LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
O‘zbekiston Respublikasi Tashqi iqtisodiy aloqalar vazirligi xodimlarining respublika uchun foydali kontraktlar tayyorlash va tuzish, eksport operatsiyalari o‘tkazishdan olinadigan valyuta tushumi muddatlarini qisqartirish bo‘yicha mehnatini rag‘batlantirish, vazirlik shtatlarini malakali kadrlar bilan butlash va ularning muqim ishlab qolishlarini ta’minlash maqsadida Vazirlar Mahkamasi qaror qiladi:
1. O‘zbekiston Respublikasi Tashqi iqtisodiy aloqalar vazirligi apparati va vazirlik organlari xodimlari uchun quyidagilar belgilansin:
belgili muddat xizmat qilganligi uchun ish stajiga bog‘liq ravishda ilovaga muvofiq miqdorlarda bir marta beriladigan mukofot. To‘lovlar bir yillik ish yakunlari bo‘yicha o‘rtacha lavozim maoshidan kelib chiqib amalga oshirilsin;
chet tillarni bilganligi uchun belgilangan tartibda tashkil etiladigan komissiyaning xulosasiga ko‘ra lavozim maoshining 10 foizi miqdorida har oylik qo‘shimcha haq.
2. O‘zbekiston Respubliiasi Tashqi iqtisodiy aloqalar vaziriga 1995-yil 1-sentabrdan boshlab Iqtisodiyot va tashqi savdoni rejalashtirish bosh boshqarmasi, Tashqi iqtisodiy faoliyatni boshqarish bosh boshqarmasi va Xalqaro yuk tashish boshqarmasi xodimlariga lavozim maoshining 70 foizigacha miqdorida ustama belgilash huquqi berilsin.
O‘zbekiston Respublikasi Tashqi iqtisodiy aloqalar vazirligiga O‘zbekiston Respublikasi uchun foydali bo‘lgan eksport-import kontraktlarini tayyorlashda, tuzishda va amalga oshirishda qatnashgan vazirlik xodimlarini moddiy rag‘batlantirish uchun mehnatga haq to‘lash yillik fondining 15 foizi miqdorida maxsus jamg‘arma tashkil etishga ruxsat berilsin. O‘zbekiston Respublikasi Tashqi iqtisodiy aloqalar vazirligi Moliya vazirligi bilan kelishgan holda bir oy muddatda Maxsus jamg‘arma to‘g‘risidagi nizomni ishlab chiqsin va tasdiqlasin.
3. 1995-yilda ustama va qo‘shimcha haqlar joriy etilishi bilan bog‘liq xarajatlar 1995-yilgi smeta bo‘yicha O‘zbekiston Respublikasi Tashqi iqtisodiy aloqalar vazirligi xodimlari mehnatiga haq to‘lash fondi doirasida amalga oshirilsin.
4. O‘zbekiston Respublikasi Moliya vazirligi 1996-yilgi davlat budjetida yuqorida ko‘rsatilgan maqsadlar uchun sarf-xarajatlarni nazarda tutsin.