Vazirlar Mahkamasining 1992-yil 23-sentabrdagi 443-son qarorida nazarda tutilgan mahalliy sanoat, aholiga maishiy xizmat koʻrsatish va umumiy ovqatlanish korxonalari va tashkilotlarini davlat tasarrufidan chiqarish va xususiylashtirish chora-tadbirlarini amalda roʻyobga chiqarishni taʼminlash, qayta tashkil etilayotgan jamoalar manfaatlarini yanada toʻlaroq hisobga olish, shuningdek, mulkchilik shakllarini oʻzgartirish mexanizmini tartibga soluvchi zarur meʼyoriy bazani shakllantirish maqsadida Vazirlar Mahkamasi qaror qiladi:

1. Mahalliy sanoat, aholiga maishiy xizmat koʻrsatish, davlat savdosi va umumiy ovqatlanish korxonalari va tashkilotlarining mehnat jamoalari mulkni sotib olayotganda ularga beriladigan qoʻshimcha imtiyozlar roʻyxati 1-ilovaga muvofiq tasdiqlansin.

2. Belgilab qoʻyilsinki, mulk toʻla sotib olingunga qadar davlatga tegishli aksiyalar (hissalar) boʻyicha dividendlar Oʻzbekiston Respublikasi Moliya vazirligi huzuridagi davlat mulki jamgʻarmasi tomonidan aksionerlik jamiyatiga (masʼuliyati cheklangan jamiyatga, shirkatga) uni rivojlantirish uchun beriladi.

3. Oʻzbekiston Respublikasi Davlat mulki qoʻmitasiga va uning hududiy organlariga:

xizmat koʻrsatish obyektlari va ularning boʻlinmalari tanlov boʻyicha va auksionda xususiylashtirilayotganda obyektning dastlabki narxini asosiy fondlarning 1992-yilning 1-yanvarigacha boʻlgan qiymati boʻyicha belgilashga;

“Mahalliy sanoat” davlat korporatsiyasi ishtirokida, tajriba tariqasida, mahalliy sanoat korxonalari 2-ilovaga muvofiq davlat tasarrufidan chiqarilib, bu obyektlarni sotib olish summasini soʻnggi 3 yildagi yillik oʻrtacha hisob balansiga qarab, 1992-yil 1-dekabrgacha boʻlgan qiymatini ikki baravar koʻpaytirilgan narxlarda belgilashga;

baʼzi hollarda yuqorida koʻrsatilgan davlat korxonalari mulkini sotib olish qiymatini, Vazirlar Mahkamasining 1991-yil 26-iyundagi 171-son qarorining 10-bandi talablariga amal qilgan holda, uning qayerda joylashganligi, ishlab chiqaradigan mahsuloti turi va unga boʻlgan talabga, ishlab chiqarishning texnikaviy darajasiga, kadrlar bilan taʼminlanganligi va ularning malakasiga qarab kamaytirish toʻgʻrisida qaror qabul qilishga;

ishlovchilar soni 5 kishigacha boʻlgan, mustaqil balansga ega boʻlmagan yoki boshqa yuridik shaxslar mulkining bir qismini ijaraga oluvchilarning davlat mulki obyektlari boʻyicha mulk shaklini oʻzgartirishga talabnomalarni koʻrib chiqayotganda davlat tasarrufidan chiqarilayotgan va xususiylashtirilayotgan obyektning qiymatiga qarab 1 ming soʻmdan 5 ming soʻmgacha tabaqalashtirilgan yigʻim belgilashga;

hududiy boshqarmalar huzurida korxonalarga davlat tasarrufidan chiqarish va xususiylashtirish masalalarida malakali yordam koʻrsatuvchi, xoʻjalik hisobi asosida ishlovchi maslahatchilar guruhi tuzishga ruxsat berilsin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Moliya vazirligi bilan kelishgan holda 1993-yilning 20-yanvariga qadar Oʻzbekiston Respublikasi Davlat mulki qoʻmitasining respublika shahar va qishloqlaridagi hududiy boʻlinmalarini tuzish va ularni mablagʻ bilan taʼminlash, shuningdek, ularni malakali kadrlar bilan toʻldirish masalasini hal etsinlar.

6. Mazkur qarorning bajarilishini nazorat qilish Bosh vazir oʻrinbosarlari A.N. Voznenko va B.S. Hamidov oʻrtoqlar zimmasiga yuklatilsin.

