Oʻzbekiston Respublikasi Prezidentining “Sportni rivojlantirish vazirligi faoliyatini tashkil etish toʻgʻrisida” 2022-yil 18-fevraldagi PQ-136-son qarori ijrosi yuzasidan Vazirlar Mahkamasi qaror qiladi:

1. Oʻzbekiston Respublikasi Prezidentining “Sportni rivojlantirish vazirligi faoliyatini tashkil etish toʻgʻrisida” 2022-yil 18-fevraldagi PQ-136-son qaroriga muvofiq:

Sport vazirligining budjetdan tashqari Sportni qoʻllab-quvvatlash jamgʻarmasi tashkil etilganligi (keyingi oʻrinlarda — Jamgʻarma) hamda uning mablagʻlarini shakllantirish manbalari belgilanganligi;

Jamgʻarma mablagʻlari Sport vazirligi va uning hududiy boʻlinmalari, shuningdek, tizim tashkilotlari xodimlarini qoʻshimcha ragʻbatlantirishga, moddiy-texnik bazani mustahkamlashga, sohani raqamlashtirishga hamda sportni rivojlantirish bilan bogʻliq boʻlgan boshqa tadbirlarga yoʻnaltirilishi nazarda tutilganligi maʼlumot uchun qabul qilinsin.

2. Quyidagilarni nazarda tutuvchi Oʻzbekiston Respublikasi Sport vazirligining budjetdan tashqari Sportni qoʻllab-quvvatlash jamgʻarmasi mablagʻlarini shakllantirish va ulardan foydalanish tartibi toʻgʻrisida nizom ilovaga muvofiq tasdiqlansin:

Jamgʻarmaning maqomi, jamgʻarma mablagʻlarini shakllantirish manbalari, unga tushgan mablagʻlarni vazirlik tomonidan ochiladigan shaxsiy gʻazna hisobvaraqlari va xorijiy valyutadagi bank hisobvaraqlarida jamlash;

Jamgʻarma mablagʻlaridan har yili vazirlik tomonidan tasdiqlanadigan, Iqtisodiyot va moliya vazirligi bilan kelishilgan daromadlar va xarajatlar smetasiga qatʼiy muvofiq ravishda foydalanish yoʻnalishlari va tartibi;

Jamgʻarma mablagʻlaridan oqilona va maqsadli foydalanilishini nazorat qilish.

3. Sportni rivojlantirish vazirligi manfaatdor vazirlik va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi sport vaziri A.I. Ikramov zimmasiga yuklansin.

1. Ushbu Nizom Oʻzbekiston Respublikasi Sport vazirligining budjetdan tashqari Sportni qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish tartibini belgilaydi.

2. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida jamgʻarma uchun ochilgan Sport vazirligi (keyingi oʻrinlarda — Vazirlik) hamda uning tizimidagi budjet tashkilotlarining shaxsiy gʻazna hisobvaragʻida, shu jumladan, xorijiy valyutadagi shaxsiy gʻazna hisobvaraqlarida jamlanadi.

3. Jamgʻarma quyidagi manbalar hisobiga shakllantiriladi:

muassisi Vazirlik hisoblangan tashkilotlar (keyingi oʻrinlarda — tizim tashkilotlari) ixtiyorida soliqlar va yigʻimlar toʻlanganidan keyin qoladigan sof foydaning bir qismi;

xususiylashtirish toʻgʻrisidagi qonunchilik hujjatlariga muvofiq davlat mulki obyektlarini realizatsiya qilishdan tushadigan tegishli mablagʻlar;

tizimdagi tashkilotlarning mol-mulkini (bundan koʻchmas mulk mustasno) sotishdan tushgan mablagʻlarning 50 foizi;

tizimdagi tashkilotlarning mol-mulkini ijaraga berishdan tushgan budjetga yoʻnaltirilayotgan mablagʻlarning 50 foizi;

tizimdagi tashkilotlar faoliyatini tekshirish natijalari boʻyicha Vazirlikning ichki audit xizmatlari tomonidan aniqlangan Davlat budjeti mablagʻlarining, shuningdek, talon-toroj, rastratalar, kamomadlar summalarining 50 foizi;

tizimdagi tashkilotlar faoliyatini tekshirish natijalari boʻyicha Vazirlikning ichki audit xizmatlari tomonidan aniqlangan hamda davlat maqsadli jamgʻarmalari va budjetdan tashqari jamgʻarmalar daromadiga undirilgan noqonuniy sarflangan budjet mablagʻlari, talon-toroj, rastratalar, kamomadlar summalari;

tizimdagi tashkilotlarning budjetdan tashqari jamgʻarmalariga tushadigan mablagʻlarning 10 foizi;

