1. Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi (OAK)ning ekspert kengashlari attestatsiya tizimi ishining eng muhim yoʻnalishlari hamda ilmiy darajalar va ilmiy unvonlar berish masalalari boʻyicha tavsiyalar ishlab chiquvchi va ularni amalga oshiruvchi ilmiy-ijtimoiy organdir. Ekspert kengashi oʻz faoliyatida OAK toʻgʻrisidagi Nizomga amal qiladi. U ixtisoslashgan kengash (bundan keyin kengash) toʻgʻrisidagi, ilmiy darajalar va ilmiy unvonlar berish toʻgʻrisidagi Nizomlarga, shuningdek ushbu Nizomga muvofiq oʻz zimmasiga yuklangan vazifalarni bajarish uchun masʼuldir.

2. Ekspert kengashining asosiy vazifalari:

a) yuqori malakali ilmiy va ilmiy-pedagog xodimlarni tayyorlash hamda attestatsiyadan oʻtkazishga oid tashkilotlar va muassasalar takliflarini oʻrganish, ularga baho berish;

b) fan va texnikaning eng yangi yoʻnalishlarini hisobga olgan holda ilmiy xodimlar ixtisosliklari nomenklaturasini takomillashtirishga oid takliflarni koʻrib chiqish va tayyorlash;

v) ixtisoslashgan hamda ilmiy kengashlarda ilmiy darajalar va ilmiy unvonlar berish ishlarini nazorat qilish;

g) oliy oʻquv yurtlarida, ilmiy-tadqiqot muassasalarida dissertatsiya yoqlash boʻyicha kengash tuzishda ishtirok etish;

d) dissertatsiyalarning ilmiy saviyasini, ularning ilmiy va amaliy qimmatini baholash, ilmiy daraja va ilmiy unvon daʼvogarlariga qoʻyiladigan talablarning yagonaligini, dissertatsiyalarning yuqori saviyada ekspertizadan oʻtkazilishini taʼminlash;

e) dissertatsiya natijalarini tahlil qilish hamda ularning ilmiy-texnikaviy va ijtimoiy taraqqiyot yoʻnalishlariga qanchalik mosligiga baho berish.

3. Ekspert kengashi oʻz zimmasidagi vazifalarga muvofiq:

a) kengashlarning maqbul shaxobchalarini shakllantirishda ishtirok etadi;

b) kengashlarni. tuzish va qayta tasdiqlashga oid materiallarni koʻrib chiqadi hamda ularning malaka darajasi va tuzishning maqsadga muvofiq yoki muvofiq emasligi toʻgʻrisida xulosa chiqaradi;

v) ilmiy darajalar va ilmiy unvonlar beruvchi kengashlarning ish tajribasini tahlil etadi va umumlashtiradi;

g) kengashlarning oliy oʻquv yurtlari va ilmiy-tadqiqot muassasalari xodimlariga ilmiy daraja va ilmiy unvonlar berish toʻgʻrisidagi iltimosnomalarini koʻrib chiqadi hamda OAK Hayʼati va Rayosatiga tavsiyalar tayyorlaydi;

d) himoya qilingan dissertatsiyalar mavzularini, ilmiy va amaliy natijalarini tahlil etib, Oʻzbekiston Respublikasi Hukumati, vazirliklari, davlat qoʻmitalari, idoralari uchun tegishli materiallar tayyorlaydi;

e) ilmiy xodimlar ixtisoslarining nomenklaturasini takomillashtirishga, yangi ixtisoslar boʻyicha pasportlarni va nomzodlik imtihonlari dasturlarini tayyorlashga oid takliflarni koʻrib chiqishda qatnashadi;

j) fuqarolarning taklif, ariza va shikoyatlarini koʻrib chiqishda ishtirok etadi;

z) OAK ilmiy kengashi, Rayosati va rahbariyatining topshirigʻiga binoan ilmiy va ilmiy-pedagog xodimlarni attestatsiyadan oʻtkazishga aloqador boshqa masalalarni koʻrib chiqadi.

