Vazirlar Mahkamasi qaror qiladi:

1. Ilova qilinayotgan Uy-joy, arxitektura-shaharsozlik qonunchiligiga rioya qilinishini nazorat qilish boʻyicha Respublika komissiyasi toʻgʻrisidagi Nizom tasdiqlansin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari uy-joy, arxitektura-shaharsozlik qonunchiligiga rioya qilinishini nazorat qilish boʻyicha hududiy komissiyalar toʻgʻrisidagi nizomlarni ikki hafta muddatda ishlab chiqsinlar va tasdiqlasinlar.

3. Mazkur qarorning bajarilishini nazorat qilish Bosh vazir oʻrinbosari B.S. Hamidov zimmasiga yuklansin.

1. Mazkur Nizom uy-joy, arxitektura-shaharsozlik qonunchiligiga rioya qilinishini nazorat qilish boʻyicha Respublika komissiyasi (keyingi oʻrinlarda — Komissiya)ning asosiy vazifalari, funksiyalari, huquqlari va uning faoliyatini tashkil etishni belgilaydi.

2. Komissiya oʻz faoliyatida Oʻzbekiston Respublikasi qonunlariga, Oliy Majlis qarorlariga, Oʻzbekiston Respublikasi Prezidentining farmonlariga, qarorlariga va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa meʼyoriy hujjatlarga va mazkur Nizomga amal qiladi.

3. Komissiya oʻz faoliyatini mahalliy davlat hokimiyati organlari va fuqarolarning oʻzini oʻzi boshqarish organlari, tabiatni muhofaza qilish organlari, huquqni muhofaza qilish organlari, “Mahalla” jamgʻarmasi va boshqa jamoat tashkilotlari bilan yaqin aloqada amalga oshiradi.

4. Quyidagilar:

uy-joy va arxitektura-shaharsozlik siyosati amalga oshirilishini;

vakolatli davlat boshqaruvi organlari tomonidan yer, uy-joy, arxitektura-shaharsozlik qonunchiligiga rioya qilinishi ustidan nazorat tashkil etilishini;

aholi yashash joylari yerlaridan aniq maqsadli foydalanish, uy-joy fondini, xoʻjalik va ishlab chiqarish maqsadlaridagi obyektlarni saqlash va unga xizmat koʻrsatish boʻyicha chora-tadbirlarning samaradorligini taʼminlashga qaratilgan kompleks tadbirlar ishlab chiqish va ularni amalga oshirish Komissiyaning asosiy vazifalari hisoblanadi.

5. Komissiya oʻziga yuklangan vazifalarga muvofiq:

tegishli vazirliklar, davlat qoʻmitalari va idoralarning uy-joy fondidan, xoʻjalik va ishlab chiqarish maqsadlaridagi obyektlardan, aholi yashash joylari yerlaridan aniq maqsadli foydalanish va ularning saqlanishini taʼminlash sohasidagi faoliyatini muvofiqlashtiradi;

er, uy-joy va arxitektura-shaharsozlik qonunchiligini takomillashtirish yuzasidan takliflar tayyorlaydi va ularni Hukumatga kiritadi;

tegishli hududiy komissiyalar, uy-joy inspeksiyalari, arxitektura va shaharsozlik organlari, yer resurslari va koʻchmas mulk kadastri xizmatlari va boshqa davlat vakolatli organlar faoliyatini nazorat qiladi.

6. Komissiya quyidagi huquqlarga ega:

davlat hokimiyati va boshqaruvi organlari, tashkilotlardan oʻz vakolatiga kiruvchi masalalar boʻyicha zarur materiallar va boshqa hujjatlarni olish;

vakolatli organlarga uy-joy, arxitektura-shaharsozlik va yer kadastri qonunchiligiga rioya qilinishini belgilangan tartibda tekshirishni tavsiya qilish;

oʻz yigʻilishlarida yer, uy-joy va arxitektura-shaharsozlik qonunchiligi buzilishining oldini olish va uni bartaraf etish boʻyicha koʻrilayotgan chora-tadbirlar, shuningdek, yuridik va jismoniy shaxslarning ushbu masalalar boʻyicha xatlari, shikoyatlari va murojaatlarini koʻrib chiqish boʻyicha ishlarning ahvoli toʻgʻrisida vazirliklar, davlat qoʻmitalari, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari rahbarlarining, hududiy komissiyalarning axborotlarini vaqti-vaqti bilan eshitish;

tekshirishlar natijalarini koʻrib chiqish chogʻida, zaruriyatga qarab, aybdor mansabdor va boshqa shaxslarga nisbatan maʼmuriy va fuqarolik — huquqiy taʼsir koʻrsatish choralari qoʻllanish uchun ularni sudga oshirish toʻgʻrisida tavsiyalar berish;

oʻz vakolatlari doirasida tegishli organlar faoliyatidagi aniqlangan kamchiliklarni bartaraf etish yuzasidan qarorlar qabul qilish.

7. Komissiya ishiga rais, u boʻlmagan vaqtlarda esa oʻrinbosar boshchilik qiladi.

Komissiya raisi, uning oʻrinbosari va uning tarkibi Oʻzbekiston Respublikasi Vazirlar Mahkamasining Rayosati tomonidan tasdiqlanadi.

8. Komissiya qarorlari uning aʼzolarining oddiy koʻpchilik ovozi bilan qabul qilinadi, bayonnoma bilan rasmiylashtiriladi va rais tomonidan imzolanadi.

9. Komissiya majlislari zaruriyatga koʻra, har chorakda kamida bir marta oʻtkaziladi.

10. Komissiya tomonidan oʻz vakolati doirasida qabul qilingan qarorlar vazirliklar, davlat qoʻmitalari, idoralar, davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari, mulkchilik shakllaridan qatʼi nazar, xoʻjalik yurituvchi subyektlar va fuqarolar tomonidan bajarilishi majburiy hisoblanadi.