“Oʻzbekiston — 2030” strategiyasida koʻzda tutilgan ustuvor vazifalarni izchil amalga oshirish, shu jumladan milliy iqtisodiyotning mavjud salohiyatini roʻyobga chiqarish, uning global ishlab chiqarish va qoʻshilgan qiymat zanjiriga integratsiyasini yanada chuqurlashtirish, erkin bozor tamoyillarini amalda tatbiq etishni kengaytirish hamda Oʻzbekistonning Jahon savdo tashkilotiga aʼzoligiga erishishni jadallashtirish maqsadida:

1. Qonunchilik bilan taqdim etilgan quyidagi maxsus (eksklyuziv) huquqlar bekor qilinsin:

a) 2025-yil 1-yanvardan boshlab:

“Oʻzmetkombinat” AJning respublika hududida qora metall lomi va chiqindilarini tayyorlash (xarid qilish) huquqi;

“Oʻzikkilamchiranglimetall” AJning respublika hududida rangli metall lomi va chiqindilarini tayyorlash va eksport qilish huquqi;

“Oʻztreyd” AJning konsignatsiya shartlarida oziq-ovqat uni va bugʻdoyni, shuningdek, kichik biznes va xususiy tadbirkorlik subyektlari, dehqon va fermer xoʻjaliklari mahsulotlarini bank kafolatlari yoki siyosiy va tijorat xavflaridan eksport shartnomalarini sugʻurtalash polislarini taqdim etmasdan eksport qilinadigan mahsulotlarni savdo uylari manzillariga tushirish huquqi;

“Oʻzkimyoimpeks” MCHJning “Oʻzkimyosanoat” AJ tashkilotlari kimyoviy mahsulotlari eksporti hamda ularning ishlab chiqarish ehtiyojlari uchun uskunalar, ehtiyot qismlar, butlovchi buyumlar, xomashyo va materiallar importini amalga oshirishdagi yagona agent huquqi;

b) 2026-yil 1-iyuldan boshlab:

“UzGasTrade” AJning tabiiy gazni yagona eksport qiluvchi va import orqali tashqi manbalardan markazlashgan tartibda xarid qilish boʻyicha yagona operator sifatidagi huquqi;

“Oʻzenergosotish” AJning elektr energiyasining eksporti va importini markazlashgan tartibda amalga oshirish huquqi.

2. Belgilansinki, 2025-yil 1-yanvardan boshlab:

qora va rangli metall lomi va chiqindilarini tayyorlash (xarid qilish), qayta ishlash va realizatsiya qilish, shuningdek, tabiiy gaz va elektr energiyasining ulgurji va chakana savdo faoliyatlarini litsenziyalash tartibi joriy etiladi;

mobil va (yoki) simli telekommunikatsiya tarmoqlariga ega Oʻzbekiston Respublikasi hududida faoliyat yuritadigan telekommunikatsiya operatorlariga tezkor-qidiruv faoliyati, axborot va kiberxavfsizlik tizimlari talablariga toʻliq rioya qilgan holda sinov tariqasida xalqaro internet tarmoqlariga oʻz tijorat ehtiyojlari uchun toʻgʻridan-toʻgʻri ulanish huquqi beriladi.

Togʻ-kon sanoati va geologiya vazirligi hamda Energetika vazirligi Iqtisodiyot va moliya vazirligi va boshqa manfaatdor idoralar bilan birgalikda 2024-yil 1-sentabrga qadar qora va rangli metall lomi va chiqindilarini tayyorlash (xarid qilish), qayta ishlash va realizatsiya qilish, shuningdek, tabiiy gaz va elektr energiyasining ulgurji va chakana savdosi tartibini nazarda tutuvchi normativ-huquqiy hujjatlar loyihalarini Vazirlar Mahkamasiga kiritsin.

Raqamli texnologiyalar vazirligi 2024-yil 1-oktabrga qadar axborot va milliy xavfsizlikning toʻliq taʼminlanishini nazarda tutgan holda telekommunikatsiya operatorlarining sinov tariqasida xalqaro Internet tarmoqlariga oʻz tijorat ehtiyojlari uchun toʻgʻridan-toʻgʻri ulanishi va bosqichma-bosqich boshqa operatorlarga xalqaro internet kanallarini tashkil etish boʻyicha xizmatlarni koʻrsatish tartibini tasdiqlash uchun Vazirlar Mahkamasiga kiritsin.

