“Davlat xaridlari to‘g‘risida” gi O‘zbekiston Respublikasi Qonuniga muvofiq, shuningdek, davlat xaridlarini amalga oshirishda xarid qilish tartib-taomillarini tashkil etish jarayonlarini axborot-kommunikatsiya texnologiyalaridan foydalangan holda yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Moliya vazirligi:

2021-yil 1-aprelga qadar davlat xaridlari sohasidagi maxsus axborot portali operatorlari bilan birgalikda maxsus axborot portalida qurilish sohasida davlat xaridlarini elektron shaklda o‘tkazishni nazarda tutuvchi alohida sahifa yaratsin;

2021-yil 1-mayga qadar Markaziy axborot portalini yaratish bo‘yicha texnik-loyiha hujjatlarini ishlab chiqsin va belgilangan tartibda O‘zbekiston Respublikasi Axborot texnologiyalari va kommunikatsiyalarini rivojlantirish vazirligida ekspertizadan o‘tkazsin;

2021-yil 1-sentabrga qadar davlat xaridlari bo‘yicha barcha ma’lumotlarni jamlovchi va tashqi axborot tizimlar bilan o‘zaro elektron hamkorlikni ta’minlovchi Davlat xaridlari markaziy axborot portali dasturiy majmuasini (keyingi o‘rinlarda — Markaziy axborot portali) yaratish va uni kuzatishni ta’minlash choralarini ko‘rsin.

2. Belgilansinki:

Markaziy axborot portalini ishlab chiqish va uni kuzatishni ta’minlash O‘zbekiston Respublikasi Moliya vazirligining Axborot-hisoblash markazi tomonidan amalga oshiriladi;

Markaziy axborot portalini ishlab chiqish va uni kuzatishni ta’minlash xalqaro moliya institutlaridan jalb qilinadigan mablag‘lar hamda Moliya vazirligi Axborot-hisoblash markazining o‘z mablag‘lari hisobiga amalga oshiriladi;

2021-yil 1-apreldan boshlab davlat xaridlari ijrochisining muassislari to‘g‘risidagi ma’lumotlar O‘zbekiston Respublikasi Moliya vazirligi va Davlat soliq qo‘mitasi axborot tizimlari o‘rtasidagi axborot almashinuvidan foydalangan holda davlat buyurtmachilari bilan tuzilgan shartnomalar reyestriga kiritiladi.

3. O‘zbekiston Respublikasi Moliya vazirligi, Qurilish vazirligi, Iqtisodiy taraqqiyot va kambag‘allikni qisqartirish vazirligi boshqa manfaatdor vazirliklar va idoralar bilan birgalikda davlat xaridlari sohasidagi ma’lumotlar almashinuvini ta’minlash maqsadida Markaziy axborot portali bilan elektron hamkorlikni amalga oshirish choralarini ko‘rsin.

O‘zbekiston Respublikasi Qurilish vazirligi ikki oy muddatda Moliya vazirligiga qurilish sohasida (loyihalashtirish, qurish, rekonstruksiya (modernizatsiya) qilish va mukammal ta’mirlash) tanlovni (tenderni) tashkil etish va o‘tkazishda ishtirokchilar uchun talab etiladigan namunaviy hujjatlarni tasdiqlash uchun kiritsin.

4. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Moliya vazirligining so‘roviga muvofiq Markaziy axborot portalini elektron hukumat tizimlari bilan integratsiyalashni ta’minlasin.

5. Quyidagilar:

Davlat xaridlari markaziy axborot portalini yuritish bo‘yicha funksional talablar 1-ilovaga muvofiq;

Davlat xaridlari sohasida foydalaniladigan tovarlarning (ishlarning, xizmatlarning) milliy klassifikatorini yuritish qoidalari 2-ilovaga muvofiq tasdiqlansin.