Mehnat jamoalari sotib oladigan mahalliy sanoat, aholiga maishiy xizmat koʻrsatish, davlat savdosi va umumiy ovqatlanish korxonalari mulki qiymatiga narx belgilanayotganda Vazirlar Mahkamasining 1992-yil 23-sentabrdagi 443-son qarorining 8-bandi qoidalariga amal qilinib, quyidagi qoʻshimcha imtiyozlar hisobga olinsin:

1. “Oʻzbekiston Respublikasida mulkchilik toʻgʻrisida”gi Qonunning 30-moddasiga muvofiq mehnat jamoasiga korxona tomonidan sof foyda, shuningdek, shu foyda hisobidan qoplangan zayom mablagʻlari hisobiga sotib olingan qurilgan davlat mulkining bir qismi haq olmasdan oʻtkaziladi.

2. Mulkning yangi egasi aholining kam taʼminlangan qatlamiga (bolalar, keksa kishilar, nogironlarga) atalgan davlat ehtiyojlari uchun ishlab chiqarish dasturining kamida 50 foizi hajmida xalq isteʼmol tovarlarini yetkazib berish majburiyatini olganda sotib olinadigan mulk qiymatining 20 foiziga qadar chegirma berilishi nazarda tutilsin.

3. Sotib olinadigan mulkning dastlabki qiymati:

— mehnat jamoasiga bepul beriladigan har biri fizik jihatdan 70 foiz va undan koʻp eskirgan asosiy fondlarning aniq turlari qiymati miqdorida;

— yetkazib beruvchilarga tovar-moddiy boyliklar uchun kreditorlik qarz summasi, shuningdek, mulkning yangi egasi qarzni belgilangan tartibda birinchi navbatda uzish majburiyatini olsa banklar qarzi miqdorida;

— asosiy ishlab chiqarish balansida boʻlgan hamda ijtimoiy infrastruktura va atrof muhitni muhofaza qilish uchun foydalaniladigan, mehnat jamoasiga haq olmasdan oʻtkaziladigan muhandislik tarmoqlari (elektr, gaz, issiqlik, suv taʼminoti, kanalizatsiya va zovur kollektorlari nasos qurilmalari va h. k.) qiymatining bir qismi miqdorida kamaytiriladi.

4. “Oʻzmaishiyxizmat” uyushmasiga kiruvchi korxonalar boʻyicha mehnat jamoalariga toʻla amortizatsiya muddatini oʻtab boʻlgan, uch kishigacha ishchi oʻrni boʻlgan maishiy xizmat obyektlari (sartaroshxonalar, poyabzal, kiyim-kechak tuzatish ustaxonalari va boshqalar) haq olmasdan oʻtkazilsin, buning uchun tomonlarning faoliyat yoʻnalishini, koʻrsatiladigan xizmat hajmlarini saqlab qolish boʻyicha kamida uch yilga bitim tuzilishi hamda mazkur shartnoma amal qilgan davrda obyektlarni davlat tasarrufida boʻlmagan yuridik shaxslar va fuqarolarga sotmaslik va bermaslik shartdir.

Qishloq joylarda mazkur obyektlar, asosiy fondlarning eskirganlik darajasidan qatʼiy nazar, koʻrsatilgan shartlar boʻyicha mehnat jamoalariga haq olmasdan berilsin.

5. Davlat mulkini sotib olish uchun tegishli summa mehnat jamoalari tomonidan bir yoʻla toʻlanadigan boʻlsa, davlat tasarrufidan chiqariladigan obyekt qiymati bahosining 10 foiziga qadar miqdorda, bir yil davomida toʻlanadigan boʻlsa – 3 foizgacha boʻlgan miqdorda chegirma beriladi.

6. Agar berilgan imtiyozlardan foydalangan mulkning yangi egasi belgilangan muddatda mulkni toʻla sotib olgunga qadar mulkka egalik huquqi dalolatnomasidan mahrum etilsa u ilgari davlat tasarrufidan chiqarilgan va xususiylashtirilgan korxona mol-mulkini, oʻzi toʻlagan sotib olish summasini chiqarib tashlab, Vazirlar Mahkamasining 1992-yil 18-iyundagi 293-son qaroriga muvofiq asosiy fondlarni qayta hisoblab chiqishning oshib boruvchi koeffitsiyentini hisobga olgan holda dastlabki baholash qiymati boʻyicha davlatga qaytarishga majburdir.

Mangʻit xalq isteʼmol tovarlari fabrikasi

Amudaryo tumani sanoat kombinati

Izboskan tumani sanoat kombinati

Kosonsoy tumani sanoat kombinati

Sariosiyo tikuvchilik fabrikasi

Yangiyer shahar sanoat kombinati

Toshloq tikuvchilik fabrikasi

Hazorasp xoʻjalik-roʻzgʻor tovarlari fabrikasi

Qibray tumani sanoat kombinati

Buxoro zardoʻzlik buyumlari fabrikasi

Samarqand xoʻjalik-roʻzgʻor buyumlari zavodi

Navbahor tumani sanoat kombinati

Peshku tumani sanoat kombinati

Sherobod tumani sanoat kombinati

Toshkent “Chevar” aksionerlik jamiyati