Oʻzbekiston Respublikasining “Ixtirolar, foydali modellar va sanoat namunalari toʻgʻrisida”gi, “Tovar belgilari, xizmat koʻrsatish belgilari va tovar kelib chiqqan joy nomlari toʻgʻrisida”gi, “Geografik koʻrsatkichlar toʻgʻrisida”gi, “Elektron hisoblash mashinalari uchun yaratilgan dasturlar va maʼlumotlar bazalarining huquqiy himoyasi toʻgʻrisida”gi, “Integral mikrosxemalar topologiyalarini huquqiy muhofaza qilish toʻgʻrisida”gi va “Seleksiya yutuqlari toʻgʻrisida”gi qonunlariga muvofiq buyuraman:

1. Oʻzbekiston Respublikasi Adliya vazirligining intellektual mulk sohasidagi rasmiy nashrlari toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan sanadan eʼtiboran uch oy oʻtgach kuchga kiradi.

Mazkur Nizom Oʻzbekiston Respublikasi Adliya vazirligining (bundan buyon matnda Adliya vazirligi deb yuritiladi) intellektual mulk sohasidagi rasmiy nashrlari (bundan buyon matnda rasmiy nashrlar deb yuritiladi) turlarini, tuzilishini va ularda eʼlon qilinadigan maʼlumotlarning tarkibini belgilaydi.

1. Rasmiy nashrlar Adliya vazirligining Internet jahon axborot tarmogʻidagi sahifasiga elektron shaklda joylashtiriladi va ularda quyidagi maʼlumotlar eʼlon qilinadi:

ixtiroga patent berish haqidagi talabnomalar toʻgʻrisida;

ixtiro, foydali model va sanoat namunasiga berilgan patentlar toʻgʻrisida;

roʻyxatdan oʻtkazilgan tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar toʻgʻrisida;

roʻyxatdan oʻtkazilgan elektron hisoblash mashinalari (bundan buyon matnda EHM deb yuritiladi) uchun yaratilgan dasturlar, maʼlumotlar bazalari va integral mikrosxemalar topologiyalari toʻgʻrisida;

seleksiya yutugʻiga patent berish haqidagi talabnomalar va seleksiya yutugʻiga berilgan patentlar toʻgʻrisida;

roʻyxatdan oʻtkazilgan intellektual mulk obyektlari bilan bogʻliq tegishli davlat reyestrlariga kiritilgan oʻzgartirishlar, shu jumladan litsenziya shartnomalari va huquqni oʻtkazish bilan bogʻliq shartnomalar toʻgʻrisida;

intellektual mulk masalalari boʻyicha boshqa rasmiy maʼlumotlar toʻgʻrisida.

2. Rasmiy nashrlar davlat tilida hamda Butunjahon intellektual mulk tashkilotining (bundan buyon matnda BIMT deb yuritiladi) rasmiy tillaridan birida eʼlon qilinadi.

3. Rasmiy nashrlarda eʼlon qilingan intellektual mulk obyektlari toʻgʻrisidagi maʼlumotlar jismoniy va yuridik shaxslar foydalanishi uchun ochiq hisoblanadi.

4. Adliya vazirligining rasmiy nashrlari turlariga quyidagilar kiradi:

a) Rasmiy axborotnoma;

b) Rasmiy axborotnomaga yillik koʻrsatkichlar toʻplami;

d) Adliya vazirligining intellektual mulk sohasidagi faoliyati toʻgʻrisidagi yillik hisoboti.

5. Rasmiy axborotnoma quyidagi shakllarda eʼlon qilinadi:

“Ixtirolar. Foydali modellar. Sanoat namunalari” rasmiy axborotnomasi;

“Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasi;

“EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasi;

“Seleksiya yutuqlari” rasmiy axborotnomasi.

6. “Ixtirolar. Foydali modellar. Sanoat namunalari” rasmiy axborotnomasi davriy elektron nashr hisoblanadi va bir oyda kamida bir marta nashr etiladi.

“Ixtirolar. Foydali modellar. Sanoat namunalari” rasmiy axborotnomasi uning titul varagʻida koʻrsatilgan muddat davomida toʻplangan maʼlumotlar bilan har kuni toʻldirib boriladi.

