Oʻzbekiston Respublikasining “Aholini ish bilan taʼminlash toʻgʻrisida”gi Qonuniga muvofiq va ishga layoqatli aholini ijtimoiy himoyalashni taʼminlash maqsadida Vazirlar Mahkamasi qaror qiladi:

1. Ish bilan taʼminlash siyosatini amalga oshirish tadbirlarini mablagʻ bilan taʼminlash va davlat ish bilan taʼminlash xizmatining samarali faoliyat koʻrsatishi uchun Oʻzbekiston Respublikasi Mehnat vazirligi tarkibida mahalliy va respublika darajalarida Oʻzbekiston Respublikasi ish bilan taʼminlashga koʻmaklashish respublika jamgʻarmasi (bundan keyin Ish bilan taʼminlash jamgʻarmasi deb ataladi) tashkil etilsin.

2. Mulkchilik va xoʻjalik yuritish shakllaridan qatʼiy nazar, korxonalar, tashkilotlar, muassasalar, kooperativlar va boshqa ishga oluvchilar Ish bilan taʼminlash jamgʻarmasiga har oyda mehnat haqining uch foizi miqdorida majburiy ajratmalar oʻtkazib tursinlar. Koʻrsatilgan ajratmalar hisobiga tashkil topadigan ish bilan taʼminlash jamgʻarmasining 70 foizi Qoraqalpogʻiston Respublikasi viloyatlar va Toshkent shahrining ish bilan taʼminlash organlari ixtiyorida qoladi, 30 foizi esa respublika darajasida markazlashtiriladi.

Jamgʻarma mablagʻlari Davlat budjeti tarkibiga kirmaydi joriy yilda foydalanilmagan taqdirda musodara qilinmaydi va keyingi moliyaviy yilga oʻtadi.

Ish bilan taʼminlash jamgʻarmasiga budjet tashkilotlari tomonidan majburiy ajratmalar 1993-yil 1-yanvardan boshlab amalga oshiriladi.

3. Quyidagilar Ish bilan taʼminlash jamgʻarmasiga ajratmalar toʻlashdan ozod etiladilar:

jamoat tashkilotlari;

nogironlarning jamoat tashkilotlari huzuridagi muassasalar oʻquv-ishlab chiqarish korxonalari va birlashmalar;

protez-ortopediya buyumlari ishlab chiqaradigan nogironlarni protezlash boʻyicha xizmat koʻrsatuvchi korxonalar;

oʻquvchilar korxonalari va oʻquvchilar kooperativlari;

budjet hisobiga mablagʻ bilan taʼminlanadigan teatr-tomosha tashkilotlari.

4. Vazirliklar, idoralar, konsernlar, uyushmalar, korxonalar va oʻzini-oʻzi boshqaruvchi boshqa tashkilotlar, mulkchilik shakllaridan va idoraviy tobeligidan qatʼi nazar, belgilangan miqdordagi mablagʻlarning Ish bilan taʼminlash jamgʻarmasiga toʻliq va oʻz vaqtida oʻtkazilishini taʼminlasinlar.

5. Oʻzbekiston Respublikasi Moliya vazirligi 1993-yildan boshlab respublika budjetlari loyihalarida pul mablagʻlaridagi kamomadni toʻldirish uchun Ish bilan taʼminlash jamgʻarmasiga zarur ajratmalarni nazarda tutsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Ish bilan taʼminlash jamgʻarmasiga mahalliy budjetlardan mablagʻ ajratsinlar.

6. Ish bilan taʼminlash jamgʻarmasi mablagʻlaridan respublika darajasida foydalanishni boshqarish, viloyatlarning aholini ish bilan taʼminlash bilan bogʻliq manfaatlariga rioya qilish uchun doimiy ishlaydigan ijrochi organ — Ijrochi direksiyasi boʻlgan Ish bilan taʼminlash jamgʻarmasi Boshqaruvi, shuningdek, Taftish komissiyasi tashkil etilsin.

