Oʻzbekiston Respublikasining “Aholini ish bilan taʼminlash toʻgʻrisida”gi Qonuniga muvofiq va ishga layoqatli aholini ijtimoiy himoyalashni taʼminlash maqsadida Vazirlar Mahkamasi qaror qiladi:

1. Mehnatdan foydalanish va ish bilan taʼminlash sohasidagi davlat siyosatini amalga oshirish tadbirlarini mablagʻ bilan taʼminlash uchun Oʻzbekiston Respublikasi Mehnat vazirligi tarkibida mahalliy va respublika darajalarida Oʻzbekiston Respublikasi ish bilan taʼminlashga koʻmaklashish davlat jamgʻarmasi (bundan keyin Ish bilan taʼminlash jamgʻarmasi deb ataladi) tashkil etilsin.

2. Mulkchilik va xoʻjalik yuritish shakllaridan qatʼiy nazar, korxonalar, tashkilotlar, muassasalar, kooperativlar va boshqa ishga oluvchilar Ish bilan taʼminlash jamgʻarmasiga har oyda mehnat haqining uch foizi miqdorida majburiy ajratmalar oʻtkazib tursinlar. Koʻrsatilgan ajratmalar hisobiga tashkil topadigan ish bilan taʼminlash jamgʻarmasining 70 foizi Qoraqalpogʻiston Respublikasi viloyatlar va Toshkent shahrining mehnat organlari ixtiyorida qoladi, 30 foizi esa respublika darajasida markazlashtiriladi.

Jamgʻarma mablagʻlari Davlat budjeti tarkibiga kirmaydi joriy yilda foydalanilmagan taqdirda musodara qilinmaydi va keyingi moliyaviy yilga oʻtadi.

Ish bilan taʼminlash jamgʻarmasiga budjet tashkilotlari tomonidan majburiy ajratmalar 1993-yil 1-yanvardan boshlab amalga oshiriladi.

3. Quyidagilar Ish bilan taʼminlash jamgʻarmasiga ajratmalar toʻlashdan ozod etiladilar:

jamoat tashkilotlari;

nogironlarning jamoat tashkilotlari huzuridagi muassasalar oʻquv-ishlab chiqarish korxonalari va birlashmalar;

protez-ortopediya buyumlari ishlab chiqaradigan nogironlarni protezlash boʻyicha xizmat koʻrsatuvchi korxonalar;

oʻquvchilar korxonalari va oʻquvchilar kooperativlari;

budjet hisobiga mablagʻ bilan taʼminlanadigan teatr-tomosha tashkilotlari.

Oʻzbekiston Respublikasi Mehnat vazirligi Adliya vazirligi va Oʻzbekiston Kasaba uyushmalari Federatsiyasi Kengashi bilan birgalikda Ish bilan taʼminlash jamgʻarmasiga majburiy ajratmalar toʻlashdan ozod etiladigan jamoat tashkilotlari roʻyxatini aniqlasin.

4. Vazirliklar, idoralar, konsernlar, uyushmalar, korxonalar va oʻzini-oʻzi boshqaruvchi boshqa tashkilotlar, mulkchilik shakllaridan va idoraviy tobeligidan qatʼi nazar, belgilangan miqdordagi mablagʻlarning Ish bilan taʼminlash jamgʻarmasiga toʻliq va oʻz vaqtida oʻtkazilishini taʼminlasinlar.

5. Oʻzbekiston Respublikasi Moliya vazirligi 1993-yildan boshlab respublika budjetlari loyihalarida pul mablagʻlaridagi kamomadni toʻldirish uchun Ish bilan taʼminlash jamgʻarmasiga zarur ajratmalarni nazarda tutsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Ish bilan taʼminlash jamgʻarmasiga mahalliy budjetlardan mablagʻ ajratsinlar.

