Davolash muassasalarining moddiy-texnika bazasini mustahkamlash, sogʻliqni saqlashni mablagʻ bilan taʼminlashga yoʻnaltirilayotgan budjet mablagʻlaridan yanada oqilona foydalanish, turgʻun davolanishdagi fuqarolarga tibbiy xizmat koʻrsatishni takomillashtirish maqsadida Oʻzbekiston Respublikasi Vazirlar Mahkamasi qaror qiladi:

1. 1998-yil 1-yanvardan boshlab turgʻun davolash-profilaktika muassasalarida davolanayotgan kishilar uchun ovqatlanish (nonushtadan tashqari) toʻlovi joriy etilsin, 1 va 2-ilovalarda koʻrsatilgan kasalliklarning ayrim turlariga chalingan shaxslar toʻlovdan ozod qilinsin.

2. Belgilab qoʻyilsinki, turgʻun davolash-profilaktika muassasalarida ovqatlanish toʻlovi fuqarolarning shaxsiy mablagʻlari, korxonalar, tashkilotlar, xayriya jamgʻarmalarining va boshqa homiylarning mablagʻlari hisobiga amalga oshiriladi.

Mulkchilik shakllaridan qatʼi nazar korxonalar, tashkilotlar va muassasalarning rahbarlariga, mehnat jamoalari bilan kelishilgan holda, turgʻun davolash-profilaktika muassasalarida ovqatlanish toʻlovini ularning tasarrufida qoladigan foyda (budjet muassasalari xarajatlari smetasi boʻyicha tejamlar) hisobiga amalga oshirishga ruxsat etilsin.

3. Turgʻun davolash-profilaktika muassasalarida ovqatlanishni tashkil qilish va uning uchun haq toʻlashning vaqtinchalik tartibi 3-ilovaga muvofiq tasdiqlansin.

Oʻzbekiston Respublikasi Sogʻliqni saqlash vazirligiga, joylardagi sogʻliqni saqlash organlariga va davolash-profilaktika muassasalari rahbarlariga davolash-profilaktika muassasalarida ovqatlanishning vrachlar tavsiyalariga hamda sanitariya-gigiyena normalariga muvofiq tashkil etilishi uchun javobgarlik yuklansin.

4. Oʻzbekiston Respublikasi Sogʻliqni saqlash vazirligi:

manfaatdor vazirliklar, idoralar hamda viloyatlar, shaharlar va tumanlar hokimliklari bilan birgalikda turgʻun davolash-profilaktika muassasalarida davolanayotgan fuqarolar uchun, kasalxonalarning oziq-ovqat bloklari mavjud bazasidan samarali foydalanish asosida, sifatli shifobaxsh ovqatlanishni tashkil qilsin. Zarurat boʻlganda turgʻun davolash-profilaktika muassasalarida bemorlarni vrachlar tavsiyalariga, sanitariya normalariga muvofiq ovqatlantirishni tashkil etish yuzasidan, tayyorlanayotgan shifobaxsh ovqatlar sifati uchun tomonlarning javobgarligini belgilagan holda, davolash-profilaktika muassasalari bilan ixtisoslashtirilgan korxonalar oʻrtasida shartnomalar tuzilishini bir oy muddatda taʼminlasin;

5. Oʻzbekiston Respublikasi Moliya vazirligi, Sogʻliqni saqlash vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari:

turgʻun davolash-profilaktika muassasalarida bemorlarning ayrim toifalari uchun ovqatlanish toʻlovi joriy etilishi, shuningdek aholini dori-darmonlar bilan taʼminlashning tartibga solinishi munosabati bilan boʻshaydigan budjet mablagʻlaridan davolash muassasalarini zamonaviy tibbiy texnika, asbob-uskunalar, maxsus avtotransport bilan jihozlash, shuningdek kasalliklarning oldini olish ishlarini kuchaytirish maqsadida sogʻliqni saqlashning boshlangʻich boʻgʻinlarini rivojlantirish uchun maqsadli foydalansinlar;

koʻrsatib oʻtilgan mablagʻlardan maqsadli foydalanilishi toʻgʻrisida har yili Vazirlar Mahkamasiga axborot bersinlar.

