“Siyosiy partiyalarni moliyalashtirish toʻgʻrisida”gi Oʻzbekiston Respublikasi Qonunini bajarish yuzasidan Vazirlar Mahkamasi qaror qiladi:

1. Siyosiy partiyalarning ustavda nazarda tutilgan faoliyatini davlat tomonidan moliyalashtirish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Moliya vazirligi har yili davlat budjeti parametrlarida siyosiy partiyalarning ustavda nazarda tutilgan faoliyatini moliyalashtirish uchun mablagʻlarni nazarda tutsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Mazkur Nizom “Siyosiy partiyalarni moliyalashtirish toʻgʻrisida”gi Oʻzbekiston Respublikasi Qonuniga muvofiq siyosiy partiyalarning ustavda nazarda tutilgan faoliyatini moliyalashtirish uchun davlat mablagʻlarini olish va ulardan foydalanish tartibini belgilaydi.

2. “Siyosiy partiyalarni moliyalashtirish toʻgʻrisida”gi Oʻzbekiston Respublikasi Qonuniga muvofiq siyosiy partiyalar, agar Oʻzbekiston Respublikasi Oliy Majlisining Qonunchilik palatasiga (keyingi oʻrinlarda Qonunchilik palatasi deb yuritiladi) saylovlar yakunlari boʻyicha tegishli siyosiy partiyadan Qonunchilik palatasi fraksiyasini tashkil etish uchun zarur boʻlgan kamida toʻqqiz deputat saylangan boʻlsa, oʻzining ustavda nazarda tutilgan faoliyatini moliyalashtirish uchun davlat mablagʻlarini olish huquqiga ega boʻladilar.

3. Siyosiy partiyalarning ustavda nazarda tutilgan faoliyatini moliyalashtirish uchun ajratiladigan davlat mablagʻlarining har yilgi miqdori ushbu mablagʻlar ajratiladigan yildan oldingi yilning birinchi yanvariga belgilangan eng kam oylik ish haqi miqdorining ikki foizini Qonunchilik palatasiga soʻnggi saylovlarda saylovchilar roʻyxatiga kiritilgan fuqarolar soniga koʻpaytirish hisobiga shakllantiriladi.

4. Siyosiy partiyalar yangi chaqiriq Qonunchilik palatasining birinchi majlisi oʻtkazilgan oydan keyingi oydan boshlab oʻzlarining ustavda nazarda tutilgan faoliyati davlat tomonidan moliyalashtirilishi huquqini oladilar.

Siyosiy partiyalarning ustavda nazarda tutilgan faoliyatini davlat tomonidan moliyalashtirish yangi chaqiriq Qonunchilik palatasining birinchi majlisi oʻtkazilgan oydan keyingi oydan boshlab toʻxtatiladi.

5. Siyosiy partiyalarning ustavda nazarda tutilgan faoliyatini moliyalashtirish uchun ajratilgan davlat mablagʻlari siyosiy partiya tomonidan:

siyosiy partiyalar aʼzolarining televideniye, radio orqali va boshqa ommaviy axborot vositalarida chiqishlarini tashkil etishga;

aholi bilan uchrashuvlar (davra suhbatlari, yigʻilishlar, mitinglar va qonunda belgilangan tartibda oʻtkaziladigan boshqa uchrashuvlar) oʻtkazishga;

siyosiy partiyaning matbuot organiga yordam koʻrsatishga;

koʻrgazmali targʻibot materiallarini nashr etish va tarqatishga;

partiya faollarini oʻqitishga, ular bilan seminarlar, treninglar oʻtkazishga;

partiyaning konferensiyalari, syezdlarini oʻtkazish;

siyosiy partiyaning ijro etuvchi apparati taʼminoti uchun joriy xarajatlarga;

partiyaning mol-mulkini saqlash va ulardan foydalanish bilan bogʻliq kommunal xizmatlar va ekspluatatsiya xarajatlarini toʻlashga sarflanadi.

Koʻrsatib oʻtilgan mablagʻlar partiyaning ustavida va belgilangan tartibda tasdiqlangan xarajatlar smetasida nazarda tutilgan vazifalarni amalga oshirish bilan bogʻliq boshqa maqsadlar uchun ham sarflanadi.

