O‘zbekiston Respublikasi Mudofaa vazirligi va Milliy gvardiyasining oliy harbiy ta’lim muassasalarida xorijiy davlatlar harbiy kadrlarini tayyorlash va o‘qitish tizimini joriy etish maqsadida:

1. O‘zbekiston Respublikasi Mudofaa vazirligi hamda Oliy va o‘rta maxsus ta’lim vazirligining Mudofaa vazirligi oliy harbiy ta’lim muassasalarida (keyingi o‘rinlarda — OHTM):

xorijiy davlatlar harbiy kadrlarini tayyorlash, qayta tayyorlash va malakasini oshirishni (keyingi o‘rinlarda — ta’lim berish) yo‘lga qo‘yish;

umumiy cheklangan shtat birliklari doirasida Xorijiy harbiy kadrlar bilan ishlash bo‘limini tashkil etish to‘g‘risidagi takliflariga rozilik berilsin.

2. Quyidagilar Xorijiy harbiy kadrlar bilan ishlash bo‘limining asosiy vazifalari etib belgilansin:

xorijiy davlatlar harbiy kadrlarini qabul qilish, tayyorlash va bitiruv tadbirlarini amalga oshirish;

OHTMning ilmiy, o‘quv-tarbiyaviy bo‘linmalariga tarbiyaviy va o‘quv-uslubiy ishlarni tashkil etish, nazorat va monitoring qilishda ko‘maklashish;

xorijiy davlatlar harbiy kadrlarini tayyorlashni tashkil etishning mazmuni, shakllari va texnologiyalarini takomillashtirish maqsadida respublikaning boshqa sohalardagi yetakchi ta’lim muassasalarining tarkibiy bo‘linmalari bilan o‘zaro hamkorlik qilish;

xorijiy davlatlar harbiy kadrlarining O‘zbekiston sharoitiga moslashishida har tomonlama ko‘maklashish va ular tomonidan O‘zbekiston Respublikasi qonunchilik hujjatlariga amal qilinishining nazoratini ta’minlash;

xorijiy davlatlar harbiy kadrlari va O‘zbekiston Respublikasi harbiy xizmatchilari o‘rtasida madaniyatlararo almashinuv bo‘yicha tadbirlar, shuningdek, madaniy va ma’naviy-ma’rifiy ishlarning sifatli o‘tkazilishini muvofiqlashtirish;

xorijiy davlatlar harbiy kadrlari uchun birgalikdagi tadbirlarni o‘tkazish maqsadida O‘zbekiston Respublikasining san’at, madaniyat va sport sohasidagi taniqli namoyandalari va davlat (mahalliy) tashkilotlarining faollarini jalb etgan holda, davlat va jamoat tuzilmalari bilan o‘zaro hamkorlikni tashkil etish;

xorijiy davlatlar harbiy kadrlari vaqtincha yashashi uchun uy-joy ijarasi va madaniy-hordiq tadbirlarini tashkil etish masalalarini hal qilish;

tayyorgarlik natijadorligi, madaniy tadbirlar samaradorligini baholash, madaniyatlararo almashinuvning yangi shakllarini qo‘llash hamda o‘qishning tahlilini o‘tkazish;

bo‘limning moddiy-texnika bazasini mustahkamlash va rivojlantirish ishlarini amalga oshirish.

3. Belgilansinki:

a) OHTMda xorijiy davlatlar harbiy kadrlarining ta’lim olishi xorijiy davlatlarning rasmiy murojaatiga asosan O‘zbekiston Respublikasi Mudofaa vazirligi tomonidan O‘zbekiston Respublikasi Prezidenti huzuridagi Xavfsizlik kengashi bilan kelishilgan holda tashkil etiladi;

b) xorijiy davlatlar harbiy kadrlariga ta’lim berish belgilangan tartibda tuziladigan ikki tomonlama xalqaro shartnomalarga muvofiq beg‘araz, imtiyozli hamda to‘lov asosida amalga oshiriladi;

v) O‘zbekiston Respublikasi mudofaa vaziriga Mudofaa vazirligi bo‘linmalarining (qo‘shinlarining) umumiy cheklangan soni doirasida OHTMning Xorijiy harbiy kadrlar bilan ishlash bo‘limi tashkiliy-shtat tuzilmasiga zaruratga ko‘ra o‘zgartirish va qo‘shimchalar kiritishga ruxsat beriladi;

