Oʻzbekiston Respublikasi Prezidentining 2021-yil 22-oktabrdagi PQ-5263-son “Normativ-huquqiy hujjatlar va ularning loyihalarini korrupsiyaga qarshi ekspertizadan oʻtkazishni yanada takomillashtirish chora-tadbirlari toʻgʻrisida”gi qarori hamda Oʻzbekiston Respublikasi Vazirlar Mahkamasining 2020-yil 31-dekabrdagi 824-son “Oliy taʼlim muassasalarida taʼlim jarayonini tashkil etish bilan bogʻliq tizimni takomillashtirish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi oliy va oʻrta maxsus taʼlim vazirining 2009-yil 22-maydagi 160-son buyrugʻi (roʻyxat raqami 1963, 2009-yil 5-iyun) (Oʻzbekiston Respublikasi qonun hujjatlari toʻplami, 2009-y., 23-son, 267-modda) bilan tasdiqlangan Oʻzbekiston Respublikasi oliy taʼlim muassasalari bitiruvchilarining yakuniy davlat attestatsiyasi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Nizom muqaddimasi quyidagi tahrirda bayon etilsin:

“Mazkur Nizom Oʻzbekiston Respublikasining “Taʼlim toʻgʻrisida”gi Qonuniga muvofiq oliy taʼlim muassasalari bitiruvchilarining yakuniy davlat attestatsiyasini oʻtkazish tartibini belgilaydi.”.

2. 5-bandning uchinchi xatboshisidagi “(umumkasbiy va ixtisoslik)” degan soʻzlar “(majburiy fanlar)” degan soʻzlar bilan almashtirilsin.

3. 8-bandning birinchi xatboshisidagi “ixtisoslik fanlaridan” degan soʻzlar “majburiy fanlardan” degan soʻzlar bilan almashtirilsin.

4. 9-band quyidagi tahrirda bayon etilsin:

“9. Oliy taʼlim muassasalari tomonidan tajribali professor-oʻqituvchilarni jalb etgan holda yakuniy davlat attestatsiyasi sinovlarining dasturlari va baholash mezonlari ishlab chiqiladi hamda oliy taʼlim muassasasi Kengashi tomonidan tasdiqlanadi va yakuniy davlat attestatsiyasi boshlanishidan kamida uch oy oldin talabalar eʼtiboriga yetkaziladi.”.

5. 10-band quyidagi tahrirda bayon etilsin:

“10. Yakuniy davlat attestatsiyasi komissiyalari raisligiga nomzodlar kafedra mudiri tomonidan tasdiqlash uchun oliy taʼlim muassasasi rektoriga (filial direktoriga) taqdim etiladi.”.

6. 11-band quyidagi tahrirda bayon etilsin:

“11. Yakuniy davlat attestatsiyasi komissiyasi raislari oliy taʼlim muassasasining idoraviy mansubligidan qatʼi nazar, ushbu taʼlim muassasasida faoliyat yuritmayotgan olimlar, ishlab chiqarishning tajribali mutaxassislaridan tegishli oliy taʼlim muassasasi rektorining (filial direktorining) buyrugʻi bilan bir yil (kalendar yil) muddatga tasdiqlanadi.

Bir kishi ketma-ket bir oliy taʼlim muassasasida tegishli yoʻnalish (mutaxassislik) boʻyicha ikki martadan ortiq yakuniy davlat attestatsiyasi komissiyasining raisi boʻlishi mumkin emas.”.

7. 12-band quyidagi tahrirda bayon etilsin:

“12. Yakuniy davlat attestatsiyasi komissiyasi raislari rahbarligida oliy taʼlim muassasasi rektori (filial direktori) bilan birgalikda xorijiy til boʻyicha yakuniy davlat attestatsiya sinovi (oliy taʼlim muassasasi Kengashi qaroriga asosan) va (yoki) taʼlim yoʻnalishi (mutaxassislik) boʻyicha fanlararo yakuniy davlat attestatsiya sinovi va diplom loyihasi yoki bitiruv malakaviy ishi (magistrlik dissertatsiyasi) himoyasi yoki majburiy fanlardan yakuniy davlat attestatsiya sinovini oʻtkazish boʻyicha yakuniy davlat attestatsiyasi komissiyalari tarkibi shakllantiriladi.”.

