Oʻzbekiston Respublikasi Oliy Majlisi Senati qon va uning tarkibiy qismlari donorligi sohasini rivojlantirish uchun koʻrilayotgan choralar yuzasidan Oʻzbekiston Respublikasi Vazirlar Mahkamasiga yuborilgan parlament soʻroviga (bundan buyon matnda Parlament soʻrovi deb yuritiladi) berilgan javobni koʻrib chiqib, bu borada muayyan ishlar amalga oshirilganligini qayd etadi.

Xususan, Oʻzbekiston Respublikasi Prezidentining 2020-yil 10-fevraldagi “Oʻzbekiston Respublikasida gematologiya va transfuziologiya xizmatlarini rivojlantirish hamda onkogematologik va davolash qiyin boʻlgan kasalliklarga chalingan shaxslarni yanada qoʻllab-quvvatlash chora-tadbirlari toʻgʻrisida”gi PQ-4592-sonli qarori va u bilan tasdiqlangan 2020 — 2024-yillarga moʻljallangan “Oʻzbekiston Respublikasida gematologiya va transfuziologiya xizmatlarini rivojlantirish boʻyicha chora-tadbirlar dasturi” va “Gematologiya va transfuziologiya xizmatlarining kadrlar salohiyatini mustahkamlash boʻyicha “Yoʻl xaritasi” asosida qator ishlar amalga oshirilgan.

Qon quyish muassasalarida gemakonlar, qon saqlash va transportirovka anjomlari bilan taʼminlash uchun soʻnggi besh yilda 15 mlrd soʻm mablagʻ ajratilgan.

Donorlar va qon zaxirasi haqidagi maʼlumotlar almashinuvini raqamlashtirish maqsadida qon xizmati avtomatlashgan axborot tizimi yaratilgan.

Qon komponentlarini tayyorlovchi asbob-uskunalarni muntazam ravishda koʻrikdan oʻtkazib, ularni taʼmirlovchi mutaxassislar tayyorlash yoʻlga qoʻyilgan.

Shu bilan birga, Parlament soʻrovida koʻrsatilgan ayrim masalalar yuzasidan javob yetarli darajada aks etmagan.

Xususan, qon va uning tarkibiy qismlari donorligini tartibga soluvchi qonun, hamda qonunosti hujjatlari bilan tartibga solinadigan normativ-huquqiy hujjatlarda boʻshliqlar mavjud va ularni bartaraf etishga qaratilgan choralar koʻrilmagan.

Ixtisoslashgan muassasalarning moddiy-texnika taʼminoti va modernizatsiyalash, xususan PSR apparatlari, gemotsitoferez, plazmaferez, immunogematologik analizator va IFA-analizator va boshqa uskunalar bilan jihozlash boʻyicha aniq chora-tadbirlar belgilanmagan. Jumladan, mazkur maqsadlar uchun grantlar ajratish rejalashtirilgan boʻlsada, bugunga qadar grantlar jalb qilish boʻyicha aniq natijalarga erishilmagan.

Qon quyish muassasalarida gemakonlar (bir martalik tizimlar va konteynerlar yoki qon yigʻish paketlari), qon saqlash va transportirovka anjomlarining miqdor va sifat koʻrsatkichlari nazorati aniq yoritilmagan.

Qon xizmati avtomatlashgan axborot tizimiga barcha ixtisoslashgan muassasalar bogʻlanmagan, axborot tizimining ish davomida qoʻllanilishi hamda joriy etilishi rasmiyatchilik uchun tashkil qilinib, tizimni takomillashtirish ishlari talab darajasida emas.

Respublika miqyosida jami 2 ta “ISUZU” va 17 ta “DAMAS” rusumidagi avtotransport vositasi negizida mobil “donorlik kompleks”lari mavjud va ularning sonini koʻpaytirish boʻyicha aniq tadbirlar belgilanmagan.

Koʻngilli va begʻaraz donorlarning aksariyati davlat va xoʻjalik boshqaruvi organlari xodimlari ulushiga toʻgʻri kelib, bu borada fuqarolar orasida targʻibot ishlari yetarlncha tashkil etilmagan.

Qon xizmati xodimlari uchun ijtimoiy imtiyozlar belgilash masalasi umuman yoritilmagan.

Oʻzbekiston Respublikasi Oliy Majlisi Senatining Fan, taʼlim va sogʻliqni saqlash masalalari qoʻmitasi raisi O. Iminovning axborotini eshitib va muhokama qilib, “Parlament nazorati toʻgʻrisida”gi Oʻzbekiston Respublikasi Qonunining 14-moddasiga muvofiq Oʻzbekiston Respublikasi Oliy Majlisining Senati qaror qiladi:

1. Oʻzbekiston Respublikasi Oliy Majlisi Senatining 2021-yil 25-iyundagi SQ-328-IV-sonli Qarori bilan Qon va uning tarkibiy qismlari donorligi sohasini rivojlantirish uchun koʻrilayotgan choralar yuzasidan Oʻzbekiston Respublikasi Vazirlar Mahkamasiga yuborilgan parlament soʻrovida qoʻyilgan masalalar chuqur oʻrganilmaganligi koʻrsatib oʻtilsin.

2. Oʻzbekiston Respublikasn Vazirlar Mahkamasi:

parlament soʻrovida qoʻyilgan masalalarga yuzaki yondashgan mutasaddilarning masʼuliyatini oshirish choralarini koʻrsin;

2021-yil 31-dekabrga qadar parlament soʻrovida aks ettirilgan barcha masalalarni chuqur oʻrganib, mavjud kamchiliklarni bartaraf etish choralarini koʻrsin va natijalari yuzasidan Senatga axborot kiritsin.

3. Mazkur Qaror ijrosi boʻyicha Senatning Fan, taʼlim va sogʻliqni saqlash masalalari qoʻmitasi raisi O. Iminov Senat Kengashiga 2022-yil 15-yanvarga qadar axborot taqdim etsin.

4. Mazkur Qaror ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

5. Ushbu Qaror qabul qilingan kundan eʼtiboran kuchga kiradi.