7. Ish bilan taʼminlash jamgʻarmasining Nizomi ilovaga muvofiq tasdiqlansin.

8. Oʻzbekiston Respublikasi Mehnat vazirligi Moliya vazirligi va Markaziy bank bilan birgalikda Oʻzbekiston Respublikasi ish bilan taʼminlash respublika jamgʻarmasiga tushadigan mablagʻlarni undirish, hisobga olish va sarflash tartibini ishlab chiqsin, hamda tasdiqlash uchun Vazirlar Mahkamasiga taqdim etsin.

Ish bilan taʼminlash jamgʻarmasi mablagʻlarini jamlash va ulardan foydalanish uchun Oʻzbekiston Respublikasi Markaziy bankida, uning muassasalarida hamda boshqa banklarning muassasalarida Jamgʻarma schyoti ochilsin.

9. Ish bilan taʼminlash jamgʻarmasiga Oʻzbekiston Respublikasi Moliya vazirligi, Markaziy banki va Tashqi iqtisodiy faoliyat banki bilan kelishilgan holda Oʻzbekiston Respublikasi hamda boshqa davlatlarning tashkilotlari va fuqarolaridan tushadigan mablagʻlarni oʻtkazish uchun xorijiy valyuta schyotini ochishga ruxsat etilsin.

Oʻzbekiston Respublikasi Moliya vazirligi va Adliya vazirligi Ish bilan taʼminlash jamgʻarmasiga harakatsiz va boshqa mulklarni inʼom sifatida qabul qilish tartibini belgilasinlar.

Ish bilan taʼminlash jamgʻarmasi koʻrsatilgan valyuta mablagʻlaridan ish bilan taʼminlash davlat xizmati moddiy bazasini rivojlantirishda hamda aholini ish bilan taʼminlash bilan bogʻliq boʻlgan boshqa maqsadlarda foydalansin.

10. Belgilab qoʻyilsinki, Ish bilan taʼminlash jamgʻarmasi ish bilan taʼminlash davlat siyosati vazifalarini bajarish maqsadida belgilangan tartibda tashqi iqtisodiy faoliyatni amalga oshirish, oʻz bankini, aksionerlik jamiyatini tashkil qilish, mulkchilikning turli shakllaridagi korxonalar barpo etish huquqiga ega.

11. Toshkent shahar hokimligi Oʻzbekiston Respublikasi ish bilan taʼminlash jamgʻarmasi apparatini joylashtirish masalasini hal qilsin.

12. Oʻzbekiston Respublikasi Aloqa vazirligi Oʻzbekiston Respublikasi ish bilan taʼminlash jamgʻarmasini telefon aloqasi tarmoqlari bilan taʼminlasin.

13. Mazkur qarorning bajarilishini nazorat qilish Oʻzbekiston Respublikasi Bosh vazirning oʻrinbosari oʻrtoq B. S. Hamidov zimmasiga yuklatilsin.

1. Ish bilan taʼminlashga koʻmaklashish respublika jamgʻarmasi (bundan keyin Ish bilan taminlash jamgʻarmasi deb ataladi) ish bilan taʼminlash siyosatini amalga oshirish tadbirlarini mablagʻ bilan taʼminlash uchun mahalliy va respublika darajalarida tashkil etiladi. Uning mablagʻlari mahalliy va respublika budjetlari tarkibiga kirmaydi, hisobot yilida foydalanilmagan taqdirda musodara qilinmaydi va kelgusi moliya yiliga oʻtadi.

