“Oʻzbekiston — 2030” strategiyasida belgilangan maqsadlarga erishish yoʻlida keng koʻlamli tarkibiy islohotlarni oʻz vaqtida va sifatli amalga oshirish uchun xorijiy ekspertlar koʻmagining muvofiqligini va taʼsirchanligini taʼminlash maqsadida:

1. Davlat organlari va tashkilotlari tarkibiy islohotlarni samarali amalga oshirish uchun malakali xorijiy konsultant va ekspertlarni, shu jumladan, xalqaro moliya institutlari va xorijiy hukumat moliya tashkilotlarini hamda konsalting kompaniyalarini (keyingi oʻrinlarda — xorijiy konsultant va ekspertlar) oʻz mablagʻlari yoki budjet mablagʻlari hisobidan jalb etish huquqiga ega ekanligi maʼlumot uchun qabul qilinsin.

2. Davlat organlari va tashkilotlari (keyingi oʻrinlarda — buyurtmachi tashkilot) tomonidan xorijiy konsultant va ekspertlarni jalb etish jarayonini muvofiqlashtiruvchi organ etib Strategik islohotlar agentligi belgilansin.

3. Shunday tartib oʻrnatilsinki, unga koʻra:

a) xorijiy konsultant va ekspertlar ular bilan buyurtmachi tashkilot hamda Strategik islohotlar agentligi oʻrtasida tuziladigan uch tomonlama shartnoma asosida jalb qilinadi. Bunda:

xorijiy konsultant va ekspertlar bilan shartnoma bir yilgacha boʻlgan muddatga tuziladi va ushbu muddat keyinchalik uzaytirilishi mumkin;

shartnomada xorijiy konsultant va ekspertlar tomonidan amalga oshirilishi lozim boʻlgan vazifalar (texnik topshiriq shaklida) hamda erishiladigan individual maqsadli koʻrsatkichlar (KPI) aks ettiriladi;

buyurtmachi tashkilot har oy xorijiy konsultant va ekspertlar tomonidan amalga oshirilgan ishlar va koʻrsatilgan xizmatlar toʻgʻrisida dalolatnoma tuzadi. Bunda xorijiy konsultant va ekspertlar tomonidan jami amalga oshirilgan ishlar va koʻrsatilgan xizmatlar toʻgʻrisida yakuniy dalolatnoma Strategik islohotlar agentligi bilan kelishilgan holda imzolanadi;

b) xorijiy konsultant va ekspertlar quyidagi asosiy talablarga muvofiq boʻlishi lozim:

iqtisodiyot, ijtimoiy soha va boshqa ahamiyatga ega boʻlgan yoʻnalishlarni isloh qilish boʻyicha bilim, malaka va zarur koʻnikmalarga ega boʻlishi;

nufuzli xalqaro tashkilotlar yoki xorijiy davlatlarning ilgʻor korxona va tashkilotlarida ish tajribasiga ega boʻlishi;

xorijiy tillarni (ingliz, rus va boshqalar) zarur darajada bilishi.

Bunda buyurtmachi tashkilot tomonidan xorijiy konsultant va ekspertlarga nisbatan qoʻshimcha talablar belgilanishi mumkin;

v) buyurtmachi tashkilot tomonidan xorijiy konsultant va ekspertlarni jalb qilish qonunchilikda belgilangan xarid qilish tartib-taomillariga muvofiq amalga oshiriladi; Oʻzbekiston Respublikasi Prezidentining 2024-yil 4-martdagi “Oʻzbekiston — 2030” strategiyasida belgilangan asosiy yoʻnalishlar boʻyicha islohotlarni amalga oshirishning 2024-yildagi ustuvor chora-tadbirlari toʻgʻrisida”gi PQ-109-son qarorida belgilangan chora-tadbirlar rejasini amalga oshirishga jalb qilinayotgan xorijiy konsultant va ekspertlar bundan mustasno;