Jamgʻarmaning vaqtincha boʻsh turgan mablagʻlarini joylashtirishdan olinadigan daromadlar;

sport sohasidagi davlat-xususiy sheriklik loyihalarini amalga oshirishdan tushadigan mablagʻlar;

jismoniy va yuridik shaxslarning, shu jumladan, Oʻzbekiston Respublikasi norezidentlarining homiylik xayriyalari;

xalqaro moliya tashkilotlari va xorijiy davlatlarning grantlari va texnik koʻmaklashish mablagʻlari;

qonunchilik hujjatlarida taqiqlanmagan boshqa manbalar.

4. Davlat aktivlarini boshqarish, transformatsiya va xususiylashtirish jamgʻarmasiga davlat aktivlarini sotishdan tushadigan mablagʻlarning 3 foizi (Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining qarorlari asosida sotiladigan davlat mulki obyektlarini sotishdan hamda yer uchastkalarini xususiylashtirishdan tushadigan mablagʻlar bundan mustasno) Jamgʻarmaga yoʻnaltiriladi.

Davlat aktivlarini boshqarish agentligi ushbu mablagʻlarni har oyda hisobot oyidan keyingi oyning oʻn beshinchi sanasiga qadar Jamgʻarmaga oʻtkazib boradi. Bunda tadbirkorlikni rivojlantirishni qoʻllab-quvvatlash, shu jumladan, tadbirkorlar uchun tashkil etiladigan oʻquv kurslarini maqsadli moliyalashtirish maqsadida Savdo-sanoat palatasi Rayosati tomonidan belgilangan, biroq tushumning (Jamgʻarmaga tushadigan 3 foiz qismidan) 10 foizidan oshmagan miqdori Savdo-sanoat palatasiga maqsadli yoʻnaltiriladi.

Vazirlik va Davlat aktivlarini boshqarish agentligi har chorakda Jamgʻarmaga Nizomning ushbu bandiga muvofiq tushadigan tushumlar boʻyicha hisobotlarni toʻgʻri yuritilishini taʼminlash maqsadida solishtirma-dalolatnoma tuzadilar.

5. Jamgʻarma mablagʻlaridan har yili Vazirlik tomonidan tasdiqlanadigan va Iqtisodiyot va moliya vazirligida roʻyxatdan oʻtkaziladigan daromadlar va xarajatlar smetasiga muvofiq foydalaniladi.

6. Jamgʻarma mablagʻlaridan quyidagi maqsadlarda foydalaniladi:

sport sohasini rivojlantirish dasturlari xarajatlarini moliyalashtirishga;

Vazirlik, uning tizimidagi tashkilotlar bino va inshootlarini qurish va taʼmirlashga, shuningdek, ularning moddiy-texnik bazasini mustahkamlashga (mebel, orgtexnika, avtotransport vositalarini xarid qilish va boshqalar) hamda joriy saqlash xarajatlariga;

yangi sport inshootlarini qurish va foydalanishga topshirishga;

sport va ommaviy jismoniy tarbiya tadbirlarini tashkil etish va oʻtkazish bilan bogʻliq xarajatlarni moliyalashtirishga;

vakillik xarajatlari va sovgʻalar xarid qilishga;

Vazirlikka qonunchilikda belgilangan tartibda fuqarolik-huquqiy xususiyatga ega shartnomalar asosida ishlash uchun mutaxassislarni, shu jumladan, xorijiy ekspertlarni va xorijda istiqomat qilayotgan vatandoshlarni shartnomalar orqali jalb etishga;

sport sohasida kadrlarni tayyorlash, qayta tayyorlash va ularning malakasini oshirish, shu jumladan, Vazirlik markaziy apparati hamda tizimdagi tashkilotlar xodimlarining sohaviy xorijiy oʻquv markazlarida va taʼlim tashkilotlarida stajirovkadan oʻtishga, konferensiya, seminar va boshqa tadbirlarda ishtirok etishiga;

sport sohasiga doir raqamlashtirish tizimini yuritish va uni texnik jihatdan qoʻllab-quvvatlashga;

