Oʻzbekiston Respublikasi Prezidentining “Qishloq xoʻjaligida bilim va innovatsiyalar tizimi hamda zamonaviy xizmatlar koʻrsatishni yanada rivojlantirish toʻgʻrisida” 2021-yil 3-fevraldagi PF-6159-son Farmoniga muvofiq Vazirlar Mahkamasi qaror qiladi:

1. Quyidagilarni nazarda tutuvchi Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazining Qishloq xoʻjaligida bilim va innovatsiyalarni qoʻllab-quvvatlash jamgʻarmasi toʻgʻrisidagi nizom ilovaga muvofiq tasdiqlansin:

Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazining (keyingi oʻrinlarda — Milliy markaz) Qishloq xoʻjaligida bilim va innovatsiyalarni qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlarini shakllantirish manbalari hamda ulardan foydalanish yoʻnalishlari;

Jamgʻarma mablagʻlari boʻyicha daromadlar va xarajatlar smetasini tasdiqlash hamda sarflash tartibi;

Jamgʻarma mablagʻlaridan foydalanishni hisobga olish, hisobot berish va Jamgʻarmaning mablagʻlaridan maqsadli foydalanish ustidan Davlat moliyaviy nazorati inspeksiyasi tomonidan nazoratni amalga oshirish tartibi.

2. Belgilansinki:

a) Jamgʻarma mablagʻlari quyidagi manbalardan shakllantiriladi:

respublika budjeti, mahalliy budjet daromadlarining prognozdan oshirib bajarilgan qismi;

Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasidan ajratmalar;

Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi tizimidagi ilmiy tashkilotlar va kichik innovatsion korxonalarning xoʻjalik va tadbirkorlik faoliyatidan tushadigan yillik tushumning 3 foizi miqdoridagi ajratmalar;

jismoniy va yuridik shaxslarning homiylik xayriyalari;

xalqaro moliya institutlari va xorijiy hukumat tashkilotlarining grantlari;

ilmiy-tadqiqot ishlarini moliyalashtirish va ularning yakuniy natijasidan foydalanish istagini bildirgan qishloq xoʻjaligi subyektlari va boshqa shaxslarning mablagʻlari;

qonunchilik hujjatlari bilan taqiqlanmagan boshqa manbalar;

b) Jamgʻarma mablagʻlaridan quyidagi maqsadlarda foydalaniladi:

qishloq xoʻjaligi sohasida ilm-fan va texnologiyalar rivojlanishini taʼminlashga, raqobatbardosh ilmiy hajmdor mahalliy mahsulotlar ishlab chiqarishni oʻzlashtirishga yoʻnaltirilgan dolzarb yoʻnalishlardagi ilmiy loyihalarni tanlovlar asosida moliyalashtirish;

belgilangan smetalar va mavjud mablagʻlar doirasida yuqori texnologik va energiya tejaydigan asbob-uskunalar bilan jihozlangan ilmiy laboratoriyalarni tashkil etish hamda tajriba (sinov)larni oʻtkazish uchun zarur material va ehtiyot qismlar sotib olish xarajatlarini moliyalashtirish;

Milliy markaz va uning tizimidagi tashkilotlarning moddiy-texnik bazasini mustahkamlash, laboratoriya, maʼmuriy binolar, ijtimoiy-muhandislik infratuzilma obyektlarini rekonstruksiya qilish va joriy taʼmirlash tadbirlarini moliyalashtirish;

tanlov asosida ilmiy xodimlarning yetakchi xorijiy ilmiy markazlarida ilmiy stajirovkalar tashkil etish tadbirlarini moliyalashtirish;

Milliy markaz boshqaruv apparati xodimlarini moddiy ragʻbatlantirish va ijtimoiy muhofaza qilish, xodimlarning oylik lavozim maoshlariga qoʻshimchalar toʻlash (mukofotlar, moddiy yordam, transport va ovqatlanish xarajatlari, xizmat muddati uchun toʻlovlar), Milliy markaz xodimlarining xizmat safarlari hamda madaniy-ommaviy tadbirlarni moliyalashtirish, moddiy ragʻbatlantirish xarajatlarini qoplash;

Milliy markazga yuklangan vazifa va funksiyalarni samarali bajarish uchun tuzilgan shartnomalar asosida xorijdan jalb qilingan olim va mutaxassislarning xarajatlarini (mehnatga haq toʻlash, transport xarajatlari va boshqalar) moliyalashtirish;

