bayonnoma hududiy saylov komissiyasining majlisida ishtirok etgan barcha aʼzolari tomonidan imzolanadi.

31. Hududiy saylov komissiyasining qarorlari elektron shaklda “E-saylov” axborot tizimi orqali qabul qilinishi mumkin. Bunda majlisda qabul qilingan qarorning matni “E-saylov” axborot tizimiga hududiy saylov komissiyasi kotibi tomonidan yuklanadi va komissiya raisiga (majlisda raislik qiluvchi) imzolash uchun taqdim etiladi. Bunda hududiy saylov komissiyasi majlisida maʼqullangan tuzatishlar (oʻzgartirish, qoʻshimchalar) qaror matniga kiritiladi.

32. Qarorlar hududiy saylov komissiyasi raisi (majlisda raislik qiluvchi) tomonidan imzolanadi.

“E-saylov” axborot tizimi orqali qabul qilinadigan qarorlar hududiy saylov komissiyasi raisi (majlisda raislik qiluvchi) tomonidan elektron raqamli imzo bilan tasdiqlanadi.

33. Hududiy saylov komissiyasining oʻz vakolatlari doirasida qabul qilgan qarori quyi saylov komissiyalari, shuningdek barcha davlat organlari, siyosiy partiyalar va boshqa jamoat birlashmalari, mehnat jamoalari va harbiy qismlar, korxonalarning, muassasalarning va tashkilotlarning rahbarlari ijro etishi uchun majburiydir.

34. Hududiy saylov komissiyasi majlislarida Markaziy saylov komissiyasi aʼzolari va Kotibiyat xodimlari, roʻyxatga olingan nomzodlar, ularning ishonchli vakillari, siyosiy partiyalarning kuzatuvchilari, vakolatli vakillari, ommaviy axborot vositalarining vakillari, fuqarolarning oʻzini oʻzi boshqarish organlaridan, referendumda fuqarolar tashabbuskor guruhlaridan, boshqa davlatlardan, xalqaro tashkilotlardan kuzatuvchilar ishtirok etishi mumkin.

Majlislarga mahalliy davlat hokimiyati organlari, jamoat birlashmalari vakillari va boshqalar taklif etilishi mumkin.

35. Hududiy saylov komissiyasi Markaziy saylov komissiyasi tomonidan tuzilganidan soʻng quyidagi tadbirlarni amalga oshiradi:

hududiy saylov komissiyasining birinchi tashkiliy majlisini oʻtkazadi;

hududiy saylov komissiyasi joylashgan binoni belgilangan tartibda jihozlashga zarur boʻlgan tashkiliy ishlarni amalga oshiradi.

Hududiy saylov komissiyasi birinchi tashkiliy majlisida quyidagi masalalarni koʻrib chiqadi:

hududiy saylov komissiyasining saylovga tayyorgarlik koʻrish va uni oʻtkazishga doir ish rejasini tasdiqlash;

hududiy saylov komissiyasi aʼzolari oʻrtasida vazifalarni taqsimlash;

hududiy saylov komissiyasi aʼzolari tomonidan fuqarolarning qabulini tashkil etish;

hududiy saylov komissiyasi aʼzolarining navbatchiligini tashkil qilish.

36. Hududiy saylov komissiyasi 2-ilovaga muvofiq tasdiqlangan muhrga ega boʻladi.

37. Hududiy saylov komissiyasi komissiyaga ajratilgan Davlat budjeti mablagʻlari yoki qonunda taʼqiqlanmagan boshqa mablagʻlar hisobidan shartnoma asosida yoki jamoatchilik asosida hududiy saylov komissiyasi faoliyatiga koʻmaklashish uchun mutaxassislarni jalb qilishi mumkin.

Saylovga yoki referendumga tayyorgarlik koʻrish va uni oʻtkazish davrida hududiy saylov komissiyasining kotibiyati tashkil etilishi mumkin.

Hududiy saylov komissiyasi kotibiyatiga jalb etilgan mutaxassislar ishlab chiqarish yoki xizmat vazifalarini bajarishdan oʻrtacha oylik ish haqi saqlangan holda ozod qilinadi.

38. Hududiy saylov komissiyasi raisi yoki rais oʻrinbosari hududiy saylov komissiyasiga tashrif buyurgan siyosiy partiyalarning kuzatuvchilari, vakolatli vakillari, nomzodlar va ularning ishonchli vakillari, ommaviy axborot vositalari vakillari, fuqarolarning oʻzini oʻzi boshqarish organlaridan, referendumda fuqarolar tashabbuskor guruhlaridan, shuningdek, boshqa davlatlar va xalqaro tashkilotlardan kuzatuvchilarni tegishli hujjatlar asosida roʻyxatga oladi va qabul qiladi.