g) xorijiy davlatlar harbiy kadrlariga ta’lim berish:

oliy harbiy ta’limning bakalavriat dasturi bo‘yicha kursantlar umumiy cheklangan shtat birliklaridan tashqari ajratiladigan kvotalar doirasida;

magistratura, harbiy internatura, klinik ordinatura va doktorantura dasturi bo‘yicha OHTMga ajratilgan kvotalardan tashqari kvotalar doirasida amalga oshiriladi;

d) xorijiy davlatlar harbiy kadrlariga ta’lim berish OHTMning kursantlari, tinglovchilari, doktorantlari uchun belgilangan tartibda amalga oshiriladi;

e) xorijiy davlatlardan harbiy kadrlarning ta’lim olishi uchun O‘zbekiston Respublikasi Mudofaa vazirligining budjetdan tashqari hisobvarag‘iga kelib tushgan mablag‘lar Mudofaa vazirligining moddiy-texnik bazasini rivojlantirish va mustahkamlash, qurol-yarog‘, o‘q-dorilar, harbiy-texnik mulkni sotib olish va modernizatsiya qilish, bino va inshootlarni qurish, ta’mirlash hamda rekonstruksiya qilish ishlariga yo‘naltiriladi.

4. Quyidagilarni nazarda tutuvchi O‘zbekiston Respublikasi Mudofaa vazirligi va Milliy gvardiyasi oliy harbiy ta’lim muassasalarida xorijiy davlatlar harbiy kadrlarini tayyorlash va o‘qitish tartibi to‘g‘risidagi nizom ilovaga muvofiq tasdiqlansin:

oliy harbiy ta’limning bakalavriat, magistratura, harbiy internatura, klinik ordinatura va doktorantura dasturlari bo‘yicha xorijiy davlatlar harbiy kadrlarini o‘qitish, qayta tayyorlash va malakasini oshirishni beg‘araz, imtiyozli hamda to‘lov asosida tashkil etish tartibi;

OHTMda xorijiy davlatlar harbiy kadrlariga ta’lim berish, shu jumladan O‘zbekiston Respublikasi Davlat ta’lim standartlariga hamda O‘zbekiston Respublikasi qonunchiligiga muvofiq bitiruvchilarning harbiy-kasbiy tayyorgarligining malaka talablari asosida mutaxassislar tayyorlash tartibi;

xorijiy davlatlarning mudofaa sohasidagi vakolatli organlari taqdim etgan so‘rovnomalarga asosan xorijiy davlatlar harbiy kadrlarini o‘qishga qabul qilishni rejalashtirish hamda mutaxassislik va o‘qitish turi bo‘yicha har yilgi kvotalarni taqsimlash tartibi;

ta’lim dasturlarini o‘zlashtirgan xorijiy davlatlar harbiy kadrlariga dastlabki “leytenant” va “tibbiy xizmat leytenanti” harbiy unvonlari hamda mutaxassislik bo‘yicha diplom va ko‘krak nishonlarini berish tartibi;

xorijiy davlatlar harbiy kadrlarini tayyorlashni moliyalashtirish va ularning tibbiy ta’minoti hamda O‘zbekiston Respublikasida ta’lim olish davomida xorijiy davlatlar harbiy kadrlarining huquq va majburiyatlari.

5. O‘zbekiston Respublikasi Mudofaa vazirligi:

o‘z tizimidagi OHTM tomonidan harbiy kadrlarga ta’lim berish tartibi va muddatlari bo‘yicha doimiy ravishda tegishli xorijiy davlatlarni xabardor qilib borsin;

xorijiy davlatlar harbiy kadrlariga ta’lim berish uchun yetarli shart-sharoitlarni yaratish maqsadida OHTMning o‘quv va moddiy-texnika bazasini takomillashtirish va modernizatsiya qilish choralarini ko‘rsin;

Oliy va o‘rta maxsus ta’lim vazirligi bilan birgalikda ikki oy muddatda manfaatdor vazirlik va idoralarning soha bo‘yicha yuqori malakali mutaxassislarini jalb qilgan holda, xorijiy davlatlar harbiy kadrlari uchun o‘zbek tilini o‘rganish bo‘yicha o‘quv dasturlarini ishlab chiqsin.