4. Ekspert kengashiga quyidagi huquqlar berilgan:

a) zarur hollarda dissertatsiyani qoʻshimcha xulosa olish uchun kengashga yuborish;

b) yetarlicha asoslanmagan xulosani mukammallashtirish uchun kengashga qaytarish;

v) ilmiy daraja talabgorlarini, dissertatsiya himoyasi yoki uning jamoaviy taqrizi oʻtkazilgan kengashning rahbarini, rasmiy opponentlarni, ilmiy rahbar va ilmiy maslahatchilarni, shuningdek, yetakchi tashkilot vakillarini oʻz majlislariga taklif qilish;

g) oʻz majlislarida ixtisoslashgan va ilmiy (ilmiy-texnikaviy) kengash rahbarlarining hisobotini eshitish, OAK Rayosatining u yoki bu kengashning bundan buyon ishlashi maqsadga muvofiq yoki muvofiq emasligiga doir tavsiyalarni tayyorlash;

d) zarur hollarda dissertatsiya boʻyicha rasmiy opponentlarni tavsiya etish;

e) lozim boʻlganda kengash majlislariga oʻz vakillarini yuborish:

j) fan sohalari boʻyicha boʻlinmalarning va davlat inspeksiyasi boʻlimining xodimlari bilan birgalikda kengash faoliyatini tekshirishda ishtirok etish;

z) kengash ishlab turgan oʻquv yurtlari va ilmiy muassasalarda sayyor majlislar oʻtkazish.

5. OAKning ekspert kengashlari fanning turli sohalaridagi yetakchi olimlardan va xalq xoʻjaligi mutaxassislaridan tuziladi.

Ekspert kengashlarining soni va tarkibi OAK Rayosati tomonidan keyinchalik kamida uchdan bir qismini yangilash sharti bilan uch yil muddatga tasdiqlanadi. Ekspert kengashi tarkibini uch yil ichida qisman oʻzgartirish OAK Hayʼatining qarori bilan amalga oshiriladi.

OAK ekspert kengashi tarkibida uzluksiz ishlashning umumiy muhlati ikki muddatdan oshmasligi shart.

Ekspert kengashi tarkibiga faqat fan doktorlari kiradi. Istisno tariqasida kengashning ilmiy kotibi etib fan nomzodi ham tayinlanishi mumkin. Ekspert kengashining tarkibi, odatda, 21 kishidan oshmasligi kerak.

Ekspert kengashining raisi va uning oʻrinbosari bir tashkilot yoki muassasaning xodimlari boʻlishi mumkin emas.

Ekspert kengashining raisi, rais oʻrinbosari va ilmiy kotibi opponent etib tayinlanishlari mumkin emas.

Ekspert kengashi aʼzosi ekspert kengashi bilan kelishilgan holda istisno tarzida rasmiy opponent etib tayinlanishi mumkin.

Ekspert kengashining aʼzolari kengashning raisi yoki rais oʻrinbosari etib tasdiqlanishi mumkin emas. Ekspert kengashining aʼzolari kengashning aʼzosi boʻlishi tavsiya etilmaydi.

OAK ilmiy kengashining seksiyalari ekspert kengashi raisi va aʼzoligiga nomzodlar yuzasidan tavsiya beradi, ular OAK Rayosati va Hayʼati tomonidan tasdiqlanishi lozim.

6. Ekspert kengashi oʻz ishiga ekspert sifatida fanning tegishli sohalari boʻyicha mutaxassis boʻlgan fan doktorlarini jalb qilishi mumkin. Ekspert kengashining topshirigʻiga binoan ekspertlar dissertatsiyani tahlil qilish hamda attestatsiya ishlarini koʻrib chiqishda qatnashadilar.

OAK Rayosati va ilmiy kengashining aʼzolari ekspert kengashi ishida qatnashishlari mumkin emas.

Ekspert kengashiga taklif qilingan mutaxassislar ekspert kengashida faqat maslahat ovozi bilan qatnashish huquqiga egadirlar.

OAK masʼul xodimlari ekspert kengashi ishida faqat OAK rahbariyatining ruxsati bilan qatnashadilar.

7. Ekspert kengashining majlislari rais rahbarligida, u yoʻqligida esa rais oʻrinbosari rahbarligida oʻtkaziladi.

Ekspert kengashining tavsiyalari va xulosalari ochiq ovoz berish tarzida koʻpchilik ovoz bilan qabul qilinadi. Zarur hollarda yoki ekspert kengashi aqalli bir aʼzosining taklifiga binoan yopiq holda oʻtkaziladi.