2. Ish bilan taʼminlash jamgʻarmasi quyidagilar hisobiga tashkil topadi:

mulkchilik va xoʻjalik yuritish shakllaridan qatʼiy nazar, korxonalar, muassasalar, tashkilotlar va kooperativlarning mehnat haqi fondidan uch foiz miqdoridagi majburiy ajratmalari. Ushbu xarajatlar mahsulot (ishlar, xizmatlar) tannarxiga qoʻshiladi;

mehnat bozorida alohida qiyinchiliklarga duch kelishadigan shaxslarni himoya qilishni taʼminlash uchun zarur boʻladigan tegishli budjetlarni shakllantirishda Oʻzbekiston Respublikasi Hukumati va xalq deputatlari Kengashlari tomonidan belgilanadigan miqdorlarda respublika va mahalliy budjetlardan dotatsiyalar;

Oʻzbekiston Respublikasi va boshqa davlatlar korxonalari jamoat tashkilotlari va fuqarolarining ixtiyoriy badallari;

korxonalar, muassasalar, tashkilotlardan (ajratmalar belgilangan muddatda toʻlanmagan hollarda) hisoblangan penya shaklidagi boshqa tushumlar, shuningdek, ish bilan taʼminlash toʻgʻrisidagi qonunlarga muvofiq mahalliy birjalar tomonidan solinadigan jarimalar;

Ish bilan taʼminlash jamgʻarmasining tijorat faoliyatidan olinadigan daromadlar.

3. Ish bilan taʼminlash jamgʻarmasi mablagʻlarini jamlash va ulardan foydalanish uchun Oʻzbekiston Respublikasi Markaziy bankida uning muassasalarida va boshqa banklarning muassasalarida schyotlar ochiladi.

Ish bilan taʼminlash jamgʻarmasiga majburiy ajratmalarni, ixtiyoriy badallarni, boshqa tushumlarni undirib olish va hisobga olib borish, ularni foydalanishning tegishli schyotlariga oʻtkazish Oʻzbekiston Respublikasi Mehnat vazirligi, Moliya vazirligi va Markaziy banki tomonidan tasdiqlanadigan tartibda amalga oshiriladi.

4. Mulkchilik va xoʻjalik yuritish shakllaridan qatʼi nazar korxonalar, muassasalar, tashkilotlar va kooperativlar majburiy ajratmalarining oʻz vaqtida va toʻliq tushishini hamda respublika va mahalliy budjetlar mablagʻlarining Ish bilan taʼminlash jamgʻarmasiga tushishini nazorat qilish Ish bilan taʼminlash jamgʻarmasining ijro etuvchi organlari va Davlat soliq inspeksiyasi tomonidan amalga oshiriladi.

5. Ish bilan taʼminlash jamgʻarmasi mablagʻlaridan foydalanish toʻgʻrisidagi hisobotlar, jamoatchilikni xabardor qilish maqsadida, har yili kamida bir marta respublika va mahalliy matbuotda eʼlon qilinadi.

6. Ish bilan taʼminlash jamgʻarmasi mablagʻlari hisobiga quyidagilar amalga oshiriladi:

aholini ish bilan taʼminlashning umumrespublika va mintaqa dasturlarini ishlab chiqish;

ishdan boʻshab qolgan xodimlarni va ish bilan band boʻlmagan aholini kasbga yoʻnaltirish, qayta oʻqitish va qayta tayyorlashga doir ishlarni mablagʻ bilan taʼminlash shu jumladan, oʻqitish davrida stipendiyalar toʻlash;

ishsizlik boʻyicha nafaqa va kompensatsiyalar toʻlash;

nogironlar va aholining ijtimoiy jihatdan kam himoyalangan qatlamlarining boshqa tabaqalari mehnatidan foydalanish uchun ixtisoslashtirilgan ishchi oʻrinlari (ishlab chiqarishlar) tashkil etish boʻyicha jamoat ishlari va tadbirlarini mablagʻ bilan qisman taʼminlash;

respublikaning mintaqalari oʻrtasida qayta taqsimlash uchun ehtiyot zaxira jamgʻarmasini tashkil etish;

ish bilan taʼminlash boʻyicha barcha darajalardagi xizmat organlarini saqlash, ularni joylashtirish uchun binolarni qurish va qayta qurish, moddiy-texnikaviy taʼminlashni amalga oshirish, kompyuter, koʻpaytiruvchi va boshqa zarur texnika bilan jihozlash;