Milliy markaz va uning tizimidagi tashkilotlar xodimlarining malakasini oshirish va ularni qayta tayyorlash xarajatlarini qoplash;

davlat organlari va boshqa tashkilotlar, ilmiy va taʼlim muassasalari hamda xalqaro tashkilotlarning konsultant va ekspert sifatida jalb etilgan yuqori malakali mutaxassislariga belgilangan tartibda gonorar toʻlash;

ilmiy-texnik va ilmiy-metodik adabiyotlarni (shu jumladan, davriy nashrlar, eʼlonlar, risolalar, bukletlar, kitoblar, toʻplamlar va boshqa axborot-maʼrifiy materiallar) tayyorlash, nashr qilish, shuningdek, qishloq xoʻjaligida bilim va innovatsiyalar boʻyicha videoroliklar va taqdimot materiallarini yaratish, qishloq xoʻjaligi sohasidagi ilmiy tadqiqotlar natijalarini nashr qilish va Milliy markaz tizimida onlayn elektron jurnalni chop etishga sarflangan xarajatlarni moliyalashtirish;

Milliy markaz tizimida faoliyat yuritadigan olimlarning mualliflik huquqlarini, shuningdek, intellektual mulk obyektlarini xalqaro miqyosda muhofaza qilish (xalqaro patent tashkilotlarida rasmiylashtirish) bilan bogʻliq xarajatlarni moliyalashtirish;

mamlakat qishloq xoʻjaligi sohasi uchun zarur boʻlgan va davlat grantlari doirasida moliyalashtirish iloji boʻlmagan ilmiy tadqiqotlarni Milliy markaz tizimidagi ilmiy tashkilotlar hamda xususiy sektorlar bilan hamkorlikda moliyalashtirish;

v) Jamgʻarma mablagʻlari budjetdan moliyalashtirilmagan yoki toʻliq moliyalashtirilmagan Oʻzbekiston Respublikasi Qishloq xoʻjaligi vazirligi tizimidagi ilmiy tashkilotlar va boshqa qishloq xoʻjaligi subyektlarining qishloq xoʻjaligi sohasida ilm-fan va texnologiyalarning jadal rivojlanishini taʼminlashga, raqobatbardosh ilmiy hajmdor mahalliy mahsulotlar ishlab chiqarishni oʻzlashtirishga yoʻnaltirilgan dolzarb yoʻnalishlardagi ilmiy loyihalarini tanlovlar asosida moliyalashtirish uchun ajratiladi.

3. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev va Oʻzbekiston Respublikasi qishloq xoʻjaligi vaziri J.A. Xodjayev zimmasiga yuklansin.

1. Mazkur Nizom Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazining Qishloq xoʻjaligida bilim va innovatsiyalarni qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlarini shakllantirish hamda ulardan foydalanish tartibini belgilaydi.

2. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazining (keyingi oʻrinlarda — Milliy markaz) Oʻzbekiston Respublikasi Moliya vazirligi Gʻaznachiligidagi shaxsiy gʻazna hisobvaragʻida jamgʻariladi.

3. Jamgʻarma qishloq xoʻjaligida ilm-fan bilan bogʻliq ustuvor yoʻnalishlar, global, mintaqaviy va hududiy muammolarning ilmiy yechimlarini tadqiq qilish boʻyicha Oʻzbekiston Respublikasi Prezidentining “Qishloq xoʻjaligida bilim va innovatsiyalar tizimi hamda zamonaviy xizmatlar koʻrsatishni yanada rivojlantirish toʻgʻrisida” 2021-yil 3-fevraldagi PF-6159-son Farmoni 5-bandida belgilangan Qishloq xoʻjaligining ustuvor yoʻnalishlari, global, mintaqaviy va hududiy muammolarning ilmiy yechimlarini tadqiq qilish boʻyicha keyingi besh yilga moʻljallangan dasturda nazarda tutilgan, budjetdan moliyalashtirilmagan yoki toʻliq moliyalashtirilmagan Qishloq xoʻjaligi vazirligi tizimidagi ilmiy tashkilotlar va boshqa qishloq xoʻjaligi subyektlarining qishloq xoʻjaligi sohasi dolzarb yoʻnalishlaridagi ilmiy loyihalarini moliyalashtirish maqsadida tashkil etiladi.