g) xorijiy konsultant va ekspertlar tomonidan amalga oshirilgan ishlar va koʻrsatilgan xizmatlar har oyda buyurtmachi tashkilot tomonidan ommaviy axborot vositalari, ijtimoiy tarmoqlar va oʻzining rasmiy veb-saytida yoritib boriladi, ular ishtirokida joriy masalalarni muhokama qilish va hal qilishning maqbul yoʻllarini aniqlash uchun muntazam ravishda uchrashuvlar tashkil qilinadi hamda tegishli takliflar tayyorlanadi;

d) xorijiy konsultant va ekspertlarni davlat fuqarolik xizmati lavozimlariga tayinlash va lavozimidan ozod qilish davlat fuqarolik xizmati toʻgʻrisidagi qonunchilikka muvofiq amalga oshiriladi.

Ushbu band talablari Markaziy bankka nisbatan tatbiq etilmaydi.

4. Strategik islohotlar agentligi (B. Raxmatov):

Hisob palatasi (A. Boboyev) bilan birgalikda bir oy muddatda davlat organlari va tashkilotlari bilan xorijiy konsultant va ekspertlar oʻrtasida tuzilgan shartnomalarni qayta koʻrib chiqsin, ularni mazkur qaror talablariga asosan oʻzgartirish (bekor qilish) boʻyicha taklif kiritsin;

Raqamli texnologiyalar vazirligi (Sh. Shermatov) bilan birgalikda 2024-yil 1-iyulga qadar xorijiy konsultant va ekspertlarning yagona elektron reyestrini shakllantirsin va uning muntazam ravishda yangilab borilishini taʼminlasin;

ikki hafta muddatda xorijiy konsultant va ekspertlar bilan yangi tartibda tuziladigan shartnomaning namunasini ishlab chiqsin hamda vazirlik va idoralarga taqdim qilsin;

mazkur qaror talablari yuzasidan vazirlik va idoralarga muntazam ravishda tushuntirish ishlarini olib borsin.

5. Tarkibiy islohotlarni samarali amalga oshirish uchun xorijiy konsultant va ekspertlarni jalb qilish tartibi toʻgʻrisidagi nizom ilovaga muvofiq tasdiqlansin.

Bunda xalqaro moliya institutlari va xorijiy hukumat moliya tashkilotlari ishtirokidagi loyihalarni amalga oshirish uchun xorijiy konsultant va ekspertlarni jalb etish tegishli tashkilotlarning qoida va talablariga muvofiq amalga oshiriladi.

6. Mazkur qarorning ijrosini nazorat qilish Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidentining maslahatchisi B.M. Mavlonov zimmasiga yuklansin.

1. Mazkur Nizom Oʻzbekiston Respublikasining davlat organlari va tashkilotlariga tarkibiy islohotlarni samarali amalga oshirish uchun oʻz mablagʻlari yoki budjet mablagʻlari hisobidan xorijiy konsultant va ekspertlar, xalqaro tashkilotlar, xalqaro moliyaviy institutlar hamda konsalting kompaniyalarni (keyingi oʻrinlarda — xorijiy konsultant va ekspertlar) jalb etish; ularning faoliyati samaradorligining eng muhim koʻrsatkichlarini (KPI) belgilash va tizimli monitoringini yuritish tartibini belgilaydi.

Ushbu Nizom talablari Markaziy bankka nisbatan tatbiq etilmaydi.

2. Xalqaro moliya institutlari va xorijiy hukumat davlat moliya tashkilotlari ishtirokidagi loyihalarni amalga oshirish uchun xorijiy konsultant va ekspertlarni jalb etish tegishli tashkilotlarning qoida va talablariga muvofiq amalga oshiriladi.

