O‘zbekiston Respublikasi Prezidentining 2019-yil 27-maydagi “O‘zbekiston Respublikasida korrupsiyaga qarshi kurashish tizimini yanada takomillashtirish chora-tadbirlari to‘g‘risida”gi PF-5729-sonli Farmonida belgilangan vazifalar o‘z vaqtida va to‘liq amalga oshirilishini ta’minlash, korrupsiyaga qarshi kurashish sohasida parlament nazorati samaradorligini oshirish maqsadida O‘zbekiston Respublikasi Oliy Majlisi Qonunchilik palatasining Kengashi va O‘zbekiston Respublikasi Oliy Majlisi Senatining Kengashi qaror qiladilar:

1. O‘zbekiston Respublikasi Prezidentining 2019-yil 27-maydagi PF-5729-sonli Farmoni bilan tasdiqlangan 2019-2020-yillarda korrupsiyaga qarshi kurashish Davlat dasturining 30-bandiga asosan Korrupsiyaga qarshi kurashish bo‘yicha respublika idoralararo komissiyasi tomonidan ishlab chiqilgan Iqtisodiy hamkorlik va taraqqiyot tashkilotining tavsiyalarini bajarish bo‘yicha “Yo‘l xaritasi” ma’lumot uchun qabul qilinsin.

2. O‘zbekiston Respublikasi Oliy Majlisi Qonunchilik palatasining Korrupsiyaga qarshi kurashish va sud-huquq masalalari qo‘mitasi hamda O‘zbekiston Respublikasi Oliy Majlisi Senatining Sud-huquq masalalari va korrupsiyaga qarshi kurashish qo‘mitasi:

qonun hujjatlarini tahlil qilish, ularda korrupsiyaga sharoit yaratadigan qoida va normalarni aniqlash hamda ularni bartaraf qilish, korrupsiyaga qarshi kurashish sohasida huquqni qo‘llash amaliyotini takomillashtirish bo‘yicha takliflar ishlab chiqsin;

davlat organlari rahbarlarining axborotlarini eshitishni tashkil qilsin;

davlat organlarining korrupsiyaga qarshi kurashish sohasidagi huquqni qo‘llash amaliyotini tizimli ravishda o‘rgansin;

korrupsiyaga qarshi kurashish bo‘yicha davlat organlari tomonidan amalga oshiriladigan idoraviy choralar samaradorligini baholab borsin;

O‘zbekiston Respublikasi Oliy Majlisi Qonunchilik palatasining Odob komissiyasi hamda O‘zbekiston Respublikasi Oliy Majlisi Senatining Reglament va odob komissiyasi 2019-yil 1-dekabrga qadar ilg‘or xorijiy mamlakatlar tajribasini o‘rgangan holda parlament a’zolari faoliyatida manfaatlar to‘qnashuvining oldini olish masalalari bo‘yicha qonun hujjatlarini takomillashtirish yuzasidan takliflar ishlab chiqsin.

3. O‘zbekiston Respublikasi Vazirlar Mahkamasi:

har bir davlat boshqaruvi organlarida jamoatchilik tomonidan nazorat qilinadigan korrupsiyaga qarshi kurashish bo‘yicha idoraviy dasturlarni ishlab chiqilishini ta’minlash;

korrupsiya holatlariga olib kelishi mumkin bo‘lgan har qanday xizmatlarni raqamlashtirish, ularni “yagona darcha” tamoyili asosida berish va davlat xizmatlari markazlariga o‘tkazish;

fuqarolarning murojaatlaridan ko‘tarilayotgan masalalardan kelib chiqib va korrupsiyaga sharoit yaratuvchi holatlarni o‘rgangan holda, ularni bartaraf etishga qaratilgan takliflar ishlab chiqish;

korrupsiya holatlarini aniqlashga yordam ko‘rsatuvchi “xolis fuqaro” tizimini joriy etish, bunda jamoatchilik nazorati va nodavlat notijorat tashkilotlarining rolini oshirish;

huquqbuzarliklar va ularga sharoit yaratuvchi omillar haqida xabar berishga imkoniyat yaratuvchi yagona portalni tashkil etish va ishga tushirish;

davlat va xususiy sektor o‘rtasidagi munosabatlarning shaffofligini ta’minlash;

pora berilishi haqida xabar qilgan davlat xizmatchilari, shuningdek korrupsiya va boshqa huquqbuzarliklar haqida xabar bergan shaxslarni rag‘batlantirish mexanizmlarini ishlab chiqish;

korrupsiyaga qarshi kurashish bo‘yicha xalqaro reytinglarda O‘zbekistonning o‘rnini yaxshilash, xalqaro tashkilotlar, shu jumladan Iqtisodiy hamkorlik va taraqqiyot tashkilotining korrupsiyaning oldini olishga oid tavsiyalarini har tomonlama ko‘rib chiqish bo‘yicha tegishli chora-tadbirlarni amalga oshirsin.

4. “Korrupsiyasiz soha” loyihasi bo‘yicha amalga oshirilgan ishlar holatini o‘rganish maqsadida joriy yilning oktyabr-noyabr oylarida:

O‘zbekiston Respublikasi Oliy Majlisi Senatining Sud-huquq masalalari va korrupsiyaga qarshi kurashish qo‘mitasi O‘zbekiston Respublikasi Oliy va o‘rta maxsus ta’lim vazirligi;

O‘zbekiston Respublikasi Oliy Majlisi Qonunchilik palatasining Korrupsiyaga qarshi kurashish va sud-huquq masalalari qo‘mitasi O‘zbekiston Respublikasi Qurilish vazirligi rahbarlarining axborotini eshitsin.

5. O‘zbekiston Respublikasi Oliy Majlisi Qonunchilik palatasining Korrupsiyaga qarshi kurashish va sud-huquq masalalari qo‘mitasi hamda O‘zbekiston Respublikasi Oliy Majlisi Senatining Sud-huquq masalalari va korrupsiyaga qarshi kurashish qo‘mitasi har bir eshituv yakuni bo‘yicha vazirliklar, davlat qo‘mitalari va boshqa davlat boshqaruvi organlari faoliyatidagi korrupsiya alomatlariga barham berish hamda ularga qarshi keskin kurash olib borishda qat’iy choralar ko‘rishni nazarda tutadigan taklif va tavsiyalar ishlab chiqsin.

6. Mazkur Qo‘shma qarorning ijrosini nazorat qilish O‘zbekiston Respublikasi Oliy Majlisi Qonunchilik palatasi Spikerining o‘rinbosari N. Umarov va O‘zbekiston Respublikasi Oliy Majlisi Senati Raisining o‘rinbosari S. Artikova zimmasiga yuklatilsin.