6. Oʻzbekiston Respublikasi Moliya vazirligi va Sogʻliqni saqlash vazirligi:

kasalxona muassasalari kassasiga ovqatlanish toʻlovi sifatidagi naqd tushumni qabul qilib olish va nazorat qilish hamda uni inkassatsiya qilishning Markaziy bank bilan kelishilgan tartibini;

turgʻun davolash-profilaktika muassasalarida bemorlarga beriladigan, ularning ovqatni olishga huquqini tasdiqlovchi talonlarni chiqarish, hisobga olish va nazorat qilish tartibini bir oy muddatda ishlab chiqsinlar va tasdiqlasinlar.

7. Oʻzbekiston Respublikasi Moliya vazirligi:

turgʻun davolash-profilaktika muassasalarida ovqatlanishni tashkil qilish va uning uchun haq toʻlashning yangi tartibi joriy etilishi munosabati bilan Sogʻliqni saqlash vazirligi uchun oʻz aylanma mablagʻlari normativini koʻpaytirish yuzasidan ikki hafta muddatda takliflar kiritsin;

turgʻun davolash-profilaktika muassasalari tomonidan zarur oziq-ovqat mahsulotlarini oʻz vaqtida sotib olish maqsadida har yili ushbu muassasalarni belgilangan normativlardan kelib chiqqan holda zarur aylanma mablagʻlar bilan taʼminlashni nazarda tutsin.

8. Ovqatlanish uchun haq toʻlash tizimidan qatʼi nazar, davolash muassasalarida davlat tomonidan taʼminlanadigan muassasalar uchun nazarda tutilgan oziq-ovqat mahsulotlari bilan taʼminlash manbalari saqlab qolinsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari xizmat koʻrsatiladigan kontingentlarning ovqatlanishini tashkil etishda turgʻun davolash-profilaktika muassasalariga yordam koʻrsatsinlar.

9. Oʻzbekiston Respublikasi Sogʻliqni saqlash vazirligi:

dispanserlar va qishloq uchastka kasalxonalari tarmoqlarini ushbu turdagi kam quvvatli muassasalarni qayta tashkil qilish va tugatish hisobiga tartibga solish yuzasidan 1998-yil 1-yanvargacha Vazirlar Mahkamasiga takliflar kiritsin;

Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mablagʻ bilan taʼminlashni statsionar yordam koʻrsatishdan ambulatoriya-poliklinikada yordam koʻrsatishga ustuvorlik bergan holda oʻzgartirsin;

ambulatoriya-poliklinika muassasalari huzurida bemorlarga hamshiralar xizmat koʻrsatadigan kasalxonalar va uydagi shifoxonalarni rivojlantirish chora-tadbirlarini koʻrsin.

10. Aholiga tibbiy xizmat koʻrsatishni yanada takomillashtirish va pulli tibbiy xizmatlar koʻrsatish tizimini amaliyotga joriy qilish, bunda tibbiy xizmat koʻrsatish sifatini muvofiq holda oshirish, koʻrsatiladigan tibbiy xizmatlar turi va shakllarini kengaytirishni nazarda tutish Oʻzbekiston Respublikasi Sogʻliqni saqlash vazirligi, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklarining muhim vazifasi hisoblansin.

Sogʻliqni saqlash vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari stomatologiya, fizioterapiya (davolash va salomatlikni tiklash), vrachlik-jismoniy tarbiya tibbiyot muassasalarining, shuningdek mustaqil diagnostika markazlarining mulkchilik shakllarini oʻzgartirish toʻgʻrisida ikki oy muddatda Vazirlar Mahkamasiga takliflar kiritsinlar.

