LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Traktorlar va murakkab qishloq xo‘jaligi mashinalari dvigatellari puxta tuzatilishini ta’minlash, tuzatish korxonalaridagi texnologiya jarayonlarini texnik talablarga to‘liq muvofiqlashtirish maqsadida Vazirlar Mahkamasi qaror qiladi:
1. Mukammal tuzatishdan chiqqan dizel dvigatellarini sertifikatsiya sinovlariga tayyorlash va ularni o‘tkazishga oid tadbirlar rejasi ilovaga* muvofiq tasdiqlansin.
2. “O‘zqishloqxo‘jalikta’minottuzatish” davlat qo‘mitasi (Jabborov), O‘zbekiston Respublikasi Qishloq xo‘jaligi vazirligi (Husanov) va “O‘zdavstandart” markazi (Asriyans) mukammal tuzatishdan chiqqan dvigatellarni sertifikatsiya sinovlaridan o‘tkazish ishlarini Toshkent tajriba-tuzatish, Asaka va Dalvarzin tuzatish zavodlarida amaldagi normativ hujjatlarga muvofiq tashkil etsinlar.
3. “O‘zqishloqxo‘jalikta’minottuzatish” davlat qo‘mitasi yuqorida aytib o‘tilgan korxonalarni mukammal tuzatishdan chiqqan dvigatellarni sertifikatsiya sinovlaridan o‘tkazishga tayyorlashni o‘z vaqtida yakunlasin, ularning puxta ishlashlarini ta’minlasin (motoresurslar yangi dvigatellarning kamida 80 foizini tashkil qilishi kerak).
4. Mukammal tuzatishdan chiqqan dvigatellarning sertifikatsiya sinovlarini o‘tkazish mazkur ish turini amalga oshirishga vakil qilingan O‘zbekiston mashina sinash stansiyasiga topshirilsin.