6. O‘zbekiston Respublikasi Ichki ishlar vazirligi Tashqi ishlar vazirligi bilan birgalikda Mudofaa vazirligi va Milliy gvardiyasi buyurtmasiga binoan xorijiy davlatlar harbiy kadrlariga belgilangan tartibda vizalar berish va ularning muddatini uzaytirish, shuningdek, ularni turgan joyi bo‘yicha ro‘yxatdan o‘tkazishni va uning muddatini uzaytirishni ta’minlasin.

7. O‘zbekiston Respublikasi Xalq ta’lim vazirligi Mudofaa vazirligi va Milliy gvardiyasining buyurtmasiga asosan xorijiy davlatlar harbiy kadrlarining farzandlarini yashash manzili (vaqtincha ro‘yxatdan o‘tgan joyi) bo‘yicha biriktirilgan mikrohududdagi qabul qilish imkoniyati mavjud bo‘lgan umumta’lim muassasalariga joylashtirish choralarini ko‘rsin.

8. Belgilansinki, mazkur qarorni amalga oshirish, shu jumladan xorijiy davlatlarning harbiy kadrlarini tayyorlash bilan bog‘liq tadbirlar:

2021-yilda O‘zbekiston Respublikasi Mudofaa vazirligiga ajratilgan budjet mablag‘lari doirasida;

2022-yil va kelgusi yillarda tegishlicha O‘zbekiston Respublikasi Mudofaa vazirligi va Milliy gvardiyasiga har yili ajratiladigan budjet mablag‘lari, budjetdan tashqari mablag‘lar va qonunchilik hujjatlari bilan taqiqlanmagan boshqa manbalar hisobidan moliyalashtiriladi.

9. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.

1. Mazkur Nizom O‘zbekiston Respublikasi Mudofaa vazirligi va Milliy gvardiyasi oliy harbiy ta’lim muassasalarida (keyingi o‘rinlarda — OHTM) xorijiy davlatlar harbiy kadrlarini (keyingi o‘rinlarda — xorijiy harbiy kadrlar) tayyorlash, qayta tayyorlash va ularning malakasini oshirish (keyingi o‘rinlarda — ta’lim berish) tartibini belgilaydi.

2. OHTMda xorijiy harbiy kadrlarga ta’lim berish ikki tomonlama xalqaro shartnomalarga muvofiq amalga oshiriladi.

3. OHTMda xorijiy harbiy kadrlar uchun yillik qabul kvotalari O‘zbekiston Respublikasi Prezidenti tomonidan belgilanadi.

4. Xorijiy harbiy kadrlarni o‘qishga qabul qilish O‘zbekiston Respublikasi Mudofaa vazirligi va Milliy gvardiyasiga xorijiy davlatlarning mudofaa va jamoat xavfsizligini ta’minlash sohasidagi vakolatli organlari taqdim etgan murojaatga asosan rejalashtiriladi.

5. Xorijiy davlatlarning mudofaa va jamoat xavfsizligini ta’minlash sohasidagi vakolatli organlarining xorijiy harbiy kadrlar ta’lim olishi uchun murojaat qilish muddati, ularni ko‘rib chiqish va o‘qishga qabul qilish to‘g‘risidagi qaror o‘qish boshlangunga qadar to‘rt oydan kam bo‘lmagan muddatda kvotalar miqdorini aniqlashni inobatga olgan holda, O‘zbekiston Respublikasi Mudofaa vazirligi va Milliy gvardiyasi tomonidan qabul qilinadi.

6. Xorijiy davlatlar kesimidagi har yilgi kvota, mutaxassislik va o‘qitish turi bo‘yicha taqsimot O‘zbekiston Respublikasi Mudofaa vazirligi va Milliy gvardiyasi tomonidan O‘zbekiston Respublikasi Prezidenti huzuridagi Xavfsizlik kengashi kotibiyati bilan kelishgan holda amalga oshiriladi.

7. Xorijiy harbiy kadrlarga ta’lim berish:

oliy harbiy ta’limning bakalavriat dasturi bo‘yicha kursantlar umumiy cheklangan shtat birliklaridan tashqari ajratiladigan qo‘shimcha kvotalar doirasida;

magistratura, harbiy internatura, klinik ordinatura va doktorantura dasturi bo‘yicha OHTMga ajratilgan kvotalardan tashqari qo‘shimcha kvotalar doirasida amalga oshiriladi.