O‘zbekiston Respublikasi Moliya vazirligi Axborot texnologiyalari va kommunikatsiyalarini rivojlantirish vazirligi bilan birgalikda davlat xaridlari sohasida foydalaniladigan tovarlar (ishlar, xizmatlar) milliy klassifikatorining “Elektron hukumatning ma’lumotnomalar va klassifikatorlar registri” bilan malumotlar almashishini ta’minlasin.

6. O‘zbekiston Respublikasi Hukumatining 3-ilovaga muvofiq ayrim qarorlari o‘z kuchini yo‘qotgan deb hisoblansin.

7. O‘zbekiston Respublikasi Moliya vazirligi ushbu qarorning mohiyati va ahamiyati ommaviy axborot vositalarida keng yoritilishini tashkil etsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov va O‘zbekiston Respublikasi moliya vaziri T.A. Ishmetov zimmasiga yuklansin.

1. Davlat xaridlari markaziy axborot portalini yuritish bo‘yicha funksional talablar (keyingi o‘rinlarda — Funksional talablar) “Davlat xaridlari to‘g‘risida” gi O‘zbekiston Respublikasi Qonuni, shuningdek, sohaga oid qabul qilingan boshqa normativ-huquqiy hujjatlar talablari asosida ishlab chiqilgan.

2. Ushbu Funksional talablarda quyidagi asosiy tushunchalar qo‘llaniladi:

davlat xaridlari markaziy axborot portali (keyingi o‘rinlarda — DXMAP) — O‘zbekiston Respublikasi Moliya vazirligining davlat xaridlari to‘g‘risidagi axborot elektron shaklda yuritilishini, shu jumladan, maxsus axborot portali operatorining (keyingi o‘rinlarda — operator) axborot tizimlari bilan o‘zaro ma’lumot almashinuvi orqali davlat xaridlarining reja-jadvallari, davlat xaridlari to‘g‘risidagi e’lonlar, davlat xaridlarining yakunlari to‘g‘risidagi axborot, davlat xaridlari bo‘yicha statistik axborot va boshqa ma’lumotlarni o‘zining ma’lumotlar bazasida jamlanishini va ulardan barcha jismoniy va yuridik shaxslarning erkin foydalanishini ta’minlovchi maxsus elektron platformasi;

davlat xaridlari to‘g‘risidagi axborot (keyingi o‘rinlarda — axborot) — davlat xaridlari to‘g‘risidagi qonunchilik hujjatlari, davlat xaridlarining reja-jadvallari, davlat xaridlari to‘g‘risidagi e’lonlar, hujjatlarning namunaviy shakllari, xarid qilish tartib-taomillarida ishtirok etish uchun zarur bo‘lgan namunaviy shartnomalar, davlat xaridlarining yakunlari to‘g‘risidagi axborot, Insofsiz ijrochilarning yagona reyestri, Davlat xaridlari sohasidagi shikoyatlarni ko‘rib chiqish bo‘yicha komissiyaning qarorlari, davlat xaridlari bo‘yicha statistik axborot va davlat xaridlari sohasiga oid boshqa ma’lumotlar;

maxsus axborot portali — operatorning davlat xaridlari o‘tkazilishini, davlat xaridlari to‘g‘risidagi e’lonlar, davlat xaridlari yakunlari, xarid qilish tartib-taomillari ishtirokchilarining takliflari haqidagi axborotning va qonunchilik hujjatlarida nazarda tutilgan boshqa axborotning elektron shaklda joylashtirilishini va ko‘rilishini, shuningdek, elektron davlat xaridlari o‘tkazilishini ta’minlovchi veb-sayti va maxsus elektron platformasi;

maxsus axborot portali operatori — davlat xaridlarining subyektlariga xarid qilish tartib-taomillarini tashkil etish va o‘tkazish, maxsus axborot portaliga e’lonlarni, buyurtmanomalarni hamda davlat xaridlari va ularning yakunlari to‘g‘risidagi boshqa axborotni joylashtirish bilan bog‘liq xizmatlar ko‘rsatuvchi maxsus vakolatli yuridik shaxs;

xarid qilish tartib-taomillarining davlat nazoratini amalga oshiruvchi davlat organlari — O‘zbekiston Respublikasi Hisob palatasi, Bosh prokuratura, Korrupsiyaga qarshi kurashish agentligi, Moliya vazirligi, Monopoliyaga qarshi kurashish qo‘mitasi.