3. 2026-yil 1-yanvardan boshlab birja savdolarida sotib olingan mis katodi va mis katankasini eksport qilishga cheklovlar bekor qilinsin. Bunda mis katodi va mis katankasi eksporti quyidagi shartlar asosida amalga oshirilishi belgilansin:

eksportga yoʻnaltirish maqsadida birja savdolarida xarid qilingan mis katodi va mis katankasi xarid narxiga belgilangan chegirma hamda xoʻjalik yurituvchi subyektlarga nisbatan toʻlovni kechiktirib toʻlash imtiyozi qoʻllanmaydi;

mis katodi va mis katankasini “eksport” bojxona rejimiga joylashtirish uchun uning eksportga yoʻnaltirilgan hajmiga nisbatan birja savdolari xarid narxiga qoʻllangan chegirma summasi qaytarilganligi hamda toʻlovning kechiktirilgan qismi toʻliq toʻlanganligi toʻgʻrisida Oʻzbekiston respublika tovar-xom ashyo birjasi” AJ va (yoki) “Toshkent tovar xomashyo birjasi” AJ maʼlumotnomalari taqdim etilishi shart.

4. Transport vazirligi hamda “Oʻzbekiston temir yoʻllari” AJ Iqtisodiyot va moliya vazirligi bilan birgalikda 2024-yil 1-sentabrga qadar quyidagilarni nazarda tutuvchi qaror loyihasini Vazirlar Mahkamasiga kiritsin:

2024-yil 1-oktabrdan boshlab bosqichma-bosqich 2025-yil 1-aprelgacha respublika hududida temir yoʻl transportida yuk tashishda taqdim etilayotgan chegirmalar berish amaliyotini bekor qilish;

temir yoʻl orqali yuklarni tashishda eksport va import tashish xizmatlari uchun tariflarni 2030-yilgacha bosqichma-bosqich birxillashtirish.

5. 2026-yil 1-iyuldan boshlab Oʻzbekiston Respublikasining “Davlat xaridlari toʻgʻrisida”gi Qonuni bilan tartibga solinadigan korporativ buyurtmachilar tomonidan amalga oshiriladigan xaridlarda mahalliy ishlab chiqaruvchilarga taqdim etilgan imtiyozlar va preferensiyalar, shu jumladan, mahalliy ishlab chiqarilgan tovarlarga nisbatan import tovarlarining DDP (Oʻzbekiston) narxidan 15 foizdan koʻp boʻlmagan miqdordagi preferensiya hamda mahalliy ishlab chiqarilgan elektrotexnika va elektromaishiy mahsulotlarga nisbatan 20 foizgacha narx preferensiyasi bekor qilinsin.

Iqtisodiyot va moliya vazirligi manfaatdor vazirlik va idoralar bilan birgalikda 2024-yil 1-noyabrga qadar ushbu banddan kelib chiqib, tegishli qonun loyihasini Vazirlar Mahkamasiga kiritsin.

6. Belgilansinki, davlat xaridlarini amalga oshirishda sogʻlom raqobat muhitini taʼminlash maqsadida 2025-yil 1-yanvardan boshlab:

budjet buyurtmachilari tomonidan, shu jumladan, budjetdan tashqari mablagʻlar hisobidan tuziladigan shartnomalar boʻyicha toʻlovlar tegishli tartibda gʻaznachilik xizmati boʻlinmalarida roʻyxatdan oʻtkazilgandan (hisobga olingandan) soʻng amalga oshiriladi;

davlat buyurtmachilari boʻlgan davlat boshqaruvi organlari va xoʻjalik birlashmalari rahbarlari zimmasiga davlat xaridlarini amalga oshirishda sohaga oid qonunchilik hujjatlariga qatʼiy rioya etilishi, shuningdek, davlat xaridlarining ochiqligi va shaffofligini taʼminlash uchun shaxsiy javobgarlik yuklanadi;

belgilangan tartibda tasdiqlangan loyiha hujjatlari (ishchi loyiha, ish hujjatlari, loyiha-smeta hujjatlari) mavjud boʻlmaganda yoki loyiha hujjatlarini tayyorlash qurilish-montaj ishlari bilan parallel ravishda olib borilganda, konsolidatsiyalashgan budjet mablagʻlari va boshqa markazlashgan manbalar, shuningdek, davlat banklari va davlat ishtirokidagi korxonalar hisobidan xarajatlarni amalga oshirish va ishlarni bajarish taqiqlanadi.