8. OHTMda xorijiy harbiy kadrlarga ta’lim berish xarajatlari quyidagi tartibda qoplanadi:

beg‘araz asosda — ta’lim va ta’minot (kiyim-kechak, oziq-ovqat, pul ta’minoti, kommunal xizmat) xarajatlari O‘zbekiston Respublikasi Davlat budjetidan ajratilgan pul mablag‘lari hisobidan, o‘qish davri mobaynida turarjoy xarajatlari (bakalavriat dasturi bo‘yicha o‘qitiladigan kursantlardan tashqari), o‘quv dasturi bo‘yicha amalga oshirilgan uchish soatlari va uchish mashq trenajyorlaridan foydalanganlik (ishlatganlik) uchun xarajatlar yuboruvchi tomonlar hisobidan;

imtiyozli asosda — ta’lim xarajatlari O‘zbekiston Respublikasi Davlat budjetidan ajratilgan pul mablag‘lari hisobidan, ta’minot (kiyim-kechak, oziq-ovqat, pul ta’minoti, kommunal xizmat), o‘qish davri mobaynida turarjoy xarajatlari (bakalavriat dasturi bo‘yicha o‘qitiladigan kursantlardan tashqari), o‘quv dasturi bo‘yicha amalga oshirilgan uchish soatlari va uchish mashq trenajyorlaridan foydalanganlik (ishlatganlik) uchun xarajatlar esa yuboruvchi tomonlar hisobidan;

to‘lov asosida — ta’lim va ta’minotning barcha xarajatlari yuboruvchi tomonlar hisobidan.

9. OHTMga xorijiy harbiy kadrlar kirish imtihonlarisiz o‘qishga qabul qilinadi.

10. Xorijiy harbiy kadrlarga ta’lim berish quyidagicha amalga oshiriladi:

oliy harbiy ta’lim darajasiga muvofiq keladigan oliy harbiy ta’limning bakalavriat dasturi bo‘yicha;

oliy harbiy ta’lim darajasiga muvofiq keladigan oliy harbiy ta’limning magistratura, harbiy internatura, klinik ordinatura dasturi bo‘yicha;

magistratura oliy harbiy ta’lim darajasiga muvofiq keladigan oliy harbiy ta’limning operativ-strategik darajasi dasturi bo‘yicha;

oliy ta’limdan keyingi ta’lim darajasiga muvofiq keluvchi doktorantura dasturi bo‘yicha;

tayyorgarlik kurslarining yakka ta’lim va fakultativ dasturlari asosida;

qo‘shimcha kasbiy dasturlar bo‘yicha.

11. OHTMda xorijiy harbiy kadrlarga ta’lim berish O‘zbekiston Respublikasi davlat ta’lim standartlariga hamda O‘zbekiston Respublikasi qonunchilik hujjatlariga muvofiq, bitiruvchilar harbiy-kasbiy tayyorgarligining malaka talablariga tatbiq etilgan asosiy ta’lim dasturlari asosida amalga oshiriladi.

12. Xorijiy harbiy kadrlarga ta’lim berish oliy harbiy ta’limning ta’lim dasturlari bo‘yicha o‘zbek va rus tilida amalga oshiriladi.

13. OHTM tomonidan xorijiy harbiy kadrlarga mavjud (shartnoma (bitim)larda ko‘rsatilgan) mutaxassisliklar bo‘yicha ta’lim beriladi.

14. Xorijiy harbiy kadrlarga o‘zbek va rus tilini o‘rgatish OHTMdagi tillar (chet tillar) kafedrasi tomonidan amalga oshiriladi.

15. Xorijiy harbiy kadrlarga til o‘rgatish quyidagi maqsadlarda amalga oshiriladi:

xorijiy harbiy kadrlarni OHTM asosiy kurslarida ta’lim olish uchun yetarli darajada til bilishini ta’minlash;

OHTM tinglovchi va kursantlariga qo‘yilgan talablar va xorijiy harbiy kadrlarning tayyorgarlik darajasi o‘rtasidagi til bilish bo‘yicha tafovutni bartaraf etish;

xorijiy harbiy kadrlarga o‘zbek va rus tilida ta’lim berish hamda ularni OHTM mutaxassisligiga muvofiq ta’lim olishga tayyorlash;

xorijiy harbiy kadrlarni o‘zbek madaniyati, urf-odatlari va O‘zbekiston tarixi bilan yaqindan tanishtirish.