3. Ushbu Nizomda quyidagi asosiy tushunchalardan foydalaniladi:

buyurtmachi tashkilot — xorijiy konsultant va ekspertlarni jalb qiladigan va faoliyati samaradorligining eng muhim koʻrsatkichlarini (KPI) hamda moddiy ragʻbatlantirish miqdorini belgilaydigan, respublika hududida boshqa zarur shart-sharoitlarni yaratib beradigan hamda ular faoliyatining uzluksizligini taʼminlaydigan Oʻzbekiston Respublikasidagi davlat organi va/yoki tashkiloti;

dalolatnoma — shartnoma shartlarida belgilangan vazifalarning xorijiy konsultant va ekspertlar tomonidan vijdonan, oʻz vaqtida va sifatli bajarilganligini tasdiqlovchi, xorijiy konsultant va ekspert hamda buyurtmachi tashkilot tomonidan imzolanadigan hujjat;

xorijiy konsultant va ekspertlar — xalqaro moliya institutlari va xorijiy hukumat davlat moliya tashkilotlari, yetakchi xorijiy konsalting kompaniyalari, ilmiy-tadqiqot tashkilotlari, tahlil markazlari va “aql markazlari” hamda zamonaviy bilim va zarur professional tajribaga ega boʻlgan xorijiy davlatlar fuqarolari va/yoki fuqaroligi boʻlmagan shaxslar;

shartnoma — xorijiy konsultant va ekspertlar hamda buyurtmachi tashkilot tomonidan mazkur xorijiy konsultant va ekspertlarni jalb qilish maqsadga muvofiqligi, kompetensiyalariga oid talablar, ularning vazifalari, talab qilinadigan xizmatlar roʻyxati, kutilayotgan natijalar, xizmatlarni moliyalashtirish manbalari va hajmi, xizmatlarni sotib olishning rejalashtirilgan tartib-taomillari va boshqalar toʻgʻrisidagi maʼlumotlar tahlili asosida tayyorlanadigan hamda xorijiy konsultant va ekspertlar, buyurtmachi tashkilot hamda Oʻzbekiston Respublikasi Prezidenti huzuridagi Strategik islohotlar agentligi (keyingi oʻrinlarda — Strategik islohotlar agentligi) oʻrtasida tuziladigan uch tomonlama shartnoma;

zarur shart-sharoitlar — buyurtmachi tashkilot tomonidan xorijiy konsultant va ekspertlar bilan tuzilgan shartnomada belgilangan muddat davomida ularga koʻrsatiladigan tibbiy hamda transport xizmatlari, farzandlarining maktabgacha taʼlim muassasalarida tarbiyalanishi, umumiy oʻrta taʼlim va/yoki oliy taʼlim muassasasida tahsil olishi, uy-joy ijarasi xarajatlarining toʻliq yoki bir qismi qoplab berilishi (ijtimoiy paket);

Strategik islohotlar agentligi — davlat organlari va tashkilotlari tomonidan xorijiy konsultant va ekspertlarni jalb etish jarayonini muvofiqlashtiruvchi organ.

4. Buyurtmachi tashkilot xorijiy konsultant va ekspertlarni toʻliq stavkada yoki maʼlum bir loyihani bajarish muddatiga belgilangan xodimlar soni doirasida yoki qoʻshimcha ravishda jalb etadi.

5. Xorijiy konsultant va ekspertlar bilan tuzilgan shartnoma bir yilgacha boʻlgan muddatga tuziladi va ushbu muddat keyinchalik uzaytirilishi mumkin. Bunda shartnomada xorijiy konsultant va ekspertlar tomonidan amalga oshirilishi lozim boʻlgan vazifalar (texnik topshiriq shaklida) hamda erishiladigan individual maqsadli koʻrsatkichlar (KPI) (keyingi oʻrinlarda — KPI) aks ettiriladi.

