Oʻzbekiston Respublikasi Prezidentining “Toshkent islom universiteti Maslahat kengashini tuzish toʻgʻrisida” 1999-yil 7-iyundagi 1015-F-son Farmoyishini bajarish hamda universitet faoliyatini takomillashtirish maqsadida Vazirlar Mahkamasi qaror qiladi:

Toshkent islom universitetining Maslahat kengashi nizomi ilovaga muvofiq tasdiqlansin.

1.1. Oʻzbekiston Respublikasi Prezidentining “Toshkent islom universiteti Maslahat kengashini tuzish toʻgʻrisida” 1999-yil 7-iyundagi Farmoyishiga asosan tuzilgan Universitet Maslahat kengashi Toshkent islom universitetining faoliyatini tashkil etish, yurtimiz va chet ellardagi islom universitetlari, diniy tashkilotlar, tadqiqot va taʼlim muassasalari bilan hamkorlik qilish, zamonaviy fikrlovchi hamda diniy ilmlarga ega boʻlgan mutaxassislar tayyorlash, universitet, islom tadqiqotlar markazi, akademik litsey faoliyati siyosatini shakllantirishda tavsiyalar beradigan kengash hisoblanadi.

1.2. Toshkent islom universitetining Maslahat kengashi jamoatchilik asosida faoliyat koʻrsatadi, universitet oʻquv va ilmiy-tadqiqot faoliyatini amalga oshirishda muvofiqlashtiruvchi va uygʻunlashtiruvchi mohiyatga egadir.

1.3. Toshkent islom universitetining Maslahat kengashi oʻz faoliyatida Oʻzbekiston Respublikasi Konstitutsiyasi, Oʻzbekiston Respublikasi qonunlari, Oʻzbekiston Respublikasi Oliy Majlisining qarorlari, Oʻzbekiston Respublikasi Prezidentining farmonlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlariga hamda ushbu Nizomga amal qiladi.

2.1. Toshkent islom universitetining rahbariyati, ilmiy-pedagogik kadrlar tarkibini shakllantirishda universitet oldiga qoʻyilgan vazifalardan kelib chiqib, tavsiyalar berish.

2.2. Universitet talabalarini mustaqil Vatanimizga sadoqatli va fidokor boʻlgan, boy madaniy va maʼnaviy merosimizni chuqur oʻrgangan, zamonaviy texnologiyalar va taʼlim uslublari asosida dunyoviy hamda diniy ilmlarni uygʻun ravishda oʻzlashtirgan yetuk mutaxassislar darajasida tayyorlash boʻyicha tavsiyalar berish.

2.3. Jahondagi nufuzli ilmiy-tadqiqot markazlarining va oliy taʼlim muassasalarining tajribasini atroflicha oʻrganish, tahlil etish hamda diniy tashkilotlar bilan aloqalar oʻrnatish asosida universitet oʻquv-tarbiya jarayoni sifatini zamonaviy talablar darajasida tashkil etish, millatimizning buyuk ilmiy, maʼnaviy qadriyatlari asosida yetuk islomshunos mutaxassis kadrlarni tayyorlashni taʼminlash boʻyicha tavsiyalar ishlab chiqish.

2.4. Homiylarni, shu jumladan, xorijiy sarmoyalarni jalb etish, yetakchi tadqiqot va taʼlim markazlarining oʻqitish uslubiyati, taʼlimni tashkil etish tajribasini yaqindan oʻrganish va Kadrlar tayyorlash milliy dasturiga mos ravishda tatbiq etish hamda chet ellardan taʼlim va tadqiqotlar jarayoniga sohaning yetuk mutaxassislarini taklif etishda tavsiyalar berish.

2.5. Universitetning vazifalaridan kelib chiqqan holda Islom tarixi va madaniyati boʻyicha konseptual tadqiqotlar dasturlarini tahlil qilish, ilmiy yoʻnalishlar boʻyicha tavsiyalar berish.

2.6. Mamlakatimizda mavjud boʻlgan boy diniy, milliy va maʼnaviy merosni oʻrganish, diyorimizdan yetishib chiqqan allomalarning asarlarini tadqiq etish, ilmiy-tanqidiy materiallarni tayyorlash va ularni nashr etishda koʻmaklashish.

2.7. Universitet Ilmiy kengashini tuzish, uning faoliyatini tashkil etish va ilmiy yoʻnalishlarini belgilashda tavsiyalar berish.

2.8. Dunyoviy va diniy fanlarning uygʻunligini taʼminlash asosida oʻquv dasturlarini muvofiqlashtirish, takliflar tayyorlash hamda oʻquv jarayoni oldiga qoʻyilgan vazifalarni har tomonlama takomillashtirishda universitet Ilmiy kengashiga tavsiyalar berish.

2.9. Universitet va uning huzuridagi Islom tadqiqotlar markazi, akademik litseyda olib boriladigan ilmiy-uslubiy tadqiqotlar yoʻnalishi va mavzulari boʻyicha hamda Manbalar xazinasini tashkil etishda tavsiyalar berish.

2.10. Universitetning maqsad va vazifalarini amalga oshirishda keng jamoatchilik bilan aloqa bogʻlash, bu borada omma fikrini shakllantirishga koʻmaklashish.

2.11. Respublikaning ushbu soha mutaxassis kadrlariga boʻlgan ehtiyojini hisobga olgan holda ularning yoʻnalish va ixtisosliklari roʻyxatini tuzishda tavsiyalar berish.

2.12. Kadrlar tayyorlash boʻyicha davlat buyurtmasiga muvofiq universitetning manfaatdor tashkilotlar bilan shartnomalar tuzishida koʻmaklashish.

2.13. Ilmiy-pedagogik kadrlar tayyorlash, qayta tayyorlash, ularning respublikamiz va chet ellarda malaka oshirishlarini tashkil etishda yordam berish.

2.14. Universitetning ijtimoiy-moddiy muhiti, sport-sogʻlomlashtirish, sogʻliqni saqlash, davolash hamda madaniy-maishiy muassasalar tarmogʻini rivojlantirishda koʻmaklashish.

3.1. Maslahat kengashining tarkibi Prezident farmoyishi bilan tuziladi.

3.2. Maslahat kengashi yigʻilishlarini Prezident tomonidan tayinlangan Rais boshqaradi. Maslahat kengashi yigʻilishlari ikki oyda bir marta, shuningdek zarur boʻlgan hollarda oʻtkaziladi.

3.3. Maslahat kengashi qabul qilgan tavsiyalar bayonnomalarda rasmiylashtiriladi va bu tavsiyalar universitet rahbariyati hamda uning ilmiy kengashiga ijro uchun yetkaziladi.

3.4. Universitet rahbariyati berilgan tavsiyalarning bajarilishi boʻyicha Maslahat kengashiga muntazam axborot berib boradi.

3.5. Maslahat kengashining raisi oʻz ish faoliyati toʻgʻrisida Prezident devoniga muntazam axborot berib turadi.

3.6. Maslahat kengashi faoliyati Oʻzbekiston Respublikasi Prezidenti farmoyishi bilan belgilangan tartibda qayta tashkil etiladi yoki tugatiladi.