3. Funksional talablar quyidagilarni nazarda tutadi:

DXMAPda axborotni shakllantirish va joylashtirish, shuningdek, uning jamoatchilikka ochiqligini ta’minlash uchun “Davlat xaridlari to‘g‘risida”gi O‘zbekiston Respublikasi Qonuni va davlat xaridlari sohasidagi boshqa normativ-huquqiy hujjatlar talablariga hamda ushbu Funksional talablarning 2 va 3-boblari talablariga muvofiq funksional imkoniyatlarni yaratish;

DXMAPning operatorlar axborot tizimlari va boshqa axborot tizimlari bilan integratsiyasini amalga oshirish imkoniyatlarini yaratish;

“Davlat xaridlari to‘g‘risida”gi O‘zbekiston Respublikasi Qonuniga hamda O‘zbekiston Respublikasining budjet tizimi budjetlari mablag‘lari doirasida yuridik majburiyatlarni ro‘yxatdan o‘tkazish va hisobga olish tartibiga muvofiq axborotni shakllantirish, qayta ishlash, saqlash va taqdim etish;

xarid qilish tartib-taomillari ustidan jamoatchilik nazoratini amalga oshirish maqsadida DXMAPda axborot majburiy tartibda jamoatchilikka havola etilishini ta’minlash, qonunchilik hujjatlariga muvofiq davlat sirini tashkil etuvchi ma’lumotlar bundan mustasno;

xarid qilish tartib-taomillarining davlat nazoratini amalga oshiruvchi davlat organlariga o‘z funksiyalarini bajarishi uchun DXMAPdan foydalanish imkoniyatini yaratish.

4. DXMAP O‘zbekiston Respublikasi hududidagi apparat-texnika vositalarida joylashtiriladi.

5. Xarid qilish tartib-taomillarining davlat nazoratini amalga oshiruvchi davlat organlarining mas’ul xodimlari o‘z funksiyalarini amalga oshirish uchun o‘zlarining soliq organlari tomonidan berilgan elektron raqamli imzolaridan (keyingi o‘rinlarda — ERI) foydalangan holda DXMAPda kuzatuvchi sifatida ro‘yxatdan o‘tadilar.

6. DXMAPda joylashtirilgan axborot DXMAPda axborotni joylashtirish vakolatiga ega bo‘lgan shaxslarning ERIsi bilan imzolanadi.

7. DXMAPda ERIni qo‘llash tartibi “Elektron raqamli imzo to‘g‘risida”gi O‘zbekiston Respublikasi Qonunida belgilangan talablarga muvofiq, shuningdek, “Davlat xaridlari to‘g‘risida”gi O‘zbekiston Respublikasi Qonuni va davlat xaridlari sohasidagi boshqa normativ-huquqiy hujjatlar talablari asosida amalga oshiriladi.

8. DXMAPga boshqa axborot tizimlaridan integratsiya asosida uzatiladigan axborot DXMAPga avtomatik tarzda joylashadi.

9. DXMAP bilan boshqa axborot tizimlari o‘rtasidagi ma’lumotlar almashinuvi belgilangan standart talablarga muvofiq yagona formatlar orqali hamda Elektron hukumatning ma’lumotnomalar, klassifikatorlar va yagona identifikatorlaridan foydalangan holda amalga oshiriladi.