6. Buyurtmachi tashkilot har oy xorijiy konsultant va ekspertlar tomonidan amalga oshirilgan ishlar va koʻrsatilgan xizmatlar toʻgʻrisida dalolatnoma tuzadi. Bunda xorijiy konsultant va ekspertlar tomonidan jami amalga oshirilgan ishlar va koʻrsatilgan xizmatlar toʻgʻrisida yakuniy dalolatnoma Strategik islohotlar agentligi bilan kelishilgan holda imzolanadi.

7. Oʻzbekiston Respublikasining Soliq kodeksiga muvofiq xorijiy konsultant va ekspertlarning mehnatiga toʻlanadigan har oylik moddiy ragʻbatlantirish toʻlovlaridan belgilangan tartibda ajratmalar va soliqlar toʻlab boriladi.

8. Xorijiy konsultant va ekspertlarni moddiy ragʻbatlantirish va ularga zarur shart-sharoitlar yaratish buyurtmachi tashkilot tomonidan amalga oshiriladi.

9. Xorijiy konsultant va ekspertlarni davlat fuqarolik xizmati lavozimlariga tayinlash va lavozimdan ozod qilish qonunchilikda belgilangan tartibda amalga oshiriladi.

10. Quyidagilar xorijiy konsultant va ekspertlarga qoʻyiladigan asosiy talablar hisoblanadi:

a) xorijiy tillarni (ingliz, rus va boshqalar) zarur darajada bilish;

b) ijtimoiy soha, iqtisodiyot va boshqa ahamiyatga ega boʻlgan yoʻnalishlarni isloh qilish boʻyicha bilim, malaka va zarur koʻnikmalarga ega boʻlish;

v) nufuzli xalqaro tashkilotlar yoki xorijiy davlatlarning ilgʻor korxona va tashkilotlarida ish tajribasiga ega boʻlish.

Buyurtmachi tashkilot xorijiy konsultant va ekspertlarga nisbatan qoʻshimcha talablar ham qoʻyishi mumkin.

11. Xorijiy konsultant va ekspertlarni moddiy ragʻbatlantirish va ularga zarur shart-sharoitlar yaratish bilan bogʻliq mablagʻlarni shakllantirish manbalari quyidagilar hisoblanadi:

Oʻzbekiston Respublikasi Vazirlar Mahkamasining zaxira jamgʻarmasi mablagʻlari;

Oʻzbekiston Respublikasi Tiklanish va taraqqiyot jamgʻarmasi mablagʻlari;

vazirlik, idora va tashkilotlarning budjetdan tashqari jamgʻarmalari mablagʻlari;

boshqa xalqaro tashkilot va xalqaro moliya institutlarining mablagʻlari, yaʼni grantlar hamda begʻaraz texnik koʻmaklar;

jismoniy va yuridik shaxslarning homiylik mablagʻlari;

qonunchilik hujjatlari bilan taqiqlanmagan boshqa manbalar.

12. Xorijiy konsultant va ekspertlar uchun ajratiladigan mablagʻlarning daromad va xarajatlari Iqtisodiyot va moliya vazirligi huzuridagi Gʻaznachilik xizmati qoʻmitasida ochiladigan alohida shaxsiy gʻazna hisobvaragʻida yuritiladi.

13. Xorijiy konsultant va ekspertlarni loyihaga jalb qilishning maqsadga muvofiqligini tasdiqlash uchun buyurtmachi tashkilot Strategik islohotlar agentligiga quyidagi hujjatlarni taqdim etadi:

a) buyurtmachi tashkilot birinchi rahbarining xulosasi;

b)tarjimai hol (SV-maʼlumotnoma), maʼlumotnoma va amaliyot portfoliosi;

v) diplomlar va boshqa tegishli sertifikatlarining nusxasi;

g) oʻtgan yillarda bajarilgan va amalga oshirilayotgan loyihaga taalluqli ishlar va loyihalar haqida maʼlumot;