7. Investitsiyalar, sanoat va savdo vazirligi Iqtisodiyot va moliya vazirligi hamda boshqa manfaatdor idoralar bilan birgalikda etil spirti importi operatsiyalarini Jahon savdo tashkiloti bitimlari qoidalari asosida tartibga solish yuzasidan 2024-yil 1-sentabrga qadar Vazirlar Mahkamasiga takliflarni kiritsin.

8. Milliy qonunchilikni Jahon savdo tashkilotining Subsidiyalar va kompensatsiya choralari toʻgʻrisidagi bitimiga (ASCM) muvofiqlashtirish maqsadida 2024-yil 1-oktabrga qadar:

Investitsiyalar, sanoat va savdo vazirligi Iqtisodiyot va moliya vazirligi hamda boshqa manfaatdor idoralar bilan birgalikda eksportni qoʻllab-quvvatlash maqsadida taqdim etilayotgan subsidiya va preferensiyalarni, shu jumladan, tovarlarni (xizmatlarni) eksportga realizatsiya qilishdan olingan daromadlar boʻyicha foyda soligʻi, aylanmadan olinadigan soliq, transport xarajatlarini qisman qoplab berishga oid imtiyozlarni 2025-yil 1-yanvardan bekor qilishni, shuningdek JST qoidalari bilan taqiqlanmagan qoʻllab-quvvatlash choralarini;

Iqtisodiyot va moliya vazirligi Investitsiyalar, sanoat va savdo vazirligi, Adliya vazirligi hamda Soliq qoʻmitasi bilan birgalikda samarasi past boʻlgan soliq va bojxona imtiyozlarini 2025-yil 1-yanvardan bekor qilishni nazarda tutuvchi tegishli normativ-huquqiy hujjat loyihasini Vazirlar Mahkamasiga kiritsin.

9. Iqtisodiyot va moliya vazirligi Investitsiyalar, sanoat va savdo vazirligi bilan birgalikda Oʻzbekiston Respublikasi hududiga import qilinadigan va ishlab chiqariladigan aksiz soligʻi toʻlanadigan tovarlar uchun aksiz soligʻi stavkalarini quyidagi eng oxirgi muddatlargacha bosqichma-bosqich birxillashtirsin:

2026-yil 1-yanvar — tamaki mahsulotlari uchun;

2027-yil 1-yanvar — alkogol mahsulotlari va shakar uchun.

10. Milliy qonunchilikni Jahon savdo tashkilotining Savdo bilan bogʻliq investitsiya choralari toʻgʻrisidagi bitimiga (TRIMs), shu jumladan, mahalliylashtirish yoki eksport qilish boʻyicha majburiyatlarni qoʻllamaslik talablariga muvofiqlashtirish maqsadida 2024-yil 1-avgustga qadar:

Energetika vazirligi Togʻ-kon sanoati va geologiya vazirligi, Iqtisodiyot va moliya vazirligi hamda Adliya vazirligi bilan birgalikda Oʻzbekiston Respublikasi tomonidan imzolangan barcha mahsulot taqsimotiga oid bitimlarning toʻliq xatlovini;

Investitsiyalar, sanoat va savdo vazirligi Adliya vazirligi, Energetika vazirligi, “Oʻzbekneftgaz” AJ hamda “Oʻzavtosanoat” AJ bilan birgalikda Oʻzbekiston Respublikasi Hukumati tomonidan imzolangan barcha investitsiya bitimlari xatlovini yakuniga yetkazsin va ularning yakunlari boʻyicha aniq takliflarni Oʻzbekiston Respublikasi Prezidenti Administratsiyasiga kiritsin.

11. Oʻzbekiston Respublikasida amalda boʻlgan bojxona boji, yigʻimlari va qiymatini Jahon savdo tashkilotining Tariflar va savdo boʻyicha bosh bitimi (GATT 1994) talablariga muvofiqlashtirish maqsadida:

2025-yil 1-yanvardan boshlab joriy etiladigan bojxona yigʻimlarining fiskal maqsadlarda undirilmasligi belgilansin;

Investitsiyalar, sanoat va savdo vazirligi Iqtisodiyot va moliya vazirligi hamda boshqa manfaatdor vazirlik va idoralar bilan birgalikda ayrim turdagi tovarlarni eksport qilishda undiriladigan yigʻimlarni qayta koʻrib chiqib, 2024-yil 1-avgustga qadar tegishli takliflarni Vazirlar Mahkamasiga kiritsin;

Bojxona qoʻmitasi 2024-yil 1-avgustga qadar bojxona chegarasi orqali olib oʻtiladigan tovarlarning bojxona qiymatini aniqlash boʻyicha normativ-huquqiy hujjat loyihasini Vazirlar Mahkamasiga kiritsin.