Bunda, maʼlumotlarni ushbu rasmiy axborotnomaga joylashtirish sanasi ularni rasmiy eʼlon qilish sanasi hisoblanadi.

7. “Ixtirolar. Foydali modellar. Sanoat namunalari” rasmiy axborotnomasi quyidagi boʻlimlardan iborat boʻladi:

Ixtirolar;

Foydali modellar;

Sanoat namunalari;

Xabarlar.

8. “Ixtirolar. Foydali modellar. Sanoat namunalari” rasmiy axborotnomasining “Ixtirolar” boʻlimida ixtiroga patent berish haqidagi talabnomalar hamda ixtiroga berilgan patentlar toʻgʻrisidagi maʼlumotlar aks ettiriladi.

“Ixtirolar. Foydali modellar. Sanoat namunalari” rasmiy axborotnomasining “Ixtirolar” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.9 standartiga muvofiq ixtirolarga tegishli bibliografik maʼlumotlarni identifikatsiyalash uchun xalqaro kodlar roʻyxati;

ixtiroga patent berish haqidagi talabnomalar toʻgʻrisidagi maʼlumotlar;

ixtiroga patent berish haqidagi talabnomalarning tizimli va raqamli koʻrsatkichlari toʻgʻrisidagi maʼlumotlar;

ixtiroga berilgan patentlar toʻgʻrisidagi maʼlumotlar;

ixtiroga berilgan patentlarning tizimli, raqamli va nomli koʻrsatkichlari toʻgʻrisidagi maʼlumotlar.

9. Ixtiroga patent berish haqidagi talabnomalar toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

ixtiro referati.

10. Ixtiroga berilgan patentlar toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

ixtiro formulasi.

11. “Ixtirolar. Foydali modellar. Sanoat namunalari” rasmiy axborotnomasining “Foydali modellar” boʻlimida foydali modelga berilgan patentlar toʻgʻrisidagi maʼlumotlar aks ettiriladi.

“Ixtirolar. Foydali modellar. Sanoat namunalari” rasmiy axborotnomasining “Foydali modellar” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.9 standartiga muvofiq foydali modellarga tegishli bibliografik maʼlumotlarni identifikatsiyalash uchun xalqaro kodlar roʻyxati;

foydali modellarga berilgan patentlar toʻgʻrisidagi maʼlumotlar;

foydali modellarga berilgan patentlarning tizimli, raqamli va nomli koʻrsatkichlari.

12. Foydali modellarga berilgan patentlar toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

foydali model referati.

13. “Ixtirolar. Foydali modellar. Sanoat namunalari” rasmiy axborotnomasining “Sanoat namunalari” boʻlimida sanoat namunasiga berilgan patentlar toʻgʻrisidagi maʼlumotlar aks ettiriladi.

“Ixtirolar. Foydali modellar. Sanoat namunalari” rasmiy axborotnomasining “Sanoat namunalari” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.80 standartiga muvofiq sanoat namunalariga tegishli bibliografik maʼlumotlarni identifikatsiyalash uchun xalqaro kodlar roʻyxati;

sanoat namunalariga berilgan patentlar toʻgʻrisidagi maʼlumotlar;

sanoat namunalariga berilgan patentlarning tizimli, raqamli va nomli koʻrsatkichlari.

14. Sanoat namunalariga berilgan patentlar toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

sanoat namunasi tasviri.

15. “Ixtirolar. Foydali modellar. Sanoat namunalari” rasmiy axborotnomasining “Xabarlar” boʻlimida ixtirolar, foydali modellar va sanoat namunalaridan foydalanish toʻgʻrisidagi litsenziya shartnomalari va ushbu obyektlarga boʻlgan huquqlarni boshqa shaxslarga oʻtkazish toʻgʻrisidagi shartnomalar, shuningdek ixtirolar, foydali modellar va sanoat namunalariga oid davlat reyestrlariga kiritilgan oʻzgartirishlar toʻgʻrisidagi hamda intellektual mulk masalalari boʻyicha boshqa rasmiy maʼlumotlar aks ettiriladi.

16. “Ixtirolar. Foydali modellar. Sanoat namunalari” rasmiy axborotnomasi tarkibidagi boʻlimlardan biri boʻyicha eʼlon qilinadigan maʼlumotlar mavjud boʻlmagan taqdirda, ushbu boʻlim istisno qilingan holda mazkur bobda keltirilgan boʻlimlar ketma-ketligi saqlab qolinadi.

17. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasi davriy elektron nashr hisoblanadi va bir oyda kamida bir marta nashr etiladi.

18. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasi uning titul varagʻida koʻrsatilgan muddat davomida toʻplangan maʼlumotlar bilan har kuni toʻldirib boriladi.

Bunda, maʼlumotlarni mazkur rasmiy axborotnomaga joylashtirish sanasi ularni rasmiy eʼlon qilish sanasi hisoblanadi.

19. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasi quyidagi boʻlimlardan iborat boʻladi:

Tovar belgilari va xizmat koʻrsatish belgilari;

Tovar kelib chiqqan joy nomlari;

Geografik koʻrsatkichlar;

Xabarlar.

20. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasining “Tovar belgilari va xizmat koʻrsatish belgilari” boʻlimida roʻyxatdan oʻtkazilgan tovar belgilari va xizmat koʻrsatish belgilari toʻgʻrisidagi maʼlumotlar aks ettiriladi.

“Tovar belgilari va xizmat koʻrsatish belgilari” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.60 standartiga muvofiq tovar belgilari va xizmat koʻrsatish belgilariga tegishli bibliografik maʼlumotlarni identifikatsiyalash uchun xalqaro kodlar roʻyxati;

roʻyxatdan oʻtkazilgan tovar belgilari va xizmat koʻrsatish belgilari toʻgʻrisidagi maʼlumotlar;

tovar belgilari va xizmat koʻrsatish belgilariga doir guvohnoma va talabnomalarning tizimli va raqamli koʻrsatkichlari.

21. Roʻyxatdan oʻtkazilgan tovar belgilari va xizmat koʻrsatish belgilari toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

tovar belgisi va xizmat koʻrsatish belgisi tasviri;

belgilarni roʻyxatdan oʻtkazish uchun tovarlar va xizmatlarning xalqaro tasnifiga (Nitssa klassifikatsiyasi) muvofiq guruhlangan, tovar belgisini roʻyxatdan oʻtkazish soʻralayotgan tovarlarning roʻyxati.

22. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasining “Tovar kelib chiqqan joy nomlari” boʻlimida tovar kelib chiqqan joy nomini va tovar kelib chiqqan joy nomidan foydalanish huquqini roʻyxatdan oʻtkazish toʻgʻrisidagi maʼlumotlar aks ettiriladi.

“Tovar kelib chiqqan joy nomlari” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.60 — ST.69 standartlariga muvofiq shakllantirilgan tovar kelib chiqqan joy nomlariga tegishli bibliografik maʼlumotlarni identifikatsiyalash uchun xalqaro kodlar roʻyxati;

roʻyxatdan oʻtkazilgan tovar kelib chiqqan joy nomlari toʻgʻrisidagi maʼlumotlar;

tovar kelib chiqqan joy nomidan foydalanish huquqini roʻyxatdan oʻtkazish toʻgʻrisidagi maʼlumotlar;

tovar kelib chiqqan joy nomidan foydalanish huquqi toʻgʻrisidagi guvohnomaning raqamli koʻrsatkichlari.

23. Roʻyxatdan oʻtkazilgan tovar kelib chiqqan joy nomlari va tovar kelib chiqqan joy nomidan foydalanish huquqini roʻyxatdan oʻtkazish toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

tovar turi va uning alohida xususiyatlari tavsifi.

24. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasining “Geografik koʻrsatkichlar” boʻlimida geografik koʻrsatkichlar va geografik koʻrsatkichlardan foydalanish huquqini roʻyxatdan oʻtkazish toʻgʻrisidagi maʼlumotlar aks ettiriladi.

“Geografik koʻrsatkichlar” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.60 — ST.69 standartlariga muvofiq shakllantirilgan geografik koʻrsatkichlarga tegishli bibliografik maʼlumotlarni identifikatsiyalash uchun xalqaro kodlar roʻyxati;

roʻyxatdan oʻtkazilgan geografik koʻrsatkichlar toʻgʻrisidagi maʼlumotlar;

geografik koʻrsatkichdan foydalanish huquqini roʻyxatdan oʻtkazish toʻgʻrisidagi maʼlumotlar;

geografik koʻrsatkichdan foydalanish huquqi toʻgʻrisidagi guvohnomaning raqamli koʻrsatkichlari.