Vazirlik markaziy apparati hamda uning tizimidagi budjet tashkilotlari xodimlarini moddiy ragʻbatlantirish va ijtimoiy qoʻllab-quvvatlashga (mukofotlar toʻlash, maoshlarga ustamalar belgilash, moddiy yordam koʻrsatish va boshqalar), budjetdan tashqari mablagʻlar hisobidan hisoblangan va toʻlangan oʻrtacha ish haqiga qoʻshilgan va ijtimoiy sugʻurta badallari (ijtimoiy soliq) hisoblangan, mehnat taʼtili va foydalanilmagan taʼtil uchun kompensatsiya hamda boshqa toʻlovlarga;

Vazirlik tomonidan oʻz tizimida tashkil etiladigan davlat muassasalarini saqlash xarajatlari, tizimidagi tashkilotlarning ustav fondini shakllantirish hamda toʻgʻridan-toʻgʻri tuziladigan shartnomalar asosida ularning ustavlariga muvofiq ular tomonidan bajariladigan (koʻrsatiladigan) ishlar (xizmatlar) uchun toʻlovlarni amalga oshirishga;

Vazirlik va uning tizimidagi budjet tashkilotlariga aviachiptalar xarid qilish, xizmat safarlari xarajatlarini qoplash, aʼzolik badallarini toʻlash, xorijiy adabiyotlar xarid qilish va qonunchilikda nazarda tutilgan xorijiy valyutadagi boshqa xarajatlarga haq toʻlash uchun xorijiy valyutada mablagʻlar ajratishga;

nodavlat notijorat tashkilotlar bilan hamkorlikda amalga oshiriladigan loyihalarni moliyalashtirish, ular faoliyatini ragʻbatlantirish, sport sohasidagi loyihalarga grantlar ajratish, shuningdek, sport federatsiya (assotsiatsiya)larining xalqaro tashkilotlarga aʼzolik badallarini sport vazirining (keyingi oʻrinlarda — Vazir) buyrugʻi bilan toʻlab berishga;

Vazirlikka yuklatilgan vazifalarni amalga oshirishga mahalliy va xorijiy ilmiy muassasalar, olim va mutaxassislarni, ilmiy-tadqiqot tashkilotlari, oliy taʼlim muassasalari hamda boshqa yuridik va jismoniy shaxslarni belgilangan tartibda shartnoma asosida jalb qilishga;

Oʻzbekiston sport faxriylari kengashi faoliyatini moliyalashtirishga;

Oʻzbekiston Respublikasi Prezidenti va Vazirlar Mahkamasining topshiriqlari asosida xarajatlarni moliyalashtirish (qoplash), shuningdek, Oʻzbekiston Respublikasiga tashrif buyuradigan xorijiy davlatlar, xalqaro tashkilotlar delegatsiyalarining tashriflarini tashkil etish va moliyalashtirishga;

yuqori natijaga erishgan sportchilar va ularning trenerlarini qoʻshimcha ragʻbatlantirish maqsadida esdalik sovgʻalari xarid qilish, pul koʻrinishida mukofotlar toʻlashga;

Vazirlik tizimidagi taʼlim muassasalarining iqtidorli, shuningdek, ijtimoiy himoyaga muhtoj, chin yetim va nogironligi boʻlgan talabalari (oʻquvchilari)ni qoʻllab-quvvatlash maqsadida stipendiyalar toʻlashga (stipendiyalar miqdori Vazir buyrugʻiga asosan belgilanadi);

Vazirlikning kasaba uyushmasiga jamoa shartnomasida (kelishuvida) belgilangan maqsadlar va miqdorlarda mablagʻlar oʻtkazishga.

Vazirlik va uning tizimidagi budjet tashkilotlarining vazifalari va faoliyatining asosiy yoʻnalishlarini amalga oshirishga qaratilgan boshqa xarajatlarni moliyalashtirishga.

7. Vazirlik markaziy apparatining shaxsiy gʻazna hisobvaragʻidan zarur hollarda, uning tizimidagi budjet tashkilotlarining shaxsiy gʻazna hisobvaragʻiga mazkur Nizomning 6-bandida nazarda tutilgan xarajatlarni amalga oshirish uchun maqsadli mablagʻlar oʻtkazib beriladi.