11. Oʻzbekiston Respublikasi Vazirlar Mahkamasining “Aholini dori-darmonlar bilan taʼminlashga doir qoʻshimcha chora-tadbirlar toʻgʻrisida” 1993-yil 8-yanvardagi 15-son qarorining 2-bandi oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Bosh vazir oʻrinbosarlari A.A. Azizxoʻjayev va B.S. Hamidov zimmasiga yuklansin.

1. Onkologik kasalliklar

2. Sil kasalligi

3. Ruhiy kasalliklar

4. Ixtisoslashtirilgan muassasalarda giyohvandlik

5. Moxov kasalligi

6. Nurlanish kasalligiga chalingan bemorlar

7. Yuqumli kasalliklar

8. Sifilis

9. OIV kasalligini yuqtirganlar (OITS)

10. Shoshilinch tibbiy yordam koʻrsatish chogʻida bemorlarning shifoxonada boʻlishi cheklangan muddatlarining tasdiqlangan standartlari boʻyicha reanimatsiya tadbirlarini va intensiv terapiyani talab etuvchi holatlar

11. Darajasidan qatʼi nazar kamqonlik kasalligiga chalingan homilador ayollar va tuqqan ayollar

12. Endokrinologik kasalliklar.

1. Bolalikdan nogironlar

2. Gʻirt etimlar

3. I va II guruh nogironlari

4. 1941—1945-yillardagi urush nogironlari va qatnashchilari, shuningdek ularga tenglashtirilgan shaxslar

5. Bandlikka koʻmaklashish va aholini ijtimoiy muhofaza qilish markazlarida hisobda turuvchi yolgʻiz pensionerlar

6. 1941—1945-yillardagi urush yillari mehnat fronti qatnashchilari

7. Chernobil AESidagi halokat oqibatlarini tugatishda qatnashgan — nogiron shaxslar

8. Baynalmilalchi jangchilar

9. 17 yoshgacha boʻlgan bolalar va oʻsmirlar

10. Mudofaa ishlari boʻlimlarining yoʻllanmalari boʻyicha 18—27 yoshli chaqiriq yoshidagilar.

11. “Oʻzbekiston Respublikasi faxriy donori” (“Pochetniy donor Respubliki Uzbekistan”) koʻkrak nishoni bilan mukofotlangan shaxslar.

1.1 Mazkur Vaqtinchalik tartib (keyingi oʻrinlarda — Tartib) turgʻun davolash-profilaktika muassasalarida davolanayotgan kontingentning ovqatlanishi uchun haq toʻlash joriy qilinishi munosabati bilan Vazirlar Mahkamasining “Davolash-profilaktika muassasalarini mablagʻ bilan taʼminlash tizimini takomillashtirish toʻgʻrisida” 1997-yil 2-dekabrdagi 532-son qaroriga muvofiq joriy etiladi.

1.2. Ovqatlanish toʻlovi (nonushtalardan tashqari) fuqarolarning shaxsiy mablagʻlari, shuningdek, korxonalar, Tashkilotlar, jamgʻarmalar va boshqa homiylar mablagʻlari hisobiga amalga oshiriladi.

1.3. Mazkur tartib turgʻun davolash-profilaktika muassasalarida davolanayotgan barcha kontingentga joriy etiladi, ovqatlanish toʻlovi hukumat qaroriga muvofiq davlat budjeti mablagʻlari hisobiga amalga oshiriladigan aholi toifalari va ayrim kasalliklarga chalingan shaxslar bundan mustasno.

Koʻrsatib oʻtilgan tartib bemorlar kontingenti imtiyozlilar toifasiga toʻliq kiradigan davolash-profilaktika muassasalariga joriy etilmaydi.

1.4. Mazkur tartibga muvofiq haq kasalxona muassasalari yoki davolash-profilaktika muassasalari buyurtmanomalariga koʻra xizmatlar koʻrsatuvchi boshqa korxonalar tomonidan faqat taomlar tayyorlash uchun sarflangan oziq-ovqat mahsulotlari qiymati uchun toʻlanadi. Taomlar tayyorlash uchun asbob-uskunalar sotib olish va ulardan foydalanish bilan bogʻliq boshqa xarajatlar, oziq-ovqat bloklari binolarini saqlash, taomlar tayyorlash bilan band boʻlgan xodimlar mehnatiga haq toʻlash xarajatlari va boshqalar davlat budjeti mablagʻlari hisobiga qoplanadi.