10. DXMAPda axborotni joylashtirish quyidagi talablardan kelib chiqib amalga oshiriladi:

axborot elektron hujjatlarning yagona shakliga muvofiq bo‘lgan taqdirda;

foydalanilayotgan ERIning haqiqiyligi tasdiqlanganda;

joylashtirilishi lozim bo‘lgan axborot qonunchilik hujjatlari talablariga muvofiq bo‘lgan taqdirda.

11. Axborotni DXMAPda joylashtirishda ularga avtomatik ravishda DXMAP tomonidan identifikatsiya raqami beriladi.

12. Maxsus axborot portalida e’lon qilinishi lozim bo‘lgan axborot DXMAPda joylashtirilishi shart.

13. DXMAPda axborotni shakllantirish, qayta ishlash, saqlash va taqdim qilish funksiyalari “Davlat xaridlari to‘g‘risida”gi O‘zbekiston Respublikasi Qonuni va davlat xaridlari sohasidagi boshqa normativ-huquqiy hujjatlar talablari, shuningdek, ushbu Funksional talablarga muvofiq amalga oshirilishi lozim.

14. DXMAP quyidagi sahifalardan tashkil topadi:

axborotni joylashtirish, jamlash, qayta ishlash va tahliliy hisobotlarni shakllantirish sahifasi;

tashqi axborot tizimlar bilan ma’lumot almashinuvini ta’minlash sahifasi;

xarid qilish tartib-taomillarining davlat nazoratini amalga oshiruvchi davlat organlari va ichki audit bo‘linmalari tomonidan davlat xaridlari subyektlarining o‘z funksiyalarini qonunchilik hujjatlari talablari doirasida amalga oshirayotganligi bo‘yicha monitoring va nazorat qilish sahifasi;

davlat xaridlari sohasida foydalaniladigan tovarlarning (ishlarning, xizmatlarning) milliy klassifikatorini yuritish sahifasi;

qayta ishlanadigan ma’lumotlarning xavfsizligi, yaxlitligi, to‘g‘riligi va ulardan foydalana olish imkoniyatini ta’minlash sahifasi;

davlat xaridlari sohasida foydalaniladigan ma’lumotlarni (ma’lumotnomalar, tasniflar, normativ-huquqiy hujjatlar, sharhlar va tushuntirishlar) olish, saqlash va tarqatish sahifasi;

davlat buyurtmachilarining kasbiy mahoratga ega bo‘lishi, xodimlarning soha bo‘yicha malakasini muntazam ravishda oshirib borish uchun mo‘ljallangan ta’lim sahifasi.

15. DXMAPda quyidagi axborotlar shakllantiriladi, joylashtiriladi va taqdim etiladi:

davlat xaridlari to‘g‘risidagi qonunchilik hujjatlari;

davlat xaridlarining reja-jadvallari;

amalga oshirilgan va amalga oshirilayotgan davlat xaridlari to‘g‘risidagi ma’lumotlar (davlat xaridlari to‘g‘risidagi e’lonlar, eng yaxshi takliflarni tanlash, tanlov va tender hujjatlari va ularga kiritilgan o‘zgartirishlar, yakunlangan yoki bekor qilingan davlat xaridlari to‘g‘risidagi axborot, shuningdek, davlat xaridlarida foydalaniladigan hujjatlarning namunaviy shakllari);

davlat buyurtmachilari bilan tuzilgan shartnomalar reyestri;

Insofsiz ijrochilarning yagona reyestri;

Yagona yetkazib beruvchilar reyestri;

Davlat xaridlari sohasidagi shikoyatlarni ko‘rib chiqish bo‘yicha komissiyaning qarorlari;

davlat xaridlari bo‘yicha statistik axborot;

to‘g‘ridan-to‘g‘ri tuzilgan shartnomalar to‘g‘risidagi ma’lumotlar;

davlat xaridlari monitoringi natijalari bo‘yicha jamlangan tahliliy hisobotlar;

davlat xaridlari sohasida foydalaniladigan tovarlarning (ishlarning, xizmatlarning) milliy klassifikatori;

qonunchilik hujjatlariga muvofiq faoliyat yuritayotgan elektron savdo maydonchalarida ro‘yxatdan o‘tgan davlat buyurtmachilari va xarid qilish tartib-taomillari ishtirokchilari ro‘yxati;

davlat xaridlari ijrochisining muassislari to‘g‘risidagi ma’lumotlar;

