Oliy ta’lim muassasalarida xalqaro munosabatlar sohasida tahsil olayotgan talabalarning ishlab chiqarish amaliyotini bevosita O‘zbekiston Respublikasining xorijdagi muassasalarida o‘tashini tizimli ravishda tashkil etish mexanizmini yaratish, shuningdek, xalqaro munosabatlar sohasida yuqori malakali va raqobatdosh kadrlarni tayyorlash, ularning dunyoqarashini kengaytirish maqsadida Vazirlar Mahkamasi qaror qiladi:

1. Ma’lumot uchun qabul qilinsinki, ushbu qaror maqsadlari uchun:

O‘zbekiston Respublikasining xorijdagi muassasalari deganda — O‘zbekiston Respublikasining xorijiy davlatlardagi diplomatik vakolatxonalari, konsullik muassasalari yoki O‘zbekiston Respublikasining xalqaro tashkilotlar huzuridagi vakolatxonalari;

xalqaro munosabatlar deganda — “Siyosatshunoslik”, “Xalqaro munosabatlar”, “Xalqaro iqtisodiyot va menejment (mintaqalar va faoliyat yo‘nalishlari bo‘yicha)”, “Yurisprudensiya (xalqaro huquqiy faoliyat)”, “Xorijiy mamlakatlar iqtisodiyoti va mamlakatshunoslik (mamlakatlar va mintaqalar bo‘yicha)” hamda “Jahon iqtisodiyoti va xalqaro iqtisodiy munosabatlar (mintaqalar va faoliyat turlari bo‘yicha)” bakalavriat ta’lim yo‘nalishlari tushuniladi.

2. Quyidagilarni nazarda tutuvchi Oliy ta’lim muassasalarida xalqaro munosabatlar sohasida tahsil olayotgan talabalarning ishlab chiqarish amaliyotini O‘zbekiston Respublikasining xorijdagi muassasalarida tashkil etish to‘g‘risidagi nizom ilovaga muvofiq tasdiqlansin:

talabalarning ishlab chiqarish amaliyotini (keyingi o‘rinlarda — amaliyot) tashkil etishning bosqichlari;

amaliyotga yuborilayotgan nomzodlarga qo‘yiladigan talablar, ularni saralash tartibi;

amaliyot o‘tash jarayoni, talabalarni qabul qiluvchi tashkilotlarning vazifalari;

amaliyot o‘tashni moliyalashtirish, talabalarning xarajatlarini qoplash masalalari.

3. O‘zbekiston Respublikasi Tashqi ishlar vazirligi Oliy va o‘rta maxsus ta’lim vazirligi bilan birgalikda oliy ta’lim muassasalarida xalqaro munosabatlar bakalavriat ta’lim yo‘nalishlari bo‘yicha tahsil olayotgan talabalarning amaliyoti O‘zbekiston Respublikasining xorijdagi muassasalarida shartnoma asosida tizimli ravishda o‘tkazilishi hamda amaliyotning tegishli dasturlarga muvofiq tashkil qilinishini ta’minlasin.

4. O‘zbekiston Respublikasining xorijdagi muassasalari rahbarlari talabalarning amaliyot davridagi faoliyatiga shaxsan mas’ul ekanliklari belgilab qo‘yilsin. Bunda ular:

amaliyot dasturiga muvofiq talabalarga zarur shart-sharoitlar yaratadi;

amaliyot natijasiga ko‘ra, Tashqi ishlar vazirligiga xulosa taqdim etilishini ta’minlaydi.

5. O‘zbekiston Respublikasi Transport vazirligi milliy reyslarda xorijiy davlatlarga amaliyot o‘tashga yuborilayotgan talabalar uchun Tashqi ishlar vazirligining buyurtmasi asosida borish va qaytish aviachiptalariga yiliga bir marotaba 20 foizli chegirma berilishini ta’minlasin.

6. Mazkur qarorning bajarilishini nazorat qilish O‘zbekiston Respublikasi Bosh vazirining investitsiyalar va tashqi iqtisodiy aloqalar masalalari bo‘yicha o‘rinbosari — investitsiyalar va tashqi savdo vaziri S.U. Umurzakov hamda O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari B.A. Musayev zimmasiga yuklansin.

