Davlat budjetidan ajratilayotgan mablag‘larning maqsadli va samarali sarflanishini ta’minlash, zamonaviy axborot-kommunikatsiya texnologiyalarini keng joriy etish orqali qurilish ustidan davlat va jamoatchilik nazorati mexanizmlarini takomillashtirish, ochiqlik va shaffoflikni ta’minlash maqsadida:

1. 2023-yil 1-yanvardan boshlab O‘zbekiston Respublikasining ijtimoiy va ishlab chiqarish infratuzilmasini rivojlantirish dasturiga va Davlat budjeti mablag‘lari hisobidan amalga oshiriladigan dasturlarga (keyingi o‘rinlarda — Dasturlar) kiritilgan loyihalar, shuningdek, tashabbusli budjetlashtirish jarayonlari asosida moliyalashtiriladigan qurilish-ta’mirlash ishlari bo‘yicha loyihalar (keyingi o‘rinlarda — Loyihalar) doirasida:

obyektlarning bosh loyiha-qidiruv va bosh qurilish-pudrat tashkilotlari Qurilish vazirligining “Shaffof qurilish” milliy axborot tizimida inson omilisiz o‘tkaziladigan elektron tender (tanlov) savdolari orqali aniqlanishi ta’minlansin;

“Shaffof qurilish” milliy axborot tizimida o‘tkazilgan tender (tanlov) savdolari yakuni, shuningdek, qonunchilik hujjatlariga muvofiq to‘g‘ridan-to‘g‘ri muzokaralar bo‘yicha buyurtmachi bilan loyiha-qidiruv va qurilish-pudrat tashkilotlari o‘rtasidagi loyiha-smeta hujjatlarini ishlab chiqish va pudrat ishlarini bajarish to‘g‘risidagi shartnomalar mazkur tizimda elektron raqamli imzo orqali tuzilsin hamda ro‘yxatdan o‘tkazish yoki hisobga olish uchun Moliya vazirligining Davlat moliyasini boshqarish axborot tizimiga elektron shaklda yuborilsin;

tasdiqlangan manzilli ro‘yxatlarga kiritilgan har bir obyekt identifikatsiya raqami berilgan holda, “Shaffof qurilish” milliy axborot tizimiga kiritilsin hamda ular bo‘yicha har qanday o‘zgartirish yoki qo‘shimchalar mazkur axborot tizimida aks ettirilsin;

xavf-xatar toifasidan qat’i nazar, barcha obyektlar qurilish-montaj ishlarini boshlash uchun vakolatli organda ro‘yxatdan o‘tkazilishi va nazoratga olinishi ta’minlansin;

mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchisi, mahalla faollari va yoshlar yetakchilari, ommaviy axborot vositalari va boshqa jamoat tashkilotlari tegishli hududda Dasturlar va Loyihalar doirasida amalga oshirilayotgan ishlarning holati, sifati hamda ko‘lami ustidan jamoatchilik nazoratini o‘rnatsin, unda aniqlangan kamchiliklar haqida Davlat dasturlari ijro etilishini nazorat qilish va muvofiqlashtirish bo‘yicha tuman (shahar) shtablariga ma’lumot taqdim etsin;

“Shaffof qurilish” milliy axborot tizimida obyektlar bo‘yicha aniqlangan bosh pudrat tashkiloti tomonidan ishlar bajarilganligini (tovarlar yetkazib berilganligini) tasdiqlovchi dalolatnoma uning mazkur tizimdagi shaxsiy kabinetida elektron tarzda shakllantirilib, buyurtmachi tashkilot bilan elektron tarzda kelishilsin. Bunda, buyurtmachi tomonidan hisobvaraq-fakturalar Davlat moliyasini boshqarish axborot tizimiga moliyalashtirish uchun elektron shaklda yuboriladi;

“Shaffof qurilish” milliy axborot tizimidagi loyiha-qidiruv va qurilish-pudrat tashkilotlarining reytingida mavjud bo‘lgan korxonalar, ularning reytingini hisoblash mezonlari kesimidagi ballari, Dasturlar hamda Loyihalardagi har bir obyektning shaharsozlik hujjatlari, obyektda bajarilgan ish hajmlari va moliyalashtirilgan mablag‘lar haqidagi ma’lumotlar tizimda real vaqt rejimida jamoatchilik uchun ochiq e’lon qilinsin.