25. Roʻyxatdan oʻtkazilgan geografik koʻrsatkichlar va geografik koʻrsatkichdan foydalanish huquqini roʻyxatdan oʻtkazish toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

tovar turi va uning alohida xususiyatlari tavsifi.

26. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasining “Xabarlar” boʻlimida tovar belgilari va xizmat koʻrsatish belgilaridan foydalanish toʻgʻrisidagi litsenziya shartnomalari va ushbu obyektlarga boʻlgan huquqlarni boshqa shaxslarga oʻtkazish toʻgʻrisidagi shartnomalar, shuningdek tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlarga oid davlat reyestrlariga kiritilgan oʻzgartirishlar toʻgʻrisidagi hamda intellektual mulk masalalari boʻyicha boshqa rasmiy maʼlumotlar aks ettiriladi.

27. “Tovar belgilari, xizmat koʻrsatish belgilari, tovar kelib chiqqan joy nomlari va geografik koʻrsatkichlar” rasmiy axborotnomasi tarkibidagi boʻlimlardan biri boʻyicha eʼlon qilinadigan maʼlumotlar mavjud boʻlmagan taqdirda, ushbu boʻlim istisno qilingan holda mazkur bobda keltirilgan boʻlimlar ketma-ketligi saqlanib qoladi.

28. “EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasi davriy elektron nashr hisoblanadi va bir oyda kamida bir marta nashr etiladi.

“EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasi uning titul varagʻida koʻrsatilgan muddat davomida toʻplangan maʼlumotlar bilan har kuni toʻldirib boriladi.

Bunda, maʼlumotlarni ushbu rasmiy axborotnomaga joylashtirish sanasi ularni rasmiy eʼlon qilish sanasi hisoblanadi.

29. “EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasi quyidagi boʻlimlardan iborat boʻladi:

EHM uchun yaratilgan dasturlar;

Maʼlumotlar bazalari;

Integral mikrosxemalar topologiyalari;

Xabarlar.

30. “EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasining “EHM uchun yaratilgan dasturlar” boʻlimida roʻyxatdan oʻtkazilgan EHM uchun yaratilgan dasturlar toʻgʻrisidagi maʼlumotlar aks ettiriladi.

“EHM uchun yaratilgan dasturlar” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.9 standartlariga muvofiq shakllantirilgan EHM uchun yaratilgan dasturlarga tegishli bibliografik maʼlumotlarni identifikatsiyalash uchun kodlar roʻyxati;

roʻyxatdan oʻtkazilgan EHM uchun yaratilgan dasturlar toʻgʻrisidagi maʼlumotlar;

EHM uchun yaratilgan dasturlarni rasmiy roʻyxatdan oʻtkazganlik toʻgʻrisidagi guvohnomaning raqamli koʻrsatkichlari.

31. Roʻyxatdan oʻtkazilgan EHM uchun yaratilgan dasturlar toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

EHM uchun yaratilgan dastur referati.

32. “EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasining “Maʼlumotlar bazalari” boʻlimida roʻyxatdan oʻtkazilgan maʼlumotlar bazalari toʻgʻrisidagi maʼlumotlar aks ettiriladi.

“Maʼlumotlar bazalari” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.9 standartiga muvofiq shakllantirilgan maʼlumotlar bazalariga tegishli bibliografik maʼlumotlarni identifikatsiyalash uchun kodlar roʻyxati;

roʻyxatdan oʻtkazilgan maʼlumotlar bazalari toʻgʻrisidagi maʼlumotlar;

maʼlumotlar bazalarini rasmiy roʻyxatdan oʻtkazganlik toʻgʻrisidagi guvohnomaning raqamli koʻrsatkichlari.

33. “EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasining “Integral mikrosxemalar topologiyalari” boʻlimida roʻyxatdan oʻtkazilgan integral mikrosxemalar topologiyalari toʻgʻrisidagi maʼlumotlar aks ettiriladi.

“Integral mikrosxemalar topologiyalari” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.13 standartiga muvofiq integral mikrosxemalar topologiyalariga tegishli bibliografik maʼlumotlarni identifikatsiyalash uchun xalqaro kodlar roʻyxati;

roʻyxatdan oʻtkazilgan integral mikrosxemalar topologiyalari toʻgʻrisidagi maʼlumotlar;

integral mikrosxemalar topologiyalarini roʻyxatdan oʻtkazganlik toʻgʻrisidagi guvohnomaning raqamli koʻrsatkichlari.

