Surishtiruv, dastlabki tergov, sudda fuqarolarning himoya qilinishga boʻlgan huquqlarini taʼminlash hamda Jinoyat-protsessual kodeksining 50-moddasi va “Advokatura toʻgʻrisida”gi Oʻzbekiston Respublikasi Qonunining 11-moddasiga muvofiq Vazirlar Mahkamasi qaror qiladi:

1. Belgilansinki, surishtiruvni olib boruvchi shaxs, tergovchi, prokurorning qarori, sudning fuqaroni huquqiy yordam koʻrsatilganligi uchun haq toʻlashdan ozod qilish haqidagi ajrimi gumon qilinuvchi, ayblanuvchi yoki sudlanuvchiga advokat tomonidan huquqiy yordam koʻrsatish boʻyicha xarajatlarni davlat hisobiga oʻtkazish uchun asos boʻlib hisoblanadi.

Advokatlarga toʻlanadigan summa miqdori Oʻzbekiston Respublikasi Adliya vazirligi Moliya vazirligi bilan birgalikda tasdiqlaydigan Advokatlar tomonidan koʻrsatiladigan huquqiy yordam uchun haq toʻlash toʻgʻrisidagi yoʻriqnomaga muvofiq belgilanadi.

2. Mehnatga layoqatsiz va toʻlovga qobiliyatsiz shaxslar, shuningdek jami daromadi har bir boqimandaga hisoblaganda ushbu davrda belgilangan eng kam ish haqi miqdoridan ortiq boʻlmagan nochor fuqarolar huquqiy yordam uchun haq toʻlashdan ozod qilinishlari kerak.

3. Tuman, shahar hokimligi haq toʻlashni qaror, ajrimni chiqargan organ joylashgan joy boʻyicha amalga oshiradi.

Haq qaror, ajrim va advokatlar byurosi, hayʼati va firmasi rahbari tomonidan hisoblab chiqarilgan summa koʻrsatilgan hamda qaror, ajrimni chiqargan shaxs tomonidan tasdiqlangan maʼlumotnoma taqdim etilgach toʻlanadi.

4. Tuman, shahar hokimligi koʻrsatib oʻtilgan hujjatlar olingach, bir oy muddatda advokatlar byurosi, hayʼati, firmasiga toʻlanishi kerak boʻlgan summani oʻtkazadi.

5. Advokat jinoiy ishni sudda koʻrib chiqishda uzoq vaqt qatnashgan taqdirda uning mehnatiga haq toʻlash haqidagi maʼlumotnoma har oyda tuziladi.

6. Advokatlar byurosi, hayʼati va firmasi rahbari tayinlanib jinoiy ishda qatnashgan advokatga haq toʻlangandan keyin bir hafta muddatda jinoiy ishga tirkash uchun davlatga toʻlanishi kerak boʻlgan summa haqida surishtiruvni olib borgan shaxs, tergovchi, prokurorni xabardor qiladi. Fuqaro sudning hukmi bilan aybdor deb topilganda va huquqiy yordam uchun haq toʻlashdan ozod qilish uchun asos mavjud boʻlmagan holda davlat xarajatlari hukm qilinganning hisobidan undirib olinadi.

7. Davlat tomonidan haq toʻlangan huquqiy yordamga oid xarajatlarni hukm qilingandan undirib olish yuzasidan hukmning ijro etilishi (qonun hujjatlarida belgilangan tartibda sud ijrochisi tomonidan amalga oshiriladi.

8. Advokatlar tomonidan fuqarolarga huquqiy yordam koʻrsatish boʻyicha xarajatlarni davlat hisobiga oʻtkazish tartibiga rioya qilinishi ustidan nazoratni moliya organlari amalga oshiradi.

9. Gumon qilinuvchi, ayblanuvchi yoki sudlanuvchiga advokatlar tomonidan koʻrsatilgan huquqiy yordamga davlat hisobidan haq toʻlash bilan bogʻliq xarajatlar qonun hujjatlariga muvofiq mahalliy budjetlar mablagʻlari hisobiga amalga oshiriladi.

10. Oʻzbekiston Respublikasi Adliya vazirligi Moliya vazirligi bilan birgalikda Advokatlar tomonidan koʻrsatiladigan huquqiy yordamga haq toʻlash haqidagi yoʻriqnomani va Gumon qilinuvchi, ayblanuvchi, sudlanuvchiga davlat hisobiga oʻtkazilgan huquqiy yordam koʻrsatish bilan bogʻliq xarajatlarni advokatlarga toʻlash tartibi toʻgʻrisidagi qoidalarni bir oy muddatda tasdiqlasin.

11. Oʻzbekiston SSJ Vazirlar Kengashining “Advokatlar tomonidan fuqarolarga huquqiy yordam koʻrsatish boʻyicha xarajatlarni davlat hisobiga oʻtkazish tartibi toʻgʻrisida” 1990-yil 19-sentabrdagi 314-son qarori oʻz kuchini yoʻqotgan deb hisoblansin.