2. Bosh prokuratura (N. Yo‘ldoshev):

a) Dasturlar va Loyihalar doirasida quyidagi yo‘nalishlarda nazoratni kuchaytirsin:

Dasturlarning manzilli ro‘yxatini shakllantirish, obyektlarni moliyalashtirish va qurilish-ta’mirlash ishlarini olib borish tadbirlarini O‘zbekiston Respublikasi Prezidentining 2021-yil 10-dekabrdagi “O‘zbekiston Respublikasining ijtimoiy va ishlab chiqarish infratuzilmasini rivojlantirish dasturi hamda boshqa davlat dasturlari ijrosi ustidan nazoratni kuchaytirishga doir qo‘shimcha chora-tadbirlar to‘g‘risida”gi PQ-43-son qarori bilan belgilangan talablar asosida amalga oshirish;

har bir obyekt bo‘yicha yer maydoni ajratish, loyiha-smeta hujjatlarini ishlab chiqish va ekspertiza qilish, tender (tanlov) savdolarini o‘tkazish va moliyalashtirish tadbirlarini qonunchilik hujjatlarida belgilangan muddatlarda bajarish;

obyektda qurilish-ta’mirlash ishlarini amalga oshirishda arxitektura, shaharsozlik va boshqa qonunchilik hujjatlariga qat’iy rioya etilishini ta’minlash;

loyiha-smeta hujjatlarida ortiqcha ish hajmlari ko‘rsatilishi va mahsulotlar narxlari asossiz oshirilgan holda kiritilishining oldini olish choralarini ko‘rish;

qurilishi tugallangan obyektlarni foydalanishga topshirish va qabul qilish talablariga rioya etilishini ta’minlash, ushbu jarayonda ortiqcha byurokratiyaga yo‘l qo‘yilmaslik choralarini ko‘rish;

jismoniy va yuridik shaxslarning Dastur va Loyihalar doirasidagi qurilishlar bilan bog‘liq murojaatlarini o‘rganish, ularning buzilgan huquqlarini tiklash, qonun buzilishiga yo‘l qo‘ygan shaxslarga nisbatan qonun ustuvorligi va jazo muqarrarligini ta’minlash;

b) har chorakda viloyat, tuman (shahar) prokurorlari va ularga tenglashtirilgan prokurorlar tomonidan qurilish sohasida korrupsiya va qonun buzilishi holatlarining oldini olish yuzasidan ko‘rilayotgan chora-tadbirlar haqida keng jamoatchilikka axborot berib borilishini ta’minlasin.

3. Tashabbusli budjetlashtirish jarayonlari doirasida amalga oshiriladigan qurilish-ta’mirlash ishlari bo‘yicha buyurtmachilar etib:

ichki avtomobil yo‘llari bo‘yicha — Avtomobil yo‘llari qo‘mitasi tizimidagi buyurtmachi tashkilotlar;

ichimlik suv ta’minoti va oqova suv tizimi obyektlari bo‘yicha — “Suv ta’minoti va oqova suv obyektlari qurilishi bo‘yicha injiniring kompaniyasi” unitar korxonasi;

elektr energiyasi va gaz ta’minoti obyektlari hamda aloqa tarmoqlari bo‘yicha — tegishincha “Hududiy elektr tarmoqlari” AJ, “Hududgazta’minot” AJ va “O‘zbektelekom” AK;

ijtimoiy soha obyektlari, mahalla fuqarolar yig‘inlari idoralari, obodonlashtirish, tungi yoritish uskunalarini o‘rnatish ishlari va boshqa obyektlar bo‘yicha — Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari huzuridagi “Yagona buyurtmachi xizmati” injiniring kompaniyalari hamda ushbu obyektlarni saqlash bilan bog‘liq ta’mirlash ishlari bo‘yicha — tegishli tarmoq korxonalari belgilansin.

4. Qurilish vazirligi (B. Zakirov):

a) Transport vazirligi (I. Maxkamov) va Bosh prokuratura (N. Yo‘ldoshev) bilan birgalikda 2023-yil 1-yanvarga qadar Qurilish vazirligi huzuridagi Qurilish sohasida nazorat inspeksiyasi va Transport vazirligi huzuridagi Yo‘l-qurilish ishlari sifatini nazorat qilish inspeksiyasi ish uslublarini to‘liq qayta ko‘rib chiqib, qurilish obyektlarini ro‘yxatga olishdan boshlab, foydalanishga qabul qilishgacha bo‘lgan barcha jarayonlarni raqamlashtirsin hamda “Shaffof qurilish” milliy axborot tizimining vazirlik va idoralarning avtomatlashtirilgan real vaqt rejimida ishlovchi monitoring tizimlari bilan integratsiya qilinishini ta’minlasin;

b) Iqtisodiy taraqqiyot va kambag‘allikni qisqartirish vazirligi (A. Boboyev), Moliya vazirligi (T. Ishmetov), Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda “Shaffof qurilish” milliy axborot tizimida 2023-yil 1-yanvarga qadar:

Dasturlar va Loyihalarning ro‘yxatlarini yuritish, ularga kiritiladigan barcha o‘zgartirish va qo‘shimchalarni aks ettirish;

bosh pudrat tashkiloti tomonidan ishlar bajarilganligini (tovarlar yetkazib berilganligini) tasdiqlovchi dalolatnomalarni uning shaxsiy kabinetida elektron shaklda rasmiylashtirish, buyurtmachi bilan elektron tarzda kelishish va buyurtmachi tomonidan hisobvaraq-fakturani Davlat moliyasini boshqarish axborot tizimiga moliyalashtirish uchun elektron shaklda yuborish imkoniyatini yaratsin;

v) Axborot texnologiyalari va kommunikatsiyalarini rivojlantirish vazirligi (Sh. Shermatov), Moliya vazirligi (T. Ishmetov) bilan birgalikda bir oy muddatda “Shaffof qurilish” milliy axborot tizimidagi loyiha-qidiruv va qurilish-pudrat tashkilotlarining reytingida mavjud bo‘lgan korxonalar hamda ularning reytingini hisoblash mezonlari kesimidagi ballari, Dasturlar va Loyihalardagi har bir obyektning shaharsozlik hujjatlari, obyektda bajarilgan ish hajmlari va moliyalashtirilgan mablag‘lar to‘g‘risidagi ma’lumotlarni tizimda real vaqt rejimida jamoatchilik uchun ochiq e’lon qilinishini ta’minlash choralarini ko‘rsin;

g) ikki oy muddatda qurilishi tugallangan obyektlarni qabul qilish va foydalanishga topshirish bo‘yicha tuziladigan komissiyalarning tarkibini shakllantirish bo‘yicha takliflarni Vazirlar Mahkamasiga kiritsin;

d) uch oy muddatda Davlat budjeti mablag‘lari hisobidan qurilish-ta’mirlash ishlari amalga oshiriladigan obyektlarda jamoatchilik nazoratini amalga oshirishda loyiha-qidiruv va qurilish-pudrat tashkilotlari reytingi va elektron tender (tanlov) savdolari bilan bog‘liq jarayonlarni hamda qurilish obyektlaridagi kamchiliklar va qonun buzilish holatlarini aks ettiruvchi foto va video materiallarni yuklash imkonini beruvchi “Shaffof qurilish” milliy axborot tizimining mobil ilovasini yaratsin.

5. Moliya vazirligi (T. Ishmetov) ikki oy muddatda Korrupsiyaga qarshi kurashish agentligi (A. Burxanov), Qurilish vazirligi (B. Zakirov) bilan birgalikda Insofsiz ijrochilarning yagona reyestrini shakllantirish tartibini tasdiqlasin hamda ushbu reyestrning “Shaffof qurilish” milliy axborot tizimi bilan integratsiya qilinishini ta’minlasin.

6. Iqtisodiy taraqqiyot va kambag‘allikni qisqartirish vazirligi (A. Boboyev) Moliya vazirligi (T. Ishmetov), Qurilish vazirligi (B. Zakirov), Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, manfaatdor vazirlik va idoralar bilan birgalikda 2023-yil 1-aprelga qadar Dasturlarga kiritiladigan obyektlarning manzilli ro‘yxatini “Shaffof qurilish” milliy axborot tizimi orqali shakllantirish imkoniyatini yaratish bo‘yicha texnik topshiriqni ishlab chiqsin hamda kelgusida Dasturlar ushbu tizimda shakllantirilishini ta’minlasin.

7. Hisob palatasi (B. Turabov) Dasturlar va Loyihalar asosida moliyalashtiriladigan obyektlarga ajratilgan mablag‘larning maqsadli hamda samarali ishlatilishini nazorat qilib borsin.

8. Bosh prokuratura (N. Yo‘ldoshev) ikki oy muddatda:

ushbu qaror bilan joriy etilayotgan tartibning mazmun-mohiyatini tushuntirish bo‘yicha mas’ul vazirlik va idoralar, loyiha-qidiruv va qurilish-pudrat tashkilotlari vakillari ishtirokida o‘quv seminarlari o‘tkazilishini, ular o‘rtasida targ‘ibot ishlari olib borilishini ta’minlasin;

manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

9. Ushbu qarorning ijrosini nazorat qilish O‘zbekiston Respublikasi Prezidentining maslahatchisi R.A. Gulyamov va O‘zbekiston Respublikasi Prezidenti maslahatchisining o‘rinbosari D.B. Kadirov zimmasiga yuklansin.