34. Roʻyxatdan oʻtkazilgan integral mikrosxemalar topologiyalari toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

integral mikrosxemalar topologiyasi referati.

35. “EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasining “Xabarlar” boʻlimida EHM uchun dasturlar, maʼlumotlar bazalari, integral mikrosxemalar topologiyalaridan foydalanish toʻgʻrisidagi litsenziya shartnomalari va ushbu obyektlarga boʻlgan huquqlarni boshqa shaxslarga oʻtkazish toʻgʻrisidagi shartnomalar, shuningdek EHM uchun yaratilgan dasturlar, maʼlumotlar bazalari, integral mikrosxemalar topologiyalariga oid davlat reyestrlariga kiritilgan oʻzgartirishlar toʻgʻrisidagi hamda intellektual mulk masalalari boʻyicha boshqa rasmiy maʼlumotlar aks ettiriladi.

36. “EHM uchun yaratilgan dasturlar. Maʼlumotlar bazalari. Integral mikrosxemalar topologiyalari” rasmiy axborotnomasi tarkibidagi boʻlimlardan biri boʻyicha eʼlon qilinadigan maʼlumotlar mavjud boʻlmagan taqdirda, ushbu boʻlim istisno qilingan holda mazkur bobda keltirilgan boʻlimlar ketma-ketligi saqlanib qoladi.

37. “Seleksiya yutuqlari” rasmiy axborotnomasi davriy elektron nashr hisoblanadi va bir oyda kamida bir marta nashr etiladi.

“Seleksiya yutuqlari” rasmiy axborotnomasi uning titul varagʻida koʻrsatilgan muddat davomida toʻplangan maʼlumotlar bilan har kuni toʻldirib boriladi.

Bunda, maʼlumotlarni ushbu rasmiy axborotnomaga joylashtirish sanasi ularni rasmiy eʼlon qilish sanasi hisoblanadi.

38. “Seleksiya yutuqlari” rasmiy axborotnomasi quyidagi boʻlimlardan iborat boʻladi:

Seleksiya yutuqlari;

Xabarlar.

39. “Seleksiya yutuqlari” rasmiy axborotnomasining “Seleksiya yutuqlari” boʻlimida seleksiya yutugʻiga patent berish haqidagi talabnomalar va seleksiya yutugʻiga berilgan patentlar toʻgʻrisidagi maʼlumotlar aks ettiriladi.

“Seleksiya yutuqlari” boʻlimida eʼlon qilinadigan maʼlumotlar tarkibiga quyidagilar kiradi:

BIMTning ST.9, ST.17 standartlariga muvofiq shakllantirilgan seleksiya yutuqlariga tegishli bibliografik maʼlumotlarni identifikatsiyalash uchun kodlar roʻyxati;

seleksiya yutugʻiga patent berish haqidagi talabnomalar toʻgʻrisidagi maʼlumotlar;

seleksiya yutugʻiga patent berish haqidagi talabnomalarning tizimli va raqamli koʻrsatkichlari;

seleksiya yutugʻiga berilgan patentlar toʻgʻrisidagi maʼlumotlar;

seleksiya yutugʻiga berilgan patentlarning tizimli, raqamli va nomli koʻrsatkichlari toʻgʻrisidagi maʼlumotlar.

40. Seleksiya yutugʻiga patent berish haqidagi talabnomalar toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

seleksiya yutugʻining nomi.

41. Seleksiya yutugʻiga berilgan patentlar toʻgʻrisidagi maʼlumotlar tarkibiga quyidagilar kiradi:

bibliografik maʼlumotlar;

seleksiya yutugʻi tavsifi.

42. “Seleksiya yutuqlari” rasmiy axborotnomasining “Xabarlar” boʻlimida seleksiya yutuqlaridan foydalanish toʻgʻrisidagi litsenziya shartnomalari va seleksiya yutuqlariga boʻlgan huquqlarni boshqa shaxslarga oʻtkazish toʻgʻrisidagi shartnomalar, shuningdek seleksiya yutuqlariga oid davlat reyestriga kiritilgan oʻzgartirishlar toʻgʻrisidagi hamda intellektual mulk masalalari boʻyicha boshqa rasmiy maʼlumotlar aks ettiriladi.