6. Belgilab qoʻyilsinki, Ish bilan taʼminlash jamgʻarmasi mablagʻlarini Oʻzbekiston Respublikasi Mehnat vazirligi tasarruf etadi.

7. Ish bilan taʼminlash jamgʻarmasining Nizomi ilovaga muvofiq tasdiqlansin.

8. Oʻzbekiston Respublikasi Mehnat vazirligi Moliya vazirligi va Markaziy bank bilan birgalikda Oʻzbekiston Respublikasi ish bilan taʼminlash respublika jamgʻarmasiga tushadigan mablagʻlarni undirish, hisobga olish va sarflash tartibini ishlab chiqsin, hamda tasdiqlash uchun Vazirlar Mahkamasiga taqdim etsin.

Ish bilan taʼminlash jamgʻarmasi mablagʻlarini jamlash va ulardan foydalanish uchun Oʻzbekiston Respublikasi Markaziy bankida, uning muassasalarida hamda boshqa banklarning muassasalarida Jamgʻarma schyoti ochilsin.

9. Mehnat vazirligiga Oʻzbekiston Respublikasi Moliya vazirligi, Markaziy banki va Tashqi iqtisodiy faoliyat banki bilan kelishilgan holda Oʻzbekiston Respublikasi hamda boshqa davlatlarning tashkilotlari va fuqarolaridan tushadigan mablagʻlarni oʻtkazish uchun xorijiy valyuta schyotini ochishga ruxsat etilsin.

Oʻzbekiston Respublikasi Moliya vazirligi va Adliya vazirligi Ish bilan taʼminlash jamgʻarmasiga harakatsiz va boshqa mulklarni inʼom sifatida qabul kilish tartibini belgilasinlar.

Mehnat vazirligi koʻrsatilgan valyuta mablagʻlaridan mehnat organlari moddiy-texnika negizini rivojlantirishda hamda aholini ish bilan taʼminlash bilan bogʻliq boshqa maqsadlarda foydalansin.

10. Mehnat vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Ish bilan taʼminlash jamgʻarmasi mablagʻlarini shakllantirish va sarflash hajmlari yil choragi uchun belgilanadigan va keyinchalik ish yakunlari vazirlik hayʼati majlisida koʻrib chiqiladigan tartibni Davlat budjeti bilan ishlash tartibiga oʻxshash shaklga keltirsin.

11. Belgilab qoʻyilsinki, Oʻzbekiston Respublikasi Mehnat vazirligi mehnatdan foydalanish va ish bilan taʼminlash sohasidagi davlat siyosatini amalga oshirish va Ish bilan taʼminlash jamgʻarmasi mablagʻlarini koʻpaytirish maqsadida belgilangan tartibda tashqi iqtisodiy faoliyatni amalga oshirish, Ish bilan taʼminlashga koʻmaklashish bankini, aksionerlik jamiyatlarini, mulkchilikning turli shakllaridagi korxonalarni tashkil etish huquqiga ega.

Ish bilan taʼminlash jamgʻarmasi mablagʻlaridan foydalanish samaradorligini taʼminlash va sarflanishini nazorat qilishni kuchaytirish uchun hamda bu ishlar Ish bilan taʼminlash jamgʻarmasining mazkur qaror bilan tugatilayotgan Ijrochi direksiyasi tomonidan bajarib kelinganligini hisobga olib, Oʻzbekiston Respublikasi Mehnat vazirligiga, zarurat boʻlsa, Ish bilan taʼminlash jamgʻarmasi mablagʻlari hisobidan xoʻjalik hisobidagi auditor markazini taʼsis etishga ruxsat berilsin.

12. Oʻzbekiston Respublikasi Aloqa vazirligi Oʻzbekiston Respublikasi ish bilan taʼminlash jamgʻarmasini telefon aloqasi tarmoqlari bilan taʼminlasin.

13. Mazkur qarorning bajarilishini nazorat qilish Oʻzbekiston Respublikasi Bosh vazirning oʻrinbosari oʻrtoq B. S. Hamidov zimmasiga yuklatilsin.

