Oʻzbekiston Respublikasi Vazirlar Mahkamasining 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturining (bundan buyon matnda Davlat dasturi deb yuritiladi) 2021-yil I yarim yilligida bajarilishi yuzasidan hisobotini koʻrib chiqib, Oʻzbekiston Respublikasi Oliy Majlisi Qonunchilik palatasi taʼkidlaydiki, hisobot davrida Davlat dasturida belgilangan vazifalarni hayotga tatbiq etish borasida qator tizimli ishlar amalga oshirilgan.

Hukumat tomonidan oʻz vaqtida koʻrilgan amaliy chora-tadbirlar makroiqtisodiy barqarorlikni taʼminlashga xizmat qilgan. Xususan, oʻtgan davrda yalpi ichki mahsulotning oʻsishi oʻtgan yilning mos davriga nisbatan 106,2 foizni tashkil etgan, savdo aylanmasi hajmi 104,4 trln. soʻmni tashkil qilib, oʻtgan yilga nisbatan 109 foizga oʻsgan.

Oʻzbekiston Respublikasi Davlat budjeti daromadlari 74,9 trln. soʻmga ijro etilib, Davlat budjetining jami xarajatlari 79,3 trln. soʻmni, shundan ijtimoiy sohaga yoʻnaltirilgan xarajatlar 40,4 trln. soʻmni tashkil qilgan.

Hisobot davrida Oʻzbekiston fuqaroligini berish tartibini takomillashtirish borasidagi islohotlar izchil davom ettirilgan. Jumladan, mamlakatimizga 2005-yil 1-yanvarga qadar kelib, doimiy yashayotgan, shuningdek mamlakatimizda 15 yil davomida doimiy yashab turgan fuqaroligi boʻlmagan (chet davlat fuqaroligini qabul qilmagan) shaxslar tomonidan istak bildirilgan taqdirda ularni Oʻzbekiston Respublikasi fuqarosi deb tan olish tartibi joriy qilingan.

Hisobot davrida davlat va jamiyat qurilishi tizimini takomillashtirish borasida ham sezilarli ishlar bajarilgan. Xususan, Oʻzbekiston Respublikasi Prezidenti hujjatlari ijrosini nazorat qilishning mutlaqo yangi tizimi yoʻlga qoʻyilgan, aholi va tadbirkorlik subyektlarining davlat organlari bilan munosabatga kirishishida qator byurokratik toʻsiqlar tubdan qisqartirilgan.

Davlat organlarida ochiqlik va oshkoralikni taʼminlash mexanizmlari yanada takomillashtirilgan. Jumladan, 2021-yil 1-iyuldan boshlab amalga oshirilgan davlat xaridlari, shu jumladan toʻgʻridan-toʻgʻri shartnomalar boʻyicha xarid qilinadigan tovarlar (ishlar, xizmatlar), davlat organlarining yillik xarajatlari smetasi va uning ijrosi, shu jumladan obyektlarni qurish, rekonstruksiya qilish va kapital taʼmirlash borasidagi maʼlumotlarni Ochiq maʼlumotlar portaliga joylashtirish hamda har chorakda yangilab borish amaliyoti joriy etilgan.

Yoshlarni qoʻllab-quvvatlash va aholi salomatligini mustahkamlash hamda ijtimoiy sohani rivojlantirish yoʻnalishida ham bir qator ishlar amalga oshirilgan. Jumladan, Qoraqalpogʻiston Respublikasi va viloyatlarda jami 425 ming 662 nafar yoshning bandligi taʼminlangan, 107 ming 241 nafar yosh kasb-hunar va tadbirkorlikka oʻqitilgan hamda 70 ming 424 nafar yosh “1+1” loyihasi asosida tadbirkor va usta-hunarmandlarga biriktirilgan.

Oʻtgan davrda aholi salomatligini mustahkamlash, sogʻliqni saqlash tizimida olib borilayotgan islohotlarni yanada jadallashtirish yuzasidan Oʻzbekiston Respublikasi Prezidentining 2 ta farmoni, 5 ta qarori qabul qilingan.

Barcha respublika ixtisoslashtirilgan ilmiy-amaliy tibbiyot markazlari va ularning 211 ta hududiy filiali va yoʻnalish boʻyicha ilmiy-uslubiy yordam koʻrsatuvchi boʻlim va dispanserlarda teletibbiyot aloqasi oʻrnatilgan. Hisobot davrida teletibbiyot aloqasi orqali 34 586 nafar bemor maslahat olgan, 348 ta seminar, 312 ta onlayn master klass darsi, 2 828 ta onlayn konsilium, 176 ta onlayn jarrohlik amaliyoti oʻtkazilgan.

Ixtisoslashtirilgan tibbiyot markazlari mutaxassislari tomonidan oʻtgan davrda 759 ta yuqori texnologik operatsiya amalga oshirilgan, ular ishtirokida hududlarda 32 677 ta koʻrik oʻtkazilgan.

