O‘zbekiston Respublikasining Budjet kodeksi hamda “Normativ-huquqiy hujjatlar to‘g‘risida”gi Qonuniga muvofiq, shuningdek Uchquduq, Zarafshon, Nurobod shaharlari va shahar tipidagi Zafarobod posyolkasining budjet tashkilotlari xodimlariga muayyan davr ishlaganlik uchun oylik to‘lovlar olish huquqini beradigan ish stajini hisoblab chiqishni tartibga solish maqsadida O‘zbekiston Respublikasi Bandlik va mehnat munosabatlari vazirligi va O‘zbekiston Respublikasi Moliya vazirligi qaror qiladi:

1. Mehnat va aholini ijtimoiy muhofaza qilish vazirligi va Moliya vazirligining 2001-yil 5-apreldagi 2 va 33-son qarori (ro‘yxat raqami 1026, 2001-yil 13-aprel) (O‘zbekiston Respublikasi vazirliklari, davlat qo‘mitalari va idoralari normativ hujjatlari byulleteni, 2001-yil, 7-son) bilan tasdiqlangan Uchquduq, Zarafshon, Nurobod shaharlari va shahar tipidagi Zafarobod posyolkasining budjet tashkilotlari xodimlariga muayyan davr ishlaganlik uchun oylik to‘lovlar to‘lash tartibi to‘g‘risidagi nizomga ilovaga muvofiq o‘zgartirishlar kiritilsin.

2. Ushbu qaror rasmiy e’lon qilingan kundan e’tiboran kuchga kiradi.

1. 3¹-band quyidagi tahrirda bayon etilsin:

“3¹. Mulkchilik shaklidan qat’i nazar boshqa tashkilotdan Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlariga ishga kirganda, ish staji saqlanib qolinadi.

Bunda, mulkchilik shaklidan qat’i nazar boshqa tashkilotdagi (Uchquduq, Zarafshon, Nurobod shaharlari va shahar tipidagi Zafarobod posyolkasidagi budjet tashkilotlari, shuningdek Vazirlar Mahkamasining 2020-yil 8-yanvardagi 5-F-son farmoyishiga asosan “Navoiy kon-metallurgiya kombinati” davlat korxonasi tizimidan Maktabgacha ta’lim vazirligi tizimiga o‘tkazilgan maktabgacha ta’lim tashkilotlaridan tashqari) ish staji, budjet tashkilotlari xodimlariga muayyan davr ishlaganlik uchun oylik to‘lovlar to‘lanishi huquqini beradigan ish stajiga kiritilmaydi.”.

2. 4-bandning birinchi xatboshisi quyidagi tahrirda bayon etilsin:

“4. “Yagona milliy mehnat tizimi” idoralararo dasturiy-apparat kompleksida avtomatik tarzda shakllantiriladigan, QR-kod bilan tasdiqlangan elektron mehnat daftari xodimning mehnat stajini tasdiqlovchi asosiy hujjat hisoblanadi.”.