Ustavda nazarda tutilgan faoliyatini moliyalashtirish uchun davlat mablagʻlarini oladigan siyosiy partiyalar har yili Oʻzbekiston Respublikasi Adliya vazirligiga:

yangi chaqiriq Qonunchilik palatasi faoliyatining birinchi yilida — siyosiy partiya mazkur oydan boshlab davlat tomonidan moliyalashtirish huquqini oladigan oy boshlangungacha;

keyingi yillarda — navbatdagi moliya yilidan oldingi yilning oʻninchi dekabrigacha tasdiqlangan xarajatlar smetasini, shuningdek banklar tomonidan tasdiqlangan oʻz hisob raqamlarini taqdim etadilar.

6. Markaziy saylov komissiyasi “Oʻzbekiston Respublikasi Oliy Majlisiga saylovlar toʻgʻrisida”gi Qonunning 43-moddasiga muvofiq unga saylov okruglari boʻyicha saylovlarning natijalari toʻgʻrisida okrug saylov komissiyalarining barcha protokollari taqdim etilgan vaqtdan boshlab uch kun muddatda har bir saylov okrugi boʻyicha, Markaziy saylov komissiyasining raisi va kotibi tomonidan imzolanadigan protokolda koʻrsatgan holda saylovchilarning umumiy sonini aniqlaydi. Koʻrsatib oʻtilgan protokolning bir nusxasi Markaziy saylov komissiyasida qoladi, qolgan ikki nusxasi imzolangandan keyin oʻn kun mobaynida Oʻzbekiston Respublikasi Adliya vazirligiga va Moliya vazirligiga beriladi.

7. Oʻzbekiston Respublikasi Markaziy saylov komissiyasi Qonunchilik palatasi deputatlari roʻyxatdan oʻtkazilgan kundan boshlab oʻn kun muddatda Oʻzbekiston Respublikasi Adliya vazirligiga familiyasi, ismi va otasining ismini koʻrsatgan holda har bir siyosiy partiyadan saylangan Qonunchilik palatasi deputatlarining soni toʻgʻrisidagi maʼlumotlarni taqdim etadi.

8. Oʻzbekiston Respublikasi Moliya vazirligi Markaziy saylov komissiyasining maʼlumotlari asosida davlat budjeti parametrlarida siyosiy partiyalarning ustavda nazarda tutilgan faoliyatini moliyalashtirish uchun mablagʻlarni nazarda tutadi va “Budjet tizimi toʻgʻrisida”gi Oʻzbekiston Respublikasi Qonunida belgilangan muddatlarda ajratiladigan mablagʻlar miqdori toʻgʻrisidagi maʼlumotlarni har yili Oʻzbekiston Respublikasi Adliya vazirligiga maʼlum qiladi.

9. Tegishli siyosiy partiyalarning ustavda nazarda tutilgan faoliyatini har yili moliyalashtirishga moʻljallangan davlat mablagʻlarining yillik summasi va ularni oylar boʻyicha ajratish jadvali Markaziy saylov komissiyasi va Oʻzbekiston Respublikasi Moliya vazirligining maʼlumotlari asosida Markaziy saylov komissiyasi va Moliya vazirligining maʼlumotlari taqdim etilgan kundan boshlab oʻn kun mobaynida Oʻzbekiston Respublikasi Adliya vazirligi tomonidan belgilanadi.

Keyingi yillarda koʻrsatib oʻtilgan summa va uni ajratish jadvali Oʻzbekiston Respublikasi Moliya vazirligi tomonidan tegishli yilga ajratiladigan mablagʻlar miqdori toʻgʻrisidagi maʼlumotlar taqdim etilgan kundan boshlab oʻn kundan kechikmay Oʻzbekiston Respublikasi Adliya vazirligi tomonidan belgilanadi.

Adliya vazirligining davlat mablagʻlari summasini aniqlash va uni ajratish jadvali toʻgʻrisidagi qarori qabul qilingan vaqtdan boshlab ikki ish kunidan kechikmay Oʻzbekiston Respublikasi Moliya vazirligiga yuboriladi.