d) xorijiy konsultant va ekspertlar jalb etilgan loyihani amalga oshirish rejasi yoki toʻliq stavkada jalb etilsa, ushbu sohani rivojlantirish boʻyicha takliflar (shu jumladan, kutilayotgan natijalarning Oʻzbekiston Respublikasini strategik rivojlantirish dasturlari hamda maqsadlariga taʼsirining tahlili);

e) oldingi ish joyi rahbariyatidan yoki loyiha tashabbuskoridan tavsiyanoma;

j) buyurtmachi tashkilot tomonidan xorijiy konsultant va ekspertlarni ishga jalb etish yuzasidan belgilangan tartibda ruxsat etilganligi toʻgʻrisida rasmiy hujjatlarning nusxalari.

14. KPIni belgilash va baholash jarayoni uch bosqichda amalga oshiriladi va bunda buyurtmachi tashkilot tomonidan quyidagilar inobatga olinadi:

a) 1-bosqich. Koʻrsatkichlar va baholash mezonlarini ishlab chiqish:

loyihaga jalb etilgan xorijiy konsultant va ekspertlar faoliyati har oylik vazifalarining aniq roʻyxati ishlab chiqiladi;

tegishli soha yoki loyihaning strategik maqsadlarini shartnoma amal qilish muddati davomida oʻlchash mumkin boʻlgan aniq koʻrsatkichlar (shu jumladan, buyurtmachi tashkilot xodimlarini “kouching” qilish) belgilanadi;

belgilangan vazifalarni bajarish hamda strategik maqsadlarga erishish uchun zarur moliyaviy, texnik va inson resurslari hisob-kitoblarining (keyingi oʻrinlarda — zarur resurslar) buyurtmachi tashkilot imkoniyatlariga mosligi asoslantiriladi;

b) 2-bosqich. Muntazam koʻmak va monitoring:

buyurtmachi tashkilotning birinchi rahbari tomonidan har oy kamida bir marta xorijiy konsultant va ekspert (yoki uning vakili) bilan yuzma-yuz suhbat oʻtkazish orqali:

xorijiy konsultant va ekspertning zarur resurslar bilan taʼminlanganlik holati boʻyicha muntazam monitoring olib boriladi;

1-bosqichda belgilangan oylik vazifalarga va strategik maqsadlarga koʻzda tutilmagan qoʻshimcha oʻzgartirishlarning KPIga taʼsiri tahlil qilinadi;

byurokratik yoki boshqa sabablar tufayli yuzaga kelgan vaziyatlar tezkorlik bilan hal etiladi;

v) 3-bosqich. Baholash:

xorijiy konsultant va ekspertlar tomonidan 1-bosqichda belgilangan vazifalar va strategik maqsadlarga erishish boʻyicha rejalarning ijrosi hamda KPIga erishish hisoboti har chorakda taqdim etiladi;

hisobot buyurtmachi tashkilot tomonidan aniq natijalarga tayangan holda quyidagi mezonlar asosida baholanadi, yaʼni samaradorlikning yigʻma koʻrsatkichi:

50 foizdan kam boʻlsa — qoniqarsiz. Bunday holda xorijiy konsultant va ekspertlar bilan tuzilgan shartnoma bekor qilinadi;

50 foizdan 70 foizgacha boʻlsa — past daraja. Bunday holda xorijiy konsultant va ekspertlardan koʻrsatkichlarini yaxshilash uchun aniq rejalar talab qilinadi va buning uchun uch oy muddat beriladi;

70 foizdan 85 foizgacha boʻlsa — oʻrta daraja. Bunday holda xorijiy konsultant va ekspertlarning toʻliq salohiyatini roʻyobga chiqarish uchun zarur resurslar qayta koʻrib chiqiladi;

85 foizdan 100 foizgacha boʻlsa — yuqori daraja. Bunda xorijiy konsultant va ekspertlarni ragʻbatlantirish uchun buyurtmachi tashkilot tomonidan taklif kiritilishi mumkin.