8. Vazirlik tomonidan, istisno tariqasida, nodavlat notijorat tashkilotlar va fuqarolik jamiyatining boshqa institutlariga davlat ijtimoiy buyurtmasi shaklida mablagʻ ajratishda mablagʻlarning 50 foizigacha qismi oldindan avans tariqasida, qolgan qismi esa — avans mablagʻlarining oʻzlashtirilishiga qarab ajratilishi mumkin.

9. Jamgʻarma mablagʻlari hisobidan Vazirlik hamda uning tizimidagi budjet tashkilotlari xodimlarini moddiy ragʻbatlantirish va ijtimoiy himoya qilish Jamgʻarma moliyaviy holatidan kelib chiqib, quyidagi shakllarda amalga oshiriladi:

koʻp yillik ishlaganlik uchun qoʻshimcha haq va ustamalar toʻlash;

qonunchilikda belgilangan bayram kunlarda va boshqa muhim sanalarda bir martalik pul mukofoti bilan mukofotlash;

lavozim maoshlariga har oylik belgilanadigan shaxsiy ustama toʻlash;

ishda muvaffaqiyatlarga erishganligi va muhim topshiriqlarni bajarganligi uchun alohida xodimlarni mukofotlash;

ovqat puli uchun toʻlov;

yoʻl kira xarajatlari uchun toʻlov;

moddiy yordam koʻrsatish.

10. Vazirlik markaziy apparati xodimlariga Jamgʻarma hisobidan, quyidagi miqdorda koʻp yillik ishlaganlik uchun har oylik ustama toʻlanadi (ustama va ragʻbatlantirish koeffitsiyentini inobatga olgan holda lavozim maoshiga nisbatan koeffitsiyentlarda):

1 yildan 3 yilgacha — 0,3;

3 yildan 5 yilgacha — 0,6;

5 yildan 10 yilgacha — 0,8;

10 yildan 15 yilgacha — 1,0;

15 yildan 20 yilgacha — 1,2;

20 yildan yuqori — 1,5.

Bunda koʻp yillik ishlaganlik uchun har oylik ustama toʻlovlari koeffitsiyentini hisoblashda Vazirlik markaziy apparati xodimlarining tashkiliy-huquqiy shaklidan qatʼi nazar (yakka tadbirkor va oʻzini oʻzi band qilib ishlagan davridan tashqari), barcha tashkilotlardagi rasmiy mehnat faoliyati davri hisobga olinadi.

11. Vazirlik hamda uning tizimidagi budjet tashkilotlari xodimlari quyidagi bayramlar va muhim sanalar munosabati bilan mukofotlanadi.

1-yanvar — Yangi yil;

8-mart — Xalqaro xotin-qizlar kuni;

21-mart — Navroʻz bayrami;

9-may — Xotira va qadrlash kuni;

Ramazon hayiti (Iyd al-Fitr);

Qurbon hayiti (Iyd al-Adha);

1-sentabr — Mustaqillik kuni;

1-oktabr — Oʻqituvchi va murabbiylar kuni;

8-dekabr — Konstitutsiya kuni.

Bunda xodimlarga beriladigan mukofot miqdori Vazir tomonidan belgilanadi.

12. Vazirlik markaziy apparati xodimlariga Jamgʻarma hisobidan quyidagi ustama va ragʻbatlantirish choralari belgilanadi:

tashabbuskorlik va mehnat natijalari boʻyicha har oyda shaxsiy ustama toʻlovlari lavozim maoshining (ustama va ragʻbatlantirish koeffitsiyenti hamda koʻp yillik ishlaganlik uchun ustamani hisobga olgan holda) — ikki yuz ellik foizigacha boʻlgan miqdorda;

xizmat vazifalarini sidqidildan bajarganligi, ijro intizomiga rioya etilganligi, oʻz xizmat faoliyati samaradorligini oshirish motivatsiyasi va xizmat vazifalarini samarali bajarish tizimini joriy etganligi hamda moddiy javobgarligi yuqori boʻlgan xodimlarga har chorakda lavozim maoshining (ustama va ragʻbatlantirish koeffitsiyenti hamda koʻp yillik ishlaganlik uchun ustamani hisobga olgan holda) — ikki yuz foizigacha boʻlgan miqdorda.

Mazkur bandda nazarda tutilgan ustamalar xodim ishga kirgan oyning keyingi oyidan boshlab qoʻllaniladi.