DXMAP bilan o‘zaro aloqada bo‘lgan axborot tizimlari ro‘yxati;

davlat buyurtmachilarining kelgusi yilda joriy xo‘jalik faoliyatini ta’minlash uchun moddiy-texnik resurslar ro‘yxati;

davlat xaridlari sohasidagi yangiliklar, hujjatlar, o‘kuv materiallari, ma’lumotnomalar, savolnomalar, aloqa ma’lumotlari haqidagi axborot;

davlat xaridlari sohasiga oid boshqa axborot.

16. DXMAPda joylashtirilgan axborot jamoatchilik uchun e’lon qilinadi.

17. DXMAPda shakllantirilgan va joylashtirilgan barcha axborot qonunchilik hujjatlarida belgilangan muddatlarda saqlanishi lozim.

18. DXMAPda barcha operatorlar uchun teng ma’lumot almashinuvi imkoniyatlari yaratilishi shart.

19. Ushbu Funksional talablar buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.

20. Operatorlar axborot DXMAPga o‘z vaqtida taqdim etilishi uchun javob beradilar.

1. Ushbu Qoidalar “Davlat xaridlari to‘g‘risida” gi O‘zbekiston Respublikasi Qonuniga muvofiq ishlab chiqilgan va davlat xaridlari sohasida foydalaniladigan Tovarlarning (ishlarning, xizmatlarning) milliy klassifikatorini (keyingi o‘rinlarda — Klassifikator) yuritish tartibini belgilaydi.

2. Ushbu Qoidalarning maqsadi texnik jihatdan tartibga solish sohasidagi normativ hujjatlarga va xalqaro klassifikatorlarga muvofiq tovarlar, ishlar va xizmatlarni tavsiflash va davlat xaridlari samaradorligini oshirishdan iborat.

3. O‘zbekiston Respublikasi Moliya vazirligi — davlat xaridlari sohasidagi vakolatli davlat organi (keyingi o‘rinlarda — vakolatli davlat organi) Klassifikatorga o‘zgartirish va qo‘shimchalar kiritish huquqiga ega.

4. Klassifikatordan quyidagi maqsadlarda foydalaniladi:

davlat xaridlari maqsadlari uchun tovar (ish, xizmat)ni tasniflash va kodlash;

tovar (ish, xizmat)ning batafsil tavsifini davlat xaridining reja-jadvalida, davlat xaridi to‘g‘risidagi e’londa, xarid qilish tartib-taomillari ishtirokchisining ofertasida, tanlov va tender hujjatlarida, davlat xaridlari to‘g‘risidagi shartnomada va qonunchilik hujjatlariga muvofiq davlat xaridlari to‘g‘risidagi boshqa axborotlarda aks ettirish;

davlat xaridlari to‘g‘risidagi barcha ma’lumotlarni yig‘ish, hisobga olish, ishlov berish va tahlil qilishni hamda barcha manfaatdor shaxslarga undan foydalanishni ta’minlash;

tovarlar (ishlar, xizmatlar)ning spetsifikatsiyalarini shakllantirishda;

davlat xaridlarining boshlang‘ich narxini va loyiha xarajatlarining me’yoriy ko‘rsatkichlarini aniqlashda xolisligiga erishish;

xalqaro statistika metodologiyasiga muvofiq tovarlar (ishlar, xizmatlar) guruhlari bo‘yicha ma’lumotlarni taqqoslash orqali statistik ma’lumotlarni tayyorlash;

davlat xaridlari shaffofligi va samaradorligini ta’minlash;

xalqaro elektron axborot tizimlari bilan davlat xaridlari bo‘yicha hamkorlik imkoniyatlarini oshirish.

