Oʻzbekiston Respublikasi Prezidentining 1994-yil 18-yanvardagi Farmoniga muvofiq respublika Davlat bojxona qoʻmitasi qayta tuzilishi munosabati bilan va Oʻzbekiston Respublikasi Vazirlar Mahkamasining “Oʻzbekiston Respublikasi Davlat soliq qoʻmitasini tashkil etish va uning faoliyati masalalari toʻgʻrisida” 1994-yil 4-martdagi 114-son qarorining 6-bandini bajarish maqsadida Vazirlar Mahkamasi qaror qiladi:

1. Respublika sobiq Davlat bojxona qoʻmitasining boshliqlari tarkibiga kiruvchi xodimlarining xizmat muddatiga koʻra pensiyaga chiqishi Tartibi tasdiqlansin (ilova qilinmoqda).

2. Oʻzbekiston Respublikasi Davlat soliq qoʻmitasi hujjatlari joʻnatilayotgan pensionerlarga xizmat koʻrsatish uchun Oʻzbekiston Respublikasi Ichki ishlar vazirligiga barcha taʼminotlari bilan bitta shtat bersin.

3. Oʻzbekiston Respublikasi Davlat soliq qoʻmitasi sobiq Davlat bojxona qoʻmitasining xizmat muddatiga koʻra pensiyaga chiqishi munosabati bilan boʻshatilayotgan boshliqlari tarkibiga kiruvchi xodimlarining pensiyasini rasmiylashtirish masalalarini oʻz vaqtida koʻrib chiqishni va hujjatlarni pensiya olishga hisobga qoʻyish uchun Oʻzbekiston Respublikasi Ichki ishlar vazirligiga topshirishni taʼminlasin.

4. Oʻzbekiston Respublikasi Moliya vazirligi yuqorida qayd etilgan toifadagi xodimlarga nafaqa toʻlash uchun zarur pul mablagʻlari ajratsin.

Mazkur Tartib Oʻzbekiston Respublikasi Prezidentining 1994-yil 18-yanvardagi Farmoniga muvofiq respublika Davlat bojxona qoʻmitasi qayta tashkil etilishi va Oʻzbekiston Respublikasi Vazirlar Mahkamasining “Oʻzbekiston Respublikasi Davlat soliq qoʻmitasini tashkil etish va uning faoliyati masalalari toʻgʻrisida” 1994-yil martdagi 114-son qarorining 6-bandini bajarish maqsadida ishlab chiqilgan.

Sobiq Davlat bojxona qoʻmitasining boshliqlari tarkibiga kiruvchi xodimlarining xizmat muddatiga pensiyaga chiqishlari quyidagi tartibda belgilanadi:

1. Respublika sobiq Davlat bojxona qoʻmitasi qayta tashkil etilayotgan vaqtda xizmat muddatiga koʻra pensiyaga chiqishi munosabati bilan xizmatdan boʻshash huquqiga ega boʻlgan boshliqlar tarkibiga kiruvchi xodimlar pensiya tayinlanishi uchun belgilangan tartibda yozma ravishda bildirish xati topshiradilar.

2. Oʻzbekiston Respublikasi Davlat soliq qoʻmitasi sobiq Davlat bojxona qoʻmitasi boshliqlar tarkibiga kiruvchi xodimlarni xizmat muddatiga koʻra respublika ichki ishlar organlarida xizmat qilish toʻgʻrisidagi Muvaqqat Nizomga asosan va harbiy xizmatchilar pensiya taʼminoti haqidagi amaldagi qonun hujjatlariga muvofiq xizmatdan boʻshatadi.

Pensiya tayinlashda xizmat muddati Oʻzbekiston Respublikasi Vazirlar Mahkamasining 1993-yil 1-martdagi 111-son qarorining 4-bandiga muvofiq Oʻzbekiston Respublikasi Vazirlar Mahkamasi tomonidan mazkur Tartib tasdiqlangan kungacha hisoblanadi.

2.1. Oʻzbekiston Respublikasi Davlat soliq qoʻmitasi Bosh bojxona boshqarmasi pensiyalarga oid hujjatlar yigʻma jildlarini rasmiylashtirishni bir oy muddatda tugallaydi va hisobga olish bundan buyon Pensiya bilan taʼminlash uchun Oʻzbekiston Respublikasi Ichki ishlar vazirligiga topshiradi. Shu toifadagi pensionerlar ichki ishlar organlari xodimlari uchun belgilangan barcha huquq va imtiyozlar joriy etiladi.

2.2. Pensiyaga chiqishda bir yoʻla beriladigan nafaqa Oʻzbekiston Respublikasi Davlat soliq qoʻmitasiga ajratiladigan budjet mablagʻi hisobidan beriladi. Pensiyalarni toʻlash ichki ishlar organlari uchun belgilangan tartibda amalga oshiriladi.

3. Pensiyaga chiqayotganning lavozim maoshi respublika Ichki ishlar vazirligidagi shunday lavozimdagi lavozim maoshiga nisbatan yuqori boʻlgan taqdirda pensiya miqdorini qayta hisoblab chiqish Oʻzbekiston Respublikasi Ichki ishlar vazirligidagi tegishli lavozim maoshi boʻyicha amalga oshiriladi.