10. Siyosiy partiyalarning ustavda nazarda tutilgan faoliyatini har yili moliyalashtirishga moʻljallangan davlat mablagʻlari summasi Oʻzbekiston Respublikasi Adliya vazirligi tomonidan ular oʻrtasida siyosiy partiyalarning har biri tomonidan Qonunchilik palatasida olingan deputatlar oʻrni soniga mutanosib tarzda taqsimlanadi. Har bir siyosiy partiyaning ustavda nazarda tutilgan faoliyatini har yili moliyalashtirish uchun moʻljallangan davlat mablagʻlari summasi quyidagi formula boʻyicha aniqlanadi:

S — muayyan siyosiy partiyaning ustav faoliyatini har yili moliyalashtirish uchun moʻljallangan davlat mablagʻlari summasi;

M* — siyosiy partiyalarning ustavda nazarda tutilgan faoliyatini moliyalashtirish uchun ajratiladigan davlat mablagʻlarining yillik miqdori;

S — ustavda nazarda tutilgan faoliyatini moliyalashtirish uchun davlat mablagʻlari olish huquqiga ega boʻlgan siyosiy partiyalar deputatlarining umumiy soni;

Ds — ustavda nazarda tutilgan faoliyatini moliyalashtirish uchun davlat mablagʻlari olish huquqiga ega boʻlgan muayyan partiya deputatlarining soni.

11. Yangi chaqiriq Qonunchilik palatasi faoliyatining birinchi yilida har bir siyosiy partiyaga oylar boʻyicha ajratiladigan mablagʻlar miqdori unga mazkur Nizomning 10-bandiga muvofiq ajratilgan davlat mablagʻlari miqdorini Qonunchilik palatasining birinchi majlisi oʻtkazilgan oydan keyingi oydan boshlab qolgan oylar soniga boʻlish yoʻli bilan aniqlanadi (1-sxema).

Yangi chaqiriq Qonunchilik palatasi faoliyatining keyingi yillarida oylar boʻyicha ajratiladigan mablagʻlar miqdori muayyan siyosiy partiyaning ustavda nazarda tutilgan faoliyatini har yili moliyalashtirish uchun moʻljallangan davlat mablagʻlari summasini joriy yildagi oylarning toʻliq soniga boʻlish yoʻli bilan aniqlanadi (2-sxema).

12. Oʻzbekiston Respublikasi Moliya vazirligi har oyda joriy oyning oʻninchi kunigacha siyosiy partiyalarning ustavda nazarda tutilgan faoliyatini moliyalashtirishga davlat budjetidan ajratilgan mablagʻlarning Oʻzbekiston Respublikasi Adliya vazirligi tomonidan tasdiqlangan jadvalga muvofiq Oʻzbekiston Respublikasi Adliya vazirligining tegishli hisob raqamiga oʻtkazilishini taʼminlaydi.

Oʻzbekiston Respublikasi Adliya vazirligi siyosiy partiyalarning ustavda nazarda tutilgan faoliyatini moliyalashtirish uchun davlat budjetidan ajratilgan mablagʻlar oʻzining hisob raqamiga tushgan vaqtdan boshlab uch ish kuni mobaynida ushbu mablagʻlarni oylar boʻyicha ajratish jadvaliga muvofiq tegishli siyosiy partiyalarning hisob raqamlariga oʻtkazadi (1 va 2-sxemalar).

13. Qonunchilik palatasi apparati fraksiya roʻyxatdan oʻtkazilgan yoki u tugatilgan, shuningdek deputatlar fraksiyaga kirgan yoki uning tarkibidan chiqqan kundan boshlab uch kun mobaynida bu haqda Oʻzbekiston Respublikasi Adliya vazirligini yozma ravishda xabardor qiladi.

Markaziy saylov komissiyasi takroriy saylovlar oʻtkazilgandan (“Oʻzbekiston Respublikasi Oliy Majlisiga saylovlar toʻgʻrisida”gi Qonunning 46-moddasi) va chiqib ketgan deputatlarning oʻrniga Qonunchilik palatasiga deputatlar saylovlari (“Oʻzbekiston Respublikasi Oliy Majlisiga saylovlar toʻgʻrisida”gi Qonunning 47-moddasi) oʻtkazilgandan keyin, shuningdek deputatlik vakolatlari muddatidan oldin toʻxtatilganda (deputatning chaqirib olinishi va qonunda nazarda tutilgan boshqa asoslar), deputatlar tarkibida boshqa oʻzgarishlar boʻlgan taqdirda uch kun mobaynida bu haqda Oʻzbekiston Respublikasi Adliya vazirligini yozma ravishda xabardor qiladi.

14. Agar mazkur Nizomning 13-bandida koʻrsatilgan maʼlumotlar yil davomida taqsimlanadigan davlat mablagʻlari summasi qayta koʻrib chiqilishiga olib kelgan taqdirda, Oʻzbekiston Respublikasi Adliya vazirligining qarorlari asosida ularni qayta taqsimlash amalga oshiriladi.