Joriy yilning birinchi yarim yilligida Davlat dasturidagi bajarilishi belgilangan 116 ta banddan 89 tasi toʻliq bajarilgan, 2 tasining bajarilish muddati uzaytirilgan, 25 tasining ijrosini toʻliq taʼminlash yuzasidan zarur choralar koʻrilmoqda.

Davlat dasturida nazarda tutilgan tadbirlarning ijrosini taʼminlash borasida amalga oshirilgan ijobiy ishlar bilan bir qatorda, ayrim bandlarning bajarilishi kechikmoqda, qator vazifalarning ijrosi bugungi kunga qadar taʼminlanmasdan qolmoqda.

Jumladan, Davlat dasturining 7-bandiga muvofiq davlat fuqarolik xizmatida kadrlarni tanlash, ularning malakasini oshirish va faoliyatini baholash boʻyicha samarali va ochiq tizimni joriy etishni, 149-bandiga koʻra, har bir tumanning imkoniyati va rivojlanish yoʻnalishidan kelib chiqib, dehqonchilik bilan shugʻullanadigan ehtiyojmand oilalarga 0,1 gektardan 1 gektargacha yer maydonlari ajratishni nazarda tutuvchi normativ-huquqiy hujjatlarni qabul qilish ishlari kechikmoqda.

Davlat dasturining 267-bandiga asosan, chet elda istiqomat qilayotgan vatandoshlarimizni har tomonlama qoʻllab-quvvatlash, ularni Oʻzbekistonning ijtimoiy-iqtisodiy, madaniy va sayyohlik salohiyatini oshirish jarayonlariga faol jalb qilish bilan bogʻliq ishlar bugungi kunga qadar yakunlanmagan.

Shuningdek yil davomida ijro etilishi belgilangan ayrim vazifalarning bajarilishi muddati kechikayotganligiga, Davlat dasturi doirasida ajratilgan mablagʻlar toʻliq oʻzlashtirilmayotganligiga ham deputatlar tomonidan eʼtibor qaratildi. Jumladan, Davlat dasturining 146-bandiga muvofiq, kambagʻal va ishsiz fuqarolarni doimiy daromad manbai bilan taʼminlash maqsadida ularni kasb-hunarga va tadbirkorlikka oʻqitish boʻyicha tizimni toʻliq joriy etish, oʻqishga jalb qilingan fuqarolar qamrovini kengaytirish vazifasi uchun ajratilishi nazarda tutilgan 140,5 mlrd. soʻmdan atigi 14,4 mlrd. soʻmi oʻzlashtirilganligi (yoki 10,2 foizi) bu boradagi ishlarni yil yakuniga qadar yakunlash imkonini pasaytiradi.

Davlat dasturining koʻrib chiqilayotgan davrdagi ijrosiga oid hisobotni muhokama qilish chogʻida Qonunchilik palatasidagi siyosiy partiyalar fraksiyalari Davlat dasturining ijrosini taʼminlashda Hukumat aʼzolari jamiyat hayotidagi boshqa bir qator muhim masalalarga ham alohida eʼtibor qaratishi lozimligini qayd etdilar.

Jumladan, bugungi murakkab sharoitda koronavirus infeksiyasining tarqalishiga qarshi kurashish, aholining sogʻligʻini muhofaza qilish va sanitariya-epidemiologik osoyishtalikni taʼminlash, aholini koronavirusga qarshi emlash ishlarini yanada jadallashtirish hamda ushbu jarayonning sifatli olib borilishi ustidan nazoratni kuchaytirish yuzasidan zarur chora-tadbirlar koʻrilishi taʼkidlab oʻtildi.

Shu bilan bir qatorda, koronavirus pandemiyasi davrida aholining ijtimoiy himoyaga muhtoj qatlamlarini va tadbirkorlik subyektlarini qoʻllab-quvvatlash, aholi bandligini taʼminlash, taʼlim muassasalarining moddiy-texnika bazasini mustahkamlash, taʼlim tizimiga xususiy sektorni jalb qilish, oziq-ovqat xavfsizligini taʼminlash, asosiy oziq-ovqat mahsulotlari narxining keskin oshib ketishiga yoʻl qoʻymaslik masalalariga eʼtiborni kuchaytirish zarurligi taʼkidlab oʻtildi.

Yuqoridagilardan kelib chiqib, “Parlament nazorati toʻgʻrisida”gi Oʻzbekiston Respublikasi Qonunining 8¹-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Vazirlar Mahkamasining 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturining 2021-yil I yarim yilligida bajarilishi yuzasidan hisoboti maʼlumot uchun qabul qilinsin.