axborot, maʼlumotlar berish va reklama-nashr ishlarini amalga oshirish matbaachilik bazasini barpo etish;

mehnat resurslari, ish bilan taʼminlash siyosatining ilmiy asoslangan tashkiliy, iqtisodiy va huquqiy yoʻnalishlarini amalga oshirish maqsadida aholining turli guruhlarini ish bilan taʼminlash masalalari boʻyicha ilmiy-tadqiqot ishlarini mablagʻ bilan taʼminlash;

umumrespublika va hududiy darajalarda aholining alohida guruhlarini ish bilan taʼminlash masalalari boʻyicha sotsiologik tekshirishlarni, anketalashtirishni tashkil etish va oʻtkazish;

ishchi kuchi bozorini hisobga olishning umumrespublika va mintaqaviy avtomatlashtirilgan tizimini yaratish, ularning konsepsiyasini va yagona dasturiy taʼminotini ishlab chiqish;

ish bilan band boʻlmagan aholiga yordam koʻrsatish, shu jumladan ularni ishga joylashtirishga koʻmaklashish bilan bogʻliq boʻlgan boshqa xarajatlarni mablagʻ bilan taʼminlash;

aholini ish bilan taʼminlash bilan bogʻliq boʻlgan muammolar boʻyicha xalqaro hamkorlikni mablagʻ bilan taʼminlash;

Ish bilan taʼminlash jamgʻarmasi mablagʻlarini koʻpaytirish va hamda aholini ish bilan taʼminlashga bevosita yordam beradigan tijorat va xoʻjalik hisobidagi faoliyatni amalga oshirish.

7. Ish bilan taʼminlash jamgʻarmasi mablagʻlarini sarflash yoʻnalishlari respublika va mintaqa darajalarida ishlab chiqilgan ish bilan taʼminlash dasturlari asosida aniqlanadi.

Ish bilan taʼminlash respublika va mahalliy jamgʻarmalarining xarajatlar smetasi Ish bilan taʼminlash jamgʻarmasining tegishli boshqaruvlari tomonidan tasdiqlanadi.

Respublika va mahalliy darajalarda Ish bilan taʼminlash jamgʻarmasi mablagʻlarini boshqarish faqat Ish bilan taʼminlash jamgʻarmasi tegishli boshqaruvlarining qarorlari bilan belgilanadi.

8. Ish bilan taʼminlash jamgʻarmasi tijorat faoliyatidan olinadigan daromadlar soliqlaridan, shuningdek, davlat va bojxona bojlaridan ozod qilinadi.

9. Ish bilan taminlash jamgʻarmasiga respublika darajasida rahbarlik qilish Ish bilan taʼminlash jamgʻarmasi Boshqaruvi hamda uning doimiy ishlaydigan ijrochi boshqaruvchi organi — Oʻzbekiston Respublikasi Ish bilan taʼminlash respublika jamgʻarmasining Ijrochi direksiyasi tomonidan amalga oshiriladi. Ijrochi direksiya toʻgʻrisidagi nizom Oʻzbekiston Respublikasi Ish bilan taʼminlash jamgʻarmasi Boshqaruvi tomonidan tasdiqlanadi.

Ish bilan taʼminlash jamgʻarmasi Boshqaruvi va Ijrochi direksiyasi oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Kengashining boshqa aktlariga, Oʻzbekiston Respublikasi Prezidenti farmonlariga, Oʻzbekiston Respublikasi Vazirlar Mahkamasining Oʻzbekiston Respublikasi Mehnat vazirligining qarorlari va farmoyishlariga amal qiladi.

Ish bilan taʼminlash jamgʻarmasi Boshqaruvi tarkibiga Qoraqalpogʻiston Respublikasi, viloyatlar va Toshkent shahar, Oʻzbekiston Respublikasi Mehnat vazirligi, Moliya vazirligi, Markaziy bank Oʻzbekiston kasaba uyushmalari Federatsiyasi Kengashining mehnat boʻyicha organlari rahbarlari, shuningdek, Ish bilan taʼminlash jamgʻarmasining Ijrochi direktori kiradilar

Ish bilan taʼminlash jamgʻarmasi Boshqaruvi tarkibiga, shuningdek, davlat, jamoat va boshqa manfaatdor tashkilotlarning vakillari kirishi mumkin.