Muayyan siyosiy partiyaning ustavda nazarda tutilgan faoliyatini moliyalashtirish uchun ajratiladigan davlat mablagʻlarining qolgan summasi mazkur Nizomning 10-bandida koʻrsatilgan formula boʻyicha aniqlanadi. Bunda “M” harfi qolgan oylarga ajratiladigan davlat mablagʻlarining umumiy miqdorini ifodalaydi. Bunda oylar boʻyicha ajratiladigan mablagʻlar miqdori qolgan summani ushbu yilning qolgan oylari soniga boʻlish yoʻli bilan aniqlanadi.

Agar:

mablagʻlarni qayta taqsimlash muayyan siyosiy partiyaga ajratiladigan mablagʻlar miqdorini kamaytirish yoki koʻpaytirish zaruriyatiga olib kelsa — mazkur partiyaga keyingi davrlarga ajratiladigan mablagʻlar miqdori deputatlar soni oʻzgarishi yuz bergan oydan keyingi oydan boshlab qayta koʻrib chiqiladi;

oʻzgarishlar natijasida muayyan siyosiy partiya deputatlarining soni 9 deputatdan boʻlib qolsa, Oʻzbekiston Respublikasi Adliya vazirligi oʻzgarish yuz bergan oydan keyingi oydan boshlab mazkur partiyaning ustavda nazarda tutilgan faoliyatini moliyalashtirishni toʻxtatadi.

Oʻzbekiston Respublikasi Adliya vazirligining davlat mablagʻlarini qayta taqsimlash toʻgʻrisidagi qarori u tomonidan Qonunchilik palatasi apparati va Markaziy saylov komissiyasining yuz bergan oʻzgarishlar toʻgʻrisidagi bildirishnomasini olgan kundan boshlab besh kun mobaynida qabul qilinadi (3-sxema).

Oʻzbekiston Respublikasi Adliya vazirligining qarori mablagʻlar kamaytirilishi (koʻpaytirilishi) miqdori koʻrsatilgan holda qabul qilingan kundan boshlab ikki kun mobaynida Oʻzbekiston Respublikasi Moliya vazirligiga yetkaziladi.

15. Siyosiy partiyalar tomonidan oʻzining ustavda nazarda tutilgan faoliyatini moliyalashtirish uchun olingan va uning uchun ajratilgan moliyaviy yil mobaynida foydalanilmagan davlat mablagʻlari moliyaviy yil tamom boʻlgandan keyin bir oy mobaynida, keyinchalik davlat budjetiga qaytarish uchun, Oʻzbekiston Respublikasi Adliya vazirligining tegishli hisob raqamiga oʻtkazilishi kerak.

16. Siyosiy partiyalarning ustavda nazarda tutilgan faoliyatini moliyalashtirish uchun ajratiladigan mablagʻlarning tushishi va siyosiy partiyalarning ushbu mablagʻlardan maqsadli foydalanishi ustidan nazoratni Oʻzbekiston Respublikasi Hisob palatasi amalga oshiradi.

Siyosiy partiyalarning ustavda nazarda tutilgan faoliyatini moliyalashtirish uchun ajratiladigan davlat mablagʻlarining tushishini va siyosiy partiyalar tomonidan ushbu mablagʻlardan foydalanilishini tekshirish, shuningdek Qonunchilik palatasi deputatlari umumiy sonining kamida oʻndan bir qismini tashkil etgan deputatlar guruhining murojaati boʻyicha Qonunchilik palatasi tomonidan ham amalga oshirilishi mumkin.

Siyosiy partiyalar faoliyatining qonun hujjatlariga va ular ustavlariga muvofiqligini nazorat qilish Oʻzbekiston Respublikasi Adliya vazirligi tomonidan amalga oshiriladi.

17. Siyosiy partiya har yili qonun hujjatlarida belgilangan muddatlarda va tartibda Oʻzbekiston Respublikasi Moliya vazirligiga, davlat soliq xizmati organlariga, Oʻzbekiston Respublikasi Hisob palatasiga va Adliya vazirligiga hisobot davrida moliyaviy mablagʻlar va boshqa mablagʻlarning tushumi va sarflanishi toʻgʻrisida hisobot taqdim etishi shart. Davlat mablagʻlarining tushishi va sarflanishi siyosiy partiyaning moliyaviy hisobotida alohida ustunda koʻrsatiladi.