16. Xorijiy harbiy kadrlarni tayyorlash kunduzgi ta’lim shaklida amalga oshiriladi.

17. Talab etilgan hajmdagi ta’lim dasturlarini o‘zlashtirgan xorijiy harbiy kadrlarga dastlabki “leytenant” harbiy unvoni, mutaxassisligi bo‘yicha toifa beriladi, belgilangan namunadagi diplom va ko‘krak nishoni taqdim etiladi.

O‘zbekiston Respublikasi Harbiy xavfsizlik va mudofaa universiteti Harbiy tibbiyot institutining bakalavriat bosqichini tamomlagan xorijiy harbiy kadrlarga dastlabki “tibbiy xizmat leytenanti” harbiy unvoni va “harbiy vrach” mutaxassisligini beradigan davlat namunasidagi diplom va ko‘krak nishonlari taqdim etiladi, harbiy internaturani tamomlagach, navbatdagi “tibbiy xizmat katta leytenanti” harbiy unvoni va tegishli mutaxassisligi bo‘yicha guvohnoma beriladi.

Oliy harbiy ta’limning magistratura darajasiga muvofiq keladigan oliy harbiy ta’lim (operativ-taktik, operativ-strategik darajasi) dasturi bo‘yicha talab etilgan hajmdagi ta’lim dasturlarini o‘zlashtirgan xorijiy harbiy kadrlarga tegishli magistr darajasi hamda belgilangan davlat namunasidagi diplom va ko‘krak nishonlari taqdim etiladi.

Ko‘krak nishonlari uchun belgilangan to‘lov xorijiy harbiy kadrlar tomonidan amalga oshiriladi.

Oliy ta’limdan keyingi ta’lim darajasiga muvofiq keladigan doktorantura dasturini tugatgan va belgilangan tartibda dissertatsiya himoya qilgan xorijiy harbiy kadrlarga tegishli fanlar bo‘yicha falsafa doktori (PhD) ilmiy darajasi beriladi.

Qisqa muddatli kurslarni tamomlagan xorijiy harbiy kadrlarga belgilangan namunadagi guvohnomalar (sertifikatlar) beriladi.

18. OHTM xorijiy harbiy kadrlarni beg‘araz, imtiyozli va to‘lov asosida tayyorlash tartibi, ularning pul ta’minoti, moddiy-texnika va boshqa ta’minot turlarining o‘ziga xosligi O‘zbekiston Respublikasining xalqaro harbiy hamkorlik doirasida tuzilgan shartnoma (bitim)lariga muvofiq belgilanadi.

19. Xorijiy harbiy kadrlarga ta’lim berish bilan bog‘liq xarajatlarning yuboruvchi tomon hisobidan to‘lanadigan qismi o‘quv yili boshlanguniga qadar OHTM hisob-kitoblari asosida yuboruvchi tomondan Mudofaa vazirligi va Milliy gvardiyaning budjetdan tashqari hisobvarag‘iga pul o‘tkazish orqali oldindan to‘lanadi.

20. O‘qishga qabul qilingan vaqtda ofitserlik unvoniga ega bo‘lmagan, beg‘araz asosda ta’lim oluvchi xorijiy harbiy kadrlarga “oliy harbiy ta’lim muassasasi kursanti” lavozimi bo‘yicha pul ta’minoti to‘lanadi.

