Mahsulot ishlab chiqarish sifatini oshirish, xalqaro talablarga javob beradigan sog‘lom raqobatni shakllantirish maqsadida Vazirlar Mahkamasi qaror qiladi:

1. Vazirlar Mahkamasining 2006-yil 7-sentabrdagi 190-son qarori bilan tasdiqlangan Tamaki mahsulotlari ishlab chiqarish faoliyatini litsenziyalash to‘g‘risida nizomga ilovaga muvofiq o‘zgartirishlar kiritilsin.

2. O‘zbekiston Respublikasi Alkogol va tamaki bozorini tartibga solish hamda vinochilikni rivojlantirish agentligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov zimmasiga yuklansin.

1. 7-band quyidagi tahrida bayon etilsin:

“7. Quyidagilar talabgorlarga tamaki mahsulotlari ishlab chiqarish bo‘yicha litsenziyalar berish uchun litsenziya talablari va shartlari hisoblanadi:

tamaki mahsulotlari ishlab chiqarish sohasidagi O‘zbekiston Respublikasi qonun hujjatlariga, texnik reglamentlarga yoki standartlarga majburiy rioya qilish;

ishlab chiqarishning to‘liq texnologik jarayoniga rioya qilish - binolar yaxlitligi, xomashyoni pirovard iste’molchiga sotish uchun tayyor mahsulot etib qayta ishlashni ta’minlovchi texnologik asbob-uskunalarning mavjudligi;

tamaki mahsulotlari ishlab chiqarishni texnik nazorat qilish bo‘yicha “O‘zstandart” agentligi organlari tomonidan akkreditatsiya qilingan laboratoriyalarning mavjudligi;

tamaki mahsulotlari ishlab chiqarishda texnika xavfsizligini, yong‘in xavfsizligi, ishlab chiqarish sanitariyasi va ekologiya talablari va normalarini ta’minlash;

ro‘yxatdan o‘tkazilgan (patentlangan) tovar belgilarining mavjudligi;

mahsulotning har bir turi bo‘yicha xalqaro va milliy standartlar talablariga muvofiq ishlab chiqilgan texnologik yo‘riqnomalarning mavjud bo‘lishi;

ishlab chiqarilayotgan tamaki mahsulotlarini O‘zbekiston Respublikasi qonun hujjatlarida belgilangan tartibda aksiz markalari bilan markalash uchun asbob-uskunalarning mavjud bo‘lishi;

tamaki mahsulotlarini ishlab chiqarishda texnik reglamentlar yoki standartlar talablariga javob beruvchi va qonun hujjatlarida belgilangan tartibda berilgan tegishli sertifikatlarga ega bo‘lgan, shu jumladan import qilingan tamaki xomashyosidan foydalanish. Mahalliy qishloq xo‘jaligi mahsulotlari ishlab chiqaruvchilaridan tamaki xomashyosini sotib olish miqdorini tamaki mahsulotlari ishlab chiqarishda foydalaniladigan umumiy yillik hajmning 20 foizidan kam bo‘lmasligi lozim. Bunda mahalliy qishloq xo‘jaligi mahsulotlari ishlab chiqaruvchilaridan sotib olingan tamaki xomashyosini ishlab chiqarishda foydalanish talabgor tomonidan mustaqil hal qilinadi. Mahalliy qishloq xo‘jaligi mahsulotlari ishlab chiqaruvchilaridan tamaki xomashyosi sotib olishga avans berish agrotexnologiya tadbirlarini o‘z vaqtida amalga oshirish uchun kontrakt summasining kamida 50 foizi miqdorida ta’minlanishi kerak.”.

2. 9-bandning to‘rtinchi xatboshisidagi “Iqtisodiyot” so‘zi “Iqtisodiy taraqqiyot va kambag‘allikni qisqartirish” so‘zlari bilan almashtirilsin.