8. 14-band quyidagi tahrirda bayon etilsin:

“14. Yakuniy davlat attestatsiya komissiyalari tarkibi kamida 5 nafar professor-oʻqituvchi va mutaxassislardan shakllantiriladi. Yakuniy davlat attestatsiyasida vasiylik kengashi va fuqarolarning oʻzini oʻzi boshqarish organlari vakillari, bitiruvchilarning ota-onalari yoki ularning qonuniy vakillari hamda kadrlar buyurtmachilari jamoatchilik asosida kuzatuvchi sifatida qatnashishi mumkin.

Yakuniy davlat attestatsiya sinovlari jarayoni onlayn rejimda ovozli videotranslyatsiya qilinadi hamda ushbu video tasvirlar 1 yil davomida mutaxassislik kafedrasida saqlanadi.”.

9. 17-banddagi “olti oy” degan soʻzlar “uch oy” degan soʻzlar bilan almashtirilsin.

10. 19-bandda:

birinchi xatboshidagi “ixtisoslik fanlaridan” degan soʻzlar “majburiy fanlardan” degan soʻzlar bilan almashtirilsin;

ikkinchi xatboshidagi “ixtisoslik fanlaridan” degan soʻzlar “majburiy fanlardan” degan soʻzlar bilan almashtirilsin.

11. 23-band quyidagi tahrirda bayon etilsin:

“23. Yakuniy davlat attestatsiyasi sinovidan oʻta olmagan shaxs oʻqish muddati tugagandan soʻng, arizasiga muvofiq yakuniy davlat attestatsiyasi sinovini keyingi 3 yil davomida qayta topshirish huquqiga ega.

Yakuniy davlat attestatsiyasi sinovidan oʻta olmagan shaxs keyingi oʻquv yili boshlanganidan keyin yakuniy davlat attestatsiya sinovini qayta topshirishga ruxsat berishni soʻrab oliy taʼlim muassasasi rektori (filial direktori) nomiga ariza bilan murojaat qilishi mumkin. Bunda, shaxsga yakuniy davlat attestatsiya sinovini keyingi har bir oʻquv yilida (3 yil davomida) 2-martadan ortiq qayta topshirishga yoʻl qoʻyilmaydi.

Yakuniy davlat attestatsiya sinovini qayta topshirishga ruxsat berish oliy taʼlim muassasasi rektorining (filial direktorining) buyrugʻi bilan rasmiylashtiriladi.”.

12. 24-band quyidagi tahrirda bayon etilsin:

“24. Yakuniy davlat attestatsiyasi sinovidan keyingi 3 yil davomida qayta oʻta olmagan talabaga akademik maʼlumotnoma beriladi va u oʻrnatilgan tartibda, toʻlov-kontrakt asosida tegishli bitiruv kursiga oʻqish uchun qayta tiklanishi mumkin.”.

13. 27-band quyidagi tahrirda bayon etilsin:

“27. Yakuniy davlat attestatsiyasi sinovlarida olgan bahosiga eʼtiroz bildirgan bitiruvchilarning arizalarini koʻrib chiqish uchun oliy taʼlim muassasasi rektorining (filial direktorining) buyrugʻi bilan apellyatsiya komissiyasi tuziladi.

Apellyatsiya komissiyasi oliy taʼlim muassasasining ilmiy-pedagogik kadrlari (apellyatsiya komissiyasi umumiy tarkibining 40 foizigacha), shuningdek tegishli sohaning malakali mutaxassislari, turdosh oliy taʼlim muassasalarining tajribali professor-oʻqituvchi va ilmiy xodimlari orasidan kamida 5 kishidan iborat tarkibda shakllantiriladi.

Apellyatsiya komissiyasi tarkibiga joriy yilda yakuniy davlat attestatsiyasi komissiyasi ishida ishtirok etgan shaxslarning kiritilishi taqiqlanadi.”.