Aholi turmush darajasini oshirishga qaratilgan chora-tadbirlar izchilligini ta’minlash va ijtimoiy himoyaga muhtoj oilalarni qo‘llab-quvvatlash mexanizmlarini yanada takomillashtirish maqsadida:
Oldingi tahrirga qarang.
1. Iqtisodiy taraqqiyot va kambag‘allikni qisqartirish vazirligi va Moliya vazirligining eng kam pensiya va nafaqa miqdorlarini qayta ko‘rib chiqish bo‘yicha takliflarini inobatga olib, 2021-yilning 1-iyulidan boshlab:
a) belgilangan yoshga doir eng kam pensiya miqdorida va undan kam pensiya oluvchi shaxslarga pensiyani hisoblash bazaviy miqdorining 20 foizi miqdorida qo‘shimcha to‘lov (keyingi o‘rinlarda — qo‘shimcha to‘lov) joriy etilsin;
b) boquvchisini yo‘qotganlik pensiyasi oluvchilarning har bir mehnatga qobiliyatsiz oila a’zosi uchun qo‘shimcha to‘lov joriy etilsin.
(1-band O‘zbekiston Respublikasi Prezidentining 2021-yil 17-avgustdagi PF-6279-sonli Farmoni tahririda — Qonunchilik ma’lumotlari milliy bazasi, 18.08.2021-y., 09/21/6279/0802-son — 2021-yil 1-sentabrdan kuchga kiradi)
2. Moliya vazirligi ushbu Farmonda belgilangan chora-tadbirlar bilan bog‘liq xarajatlarni moliyalashtirish uchun zarur mablag‘larni budjetdan tashqari Pensiya jamg‘armasi qoldiq mablag‘lari hamda respublika budjeti hisobidan ajratilishini ta’minlasin.
3. O‘zbekiston Milliy axborot agentligi va O‘zbekiston Milliy teleradiokompaniyasiga Moliya vazirligi bilan birgalikda ushbu Farmon maqsadi va vazifalari ommaviy axborot vositalarida va Internet tarmog‘ida keng yoritilishini ta’minlash tavsiya etilsin.
4. O‘zbekiston Respublikasi Hukumatining ayrim qarorlariga ilovaga muvofiq o‘zgartirishlar kiritilsin.
5. Moliya vazirligi manfaatdor vazirlik va idoralar bilan birgalikda bir oy muddatda qonunchilik hujjatlariga ushbu Farmondan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.
6. Mazkur Farmonning ijrosini nazorat qilish O‘zbekiston Respublikasi Bosh vazirining o‘rinbosari D.A. Kuchkarov zimmasiga yuklansin.
1. Vazirlar Mahkamasining 2011-yil 7-apreldagi 107-son qarori bilan tasdiqlangan Davlat pensiyasi tayinlash uchun zarur bo‘lgan ish stajiga ega bo‘lmagan shaxslarga, yoshidan qat’i nazar, ish stajiga ega bo‘lmagan I va II guruh nogironligi bo‘lgan shaxslarga hamda bolalikdan nogironligi bo‘lgan farzandi bor (bo‘lgan) onalarga nafaqalar tayinlash va to‘lash tartibi to‘g‘risidagi nizomda:
16. Nafaqa olish huquqiga ega bo‘lmagan shaxs vafot etgan taqdirda vafot etganning oila a’zolariga nafaqa qonunchilik hujjatlarida belgilangan miqdorda tayinlanadi”;
2. Vazirlar Mahkamasining 2011-yil 8-sentabrdagi 252-son qarori bilan tasdiqlangan Davlat pensiyalarini tayinlash va to‘lash tartibi to‘g‘risidagi nizomning 107-bandi “v” kichik bandidagi “yoshga doir eng kam pensiyaning 50 foizidan” degan so‘zlar “qonunchilik hujjatlarda belgilangan miqdorlardan” degan so‘zlar bilan almashtirilsin.
3. Vazirlar Mahkamasining 2018-yil 13-sentabrdagi “Mamlakatimiz aholisini va iqtisodiyot tarmoqlarini raqobat va bozor mexanizmlarini joriy etish asosida don, un va non bilan ishonchli ta’minlash chora-tadbirlari to‘g‘risida”gi 731-son qarori 3-bandining “b” kichik bandi quyidagi tahrirda bayon etilsin:
“b) un va qolipli non xarid qilish bo‘yicha qo‘shimcha xarajatlarni qoplash uchun to‘lanayotgan pul kompensatsiyasi (keyingi o‘rinlarda pul kompensatsiyasi deb ataladi) nafaqalar to‘lanishi uchun mas’ul bo‘lgan organlar tomonidan hisoblanadi va 14 yoshgacha bolalari bo‘lgan oilalarga nafaqa, bola ikki yoshga to‘lguniga qadar uni parvarish qilish nafaqasi, kam ta’minlangan oilalarga moddiy yordam bilan bir vaqtda O‘zbekiston Respublikasi Davlat budjeti mablag‘lari hisobidan to‘lanadi.
Bunda, 2021-yil 1-iyulga qadar yoshga doir va nogironligi bo‘yicha nafaqa, boquvchisini yo‘qotganlik pensiyasi va nafaqasi (har bir boqimandaga), bolalikdan nogiron bo‘lgan 18 yoshdan katta shaxslarga nafaqa, 18 yoshgacha bo‘lgan nogiron bolalar va 18 yoshga to‘lmagan OIV infeksiyasiga chalingan shaxslarga nafaqa, shuningdek, belgilangan eng kam yoshga doir pensiya miqdorida va undan kam pensiya oluvchiga tayinlangan, biroq ularga to‘lanmay qolgan pul kompensatsiyasi qayd etilgan pensiya hamda nafaqa summasiga qo‘shilgan holda O‘zbekiston Respublikasi Davlat budjeti va budjetdan tashqari Pensiya jamg‘armasi mablag‘lari hisobidan to‘lanadi”.
4. Vazirlar Mahkamasining 2019-yil 14-oktabrdagi “Don, un va non yetkazib berish tizimiga bozor mexanizmlarini to‘liq joriy etish chora-tadbirlari to‘g‘risida”gi 866-son qarori 5-bandida:
“Belgilansinki, 2019-yil 1-oktabrdan boshlab 14 yoshgacha bo‘lgan bolalari uchun tayinlangan nafaqani oluvchi oilalarga ham 50 ming so‘m miqdorida har oylik pul kompensatsiyasi joriy etilib, buning hisobiga ularning nafaqa miqdori 50 ming so‘mga ko‘payadi.
Ushbu bandda nazarda tutilgan pul kompensatsiyasi nafaqalar to‘lanishi uchun mas’ul bo‘lgan organlar tomonidan hisoblanadi va nafaqalar bilan bir vaqtda to‘lanadi”.