2.1. Turgʻun davolash-profilaktika muassasalaridagi bemorlarni ovqatlantirish Oʻzbekiston Respublikasi Sogʻliqni saqlash vazirligining “Oʻzbekiston Respublikasi davolash-profilaktika muassasalarida shifobaxsh ovqatlanishni tashkil etish toʻgʻrisida” 1993-yil 19-martdagi 122-son buyrugʻiga muvofiq mavjud oziq-ovqat bloklari negizida tashkil etiladi.

2.2. Davolash-profilaktika muassasalarining bosh shifokorlari ovqatlantirishni tashkil etish uchun shaxsan javob beradilar.

2.3. Davolash-profilaktika muassasasi taom tayyorlash uchun shartnomaviy shartlarda boshqa ixtisoslashtirilgan korxonalarni jalb etishi mumkin. Bunday hollarda davolash-profilaktika muassasalari buyurtmachi hisoblanadi va shifobaxsh ovqatlanishni tashkil etish uchun bemorlar oldida javob beradilar.

2.4. Bemorning shifobaxsh ovqati kimyoviy tarkibi va quvvatliligi jihatidan bemorga yozib berilgan parhez talablariga muvofiq boʻlishi kerak. Ovqatni tayyorlash belgilangan sanitariya meʼyorlariga toʻliq muvofiq boʻlishi kerak.

2.5. Bemor oʻz xohishiga koʻra davolash-profilaktika muassasasi tavsiya etayotgan ovqatni toʻliq yoki qisman rad etishi mumkin. Bunday xollarda uni ovqatlantirish qarindosh-urugʻlari yoki yaqin kishilari tomonidan, shifokor yozib bergan parhezga rioya qilinishini hisobga olgan holda, tashkil etiladi. Ovqatlanish toʻlovi uchun foydalanilmagan mablagʻlar davolash-profilaktika muassasalari tomonidan toʻlovchiga qaytariladi.

2.6. Ixtisoslashtirilgan korxonalar bilan shartnomaviy shartlarda ovqatlantirish tashkil etilganda davolash-profilaktika muassasasi taomnoma va buyurtma qilinadigan taomlarga har haftalik buyurtmanoma taqdim etadi. Shartnoma shartlariga koʻra buyurtma berilayotgan taomlar miqdori har kuni aniqlashtirilishi mumkin.

3.1. Bemor reja boʻyicha kasalxonaga yotqizilganda ovqatlanish toʻlovi, bemor tomonidan davolash-profilaktika muassasasiga joylashtirilgunga qadar, u yerda boʻlishi rejalashtirilayotgan barcha muddat uchun toʻliq yoki qisman, lekin belgilangan eng kam oylik ish haqidan kam boʻlmagan miqdorda toʻlanadi.

Bemor reja boʻyicha kasalxonaga yotqizilganda u ovqatlanish uchun haq toʻlanganligini tasdiqlovchi hujjat yoxud davolash-profilaktika muassasasi tomonidan beriladigan ovqatni rad etish haqida ariza taqdim etishi kerak.

Davolash-profilaktika muassasasida pulli ovqatlanishni dastlab rad etgan bemor, buyurtiriladigan davr uchun oldindan haq toʻlagan holda, ovqatlanish uchun xohlagan paytda buyurtma berishi mumkin.

Ovqatlanish uchun oldindan qisman haq toʻlanganda toʻliq hisob-kitob bemor kasalxonadan chiqqunga qadar amalga oshiriladi.

Tasdiqlangan standartlarga muvofiq bemorlar shifoxonada boʻlishining cheklangan muddatlariga binoan shoshilinch tibbiy yordam koʻrsatilishini talab etuvchi holatlar bekor qilinganda davolanishni davom ettirayotgan shaxslarning ovqatlanishi uchun haq toʻlash belgilangan tartibda amalga oshiriladi.

