O‘zbekiston Respublikasining “Pedagogning maqomi to‘g‘risida”gi Qonuni hamda O‘zbekiston Respublikasi Prezidentining 2022-yil 21-dekabrdagi PF-269-son “Yangi O‘zbekiston ma’muriy islohotlarini amalga oshirish chora-tadbirlari to‘g‘risida”gi Farmoniga muvofiq O‘zbekiston Respublikasi Oliy ta’lim, fan va innovatsiyalar vazirligi hamda Kambag‘allikni qisqartirish va bandlik vazirligi qaror qiladi:

1. O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi hamda Bandlik va mehnat munosabatlari vazirligining 2017-yil 30-iyundagi 53/QQ va 20-Q/Q-son qarori (ro‘yxat raqami 2910, 2017-yil 3-avgust) (O‘zbekiston Respublikasi qonun hujjatlari to‘plami, 2017-y., 31-son, 787-modda) bilan tasdiqlangan Akademik litseylarga o‘qituvchilarni tanlov asosida ishga qabul qilish tartibi to‘g‘risidagi nizomga ilovaga muvofiq o‘zgartirishlar kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. Muqaddima quyidagi tahrirda bayon etilsin:

“Mazkur Nizom akademik litseylarda bo‘sh (vakant) bo‘lgan o‘qituvchi lavozimlariga tanlov o‘tkazish tartibini belgilaydi.”.

2. 7-band quyidagi tahrirda bayon etilsin:

“7. O‘zbekiston Respublikasining “Pedagogning maqomi to‘g‘risida”gi Qonunining 15-moddasi birinchi va ikkinchi qismlarida qayd etilgan shaxslar tanlovga qo‘yilmaydilar.”.

3. 9-banddagi “Bandlik va mehnat munosabatlari vazirligining” degan so‘zlar “Kambag‘allikni qisqartirish va bandlik vazirligining” degan so‘zlar bilan almashtirilsin.