39. Hududiy saylov komissiyasining raisi, rais oʻrinbosari yoki kotibi ovoz berish kunida tegishli hududda ovoz berish jarayonining borishi haqida har soatda, muddatidan oldin ovoz berish kunlarida esa, har kunlik ovoz berish natijasi haqida Markaziy saylov komissiyasiga xabar berib boradi.

40. Saylovga va referendumga oid axborot tizimlaridan foydalanishni tashkillashtirish maqsadida hududiy saylov komissiyasi aʼzolaridan birining (qoida tariqasida raqamli texnologiyalar sohasida maʼlum koʻnikmaga ega boʻlgan) zimmasiga quyidagi vazifalar yuklatiladi:

komissiya aʼzolarining axborot tizimlaridan samarali foydalanishini tashkil etish;

quyi saylov komissiyasi aʼzolariga SJBATga kirish uchun tegishli maʼlumotlarni berish;

axborot tizimlaridan foydalanishda axborot xavfsizligini taʼminlash borasida nazorat olib borish;

quyi saylov komissiyalari tomonidan SJBATda amalga oshiriladigan ishlarni muvofiqlashtirib borish.

41. Hududiy saylov komissiyasida yuritiladigan ish hujjatlari:

hududiy saylov komissiyasining qarorlari, bayonnomalari, dalolatnomalar daftari va yigʻmajildi;

Markaziy saylov komissiyasining qarorlari, farmoyishlari yigʻmajildi;

Qonunchilik palatasi deputatlari sayloviga oid hujjatlar yigʻmajildi;

xalq deputatlari viloyat, Toshkent shahar Kengashi deputatlari sayloviga oid hujjatlar yigʻmajildi;

tuman, shahar saylov komissiyalari haqidagi maʼlumotlarga oid hujjatlar yigʻmajildi;

saylov uchastkalari va uchastka saylov komissiyalariga oid hujjatlar yigʻmajildi;

referendum oʻtkazilishiga oid hujjatlar yigʻmajildi;

kirish, chiqish hujjatlarini roʻyxatga olish daftari va yigʻmajildi;

moliyaviy hujjatlar va saylov jihozlari hisobiga oid hujjatlar yigʻmajildi;

SYAER va SJBATga oid hujjatlar yigʻmajildi;

jismoniy va yuridik shaxslarning murojaatlarini roʻyxatga olish daftari va yigʻmajildi;

kuzatuvchilarni roʻyxatga olish daftari.

42. Markaziy saylov komissiyasining koʻrsatmasiga asosan hududiy saylov komissiyasida yuritiladigan ish hujjatlari elektron shaklda amalga oshirilishi mumkin.

43. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hududiy saylov komissiyasini oʻz faoliyatini doimiy olib borishi uchun Markaziy saylov komissiyasi tomonidan belgilangan talablar asosida qoida tariqasida tegishli hudud markazidan, aholi qatnovi uchun qulay boʻlgan joydan alohida bino bilan taʼminlaydi.

44. Saylovni hamda referendumni oʻtkazish davrida hududiy saylov komissiyasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan kamida sakkizta xonadan iborat bino bilan, shuningdek, transport, aloqa vositalari va qoʻshimcha internet tarmogʻiga ulanish imkoniyati bilan taʼminlanadi. Bunda, tegishli hududda tuzilgan Qonunchilik palatasi deputatlari saylovini oʻtkazish boʻyicha bir mandatli saylov okruglari sonidan kelib chiqqan holda, har bir saylov okrugi boʻyicha biriktirilgan komissiya aʼzosi ish yuritishi uchun yetarli sharoit yaratilishi kerak.

45. Saylovga yoki referendumga tayyorgarlik koʻrish va uni oʻtkazish davrida tegishli hududda joylashgan davlat organlari, korxonalar, muassasalar, tashkilotlar hududiy saylov komissiyasi ixtiyoriga saylovga yoki referendumga tayyorgarlik koʻrish va uni oʻtkazish uchun zarur boʻlgan binolar, majlis zallari, xonalar hamda jihozlarni bepul berib turishi shart.

46. Hududiy saylov komissiyasi binosiga kirish joyida nogironligi boʻlgan shaxslar aravachasiga moslashtirilgan nishab yoʻlaklari (panduslar) SHNQ 2.07.02-22 “Qurilish obyektlarini nogironligi boʻlgan shaxslar hamda keksalar ehtiyojini inobatga olgan holda loyihalashtirish” shaharsozlik normalari va qoidalariga mos boʻlishi lozim.