43. “Seleksiya yutuqlari” rasmiy axborotnomasi tarkibidagi boʻlimlardan biri boʻyicha eʼlon qilinadigan maʼlumotlar mavjud boʻlmagan taqdirda, ushbu boʻlim istisno qilingan holda mazkur bobda keltirilgan boʻlimlar ketma-ketligi saqlanib qoladi.

44. “Rasmiy axborotnomaga yillik koʻrsatkichlar toʻplami” elektron nashr hisoblanadi va bir yilda bir marta nashr etiladi.

Ushbu rasmiy nashr Xalqaro patent klassifikatsiyasi, Sanoat namunalari xalqaro klassifikatsiyasi, Tovar va xizmatlar xalqaro tasnifi sinflari hamda boshqa belgilari boʻyicha qidiruv ishlarini amalga oshirishga imkoniyat yaratadigan ixtirolar, foydali modellar, sanoat namunalari va tovar belgilariga oid yillik koʻrsatkichlarning majmuasini ifoda etadi.

45. “Rasmiy axborotnomaga yillik koʻrsatkichlar toʻplami” rasmiy nashrida eʼlon qilinadigan maʼlumotlar tarkibiga quyidagilar kiradi:

“Ixtirolar. Foydali modellar. Sanoat namunalari” rasmiy axborotnomasining bir yil davomida eʼlon qilingan sonlaridagi ixtirolarga patent berish haqidagi talabnomalarning tizimli va raqamli koʻrsatkichlari;

“Ixtirolar. Foydali modellar. Sanoat namunalari” rasmiy axborotnomasining bir yil davomida eʼlon qilingan sonlaridagi ixtirolar, foydali modellar va sanoat namunalariga berilgan patentlarning tizimli, raqamli va nomli koʻrsatkichlari;

“Tovar belgilari, xizmat koʻrsatish belgilari, geografik koʻrsatkichlar va tovar kelib chiqqan joy nomlari” rasmiy axborotnomasining bir yil davomida eʼlon qilingan sonlaridagi tovar belgilari va xizmat koʻrsatish belgilari guvohnomalarining tizimli va raqamli koʻrsatkichlari hamda talabnomalarning raqamli koʻrsatkichlari.

46. “Adliya vazirligining intellektual mulk sohasidagi faoliyati toʻgʻrisidagi yillik hisoboti” elektron nashr hisoblanadi va bir yilda bir marta nashr etiladi.

“Adliya vazirligining intellektual mulk sohasidagi faoliyati toʻgʻrisidagi yillik hisoboti” rasmiy nashri intellektual mulk sohasidagi statistik va tahliliy maʼlumotlarni oʻz ichiga oladi.

47. “Adliya vazirligining intellektual mulk sohasidagi faoliyati toʻgʻrisidagi yillik hisoboti” rasmiy nashrida eʼlon qilinadigan maʼlumotlar tarkibiga quyidagilar kiradi:

intellektual mulk sohasidagi huquq ijodkorligiga oid maʼlumotlar;

intellektual mulk obyektlarini davlat roʻyxatidan oʻtkazish sohasidagi faoliyatga oid maʼlumotlar;

intellektual mulk huquqlarini himoya qilish sohasidagi faoliyatga oid maʼlumotlar;

intellektual mulk sohasida rasmiy nashrlarni eʼlon qilish faoliyatiga oid maʼlumotlar;

Adliya vazirligida roʻyxatga olingan patent vakillari toʻgʻrisidagi maʼlumotlar;

intellektual mulk obyektlarini roʻyxatdan oʻtkazishga oid 5 yillik statistik va tahliliy maʼlumotlar;

yuridik va jismoniy shaxslarning murojaatlari bilan bogʻliq statistik maʼlumotlar;

intellektual mulk sohasi boʻyicha xalqaro hamkorlikka oid maʼlumotlar.

“Adliya vazirligining intellektual mulk sohasidagi faoliyati toʻgʻrisidagi yillik hisoboti” rasmiy nashrida ushbu bandda nazarda tutilmagan intellektual mulk sohasiga oid boshqa maʼlumotlar ham eʼlon qilinishi mumkin.

48. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.