12. Jahon savdo tashkiloti bilan ishlash boʻyicha idoralararo komissiya (J. Xodjayev) 2024-yil 1-avgustga qadar:

savdo-iqtisodiy munosabatlarda eng koʻp qulaylik berish rejimi (MFN) nazarda tutilmagan mamlakatlarda ishlab chiqarilgan yoxud ishlab chiqarilgan mamlakati aniqlanmagan tovarlarga nisbatan bojxona bojlarini qoʻllash boʻyicha amaldagi qonunchilikni qayta koʻrib chiqib, uning samaradorligini oshirish yuzasidan takliflarni;

import bojxona bojlari stavkalarining qoʻllanilishi samaradorligi oshirish va shaffofligini taʼminlash maqsadida amaldagi bojxona tariflarini Oʻzbekiston Respublikasi Tashqi iqtisodiy faoliyat tovar nomenklaturasining 2022-yilgi tahririga muvofiqlashtirish boʻyicha qaror loyihasini Vazirlar Mahkamasiga kiritsin.

13. Jahon savdo tashkiloti bilan ishlash boʻyicha idoralararo komissiyaning Jahon savdo tashkilotining Sanitariya va fitosanitariya choralari toʻgʻrisidagi bitimi (SPS Agreement) talablaridan kelib chiqib, Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi markaziy apparatida 3 ta shtat birligidan iborat sanitariya va fitosanitariya choralari boʻyicha Axborot markazini tashkil etish toʻgʻrisidagi taklifi maʼqullansin.

Bunda Axborot markaziga 2 ta shtat birligi Veterinariya va chorvachilikni rivojlantirish qoʻmitasi hamda Oʻsimliklar karantini va himoyasi agentligining bittadan shtat birligini maqbullashtirish hisobiga ajratilishi belgilansin.

14. Oʻzbekiston Respublikasi Prezidentining ayrim hujjatlariga 1-ilovaga muvofiq oʻzgartirish va qoʻshimchalar kiritilsin.

15. 2025-yil 1-yanvardan boshlab Oʻzbekiston Respublikasi Prezidentining va Oʻzbekiston Respublikasi Hukumatining ayrim hujjatlari 2-ilovaga muvofiq oʻz kuchini yoʻqotgan deb hisoblansin.

16. Adliya vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

17. Bosh vazir oʻrinbosarlari J.A. Xodjayev va J.A. Qoʻchqorov:

mazkur Farmon ijrosini samarali tashkil qilishga masʼul va shaxsiy javobgar etib belgilansin;

har oy yakuni bilan amalga oshirilayotgan ishlarni Jahon savdo tashkiloti bilan ishlash boʻyicha idoralararo komissiya yigʻilishlarida birgalikda muhokama qilib borsin.

18. Mazkur Farmonning ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

1. Oʻzbekiston Respublikasi Prezidentining 2023-yil 25-yanvardagi “Respublika ijro etuvchi hokimiyat organlari faoliyatini samarali yoʻlga qoʻyishga doir birinchi navbatdagi tashkiliy chora-tadbirlar toʻgʻrisida”gi PF-14-son Farmoniga 1-ilovada:

a) “4. Qishloq xoʻjaligi vazirligi” boʻlimida:

“Veterinariya va chorvachilikni rivojlantirish qoʻmitasi” pozitsiyasi “Jami boshqaruv shtat birliklari soni” va “Davlat budjeti hisobidan” ustunlaridagi “1216” raqami “1215” raqami bilan almashtirilsin;

“Oʻsimliklar karantini va himoyasi agentligi” pozitsiyasining “Jami boshqaruv shtat birliklari soni” va “Davlat budjeti hisobidan” ustunlaridagi “605” va “586” raqamlari tegishincha “604” va “585” raqamlari bilan almashtirilsin;

b) “12. Sogʻliqni saqlash vazirligi” boʻlimi “Sanitariya-epidemiologik osoyishtalik va jamoat salomatligi qoʻmitasi” pozitsiyasi “Jami boshqaruv shtat birliklari soni” va “Davlat budjeti hisobidan” ustunlaridagi “69” raqami “71” raqami bilan almashtirilsin.