3.3. Davolash-profilaktika muassasasida ovqatga haq toʻlanmagan, toʻliq toʻlanmagan yoki ovqatlanish uchun haq toʻlashdan ozod qilish toʻgʻrisidagi hujjatlar taqdim etilmagan barcha hollarda bemor kasalxonadan chiqqandan soʻng berilishi lozim boʻlgan kasallik varaqalari bemorning ish joyiga yoki ijtimoiy sugʻurta organlariga yuqorida sanab oʻtilgan bemorlarga ovqatlantirish uchun amalda sarf qilingan xarajatlarni toʻliq toʻlash uchun yuboriladi.

3.4. Ovqatlanish toʻlovi uchun mablagʻlarni qabul qilish uchun davolash-profilaktika muassasalari oʻzlariga xizmat koʻrsatuvchi bankda alohida depozit schyoti ochadilar. Koʻrsatilgan schyotga bemorlarning ovqatlanishi uchun toʻlov sifatida ularning shaxsiy mablagʻlaridan tushuvchi barcha mablagʻlar, shuningdek, ularning ovqatlanish haqini toʻlagan korxonalar va tashkilotlarning mablagʻlari kelib tushadi. Koʻrsatib oʻtilgan schyotga imtiyozlarga ega boʻlgan kontingentlarning ovqatlanishi uchun toʻlashga moʻljallangan budjet mablagʻlari oʻtkaziladi.

3.5. Ovqatlantirish davolash-profilaktika muassasalarining oziq-ovqat bloki orqali tashkil etilgan taqdirda, ovqatlanish uchun haq naqd pul bilan toʻlanganda — u bevosita davolash-profilaktika muassasasi kassasiga va haq pul oʻtkazish yoʻli bilan toʻlanganda — taqdim etilgan schyotlar boʻyicha alohida depozit schyotiga toʻlanadi. Ovqatlanish haqini toʻlagan shaxslarga har bir toʻlovdan soʻng darhol amalda toʻlangan toʻlov miqdorini tasdiqlovchi hujjatlar beriladi. Davolash-profilaktika muassasasi tomonidan pul mablagʻlarini qabul qilib olish va topshirish Oʻzbekiston Respublikasi Markaziy banki tomonidan tasdiqlangan Xalq xoʻjaligida kassa operatsiyalarini yuritish tartibiga muvofiq amalga oshiriladi. Ushbu tartibga rioya etilishini nazorat qilish Oʻzbekiston Respublikasi Moliya vazirligiga yuklanadi.

3.6. Ovqatlantirish davolash-profilaktika muassasasi tomonidan tashkil etiladigan barcha bemorlarga har kuni ularning ovqatlanishi huquqini tasdiqlovchi talonlar beriladi. Talonlar ovqatning har bir turi (tushlik, ikkinchi tushlik, kechki ovqat) uchun beriladi, ularda tibbiy muassasaning muhri boʻladi hamda ular davolash-profilaktika muassasasi yoki taomlar tayyorlash uchun jalb qilingan ixtisoslashtirilgan korxona uchun moliyaviy hisobot hujjati hisoblanadi.

4.1. Pulli asosda ovqatlantirishni tashkil etish uchun barcha davolash-profilaktika muassasalariga budjetdan belgilangan normativlarga muvofiq bir yilga hisoblangan aylanma mablagʻlar ajratiladi.

4.2. Imtiyozlarga ega boʻlgan kontingentlarni ovqatlantirishni mablagʻ bilan taʼminlash uchun budjet mablagʻlari ilgari belgilangan tartibda ajratiladi.

4.3. Davolash-profilaktika muassasalarini oziq-ovqat mahsulotlari bilan taʼminlash davlat tomonidan taʼminlanadigan muassasalar uchun nazarda tutilgan tartibda amalga oshiriladi.