21. O‘qishga qabul qilingan vaqtda ofitserlik unvoniga ega bo‘lgan, beg‘araz asosda ta’lim oluvchi xorijiy harbiy kadrlarga, ta’lim olish muddati va kursidan qat’i nazar:

a) malaka oshirish kurslarida:

“mayor” harbiy unvoni bo‘yicha harbiy unvon maoshi;

“motoo‘qchi batalyon komandiri” lavozimi va unga tenglashtirilgan lavozimlar bo‘yicha lavozim maoshi;

b) oliy harbiy ta’lim darajasiga muvofiq keladigan oliy harbiy ta’lim (magistratura) dasturi bo‘yicha:

“podpolkovnik” harbiy unvoni bo‘yicha harbiy unvon maoshi;

“motoo‘qchi batalyon komandiri” lavozimi va unga tenglashtirilgan lavozimlar bo‘yicha lavozim maoshi;

v) magistratura oliy harbiy ta’lim darajasiga muvofiq keluvchi oliy harbiy ta’lim (operativ-strategik darajasi) dasturi, doktorantura dasturi bo‘yicha:

“podpolkovnik” harbiy unvoni bo‘yicha harbiy unvon maoshi;

“motoo‘qchi brigadasi komandiri” lavozimi va unga tenglashtirilgan lavozimlar bo‘yicha lavozim maoshi to‘lanadi.

22. Ushbu Nizomning 21-bandida nazarda tutilgan to‘lovlar o‘qishga qabul qilingan kundan boshlab, o‘qishni yakunlagan kunigacha bo‘lgan muddatda amalga oshiriladi.

23. Ofitserlik unvoniga ega bo‘lmagan xorijiy harbiy kadrlar o‘qish davrida O‘zbekiston Respublikasi Mudofaa vazirligi va Milliy gvardiyasi harbiy xizmatchilariga belgilangan me’yorlar asosida oziq-ovqat bilan ta’minlanadi.

Ofitserlik unvoniga ega bo‘lgan xorijiy harbiy kadrlarning o‘qish davrida oziq-ovqat ta’minoti o‘z hisobidan amalga oshiriladi.

24. Xorijiy harbiy kadrlarning kiyim-kechak ta’minoti (beg‘araz asosda o‘qitiladigan kursantlardan tashqari) yuboruvchi tomon hisobidan qoplanadi va ta’lim olayotgan OHTM hududlarida o‘z armiyasining kiyim rusumi qoidalarini buzmagan holda kiyib yuradi.

25. Ofitserlik unvoniga ega bo‘lgan xorijiy harbiy kadrlar O‘zbekiston Respublikasi Mudofaa vazirligi va Milliy gvardiyasi harbiy xizmatchilar toifasi uchun nazarda tutilgan me’yorlar bo‘yicha amaliy mashg‘ulotlarning alohida turlarini o‘tkazish uchun maxsus kiyim-kechak bilan ta’minlanadilar.

26. O‘qish davrida xorijiy harbiy kadrlarning turarjoy ta’minoti quyidagicha amalga oshiriladi:

oliy harbiy ta’lim darajasiga muvofiq keladigan oliy harbiy ta’limning bakalavriat dasturi bo‘yicha o‘qish davrida beg‘araz asosda OHTM yotoqxonalarida turarjoy bilan ta’minlanadi. To‘lov asosida o‘qitiladigan kursantlarning turarjoy xarajatlari yuboruvchi tomon hisobidan qoplanadi;

oliy harbiy ta’lim darajasiga muvofiq keladigan oliy harbiy ta’limning magistratura, harbiy internatura, klinik ordinatura, doktorantura, malaka oshirish kurslari dasturi bo‘yicha o‘qish davrida turarjoy ikkilamchi ijaraga olish yo‘li bilan ta’minlanadi. Bunda ikkilamchi ijaraga olish xarajatlari yuboruvchi tomon hisobidan to‘lanadi.

27. Yuboruvchi tomondan xorijiy harbiy kadrlar o‘qish davrida o‘quv rejalarida belgilangan me’yorlardan tashqari qo‘shimcha akademik soatlar talab qilinganda, o‘tkazilgan qo‘shimcha darslar uchun amalga oshirilgan sarf-xarajatlar yuboruvchi tomon hisobidan to‘lanadi.

28. Xorijiy harbiy kadrlar uchuvchi mutaxassisligi yo‘nalishida ta’lim olishda havo transportlarini parvozda boshqarish, yerdan ko‘tarish, qo‘ndirish hamda aeroport inshootlari va uskunalarini yoki foydalanishda bo‘lmagan aeroport hududida joylashgan havo transportlarini ishdan chiqarish va mashg‘ulotlar jarayonida yoki mashg‘ulotdan tashqari vaqtlarda foydalanish natijasida ularga zarar yetkazgan hollarda, ularning javobgarligi to‘g‘risidagi masalalar xalqaro shartnomalar (bitimlar) va xalqaro huquq normalarida boshqacha qoidalar belgilanmagan bo‘lsa, O‘zbekiston Respublikasi qonunchilik hujjatlariga muvofiq hal etiladi va yetkazilgan zarar yuboruvchi tomon hisobidan qoplanadi.