2. Oʻzbekiston Respublikasi Prezidentining 2019-yil 27-martdagi “Oʻzbekiston Respublikasida elektr energetika tarmogʻini yanada rivojlantirish va isloh qilish strategiyasi toʻgʻrisida”gi PQ-4249-son qarori 2-bandi “b” kichik bandining oltinchi xatboshisidagi “yagona xarid qiluvchi funksiyasini bajarish” soʻzlari “xarid qilish” soʻzlari bilan almashtirilsin.

3. Oʻzbekiston Respublikasi Prezidentining 2019-yil 30-maydagi “Elektrotexnika sanoatini yanada rivojlantirish uchun qulay shart-sharoitlar yaratish va tarmoqning investitsiyaviy hamda eksport salohiyatini oshirish boʻyicha qoʻshimcha chora-tadbirlar toʻgʻrisida”gi PQ-4348-son qarorining 4-bandi “a” kichik bandi quyidagi tahrirda bayon etilsin:

“a) elektrotexnika va elektromaishiy mahsulotlarning davlat xaridlari amalga oshirilishida mahalliy ishlab chiqaruvchilarga nisbatan 20 foizgacha narx preferensiyasi qoʻllanadi. Bunda korporativ buyurtmachilar tomonidan tijorat maqsadlarida qayta sotish yoki shu maqsadlarda tovarlardan ishlab chiqarishda foydalanish uchun amalga oshiriladigan davlat xaridlarida preferensiyalar qoʻllanmaydi”.

4. Oʻzbekiston Respublikasi Prezidentining 2020-yil 21-avgustdagi “Mahalliy ishlab chiqaruvchilarni qoʻllab-quvvatlashga doir qoʻshimcha chora-tadbirlar toʻgʻrisida”gi PQ-4812-son qarorining 1-bandi “a” kichik bandining toʻrtinchi xatboshisi quyidagi mazmundagi jumla bilan toʻldirilsin:

“Bunda korporativ buyurtmachilar tomonidan tijorat maqsadlarida qayta sotish yoki shu maqsadlarda tovarlardan ishlab chiqarishda foydalanish uchun amalga oshiriladigan davlat xaridlarida preferensiyalar qoʻllanmaydi”.

5. Oʻzbekiston Respublikasi Prezidentining 2021-yil 2-martdagi “Elektrotexnika sanoatini yanada rivojlantirish va mahalliy mahsulotlarning raqobatbardoshligini oshirishga doir qoʻshimcha chora-tadbirlar toʻgʻrisida”gi PQ-5011-son qarori 6-bandining yettinchi xatboshisi quyidagi mazmundagi yettinchi — toʻqqizinchi xatboshilar bilan almashtirilsin:

“belgilangan chegirma bilan xarid qilingan mis katodi va mis katankasi faqatgina korxonaning oʻzining ishlab chiqarish quvvatlarida qayta ishlanadi va uni uchinchi shaxslarga sotish taqiqlanadi. Mis katodi va mis katankasi eksporti quyidagi shartlar asosida amalga oshiriladi:

eksportga yoʻnaltirish maqsadida birja savdolarida xarid qilingan mis katodi va mis katankasi xarid narxiga belgilangan chegirma hamda xoʻjalik yurituvchi subyektlarga nisbatan toʻlovni kechiktirib toʻlash imtiyozi qoʻllanmaydi;

mis katodi va mis katankasini “eksport” bojxona rejimiga joylashtirish uchun uning eksportga yoʻnaltirilgan hajmiga nisbatan birja savdolari xarid narxiga qoʻllangan chegirma summasi qaytarilganligi hamda toʻlovning kechiktirilgan qismi toʻliq toʻlanganligi toʻgʻrisida Oʻzbekiston respublika tovar-xomashyo birjasining maʼlumotnomasi taqdim etilishi shart”;

sakkizinchi — oʻn birinchi xatboshilar tegishincha oʻninchi — oʻn uchinchi xatboshilar deb hisoblansin.

6. Oʻzbekiston Respublikasi Prezidentining 2023-yil 2-iyundagi “Oʻzbekiston Respublikasining Jahon savdo tashkilotiga aʼzo boʻlish jarayonini jadallashtirishga doir qoʻshimcha chora-tadbirlar toʻgʻrisida”gi PQ-181-son qarorining 6-bandi quyidagi mazmundagi xatboshi bilan toʻldirilsin:

“Ushbu bandda nazarda tutilgan mablagʻlar Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasining maxsus gʻazna hisobvaragʻida jamlanadi va foydalaniladi”.