1. Ish bilan taʼminlashga koʻmaklashish davlat jamgʻarmasi (bundan keyin Ish bilan taminlash jamgʻarmasi deb ataladi) mehnatdan foydalanish va ish bilan taʼminlash sohasidagi davlat siyosatini amalga oshirish tadbirlarini mablagʻ bilan taʼminlash uchun mahalliy va respublika darajalarida tashkil etiladi. Uning mablagʻlari mahalliy va respublika budjetlari tarkibiga kirmaydi, hisobot yilida foydalanilmagan taqdirda musodara qilinmaydi va kelgusi moliya yiliga oʻtadi.

2. Ish bilan taʼminlash jamgʻarmasi quyidagilar hisobiga tashkil topadi:

mulkchilik va xoʻjalik yuritish shakllaridan qatʼiy nazar, korxonalar, muassasalar, tashkilotlar va kooperativlarning mehnat haqi fondidan uch foiz miqdoridagi majburiy ajratmalari. Ushbu xarajatlar mahsulot (ishlar, xizmatlar) tannarxiga qoʻshiladi;

mehnat bozorida alohida qiyinchiliklarga duch kelishadigan shaxslarni himoya qilishni taʼminlash uchun zarur boʻladigan tegishli budjetlarni shakllantirishda Oʻzbekiston Respublikasi Hukumati va xalq deputatlari Kengashlari tomonidan belgilanadigan miqdorlarda respublika va mahalliy budjetlardan dotatsiyalar;

Oʻzbekiston Respublikasi va boshqa davlatlar korxonalari jamoat tashkilotlari va fuqarolarining ixtiyoriy badallari;

korxonalar, muassasalar, tashkilotlardan (ajratmalar belgilangan muddatda toʻlanmagan hollarda) hisoblangan penya shaklidagi boshqa tushumlar, shuningdek, ish bilan taʼminlash toʻgʻrisidagi qonunlarga muvofiq mahalliy birjalar tomonidan solinadigan jarimalar;

Ish bilan taʼminlash jamgʻarmasining tijorat faoliyatidan olinadigan daromadlar.

3. Ish bilan taʼminlash jamgʻarmasi mablagʻlarini jamlash va ulardan foydalanish uchun Oʻzbekiston Respublikasi Markaziy bankida uning muassasalarida va boshqa banklarning muassasalarida schyotlar ochiladi.

Ish bilan taʼminlash jamgʻarmasiga majburiy ajratmalarni, ixtiyoriy badallarni, boshqa tushumlarni undirib olish va hisobga olib borish, ularni foydalanishning tegishli schyotlariga oʻtkazish Oʻzbekiston Respublikasi Mehnat vazirligi, Moliya vazirligi va Markaziy banki tomonidan tasdiqlanadigan tartibda amalga oshiriladi.

4. Mulkchilik va xoʻjalik yuritish shakllaridan qatʼiy nazar, korxonalar, muassasalar, tashkilotlar va kooperativlar majburiy ajratmalarining oʻz vaqtida va toʻliq tushishini hamda respublika va mahalliy budjetlar mablagʻlarining Ish bilan taʼminlash jamgʻarmasiga tushishini nazorat qilish Mehnat vazirligi va Davlat soliq inspeksiyasi tomonidan amalga oshiriladi.

Tekshirish natijasida aniqlangan Ish bilan taʼminlash jamgʻarmasiga qoʻshib hisoblanadigan toʻlanmay qolgan qarzlar hamda aholini ish bilan taʼminlash toʻgʻrisidagi qonunchilikni buzganlik uchun undiriladigan maʼmuriy va moliyaviy jarimalar hisobiga tushadigan mablagʻlarning 15 foizi mehnat organlarining moddiy yordam jamgʻarmasiga yoʻnaltiriladi. Shu jamgʻarmalarning tashkil etilishi va sarflanishi tartibi Oʻzbekiston Respublikasi Mehnat vazirligi tomonidan tasdiqlanadi.