29. Xorijiy harbiy kadrlarning tibbiy ta’minoti O‘zbekiston Respublikasi Mudofaa vazirligi va Milliy gvardiyasi harbiy xizmatchilari uchun belgilangan me’yorlar asosida amalga oshiriladi.

30. Xorijiy harbiy kadrlar o‘quv rejalari va ta’lim dasturlariga muvofiq bir OHTM (harbiy qism)dan boshqasiga yuborilganda va qaytarilayotganda, ularni tashish bilan bog‘liq xarajatlar qabul qiluvchi tomon hisobidan amalga oshiriladi.

Xorijiy harbiy kadrlarning ta’tilda bo‘lish davrida doimiy yashash joyiga borishi va qaytishi bilan bog‘liq xarajatlar yuboruvchi tomon hisobidan amalga oshiriladi.

31. Xorijiy harbiy kadrlar quyidagi huquqlarga ega:

OHTM ilmiy-tadqiqot ishlarida (maxfiy grifdagi ilmiy-tadqiqot ishlari bundan mustasno), talabalarning ilmiy jamiyatlari va to‘garaklarida qatnashish;

OHTM maxfiy bo‘lmagan kutubxonalari, sport majmualari, klublari va madaniyat saroylaridan foydalanish;

dam olishning uyushtirilgan turlarida qatnashish.

32. Xorijiy harbiy kadrlar quyidagilarga majbur:

O‘zbekiston Respublikasi Konstitutsiyasi va boshqa qonunchilik hujjatlariga amal qilish, mahalliy urf-odatlar va an’analarga hurmat bilan munosabatda bo‘lish, respublikada xorijiy fuqarolarning bo‘lishi va harakatlanishi bo‘yicha belgilangan qoidalarni bajarish;

harbiy intizomga qat’iy rioya qilish, mashg‘ulotlar va o‘quvlarda qatnashish, o‘quv rejalari va dasturlarida nazarda tutilgan o‘quv ishlarining barcha turlarini bajarish, imtihon va sinovlarni belgilangan muddatlarda topshirish;

OHTM ichki tartib-qoidalariga rioya qilish;

O‘zbekiston Respublikasi Mudofaa vazirligi, Milliy gvardiyasi, OHTM rahbarlari va komandirlarning ko‘rsatma hamda farmoyishlarini bajarish.

33. OHTMda belgilangan ichki tartib-qoidalarga rioya etmagan, o‘quv fani dasturini o‘zlashtirmagan xorijiy harbiy kadrlarga belgilangan tartibda o‘qishdan chetlashtirish choralar ko‘rilishi mumkin.

O‘zbekiston Respublikasi hududida bo‘lish qoidalarini buzganlik uchun xorijiy harbiy kadrlar belgilangan tartibda vakolatli davlat organlari tomonidan respublika hududidan chiqarib yuboriladi.

34. O‘zbekiston Respublikasi hududida jinoyat sodir etgan xorijiy harbiy kadrlar, agar O‘zbekiston Respublikasining xalqaro shartnomalarida boshqacha qoida nazarda tutilmagan bo‘lsa, O‘zbekiston Respublikasi qonunchilik hujjatlariga asosan javobgarlikka tortiladi.

35. O‘qishni tugatgan yoki OHTM ro‘yxatidan chetlashtirilgan xorijiy harbiy kadrlar O‘zbekiston Respublikasi qonunchilik hujjatlarida belgilangan muddatlarda O‘zbekiston Respublikasidan chiqib ketishi shart, O‘zbekiston Respublikasining xalqaro shartnomalarida, shuningdek, jamoaviy va shaxsiy shartnomalar hamda kontraktlarda nazarda tutilgan holatlar bundan mustasno.

36. Mazkur Nizom talablarini buzishda aybdor deb topilgan shaxslar O‘zbekiston Respublikasi qonunchilik hujjatlariga muvofiq javobgarlikka tortiladi.