5. Klassifikator O‘zbekiston Respublikasi Iqtisodiy faoliyat turlari bo‘yicha mahsulotlarning (tovarlar, ishlar, xizmatlarning) statistik tasniflagichi (keyingi o‘rinlarda — MST) asosida ishlab chiqilgan.

6. Tuzilishiga ko‘ra Klassifikator tovarlar (ishlar, xizmatlar)ning nomlanishi, maxsus kodi va tavsifnomalaridan iborat.

7. Klassifikator maxsus kodlariga quyidagilar kiradi:

MSTning harfli kodi va olti xonali raqamli kodlardan iborat birinchi daraja;

tovar (ish, xizmat)ning guruhi (tipi)dan kelib chiqib shakllantirilgan uch xonali raqamli kodlardan iborat ikkinchi daraja;

tovar (ish, xizmat)ning standart parametrlari asosida shakllantirilgan besh xonali raqamli kodlardan iborat uchinchi daraja.

8. Klassifikator o‘n to‘rt raqamdan iborat va XX.XX.XX.XXX — XXXXX ko‘rinishdagi formulaga ega.

9. Klassifikator kodlarining tuzilishi formulasi:

10. Klassifikatorni yuritish jarayonida tovar (ish, xizmat)ni guruhlarga (tiplarga) bo‘lish imkoniyati mavjud bo‘lmagan taqdirda yettinchidan to‘qqizinchigacha bo‘lgan raqamlar “0” etib belgilanadi.

11. Tovar (ish, xizmat)ning alohida tavsifnomalari vakolatli davlat organi tomonidan mavjud texnik jihatdan tartibga solish sohasidagi normativ hujjatlardan kelib chiqib yuritiladi.

12. Klassifikator tuzilishining asosini faoliyat va tovar (ish, xizmat) turining yagonaligi tamoyili tashkil etadi, ya’ni tovar (ish, xizmat)ning har bir turi ma’lum bir iqtisodiy faoliyat turiga tegishli bo‘lishi va har bir faoliyat ushbu faoliyat natijasida yaratilgan tovar (ish, xizmat) kategoriyasiga mos kelishi kerak.

13. Tovar (ish, xizmat)larni aniqlashtirish jarayonlari ketma-ket kodlarga bo‘lish yo‘li orqali amalga oshiriladi.

14. Kategoriyaning kichik kategoriyalarga detalizatsiyasi tasniflash xususiyatlari asosida amalga oshiriladi.

Bunda mahsulotning asosiy tasniflash xususiyatlari mahsulotning ko‘lami, maqsadi, tarkibi, ishlab chiqarish usuli, bajaradigan vazifalaridan iborat.

15. Tasniflashning bir xil darajasida joylashgan guruhlash bir-biri bilan tutashmasligi kerak, ya’ni ular o‘xshash tushunchalarni o‘z ichiga olmasligi kerak. Tasniflashning har bir bosqichida yuqori darajali guruhlashni ajratish uchun faqat bitta xususiyat ishlatilishi kerak.

16. Tasniflash jarayonida tovar (ish, xizmat)ning nomi uning asosiy parametrlarini va unga oid batafsil ma’lumotni o‘z ichiga olishi kerak.

17. Tasniflash jarayonida tovar (ish, xizmat)ning nomidagi birinchi so‘z ot so‘z turkumida, bosh kelishik va birlikda bo‘lishi kerak, qonunchilik hujjatlariga muvofiq ko‘plikda belgilangan nomlar bundan mustasno. Nom kichik harflar bilan yozilishi va birinchi so‘z katta harf bilan boshlanishi kerak.