5. Ish bilan taʼminlash jamgʻarmasi mablagʻlaridan foydalanish toʻgʻrisidagi hisobotlar, jamoatchilikni xabardor qilish maqsadida, har yili kamida bir marta respublika va mahalliy matbuotda eʼlon qilinadi.

6. Ish bilan taʼminlash jamgʻarmasi mablagʻlari hisobiga quyidagilar amalga oshiriladi:

aholini ish bilan taʼminlashning umumrespublika va mintaqa dasturlarini ishlab chiqish;

Mehnat organlarida ish qidiruvchi sifatida roʻyxatga olingan, ishsizlik maqomiga ega boʻlgan shaxslarni, shu jumladan, kasbga ega boʻlmagan va mehnat bozoriga ilk bor tushgan ayollarni kasbga oʻrgatish, ularning malakasini oshirish va qayta tayyorlash ishlarini moliyaviy taʼminlash;

ishsizlik boʻyicha nafaqa va kompensatsiyalar toʻlash;

fuqarolarni hududlar boʻyicha ishga joylashtirish bilan bogʻliq boʻlgan qiyin vaziyatda, istisno tariqasida, jamoat ishlarini qisman moliyaviy taʼminlash uchun mahalliy budjetdan ajratiladigan mablagʻlarga mutanosib ravishda dotatsiya berish;

nogironlar va aholining ijtimoiy jihatdan kam himoyalangan qatlamlarining boshqa tabaqalari mehnatidan foydalanish uchun ixtisoslashtirilgan ishchi oʻrinlari (ishlab chiqarishlar) tashkil etish boʻyicha jamoat ishlari va tadbirlarini mablagʻ bilan qisman taʼminlash;

respublikaning mintaqalari oʻrtasida qayta taqsimlash uchun ehtiyot zaxira jamgʻarmasini tashkil etish;

tuman (shahar) mehnat, aholini ish bilan taʼminlash va ijtimoiy himoyalash boʻlimlari xodimlarini saqlash boʻyicha barcha darajalardagi mehnat organlarini joylashtirish uchun binolar qurish va qayta qurish, moddiy-texnikaviy taʼminlashni amalga oshirish, kompyuter koʻpaytiruvchi va boshqa zarur texnika bilan jihozlash;

axborot, maʼlumotlar berish va reklama-nashr ishlarini amalga oshirish jumladan, “Mehnat” gazetasi nashriga muassislik qilish va zarurat boʻlganda xoʻjalik hisobi negizida yordam berish matbaachilik bazasini barpo etish;

mehnat resurslari, ish bilan taʼminlash siyosatining ilmiy asoslangan tashkiliy, iqtisodiy va huquqiy yoʻnalishlarini amalga oshirish hamda aholini ijtimoiy himoyalash mexanizmini, mehnatga haq toʻlash, mehnat sharoitlari va meʼyornomalarini takomillashtirish maqsadida aholining turli guruhlarini ish bilan taʼminlash masalalari boʻyicha ilmiy-tadqiqot ishlarini mablagʻ bilan taʼminlash;

umumrespublika va hududiy darajalarda aholining alohida guruhlarini ish bilan taʼminlash masalalari boʻyicha sotsiologik tekshirishlarni, anketalashtirishni tashkil etish va oʻtkazish;

ishchi kuchi bozorini hisobga olishning umumrespublika va mintaqaviy avtomatlashtirilgan tizimini yaratish, ularning konsepsiyasini va yagona dasturiy taʼminotini ishlab chiqish;

ish bilan band boʻlmagan aholiga yordam koʻrsatish, shu jumladan ularni ishga joylashtirishga koʻmaklashish bilan bogʻliq boʻlgan boshqa xarajatlarni mablagʻ bilan taʼminlash;

aholini ish bilan taʼminlash bilan bogʻliq boʻlgan muammolar boʻyicha xalqaro hamkorlikni mablagʻ bilan taʼminlash;

