Soliq organlarining moddiy-texnika bazasini mustahkamlash va faoliyati samaradorligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi vazirliklari va idoralari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Vazirlar Mahkamasining 1994-yil 4-martdagi 114-son qarorining respublika soliq organlarining moddiy-texnika taʼminotiga oid qismini bajarish boʻyicha yetarlicha ish olib bormayotganliklari qayd etilsin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ikki oy muddatda 1-ilovaga* muvofiq davlat soliq organlarini joylashtirish uchun tegishli binolar ajratilishi toʻgʻrisidagi masalani belgilangan tartibda hal etsinlar.

Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari koʻrsatib oʻtilgan bandning bajarilishi toʻgʻrisida 1996-yil 1-yanvargacha axborot bersinlar.

3. Oʻzbekiston Respublikasi Moliya vazirligi Oʻzbekiston Respublikasining respublika budjeti loyihasini tuzishda hisoblash, nusxa koʻchirish-koʻpaytirish va bosish texnikasi sotib olish, shuningdek Oʻzbekiston Respublikasi davlat soliq va bojxona organlari tizimi kadrlarini tayyorlash, qayta tayyorlash va ularning malakasini oshirishga oid tadbirlarni mablagʻ bilan taʼminlash uchun 1996-yildan boshlab maqsadli mablagʻlar ajratilishini 2 — 4-ilovalarga* muvofiq nazarda tutsin.

4. “Oʻzistiqbolstat” davlat qoʻmitasi Oʻzbekiston Respublikasi Moliya vazirligi bilan birgalikda 1996-yilga investitsiya dasturini shakllantirishda tuman soliq inspeksiyalarini joylashtirish uchun bir xildagi binolar qurilishini nazarda tutsin.

Oʻzbekiston Respublikasi Davlat arxitektura va qurilish qoʻmitasi 1995-yilda soliq organlari ishining oʻziga xos sharoitlarini hisobga olgan holda bir xildagi binolar loyihalarini ishlab chiqsin.

5. Oʻzbekiston Respublikasi Xalq taʼlimi vazirligi va Oliy va oʻrta maxsus taʼlim vazirligi 1995/1996 oʻquv yilidan boshlab maktab, hunar-texnika, oʻrta maxsus va oliy taʼlim oʻquv rejalari va dasturlariga soliq qonunchiligi asoslari boʻyicha kurs yoki fakultativ kiritsinlar.

6. Belgilab qoʻyilsinki, soliq organlari xodimlarining lavozim maoshlariga maxsus shaxsiy unvonlar uchun qoʻshimcha haq Vazirlar Mahkamasining 1992-yil 20-oktabrdagi 483-son qaroriga 1-ilova bilan tasdiqlangan koeffitsiyentlar boʻyicha lavozim maoshidan kelib chiqib toʻlanadi.

7. Oʻzbekiston Respublikasi Davlat soliq qoʻmitasining Davlat soliq qoʻmitasi huzurida soliq va bojxona organlarini avtomatlashtirishni dasturiy taʼminlashni ishlab chiqish uchun xoʻjalik hisobidagi “Yangi texnologiyalar ilmiy-axborot markazi” tashkil etish, shuningdek uni maʼlumotlarni berish milliy axborot-hisoblash tarmogʻining kichik tizimini yaratish maqsadida davlat muassasalari va banklarning avtomatlashtirilgan axborot tizimlari bilan integratsiyalashtirish toʻgʻrisidagi taklifi qabul qilinsin.

Oʻzbekiston Respublikasi Davlat soliq qoʻmitasi bir oy muddatda xoʻjalik hisobidagi “Yangi texnologiyalar ilmiy-axborot markazi” Ustavini, soliq va bojxona organlarining mahalliy, mintaqaviy va boshqa axborot-hisoblash tarmoqlarini tashkil etish, joriy etish va foydalanish tartibi va qoidalari hamda ularning davlat muassasalari va banklarning avtomatlashtirilgan axborot tizimlari bilan oʻzaro hamkorligi toʻgʻrisidagi nizomni ishlab chiqsin va Oʻzbekiston Respublikasi Fan va texnika davlat qoʻmitasi va Adliya vazirligi bilan kelishgan holda tasdiqlasin.

8. Oʻzbekiston Respublikasi Davlat soliq qoʻmitasi soliq organlarining soliqlar toʻgʻrisidagi qonunlarga rioya etilishi ustidan nazorat qilish ishi samaradorligini oshirish hamda soliq toʻlovchilarning toʻliq hisobga olinishi hamda soliqlar va boshqa majburiy toʻlovlarning budjetga oʻz vaqtida tushishini taʼminlash yuzasidan zarur chora-tadbirlar koʻrsin.

9. Mazkur qarorning bajarilishini nazorat qilish Bosh vazirning birinchi oʻrinbosari I.H. Joʻrabekov zimmasiga yuklansin.