Oʻzbekiston Respublikasi mehnat vaziri lavozimiga koʻra Oʻzbekiston Respublikasi Ish bilan taʼminlash jamgʻarmasi Boshqaruvi raisi hisoblanadi.

Ish bilan taʼminlash jamgʻarmasining Ijrochi direktori Ish bilan taʼminlash jamgʻarmasi Boshqaruvi tomonidan tasdiqlanadi.

Oʻzbekiston Respublikasi Ish bilan taʼminlash jamgʻarmasi Boshqaruvi:

ish bilan taʼminlash respublika dasturida koʻzda tutilgan xarajatlarning mablagʻ bilan oʻz vaqtida va toʻliq taʼminlanishi uchun toʻla javob beradi;

Ish bilan taʼminlash jamgʻarmasining istiqboldagi va navbatdagi vazifalarini belgilaydi;

Ijrochi direksiya apparati tuzilmasini, shtatlarini, xarajatlar smetasini, ish haqi fondini va Taftish komissiyasini tasdiqlaydi;

oʻz huquq doirasida Ish bilan taʼminlash jamgʻarmasi faoliyatiga taalluqli masalalar boʻyicha zarur nizomlar va yoʻriqnomalarni tasdiqlaydi;

Ish bilan taʼminlash jamgʻarmasi huquq doirasiga taalluqli masalalar boʻyicha xalqaro tashkilotlar bilan belgilangan tartibda hamkorlik qiladi.

Ish bilan taʼminlash jamgʻarmasi Boshqaruvi zaruriyatga qarab, ammo har yili kamida bir marta chaqiriladi. U Boshqaruv aʼzolari kamida uchdan ikki qismining ovozi bilan qarorlar qabul qilish huquqiga egadir.

Qarorlar qatnashayotgan Boshqaruv aʼzolarining koʻpchilik ovozi bilan qabul qilinadi.

10. Ijrochi direksiyaning Qoraqalpogʻiston Respublikasidagi, viloyatlar va Toshkent shahridagi shoʻbalari tegishli viloyatlarning va Toshkent shahrining mehnat ahlini ish bilan taʼminlash va ijtimoiy himoya qilish boshqarmalari hamda Oʻzbekiston Respublikasi Ish bilan taʼminlashga koʻmaklashish jamgʻarmasining Ijrochi direksiyasi tasarrufida boʻladi.

Ijrochi direksiya filialining direktori mehnat aholini ish bilan taʼminlash va ijtimoiy himoya qilish boʻyicha tegishli mintaqa organining tavsiyasiga koʻra Oʻzbekiston Respublikasi Mehnat vazirligi tomonidan tayinlanadi.

11. Ish bilan taʼminlash jamgʻarmasining moliya xoʻjalik faoliyatini nazorat qilish uchun Boshqaruv huzurida Ish bilan taʼminlash jamgʻarmasining Taftish komissiyasi tuziladi. Komissiyaning vazifalari va ish tartibini Boshqaruv belgilaydi. Taftish komissiyasi faoliyati bilan bogʻliq boʻlgan hamda zarurat boʻlganda jalb qilinadigan auditor va auditor firmalarining xarajatlari jamgʻarma mablagʻlari hisobiga amalga oshiriladi.

12. Qoraqalpogʻiston Respublikasida, viloyatlarda va Toshkent shahrida hokimiyatning mahalliy organlari qaroriga koʻra Ish bilan taminlash jamgʻarmasining mahalliy boshqaruvlari tuziladi.

13. Oʻzbekiston Respublikasi Ish bilan taʼminlash jamgʻarmasi Boshqaruvi Toshkent shahrida joylashgan.