Buyurtmachi tashkilot tomonidan har chorakda xorijiy konsultant va ekspertlarni baholash natijalari boʻyicha hisobotni Strategik islohotlar agentligiga taqdim etiladi. Mazkur hisobot xorijiy konsultant va ekspertning shaxsiy yigʻmajildida umumlashtirib boriladi.

15. Xorijiy konsultant va ekspertlar moddiy ragʻbatlantirish miqdori har yili aniq ish hajmiga qarab, buyurtmachi tashkilot tomonidan qayta koʻrib chiqilishi mumkin.

16. Buyurtmachi tashkilot quyidagi huquqlarga ega:

xorijiy konsultant va ekspertlarni jalb qilish;

xorijiy konsultant va ekspertlarni moddiy ragʻbatlantirish miqdorini belgilash va uni qayta koʻrib chiqish, monitoring natijalari boʻyicha xorijiy konsultant va ekspertlarni loyihani amalga oshirishga muvofiqligi toʻgʻrisida qaror qabul qilish;

xorijiy konsultant va ekspertlar uchun aniq koʻrsatkichlar va maqsadlarni, shu jumladan, KPIni belgilash;

xorijiy konsultant va ekspertlarning mehnat faoliyatini doimiy kuzatib borish.

17. Buyurtmachi tashkilot quyidagi majburiyatlarga ega:

shartnomada belgilangan qoidalarga rioya etish;

xorijiy konsultant va ekspertlarga yuklangan vazifalarni bajarish uchun zarur resurslar va shart-sharoitlarni yaratish;

har oyda xorijiy konsultant va ekspertlar tomonidan bajarilgan ishlar toʻgʻrisida maʼlumotlarni yagona elektron reyestriga kiritish va uni muntazam ravishda yangilab borilishini taʼminlash.

18. Buyurtmachi tashkilot tomonidan shartnomada belgilangan moddiy ragʻbatlantirish toʻlovlaridan tashqari boshqa har qanday toʻlovlar amalga oshirishga yoʻl qoʻyilmaydi.

19. Xorijiy konsultant va ekspertlar quyidagi huquqlarga ega:

oʻzlariga yuklangan vazifalarni bajarish uchun buyurtmachi tashkilotdan zarur shart-sharoitlar yaratib berishini talab qilish;

oʻzlariga yuklangan vazifalarni bajarish uchun buyurtmachi tashkilotdan zarur maʼlumotlarni olish.

20. Xorijiy konsultant va ekspertlar quyidagi majburiyatlarga ega:

shartnomada koʻzda tutilgan barcha majburiyatlarni shartnoma shartlari va muddatlariga muvofiq vijdonan va samarali bajarish;

har oyda buyurtmachi tashkilotga hisobotlarni taqdim etish;

shartnoma shartlariga toʻliq rioya qilish.

21. Shartnomaning amal qilish muddati davomida va u bekor qilinganidan soʻng xorijiy konsultant va ekspertlar oʻz faoliyati davomida olgan maʼlumotlarga, shu jumladan, buyurtmachi tashkilotdan yoki boshqa idoralardan olgan maʼlumotlarga nisbatan konfidensiallikni saqlashga majburdir.

Xorijiy konsultant va ekspertlar toʻgʻridan-toʻgʻri yoki bilvosita buyurtmachi tashkilot va Strategik islohotlar agentligining yozma ruxsatisiz uchinchi shaxslarga bunday maʼlumotlarni oshkor qilishiga yoʻl qoʻyilmaydi.

22. Shartnoma imzolangandan soʻng xorijiy konsultant va ekspertlar qonunchilik hujjatlarida belgilangan tartibda Oʻzbekiston Respublikasi hududida mehnat faoliyatini amalga oshirish huquqini beruvchi tasdiqnoma olishi lozim.

23. Ushbu Nizom talablarining buzilishida aybdor boʻlgan shahslar qonunchilik hujjatlarida belgilangan tartibda javob beradilar.