2. Oʻzbekiston Respublikasi Vazirlar Mahkamasiga:

Oʻzbekiston Respublikasi Prezidentining 2021-yil 3-fevraldagi “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturi toʻgʻrisida”gi PF-6155-sonli Farmonida belgilangan ustuvor yoʻnalishlarni oʻz vaqtida va sifatli amalga oshirish;

vazirliklar, idoralar va hududlar kesimida Davlat dasturining bajarilishi holatini Oʻzbekiston Respublikasi Vazirlar Mahkamasi Rayosati majlislarida doimiy ravishda muhokama qilib borish;

Davlat dasturida ijro muddati uzaytirilgan 2 ta hamda bajarilishi toʻliq yakunlanmagan 25 ta bandda belgilangan vazifalarni oʻz vaqtida amalga oshirish yuzasidan mutasaddi vazirlik va idoralar rahbarlarining shaxsiy masʼuliyatini yanada kuchaytirish choralarini koʻrish;

Davlat dasturida belgilangan tadbirlarni amalga oshirish uchun ajratilgan mablagʻlarni oʻz vaqtida oʻzlashtirish va ulardan maqsadli foydalanishni taʼminlash choralarini koʻrish;

Oʻzbekiston Respublikasi Vazirlar Mahkamasi tarkibiga kirmaydigan davlat organlari asosiy ijrochi boʻlgan bandlarning bajarilishi yuzasidan hamkorlikni kuchaytirish;

Davlat dasturida belgilangan tadbirlarning amalga oshirilishini tizimli monitoring qilish, ularning sifatli va oʻz vaqtida bajarilishini taʼminlash yuzasidan taʼsirchan choralarni koʻrish;

Davlat dasturida koʻzda tutilgan qonun loyihalari belgilangan muddatlarda tayyorlash bilan birga ularning sifatli va puxta huquqiy ekspertizadan oʻtkazilishini taʼminlash;

Davlat dasturida nazarda tutilgan har bir tadbirning bajarilishini uning natijadorligi nuqtai nazaridan tahlil qilib borish;

Davlat dasturining bajarilishini muhokama qilish jarayonida siyosiy partiyalar fraksiyalari tomonidan koʻtarilgan masalalarni hal etish yuzasidan taʼsirchan nazorat oʻrnatish tavsiya etilsin.

3. Oʻzbekiston Respublikasi Oliy Majlisining Qonunchilik palatasidagi siyosiy partiyalar fraksiyalariga:

Davlat dasturi doirasida amalga oshirilayotgan islohotlarning mohiyati va ahamiyatini keng jamoatchilikka yetkazish;

koronavirusga qarshi emlash tadbirlarining oʻz vaqtida va samarali tashkil etilishi, bu borada ajratilayotgan budjet mablagʻlaridan maqsadli foydalanilishi ustidan parlament va deputat nazoratini oʻrnatish;

Davlat dasturida belgilangan ustuvor yoʻnalishlarning samarali ijro etilishi ustidan oʻz partiyaviy maqsad va vazifalaridan kelib chiqib, taʼsirchan jamoatchilik nazoratini amalga oshirish tavsiya etilsin.

4. Oʻzbekiston Respublikasi Oliy Majlisi Qonunchilik palatasining qoʻmitalari:

Davlat dasturining 67 va 95-bandlarida belgilangan tadbirlarning bajarilish muddatlari mos ravishda joriy yilning 1-noyabr va 1-sentabrigacha uzaytirilganligini inobatga olib, ushbu bandlarning ijrosi yuzasidan parlament nazoratini oʻrnatsin;

Davlat dasturida ijrosi toʻliq taʼminlanmagan quyidagi bandlarning bajarilishi ustidan samarali monitoring oʻrnatsin va ushbu bandlar yuzasidan amalga oshirilgan ishlarning natijalari toʻgʻrisida 2021-yil 1-oktabrga qadar Oʻzbekiston Respublikasi Oliy Majlisi Qonunchilik palatasining Kengashiga maʼlumot taqdim etsin:

Budjet va iqtisodiy islohotlar qoʻmitasi — 145-band;

Korrupsiyaga qarshi kurashish va sud-huquq masalalari qoʻmitasi — 1, 7, 27, 30, 34-bandlar;

Mehnat va ijtimoiy masalalar qoʻmitasi — 142-band;

Xalqaro ishlar va parlamentlararo aloqalar qoʻmitasi — 267-band;

Fan, taʼlim, madaniyat va sport masalalari qoʻmitasi — 231, 234, 237-bandlar;

Sanoat, qurilish va savdo masalalari qoʻmitasi — 67, 94, 95-bandlar;

Agrar va suv xoʻjaligi masalalari qoʻmitasi — 149-band;

Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi — 5, 6, 12, 257-bandlar;

Innovatsion rivojlanish, axborot siyosati va axborot texnologiyalari masalalari qoʻmitasi — 17 va 36-bandlar;

Ekologiya va atrof muhitni muhofaza qilish masalalari qoʻmitasi — 242-band.

5. Ushbu Qaror Oʻzbekiston Respublikasi Vazirlar Mahkamasiga yuborilsin.

6. Mazkur Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Xaitov zimmasiga yuklatilsin.

7. Ushbu Qaror qabul qilingan kundan eʼtiboran kuchga kiradi.