1. Oʻzbekiston Respublikasi Prezidentining 1999-yil 5-fevraldagi “Rangli metallar parchalari va chiqindilari eksportini tartibga solish toʻgʻrisida”gi PF-2212-son Farmoni.

2. Oʻzbekiston Respublikasi Prezidentining 2000-yil 4-martdagi “Rangli metallar parchalari va chiqindilari oʻgʻirlanishi hamda noqonuniy chetga olib chiqib ketilishining oldini olish chora-tadbirlari toʻgʻrisida”gi PF-2559-son Farmoni.

3. Oʻzbekiston Respublikasi Prezidentining 2004-yil 8-yanvardagi “Oʻzbekiston Respublikasi Prezidentining baʼzi farmonlariga oʻzgartirishlar kiritish toʻgʻrisida”gi PF-3376-son Farmoniga ilovaning 8-bandi.

4. Oʻzbekiston Respublikasi Prezidentining 2005-yil 5-avgustdagi “Oʻzbekiston Respublikasi Prezidentining 2000-yil 4-martdagi “Rangli metallar parchalari va chiqindilari oʻgʻirlanishi hamda noqonuniy chetga olib chiqib ketilishining oldini olish chora-tadbirlari toʻgʻrisida”gi PF-2559-son Farmoniga qoʻshimcha kiritish haqida”gi PF-3643-son Farmoni.

5. Oʻzbekiston Respublikasi Prezidentining 2006-yil 14-sentabrdagi “Oʻzbekiston Respublikasi Prezidentining ayrim farmon va qarorlariga oʻzgartishlar kiritish toʻgʻrisida”gi PF-3800-son Farmoni.

6. Oʻzbekiston Respublikasi Prezidentining 2011-yil 27-oktabrdagi “Oʻzbekiston Respublikasi Prezidentining ayrim hujjatlariga oʻzgartishlar kiritish toʻgʻrisida”gi PF-4374-son Farmoniga ilovaning 4-bandi.

7. Oʻzbekiston Respublikasi Prezidentining 2018-yil 12-yanvardagi “Oʻzbekiston Respublikasi Prezidentining ayrim qarorlariga oʻzgartishlar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida”gi PF-5300-son Farmoniga 1-ilovaning 1 va 2-bandlari.

8. Oʻzbekiston Respublikasi Prezidentining 2018-yil 5-iyundagi “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-5456-son Farmoniga 1-ilovaning 11-bandi.

9. Oʻzbekiston Respublikasi Prezidentining 2019-yil 22-fevraldagi “Oʻzbekiston Respublikasi Prezidentining ayrim hujjatlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida”gi PF-5668-son Farmoniga 1-ilovaning 11-bandi.

10. Oʻzbekiston Respublikasi Prezidentining 2020-yil 27-sentabrdagi “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida”gi PF-6075-son Farmoniga 2-ilovaning 3-bandi.

11. Oʻzbekiston Respublikasi Prezidentining 2017-yil 26-maydagi “Oʻztadbirkoreksport” aksiyadorlik jamiyati faoliyatining samaradorligini oshirishga oid qoʻshimcha chora-tadbirlar toʻgʻrisida”gi PQ-3009-son qarorining 5-bandi.

12. Oʻzbekiston Respublikasi Prezidentining 2017-yil 15-sentabrdagi “Oʻzmetkombinat” AJ boshqaruvi tizimini takomillashtirish chora-tadbirlari toʻgʻrisida”gi PQ-3277-son qarorining 5-bandi.

13. Oʻzbekiston Respublikasi Prezidentining 2017-yil 18-dekabrdagi “2018-yilda metall parchalarini tayyorlash, qora metallar prokatini ishlab chiqarish va foydalanish chora-tadbirlari toʻgʻrisida”gi PQ-3438-son qarorining 6-bandi.

14. Vazirlar Mahkamasining 2017-yil 18-oktabrdagi “Rangli metall parchalari va chiqindilarini toʻplash, topshirish hamda qayta ishlash tizimini takomillashtirish chora-tadbirlari toʻgʻrisida”gi 849-son qarorining 6 va 9-bandlari.