1. Mazkur Nizom davlat oliy ta’lim muassasalari bakalavriat bosqichlarida xalqaro munosabatlar sohasida tahsil olayotgan, umumiy o‘zlashtirish ko‘rsatkichi yuqori bo‘lgan talabalarning O‘zbekiston Respublikasining xorijiy davlatlardagi diplomatik vakolatxonalari, konsullik muassasalari yoki O‘zbekiston Respublikasining xalqaro tashkilotlar huzuridagi vakolatxonalarida (keyingi o‘rinlarda — xorijdagi muassasalar) ishlab chiqarish amaliyotini o‘tash tartibini belgilaydi.

2. Ushbu Nizomda qo‘llaniladigan asosiy tushunchalar:

amaliyot rahbari — talabalarni amaliyot davomida texnika xavfsizligi qoidalari bilan tanishtirish, amaliy ko‘nikma va malakani shakllantirishga ko‘maklashish, amaliyot davrida talaba egallagan ko‘nikmalarni baholashga mas’ul etib belgilangan qabul qiluvchi tashkilot xodimi;

ishlab chiqarish amaliyoti (keyingi o‘rinlarda — amaliyot) — talabalarda amaliy ko‘nikma va malaka hosil qilishni nazarda tutuvchi, nazariy bilimlarni mustahkamlash hamda bevosita ishlab chiqarish sharoitida amalda qo‘llashga qaratilgan ta’lim jarayoni;

qabul qiluvchi tashkilot — O‘zbekiston Respublikasining xorijdagi muassasalari;

xalqaro munosabatlar — “Siyosatshunoslik”, “Xalqaro munosabatlar”, “Xalqaro iqtisodiyot va menejment (mintaqalar va faoliyat yo‘nalishlari bo‘yicha)”, “Yurisprudensiya (xalqaro huquqiy faoliyat)”, “Xorijiy mamlakatlar iqtisodiyoti va mamlakatshunoslik (mamlakatlar va mintaqalar bo‘yicha)” hamda “Jahon iqtisodiyoti va xalqaro iqtisodiy munosabatlar (mintaqalar va faoliyat turlari bo‘yicha)” bakalavriat ta’lim yo‘nalishlari.

3. Amaliyot tegishli bakalavriat ta’lim yo‘nalishining o‘quv rejasiga muvofiq oliy ta’lim muassasasi tomonidan ishlab chiqiladigan hamda qabul qiluvchi tashkilot bilan kelishiladigan dastur asosida tashkil etiladi.

Amaliyot bir o‘quv yilida bir marta 10 kundan kam bo‘lmagan va 30 kundan ko‘p bo‘lmagan muddatlarda o‘tkaziladi. Qabul qiluvchi tashkilot imkoniyatlaridan kelib chiqib, talaba tahsil olayotgan oliy ta’lim muassasasi, O‘zbekiston Respublikasi Oliy va o‘rta maxsus ta’lim vazirligi hamda Tashqi ishlar vazirligi bilan tuzilgan uch tomonlama shartnomada amaliyotning aniq muddati belgilanadi.

4. Talabaning amaliyotga shaffof va xolisona tanlov asosida saralab olinishi hamda amaliyot dasturining shakllantirilishi talaba tahsil olayotgan oliy ta’lim muassasasining rektori zimmasiga yuklanadi.

5. Amaliyotni tashkil etish uchun ta’lim muassasasining amaliyot rahbari tayinlanadi.

6. Amaliyot ikki bosqichda amalga oshiriladi.

7. Birinchi bosqichda oliy ta’lim muassasasi tomonidan xorijiy tillarni mukammal o‘zlashtirgan iqtidorli 3-kurs talabalarining ro‘yxati tuziladi hamda ularga berilgan tavsiyanomalar bilan birga har yili 1-iyuldan kechikmagan holda, Tashqi ishlar vazirligiga taqdim etiladi.

Saralab olishda talabalardan:

CEFR tizimining kamida S1 darajasiga mos keladigan chet tilini bilish to‘g‘risidagi milliy yoki unga mos darajadagi xalqaro sertifikatga ega bo‘lishi;

umumiy reyting (o‘zlashtirish) ko‘rsatkichlari 80 ball va undan yuqori bo‘lishi, fanlardan qarzdorligi mavjud bo‘lmasligi talab etiladi.

8. Ikkinchi bosqichda oliy ta’lim muassasasi tomonidan taqdim qilingan nomzodlar Tashqi ishlar vazirligida qabul qiluvchi tashkilotning talablari va ehtiyojlaridan kelib chiqqan holda taqsimlanadi.