13. Vazirlik hamda uning tizimidagi budjet tashkilotlari xodimlari alohida muvaffaqiyatlarga erishganligi va muhim topshiriqlarni bajarganligi uchun chorak yakunlari boʻyicha lavozim maoshining (ustama va ragʻbatlantirish koeffitsiyenti hamda koʻp yillik ishlaganlik uchun ustamani hisobga olgan holda) ikki yuz foizigacha miqdorda mukofotlanadi.

Ustama va ragʻbatlantirish choralari joriy qilinadigan xodimlar toifasi, tartibi va ularga beriladigan ustama va ragʻbatlantirish miqdori Vazir tomonidan belgilanadi.

14. Vazirlik xodimlarini ijtimoiy himoya qilish maqsadida ularga har oyda bazaviy hisoblash miqdorining ikki baravarigacha miqdorda ovqat puli hamda yoʻl kira xarajatlarini qoplash uchun bazaviy hisoblash miqdorining bir baravarigacha miqdorda yoʻl kira puli beriladi.

15. Vazirlik markaziy apparati xodimlariga Vazirlik kasaba uyushmasining iltimosnomasiga binoan quyidagi sharoitlar va miqdorlarda moddiy yordam koʻrsatiladi:

a) xodimning yubiley sanalari (50, 55, 60, 65, 70) munosabati bilan bazaviy hisoblash miqdorining oʻttiz baravari;

b) xodimning oʻzi oila qurganda yoki farzandining toʻyi munosabati bilan (nikoh guvohnomasiga asosan, faqat birinchi nikoh uchun) bazaviy hisoblash miqdorining ellik baravari;

v) xodim vafot etganda, uning turmush oʻrtogʻi yoki qonuniy vakiliga bazaviy hisoblash miqdorining yuz baravari;

g) Oila kodeksiga muvofiq xodimning yaqin qarindoshlari (ota-onasi, turmush oʻrtogʻi va farzandlari) vafot etganda (oʻlim toʻgʻrisidagi guvohnomaga asosan) bazaviy hisoblash miqdorining oʻttiz baravari;

d) alohida ehtiyoj tugʻilganda (baxtsiz hodisa, avariya, uzoq muddatli kasallik sababli maxsus davolanish va sogʻliqni qayta tiklashga, shuningdek, oiladagi ogʻir moddiy ahvol va boshqa holatlar) bazaviy hisoblash miqdorining ellik baravari;

e) qishloq xoʻjaligi mahsulotlarini sotib olish uchun yilda bir marta (qoida tariqasida kuz oylarida) bazaviy hisoblash miqdorining oʻn baravari miqdorida.

16. Soha rivojlanishida alohida xizmat koʻrsatgan xodimlarga mehnat taʼtili davrida oilasi (turmush oʻrtogʻi va voyaga yetmagan farzandlari) bilan sanatoriy-kurort zonalarida dam olishi bilan bogʻliq xarajatlari qoplab berilishi mumkin.

Bunda ushbu xarajatlarning qoplab beriladigan qismi bazaviy hisoblash miqdorining yigirma baravaridan oshmasligi lozim.

17. Jamgʻarma mablagʻlarining hisob va hisoboti Vazirlik tomonidan qonunchilik hujjatlariga muvofiq yuritiladi.

18. Jamgʻarma mablagʻlaridan oqilona va maqsadli foydalanilishini nazorat qilish Vazirlikning Ichki audit va nazorat boshqarmasiga yuklanadi.

19. Vazirlik belgilangan tartibda Jamgʻarmaga mablagʻlar tushishi va ulardan maqsadli foydalanilishi toʻgʻrisida Iqtisodiyot va moliya vazirligiga hisobot taqdim etadi.

20. Jamgʻarmaning hisobot yilida foydalanilmagan mablagʻlari olib qoʻyilmaydi va keyinchalik ushbu Nizomda nazarda tutilgan tartibda foydalanish uchun milliy va xorijiy valyutada jamgʻarib boriladigan gʻaznachilik shaxsiy gʻazna hisobvaraqlarida qoladi.

21. Ushbu Nizomning talablariga rioya etilishi qonunchilik hujjatlariga muvofiq nazorat qilinadi.

22. Ushbu Nizom talablarini buzgan shaxslar qonunchilik hujjatlariga muvofiq javob beradi.