8. Ekspert kengashi faoliyatini OAK rahbariyati va OAK fan sohalari boʻyicha boʻlinmalarining rahbarlari nazorat qilib boradi.

OAKning fan sohalari boʻyicha boʻlinmalari va boshqa qismlari ekspert kengashi hamda ekspertlar ishi uchun sharoitni, shuningdek, u qabul qilgan tavsiya va xulosalarning roʻyobga chiqarilishini taʼminlaydilar.

Ekspert kengashining majlisi belgilangan tartib buzilgan holda oʻtkazilgan yoki qabul qilingan qaror yetarlicha asoslanmagan taqdirda, OAK Hayʼati yoki fan sohalari boʻyicha boʻlinma rahbari ekspert kengashiga masalani takroran koʻrib chiqishni taklif etishga haqli.

9. OAK Rayosati yoki rahbariyatining topshirigʻiga binoan, shuningdek ekspert kengashi qarori bilan ixtisoslararo yoki fan sohalariaro tutash mavzulardagi dissertatsiyalarni koʻrib chiqish uchun OAKning fan sohalari boʻyicha boʻlinmalari bir necha ekspert kengashining qoʻshma majlisini tashkil qilishlari mumkin.

10. Fan sohalari boʻyicha boʻlinma shtatidagi xodim shu ekspert kengashi mutasaddisi ekspert kengashi majlisida qatnashish huquqiga ega boʻlib, u ekspert kengashining ilmiy kotibi bilan birgalikda attestatsiya ishi hujjatlarining toʻkis saqlanishi, ularning oʻz vaqtida koʻrib chiqilishi uchun masʼuldir, u ekspert kengashi aʼzolarining ishini hisobga olib boradi.

Ekspert kengashi qaroriga muvofiq uning majlisida ushbu Nizom 4-moddasining v-bandida koʻrsatib oʻtilgan kishilardan tashqari u yoki bu masalani koʻrib chiqishda qatnashishi zarur boʻlgan boshqa ekspert kengashlarining aʼzolari va mutaxassislari ham ishtirok etishlari mumkin.

11. Ekspert kengashining majlisida dissertatsiya ishi boʻyicha rasmiy opponent yoki himoya qiluvchining ilmiy rahbari, ilmiy maslahatchisi boʻlgan aʼzolari, shuningdek koʻrib chiqilayotgan dissertatsiya boʻyicha yetakchi tashkilot taqrizini imzolagan ekspert kengashi aʼzolari ishtirok etmaydilar.

12. Ekspert kengashining qarorlari va xulosalarini raislik qiluvchi, maʼruzachi-kengash aʼzosi va ekspert kengashining ilmiy kotibi imzolaydi hamda ular majlisdan keyin besh kundan kechiktirmay OAKning fanlar boʻyicha tegishli boʻlinmasiga topshiriladi.

13. Ekspert kengashida fan doktori ilmiy darajasini va professor ilmiy unvonini berish haqidagi iltimosnomani koʻrib chiqish muddati olti oydan, nomzodlik dissertatsiyasini hamda dotsent va katta ilmiy xodim ilmiy unvonlarini berish haqidagi iltimosnomalarni koʻrib chiqish muddati toʻrt oydan oshmasligi kerak.

Ekspert kengashida kengashlar tashkil qilinishi va faoliyati xususidagi materiallarni koʻrib chiqish muddati ikki oydan oshmasligi lozim.

14. Ekspert kengashi har yili 10-yanvardan kechiktirmay OAKning fan sohalari boʻyicha boʻlinmasiga oʻtgan yil mobaynidagi oʻz faoliyati toʻgʻrisida belgilangan shaklda hisobot topshiradi.

15. Ekspert kengashi aʼzolarining va ekspertlarning ilmiy va ilmiy-pedagog xodimlarni attestatsiyadan oʻtkazish borasidagi ishiga haq toʻlash tartibi Oʻzbekiston Vazirlar Mahkamasi tomonidan oʻrnatiladi.