47. Hududiy saylov komissiyasi kompyuterlarini internet tarmogʻiga ulash Oʻzbekiston Respublikasi Raqamli texnologiyalar vazirligining hududiy boshqarmalari koʻmagida amalga oshiriladi.

48. Saylovni hamda referendumni oʻtkazish davrida hududiy saylov komissiyasi joylashgan bino tegishli tarzda jihozlanishi va quyidagilarga ega boʻlishi kerak:

Oʻzbekiston Respublikasining Davlat bayrogʻi (binoning ustida va ichida);

Oʻzbekiston Respublikasining Davlat gerbi (binoning ichida);

hududiy saylov komissiyasining toʻliq nomi koʻrsatilgan peshlavha;

qulflanadigan seyf yoki metall shkaf;

zarur mebellar, konditsioner, orgtexnika vositalari (kompyuter, noutbuk, printer, skaner, nusxa koʻchiruvchi uskuna, UPS), telefon, televizor;

SJBAT va “E-saylov” axborot tizimi talablariga javob beruvchi toʻrttadan kam boʻlmagan kompyuter va ularga kerakli boʻlgan qurilmalar (printer, skaner, UPS va boshqalar) hamda uzluksiz (simsiz) internet aloqasi va h.k.;

videokonferensaloqa uchun videomonitor, mikrofon va akustik qurilmalar;

muqobil elektr-energiyasi ishlab chiqaradigan generator qurilmasi;

yongʻinga qarshi vositalar.

Hududiy saylov komissiyasi joylashgan bino va unga olib boruvchi yoʻlaklar ozoda va taʼmirlangan, yoritish moslamalari oʻrnatilgan boʻlishi kerak.

49. Saylovni hamda referendumni oʻtkazish davrida hududiy saylov komissiyasi binosida quyidagilar joylashtiriladi:

saylov, referendum sanasiga bagʻishlangan plakatlar;

hududiy saylov komissiyasining tarkibi, manzili va telefon raqamlari;

Markaziy saylov komissiyasi, tegishli viloyat yoki Toshkent shahar sudi, prokuraturasi va ichki ishlar boshqarmasining ishonch telefonlari raqamlari.

50. Hududiy saylov komissiyasi aʼzolarining xonasida quyidagilar boʻlishi lozim:

Oʻzbekiston Respublikasi Konstitutsiyasi, Saylov kodeksi, “Oʻzbekiston Respublikasining referendumi toʻgʻrisida”gi Qonuni, saylovga va referendumga oid qonunchilik hujjatlari;

hududiy saylov komissiyasi aʼzolarining tarkibi haqida maʼlumot;

ish rejasi va navbatchilik jadvali.

51. Stendlarda joylashtiriladigan materiallarda saylovoldi tashviqotiga oid nishon va alomatlar boʻlmasligi kerak.

52. Hududiy saylov komissiyasining faoliyatini moliyalashtirish Markaziy saylov komissiyasiga ajratilgan Oʻzbekiston Respublikasi Davlat budjeti mablagʻlari hisobidan markazlashgan tartibda amalga oshiriladi.

53. Oʻzbekiston Respublikasi Prezidenti sayloviga, referendumiga, Qonunchilik palatasi, xalq deputatlari viloyatlar va Toshkent shahar Kengashlari deputatlarining saylovlariga, shu jumladan boʻshab qolgan deputatlik oʻrinlari uchun saylovlarga tayyorgarlik koʻrish va ularni oʻtkazish bilan bogʻliq xarajatlar Oʻzbekiston Respublikasi Davlat budjeti mablagʻlari hisobidan amalga oshiriladi.

54. Xalq deputatlari viloyatlar va Toshkent shahar Kengashlari deputatlarining boʻshab qolgan deputatlik oʻrinlari uchun saylovlarga tayyorgarlik koʻrish va ularni oʻtkazish bilan bogʻliq xarajatlar har yili qabul qilinadigan mahalliy budjetlarning xarajatlari qismida nazarda tutiladi.

55. Chet davlatlarning, ular jismoniy va yuridik shaxslarining hamda xalqaro tashkilotlarning mablagʻlari hisobidan saylovni moliyalashtirish taqiqlanadi.

56. Saylovlarga, shuningdek referendumga tayyorgarlik koʻrish va uni oʻtkazishni moliyalashtirish hamda mablagʻlardan foydalanish tartibi Markaziy saylov komissiyasining qaroriga asosan amalga oshiriladi.