Taqsimotdan so‘ng nomzodlar Tashqi ishlar vazirligi, Investitsiyalar va tashqi savdo vazirligi hamda Oliy va o‘rta maxsus ta’lim vazirligi vakillaridan tuzilgan komissiya tomonidan 20-iyulgacha suhbatdan o‘tkaziladi. Komissiya tarkibi tashqi ishlar vaziri tomonidan tasdiqlanadi.

Suhbat jarayonida komissiya a’zolari tomonidan talabaning hujjatlari (tegishli darajada chet tilini bilish to‘g‘risidagi sertifikat, oliy ta’lim muassasasining tavsiyanomasi) o‘rganib chiqiladi, shuningdek, talabaning o‘z ta’lim yo‘nalishi bo‘yicha bilimlariga aniqlik kiritiladi.

9. Suhbat natijalari yuzasidan komissiya bayonnomasi rasmiylashtiriladi.

10. Bayonnomada talabalarning suhbat natijasiga ko‘ra shakllantirilgan ro‘yxati tasdiqlanadi va saralash ko‘rsatkichlari bo‘yicha eng yuqori o‘rinlarni egallagan talabalar to‘g‘risidagi ma’lumotlar Tashqi ishlar vazirligi tomonidan amaliyot o‘taladigan davlatga borib kelishda aviachiptalarga 20 foizli chegirma berish masalasini ko‘rib chiqish uchun “Uzbekistan Airways” AJga yuboriladi.

11. Qabul qiluvchi tashkilotda amaliyotni o‘tashga tavsiya etilgan talabalar dastlab, Tashqi ishlar vazirligining mintaqaviy va funksional boshqarmalarida qisqa muddatli (uch kundan besh kunga qadar) amaliyot o‘taydilar.

Mazkur amaliyot jarayonida vazirlikning tegishli boshqarmasi mas’ul xodimi tomonidan talabaga u taqsimlangan xorijiy davlatning tashqi siyosati va qonunchiligiga oid umumiy ma’lumotlar beriladi.

12. Qabul qiluvchi tashkilotdagi amaliyot rahbari talabaning amaliyot dasturi ijrosini ta’minlaydi va tashkilotning ichki tartib qoidalari, ishlash rejimining xususiyatlari bo‘yicha tushuntirish ishlarini olib boradi.

13. Amaliyotning samarali tashkil etilishiga qabul qiluvchi tashkilot rahbari shaxsan mas’ul hisoblanadi.

Qabul qiluvchi tashkilot rahbariga quyidagi vazifalar yuklanadi:

amaliyot dasturiga muvofiq talabalarga zarur shart-sharoitlarni (amaliyot o‘tash uchun joy ajratish, barcha xavfsizlik qoidalari talablariga javob beradigan turar joy yoki mehmonxonaga joylashtirilishiga ko‘mak berish) yaratish;

talabalarga maxsus adabiyotlar va hujjatlardan foydalanish imkoniyatini berish;

vakolatxonaning ichki mehnat intizomini buzgan talaba haqida Tashqi ishlar vazirligi orqali oliy ta’lim muassasasi rektoriga xabar qilish;

amaliyot yakuni yuzasidan Tashqi ishlar vazirligiga xulosa taqdim qilish.

14. Talabaning amaliyotni o‘tash uchun yo‘l xarajatlari, turar joy, kundalik va boshqa xarajatlari quyidagi tartibga binoan qoplanadi:

talabaning o‘z hisobidan yoki homiylar xayriyalari hisobidan;

amaliyot o‘tashga yuboriladigan talabalar ro‘yxatida eng yuqori o‘zlashtirish ko‘rsatkichlariga ega, shu jumladan, Ijtimoiy reyestrga kiritilgan oilalar farzandlariga talabalarning ushbu bandning birinchi xatboshida nazarda tutilgan xarajatlari tegishli oliy ta’lim muassasasining budjetdan tashqari mablag‘lari hisobidan.

15. Amaliyotni o‘tash davrida talabaning belgilangan tartibda stipendiya olish huquqi saqlab qolinadi.

16. Ushbu Nizomni qo‘llash jarayonida yuzaga keladigan nizolar qonunchilik hujjatlarida belgilangan tartibda hal etiladi.

17. Mazkur Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.