4. Jamgʻarma mablagʻlarini boshqarish, nazorat va tasarruf qilish Milliy markaz tomonidan amalga oshiriladi.

5. Jamgʻarma mablagʻlari quyidagi manbalardan shakllantiriladi:

respublika budjeti, mahalliy budjet daromadlarining prognozdan oshirib bajarilgan qismi;

Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasidan ajratmalar;

Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi tizimidagi ilmiy tashkilotlar va kichik innovatsion korxonalarning xoʻjalik va tadbirkorlik faoliyatidan tushadigan yillik tushumning 3 foizi miqdoridagi ajratmalar;

jismoniy va yuridik shaxslarning homiylik xayriyalari;

xalqaro moliya institutlari va xorijiy hukumat tashkilotlarining grantlari;

ilmiy-tadqiqot ishlarini moliyalashtirish va ularning yakuniy natijasidan foydalanish xohishini bildirgan qishloq xoʻjaligi subyektlari va boshqa shaxslarning mablagʻlari;

qonunchilik hujjatlari bilan taqiqlanmagan boshqa manbalar.

6. Jamgʻarma mablagʻlaridan quyidagi maqsadlarda foydalaniladi:

qishloq xoʻjaligi sohasida ilm-fan va texnologiyalar rivojlanishini taʼminlashga, raqobatbardosh ilmiy hajmdor mahalliy mahsulotlar ishlab chiqarishni oʻzlashtirishga yoʻnaltirilgan dolzarb yoʻnalishlardagi ilmiy loyihalarni tanlovlar asosida moliyalashtirish;

belgilangan smetalar va mavjud mablagʻlar doirasida yuqori texnologik va energiya tejaydigan asbob-uskunalar bilan jihozlangan ilmiy laboratoriyalarni tashkil etish hamda tajriba (sinov)larni oʻtkazish uchun zarur material va ehtiyot qismlar sotib olish xarajatlarini moliyalashtirish;

Milliy markaz va uning tizimidagi tashkilotlarning moddiy-texnik bazasini mustahkamlash, laboratoriya, maʼmuriy binolar, ijtimoiy-muhandislik infratuzilma obyektlarini rekonstruksiya qilish va joriy taʼmirlash tadbirlarini moliyalashtirish;

tanlov asosida ilmiy xodimlarning yetakchi xorijiy ilmiy markazlarida ilmiy stajirovkalar tashkil etish tadbirlarini moliyalashtirish;

Milliy markaz boshqaruv apparati xodimlarini moddiy ragʻbatlantirish va ijtimoiy muhofaza qilish, xodimlarning oylik lavozim maoshlariga qoʻshimchalar toʻlash (mukofotlar, moddiy yordam, transport va ovqatlanish xarajatlari, xizmat muddati uchun toʻlovlar), Milliy markaz xodimlarining xizmat safarlari hamda madaniy-ommaviy tadbirlarni moliyalashtirish, moddiy ragʻbatlantirish xarajatlarini qoplash;

Milliy markazga yuklangan vazifa va funksiyalarni samarali bajarish uchun tuzilgan shartnomalar asosida xorijdan jalb qilingan olim va mutaxassislarning xarajatlarini (mehnatga haq toʻlash, transport xarajatlari va boshqalar) moliyalashtirish;

Milliy markaz va uning tizimidagi tashkilotlar xodimlarining malakasini oshirish va ularni qayta tayyorlash xarajatlarini qoplash;

davlat organlari va boshqa tashkilotlar, ilmiy va taʼlim tashkilotlari hamda xalqaro tashkilotlarning konsultant va ekspert sifatida jalb etilgan yuqori malakali mutaxassislariga belgilangan tartibda gonorar toʻlash;

ilmiy-texnik va ilmiy-metodik adabiyotlarni (shu jumladan, davriy nashrlar, eʼlonlar, risolalar, bukletlar, kitoblar, toʻplamlar va boshqa axborot-maʼrifiy materiallar) tayyorlash, nashr qilish, shuningdek, qishloq xoʻjaligi sohasida bilim va innovatsiyalar boʻyicha videoroliklar va taqdimot materiallarini yaratish, qishloq xoʻjaligi sohasidagi ilmiy tadqiqotlar natijalarini nashr qilish va Milliy markaz tizimida onlayn elektron jurnalni chop etishga sarflangan xarajatlarni moliyalashtirish;

Milliy markaz tizimida faoliyat yuritadigan olimlarning mualliflik huquqlarini, shuningdek, intellektual mulk obyektlarini xalqaro miqyosda muhofaza qilish (xalqaro patent tashkilotlarida rasmiylashtirish) bilan bogʻliq xarajatlarni moliyalashtirish;

mamlakat qishloq xoʻjaligi sohasi uchun zarur boʻlgan va davlat grantlari doirasida moliyalashtirish iloji boʻlmagan ilmiy tadqiqotlarni Milliy markaz tizimidagi ilmiy tashkilotlar hamda xususiy sektorlar bilan hamkorlikda moliyalashtirish.