57. Jismoniy va yuridik shaxslarning hududiy saylov komissiyasiga kelib tushgan murojaatlari Saylov kodeksi, “Oʻzbekiston Respublikasining referendumi toʻgʻrisida”gi, “Jismoniy va yuridik shaxslarning murojaatlari toʻgʻrisida”gi qonunlar hamda boshqa qonunchilik hujjatlarida belgilangan tartibda koʻrib chiqiladi.

58. Kelib tushgan murojaatlar hududiy saylov komissiyasi raisi tomonidan komissiya aʼzolari oʻrtasida koʻrib chiqish uchun taqsimlanadi.

Murojaatga javob xati hududiy saylov komissiyasining raisi yoki rais oʻrinbosari tomonidan imzolanadi.

59. Murojaatda bayon etilgan masalalarni hal qilish hududiy saylov komissiyasi vakolatiga kirmasa, qonunchilikda belgilangan tartibda tegishli organlarga yuboriladi.

60. Hududiy saylov komissiyasi saylov kampaniyasini hamda referendumni oʻtkazish davrida jismoniy va yuridik shaxslarning Saylov kodeksi hamda referendum qonunchiligi talablari buzilganligi yoki saylovni (referendumni) tashkil etishning boshqa masalalari xususida oʻziga kelib tushgan murojaatlarini oʻz vakolatlari doirasida koʻrib chiqadi.

Ushbu murojaatlar boʻyicha tekshiruvlar oʻtkazilishi va uch kunlik muddatda ularga yozma javoblar berilishi, saylovga (referendumga) olti kundan kam vaqt qolganida yoki ovoz berish kuni kelib tushgan murojaatlar esa darhol koʻrib chiqilib, javob qaytarilishi shart. Bundan saylov komissiyalarining yoki referendum oʻtkazuvchi uchastka komissiyalarining harakatlari va qarorlari ustidan berilgan shikoyatlar mustasno.

Zarur hollarda hududiy saylov komissiyasi murojaatlarni koʻrib chiqish uchun tegishli mutaxassislarni jalb qilgan holda ishchi guruh tuzishi mumkin.

61. Hududiy saylov komissiyasi vakolatiga doir murojaatlar hududiy saylov komissiyasi raisining koʻrsatmasiga asosan koʻrib chiqish uchun komissiya majlisi kun tartibiga kiritiladi.

Kun tartibiga kiritilgan murojaatlar hududiy saylov komissiyasi majlisida koʻrib chiqiladi va tegishli qaror qabul qilinadi.

62. Murojaatni koʻrib chiqqan hududiy saylov komissiyasi aʼzolari uni koʻrib chiqish natijalari yoki qabul qilingan qaror toʻgʻrisida murojaat yuborgan shaxsni xabardor qilishi shart.

63. Nomzodlar koʻrsatgan siyosiy partiya organlari, nomzodlar, ishonchli vakillar, kuzatuvchilar va saylovchilar hududiy saylov komissiyasining qarorlari ustidan ushbu qarorlar qabul qilinganidan keyin besh kun ichida sudga shikoyat qilishi mumkin.

64. Saylov yoki referendum toʻgʻrisidagi qonunchilik hujjatlarini buzganlikda aybdor shaxslar belgilangan tartibda javobgar boʻladi.

65. Saylov yoki referendumga tayyorgarlik koʻrish va uni oʻtkazish jarayonidagi huquqbuzarliklar boʻyicha ish yuritish qonunchilikda belgilangan tartibda amalga oshiriladi.

66. Saylovga hamda referendumga tayyorgarlik koʻrish va uni oʻtkazish bilan bogʻliq hujjatlar Markaziy saylov komissiyasi tomonidan tasdiqlanadigan tegishli hujjatga muvofiq saqlash uchun tayyorlanadi, topshiriladi hamda (yoki) yoʻq qilinadi.

67. Hududiy saylov komissiyasi quyi saylov komissiyalari oʻz faoliyatini tugatganidan soʻng ularning muhrlari belgilangan tartibda qabul qilinishini va saqlanishini taʼminlaydi.

Hududiy saylov komissiyasining gerbli rezina muhri diametri 35 mm aylana shaklda boʻlib, markazdan 18,5 mm uzoqlikda asosiy aylana va undan 1 mm masofada yana bir aylana oʻtkazilgan. Ikkinchi aylana tagida aylana boʻyicha “TOSNKENT SNANAR NUDUDIY SAYLOV KOMISSIYASI”* yozuvi bor. Ushbu matnning tagidan yana bir ichki aylana oʻtkazilgan boʻlib, aylananing ichida Oʻzbekiston Respublikasining Davlat gerbi tasvirlangan.