1. Markaziy saylov komissiyasi saylov okruglari boʻyicha saylovlar natijalari toʻgʻrisida okrug saylov komissiyalarining barcha protokollari taqdim etilgan vaqtdan boshlab 3 kun muddatda respublika boʻyicha saylovchilar sonini koʻrsatgan holda umumiy protokol tuzadi. Protokol imzolangandan keyin 10 kun muddat doirasida Adliya vazirligiga va Moliya vazirligiga yuboriladi.

2. Markaziy saylov komissiyasi Qonunchilik palatasi deputatlari roʻyxatdan oʻtkazilgan kundan boshlab 10 kun muddatda Adliya vazirligiga har bir siyosiy partiyadan saylangan deputatlar soni toʻgʻrisidagi maʼlumotlarni taqdim etadi.

3. Siyosiy partiya moliyalashtirishning birinchi oyi boshlangunga qadar Adliya vazirligiga xarajatlar smetasini va bank tomonidan tasdiqlangan hisob raqamini taqdim etadi.

4. Moliya vazirligi ajratilayotgan mablagʻlar miqdorini Adliya vazirligiga maʼlum qiladi.

5. Adliya vazirligi 10 kun muddatda muayyan siyosiy partiyani yillik moliyalashtirish miqdorini va mablagʻlarni oylar boʻyicha ajratish jadvalini belgilaydi. Qaror ikki kun muddatda Moliya vazirligiga yuboriladi.

6. Moliya vazirligi har oyda 10-kungacha mablagʻlarning Adliya vazirligi hisob raqamiga oʻtkazilishini taʼminlaydi.

7. Adliya vazirligi mablagʻlar Moliya vazirligidan tushgan kundan boshlab 3 kun muddatda siyosiy partiyaning hisob raqamiga tegishli summani oʻtkazadi.

1. Siyosiy partiya moliyaviy yildan oldingi yilning 10-dekabrigacha Adliya vazirligiga xarajatlar smetasini va bank tomonidan tasdiqlangan hisob raqamini taqdim etadi.

2. Moliya vazirligi ajratilayotgan mablagʻlar miqdorini har yili Adliya vazirligiga maʼlum qiladi.

3. Adliya vazirligi 10 kun muddatda muayyan siyosiy partiyani yillik moliyalashtirish miqdorini va mablagʻlarni oylar boʻyicha ajratish jadvalini belgilaydi. Qaror 2 kun muddatda Moliya vazirligiga yuboriladi.

4. Moliya vazirligi har oyda 10-kungacha mablagʻlarning Adliya vazirligi hisob raqamiga oʻtkazilishini taʼminlaydi.

5. Adliya vazirligi mablagʻlar Moliya vazirligidan tushgan kundan boshlab 3 kun muddatda siyosiy partiyaning hisob raqamiga tegishli summani oʻtkazadi.

1. Qonunchilik palatasi apparati fraksiyalar roʻyxatdan oʻtkazilgan yoki tugatilgan, shuningdek deputatlar fraksiyaga kirgan yoki uning tarkibidan chiqqan kundan boshlab 3 kun muddatda bu haqda Adliya vazirligiga maʼlum qiladi.

2. Markaziy saylov komissiyasi takroriy saylovlar oʻtkazilgandan hamda chiqib ketgan deputatlar oʻrniga Qonunchilik palatasi deputatlari saylovi boʻlib oʻtgandan keyin, shuningdek deputatlik vakolatlari muddatidan oldin toʻxtatilganda Qonunchilik palatasi deputati roʻyxatdan oʻtkazilgan kundan boshlab 3 kun muddatda bu haqda Adliya vazirligiga maʼlum qiladi.

3. Adliya vazirligi Qonunchilik palatasidan, Markaziy saylov komissiyasidan axborot olingan kundan boshlab 5 kun muddatda qolgan mablagʻlarni qayta taqsimlaydi. Qaror 2 kun muddatda Moliya vazirligiga yuboriladi.

4. Moliya vazirligi har oyda 10-kungacha mablagʻlarning Adliya vazirligi hisob raqamiga oʻtkazilishini taʼminlaydi.

5. Adliya vazirligi mablagʻlar Moliya vazirligidan tushgan kundan boshlab 3 kun muddatda siyosiy partiyaning hisob raqamiga tegishli summani oʻtkazadi.

5. Adliya vazirligi mablagʻlar Moliya vazirligidan tushgan kundan boshlab 3 kun muddatda siyosiy partiyaning hisob raqamiga tegishli summani oʻtkazadi.