Ish bilan taʼminlash jamgʻarmasi mablagʻlarini koʻpaytirish va hamda aholini ish bilan taʼminlashga bevosita yordam beradigan tijorat va xoʻjalik hisobidagi faoliyatni jumladan, band boʻlmagan mablagʻlarning bir qismini banklardagi depozit hisoblarga oʻtkazish, qiymatli qogʻozlarga aylantirish, loteriyalar tashkil etish va auksionlar oʻtkazish, mulkchilik va xoʻjalik yuritishning turli shakllaridagi korxonalarni yaratish, vaqtincha moliyaviy qiyinchilikka uchragan korxonalarga aholining ish bilan taʼminlanishini oshirish bilan bogʻliq boʻlgan maqsadlarda hamda toʻlanishi, taʼminlanishi va qaytarilishi shartlari bilan qisqa muddatli ssuda berilishini amalga oshirish.

qishloq joylardagi dehqon va fermer xoʻjaliklariga, kichik va oilaviy korxonalariga yangi ish joylari tashkil qilish hisobiga ularni rivojlantirish va kengaytirishni ragʻbatlantirish uchun qaytarish, qaytarilishini taʼminlash va toʻlash shartlari asosida oʻrtacha muddatli kreditlar berish.

7. Ish bilan taʼminlash jamgʻarmasi mablagʻlarini sarflash yoʻnalishlari respublika va mintaqa darajalarida ishlab chiqilgan va qonunchilik bilan belgilangan tartibda tasdiqlanadigan ish bilan taʼminlash dasturlari asosida aniqlanadi.

Oʻzbekiston Respublikasi Mehnat vazirligi ish bilan taʼminlash dasturlariga muvofiq Qoraqalpogʻiston Respublikasi, viloyatlar va Toshkent shahar organlariga Ish bilan taʼminlash jamgʻarmasi mablagʻlarini shakllantirish va sarflash hajmlarini, ularning ish yakunlarini keyinchalik vazirlik hayʼatining majlisida koʻrib chiqish sharti bilan (yil, chorak uchun) belgilaydi.

8. Ish bilan taʼminlash jamgʻarmasi tijorat faoliyatidan olinadigan daromadlar soliqlaridan, shuningdek, davlat va bojxona bojlaridan ozod qilinadi.

9. Ish bilan taʼminlash jamgʻarmasi mablagʻlarini Oʻzbekiston Respublikasi Mehnat vazirligi tasarruf etadi.

Oʻzbekiston Respublikasi Mehnat vazirligi:

Ish bilan taʼminlash respublika dasturida koʻzda tutilgan xarajatlarning oʻz vaqtida va toʻliq moliyaviy taʼminlanishi uchun toʻla javob beradi;

Ish bilan taʼminlash jamgʻarmasining navbatdagi va istiqboldagi vazifalarini, shu jumladan, uning mablagʻlari sarflanishining asosiy yoʻnalishlarini belgilaydi;

Ish bilan taʼminlash jamgʻarmasi faoliyatiga taalluqli masalalar boʻyicha kerakli nizomlar va yoʻriqnomalarni oʻz vakolati doirasida tasdiqlaydi;

xalqaro tashkilotlar bilan belgilangan tartibda Ish bilan taʼminlash jamgʻarmasi vakolatiga taalluqli masalalar boʻyicha hamkorlik qiladi.

10. Ish bilan taʼminlash jamgʻarmasi mablagʻlari sarflanishini nazorat qilish Oʻzbekiston Respublikasi Mehnat vazirligi, Moliya vazirligi tomonidan zarur boʻlganda auditorlar va auditor firmalarini jalb qilish yoʻli bilan amalga oshiriladi.