7. Jamgʻarma mablagʻlaridan foydalanish uning tasdiqlangan daromadlar va xarajatlar smetasi asosida amalga oshiriladi.

8. Jamgʻarmaning daromadlar va xarajatlar smetasi budjet tashkilotlari uchun budjetdan tashqari mablagʻlar boʻyicha qonunchilik hujjatlarida belgilangan tartibda tuziladi va Oʻzbekiston Respublikasi qishloq xoʻjaligi vazirining oʻrinbosari — Milliy markaz bosh direktori tomonidan tasdiqlanadi hamda belgilangan tartibda Oʻzbekiston Respublikasi Moliya vazirligida roʻyxatdan oʻtkaziladi.

9. Jamgʻarmaning daromadlar va xarajatlar smetasiga Milliy markaz tomonidan yil davomida belgilangan tartibda oʻzgartirishlar kiritilishi mumkin.

10. Milliy markaz tasdiqlangan daromadlar va xarajatlar smetasiga asosan Jamgʻarma mablagʻlarini tasarruf etuvchi organ hisoblanadi va xarajatlar sarfi Jamgʻarmaning tasdiqlangan daromadlar va xarajatlar smetasi parametrlari doirasida amalga oshiriladi.

11. Yil yakunida Jamgʻarma mablagʻlarining qoldiqlari Oʻzbekiston Respublikasi Davlat budjeti daromadiga kiritilmaydi va kelgusi moliya yili uchun Jamgʻarmaning daromadlar va xarajatlar smetasini tuzishda hisobga olinadi.

12. Jamgʻarmaning mablagʻlarini shakllantirish va foydalanishni hisobga olish, hisobot berish va monitoring yuritish Milliy markazning Moliyalashtirish, buxgalteriya hisobi va hisoboti boʻlimi tomonidan amalga oshiriladi.

Milliy markazning Moliyalashtirish, buxgalteriya hisobi va hisoboti boʻlimi quyidagi funksiyalarni bajaradi:

Jamgʻarmaning daromadlari va xarajatlarining yillik moliyaviy rejasini ishlab chiqadi;

Jamgʻarmaning daromadlar va xarajatlar smetasini tayyorlaydi, shuningdek, ularga qonunchilik hujjatlarida belgilangan tartibda oʻzgartirishlar kiritadi;

Jamgʻarmaning tushumlarini koʻpaytirish va uning mablagʻlaridan samarali foydalanish boʻyicha takliflar ishlab chiqadi;

Jamgʻarmadan mablagʻ ajratishga oid murojaatlarni umumlashtiradi va Qishloq xoʻjaligi sohasida taʼlim, ilm-fan va ishlab chiqarishning uzviy integratsiyasini taʼminlash boʻyicha Muvofiqlashtiruvchi kengashda koʻrib chiqish uchun materiallar tayyorlaydi;

Jamgʻarmaning tushumlari manbalari boʻyicha daromadlari hamda asosiy xarajatlar yoʻnalishlari boʻyicha hisobini yuritadi;

har chorak yakuni boʻyicha Jamgʻarmaning mablagʻlarini foydalanilishi toʻgʻrisida hisobotni tayyorlaydi hamda Qishloq xoʻjaligi vazirligi va Moliya vazirligiga koʻrib chiqish va tasdiqlash uchun taqdim etadi.

13. Jamgʻarmaning mablagʻlaridan foydalanuvchilar Jamgʻarmaning mablagʻlaridan foydalanganlik va bajarilgan ishlar toʻgʻrisidagi hisobotlarni Milliy markazga taqdim etadi.

14. Milliy markaz Jamgʻarmaning Oʻzbekiston Respublikasining respublika budjetidan olingan mablagʻlar boʻyicha daromadlar va xarajatlar toʻgʻrisidagi hisobotni Oʻzbekiston Respublikasi Moliya vazirligiga hisobot davridan keyingi oyning 25-sanasigacha har chorakda, yillik hisobotni keyingi yilning 30-yanvaridan kechiktirmasdan taqdim etadi.

15. Jamgʻarmaning mablagʻlaridan maqsadli foydalanish Davlat moliyaviy nazorati inspeksiyasi tomonidan nazorat qilinadi.

16. Ushbu Nizomni amalga oshirishda yuzaga keladigan nizolar qonunchilik hujjatlarida belgilangan tartibda hal etiladi.

17. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.