18. Tasniflash jarayonida tovar (ish, xizmat)ning nomini aks ettirishda quyidagilarga yo‘l qo‘yilmaydi:

juft ochiq joylar (probellar) qo‘yishga, nomning oxiri va boshida ochiq joylar (probellar) qo‘yishga;

nomining oxirida va boshida tinish belgilari qo‘yishga;

nomida “yo” harfi ishlatishga (“e” bilan almashtiriladi);

apostroflar va qavs belgilari ishlatilishiga, kiril harflari, lotin harflari va tinish belgilaridan boshqa har qanday belgilar qo‘yishga.

19. Nom aniq talqin qilinishi va tovar (ish, xizmat) haqida maksimal ma’lumotni o‘z ichiga olishi kerak.

20. Tovar (ish, xizmat) nomining axborot mazmuni ushbu turdagi normativ-huquqiy hujjatlarga mos kelishi kerak (ustuvorlik kamayish tartibida): Davlat standarti (GOST), Sanoat standarti (OST), Texnik shartlar (TU), Pasportlar yoki texnik tavsiflar, ishlab chiqaruvchi kataloglari.

21. Klassifikator vakolatli davlat organining axborot tizimida shakllantiriladi va yuritiladi. Klassifikatordan davlat xaridlari bo‘yicha maxsus axborot portali operatorlari (kelgusi o‘rinlarda — Operator) axborot tizimlari o‘rtasidagi o‘zaro axborot almashinuvi orqali foydalanishlari mumkin. Bunda vakolatli davlat organi operatorlardan Klassifikatordan foydalanganlik uchun haq olishga haqli. Klassifikatordan foydalanganlik uchun haq vakolatli davlat organi va Operator o‘rtasida tuziladigan Kelishuvga asosan belgilanadi.

22. Klassifikator O‘zbekiston Respublikasining davlat tilida yuritiladi. Klassifikator boshqa tillarda ham yuritilishi mumkin.

23. Klassifikatorga davlat sirini tashkil etuvchi ma’lumotlar kiritilishiga yo‘l qo‘yilmaydi.

24. Klassifikator pozitsiyalari quyidagi ko‘rinishda bo‘ladi: tovar (ish, xizmat) kodi, nomi, o‘lchov birligi, bajarilgan ish hajmi va ko‘rsatilgan xizmat.

25. Tovar (ish, xizmat)ning tavsifi quyidagi ma’lumotlarni o‘z ichiga oladi: iste’mol xususiyatlari va tovar (ish, xizmat)ning boshqa xususiyatlari, shu jumladan, funksional, texnik va sifat xususiyatlari.

26. Miqdoriy baholashga ega bo‘lgan xususiyatlar kiritilayotganda, uning o‘ziga xos qiymati yoki muayyan qiymatlarning to‘liq ro‘yxati yoki maqbul qiymatlar oralig‘i yoki o‘zgarmas qiymatlar, shu jumladan, tovar (ish, xizmat)ga bo‘lgan talablar hisobga olingan holda belgilanadi.

27. Miqdoriy baholashga ega bo‘lmagan xususiyatlar kiritilayotganda, xarid qilinayotgan obyektlarga qo‘yiladigan talablar hisobga olingan holda tovar (ish, xizmat)ning tegishli xususiyatlarining to‘liq ro‘yxati ko‘rsatiladi.

28. Klassifikator pozitsiyalarini shakllantirish va kiritish vakolatli davlat organi tomonidan apparat-texnika vositalaridan foydalangan holda avtomatik rejimda amalga oshiriladi.

1. Vazirlar Mahkamasining “Tender savdolarini tashkil etishni takomillashtirish chora-tadbirlari to‘g‘risida” 2000-yil 21-noyabrdagi 456-son qarori (O‘zbekiston Respublikasi QT, 2000-y., 11-son, 72-modda).

3. Vazirlar Mahkamasining “Eksport-import operatsiyalari monitoringini yanada takomillashtirish chora-tadbirlari to‘g‘risida” 2003-yil 30-sentabrdagi 416-son qaroriga (O‘zbekiston Respublikasi QHT, 2003-y., 9-son, 92-modda) 2-ilovaning 2 va 5-bandlari.

4. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida” 2004-yil 17-yanvardagi 28-son qaroriga (O‘zbekiston Respublikasi QHT, 2004-y., 3-son, 31-modda) ilovaning 10, 14 — 16, 18 va 19-bandlari.

5. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish va ba’zilarini o‘z kuchini yo‘qotgan deb hisoblash to‘g‘risida” 2005-yil 8-sentabrdagi 206-son qaroriga (O‘zbekiston Respublikasi QHT, 2005-y., 34-36-son, 264-modda) 1-ilovaning 25 va 26-bandlari.

6. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida” 2009-yil 20-fevraldagi 50-son qaroriga (O‘zbekiston Respublikasi QHT, 2009-y., 9-son, 89-modda) ilovaning 1-bandi.

7. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2011-yil 18-fevraldagi 42-son qaroriga (O‘zbekiston Respublikasi QHT, 2011-y., 7-8-son, 63-modda) 1-ilovaning 2-bandi.

8. Vazirlar Mahkamasining “Davlat xaridlarini tashkil etishga doir normativ-huquqiy bazani takomillashtirish chora-tadbirlari to‘g‘risida” 2011-yil 1-apreldagi 100-son qaroriga (O‘zbekiston Respublikasi QHT, 2011-y., 14-son, 137-modda) 3-ilovaning 2-bandi.

9. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida” 2012-yil 3-fevraldagi 30-son qaroriga (O‘zbekiston Respublikasi QT, 2012-y., 2-son, 6-modda) ilovaning 2-bandi.

10. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida” 2012-yil 23-maydagi 143-son qaroriga (O‘zbekiston Respublikasi QT, 2012-y., 5-son, 34-modda) ilovaning 9-bandi.

12. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2013-yil 9-sentabrdagi 244-son qaroriga (O‘zbekiston Respublikasi QHT, 2013-y. 16-sentabr, 37-son, 485-modda) 1-ilovaning 17-bandi.

13. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar va qo‘shimcha kiritish to‘g‘risida” 2013-yil 13-noyabrdagi 307-son qarori (O‘zbekiston Respublikasi QT, 2013-y., 11-son, 81-modda).

14. Vazirlar Mahkamasining “O‘zbekiston Respublikasi Hukumatining ayrim qarorlariga qo‘shimchalar kiritish va ba’zilarini o‘z kuchini yo‘qotgan deb hisoblash to‘g‘risida” 2015-yil 4-noyabrdagi 317-son qaroriga ilovaning 1-bandi.

15. Vazirlar Mahkamasining “O‘zbekiston Respublikasi Hukumatining ayrim qarorlariga siyosiy partiyalarni davlat tomonidan moliyalashtirish tartibini takomillashtirishga yo‘naltirilgan o‘zgartirish va qo‘shimchalar kiritish to‘g‘risida” 2016-yil 13-yanvardagi 9-son qaroriga ilovaning 1-bandi.

16. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2016-yil 26-apreldagi 122-son qaroriga (O‘zbekiston Respublikasi QT, 2016-y., 4-son, 28-modda) 1-ilovaning 34-bandi.

17. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2017-yil 16-avgustdagi 638-son qaroriga (O‘zbekiston Respublikasi QT, 2017-y., 33-son, 863-modda) 1-ilovaning 11-bandi.

18. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2017-yil 18-dekabrdagi 992-son qaroriga (O‘zbekiston Respublikasi QT, 2017-y., 12-son, 290-modda) 1-ilovaning 1-bandi.

19. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida” 2019-yil 26-martdagi 254-son qaroriga 1-ilovaning 1 va 6-bandlari.

20. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartish va qo‘shimchalar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida” 2019-yil 19-dekabrdagi 1014-son qaroriga ilovaning 8-bandi.