Oʻzbekiston Respublikasi Qurolli Kuchlari, chegara va ichki qoʻshinlari oldiga suveren davlatning mustaqilligini, hududiy yaxlitligini va aholining tinch hayotini himoya qilish boʻyicha masʼuliyatli vazifalar yuklatilgan. Bu vazifalarni hal etishda harbiy intizomni mustahkamlash va tarbiyaviy ishlarni takomillashtirish masalalari muhim oʻrin tutadi. Biroq tekshirish natijalari shuni koʻrsatadiki, bir qancha harbiy jamoalarda harbiy intizomni mustahkamlash, huquqiy, harbiy va axloqiy tarbiya, shuningdek, harbiy xizmatchilarni maʼnaviy-ruhiy tayyorlash ishlari samarasiz olib borilmoqda, ular jangovar tayyorgarlikka, xizmat-jangovar vazifalarni bajarish sifatiga, harbiy xizmatchilarning ongi va xulq-atvoriga zarur darajada taʼsir koʻrsatmayapti.

Shaxsiy tarkib bilan ishlashning qoʻshinlarda amal kiluvchi tuzilmasi harbiy intizomni mustahkamlash va qoʻshinlarda tarbiyaviy ishlarni takomillashtirish boʻyicha zarur tadbirlarning toʻliq darajada oʻtkazilishini taʼminlamayapti.

Mudofaa va xavfsizlik sohasida davlat siyosatini tashkil etish va oʻtkazish, qoʻshinlarning jangovar tayyorgarligini oshirish, vatanparvarlik tarbiyasini takomillashtirish, shuningdek, Oʻzbekiston Respublikasi Qurolli Kuchlari, chegara va ichki qoʻshinlari shaxsiy tarkibining siyosiy-maʼnaviy ahvolini mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Qurolli Kuchlarida, Milliy xavfsizlik xizmatining chegara qoʻshinlarida va Ichki ishlar vazirligining ichki qoʻshinlarida shaxsiy tarkib bilan ishlash boʻyicha komandirlar (boshliq)larning oʻrinbosarlari lavozimi joriy etilsin, ularga harbiy xizmatchilar oʻrtasida tarbiyaviy ishlarni tashkil etish, shaxsiy tarkib oʻrtasida maʼnaviy-ruhiy vaziyatni, harbiy intizomni mustahkamlash masuliyati yuklatilsin.

Quyidagilar bu lavozimni egallab turgan shaxslarning asosiy vazifalari hisoblansin:

shaxsiy tarkibda Oʻzbekiston Respublikasiga, oʻz xalqiga, Vatanga qasamyod va harbiy burchga sadoqatni, shuningdek, oʻz Vatanining tarixi va anʼanalariga chuqur hurmatni shakllantirish;

harbiy xizmatchilarni Oʻzbekiston Respublikasi qonunlari talablarini, Prezidenti farmonlarini, Oliy Kengashi va Hukumati qarorlarini, komandirlar va boshliqlarning buyruqlarini shak-shubhasiz bajarish ruhida tarbiyalash;

yuksak jangovar axloqiy-ruhiy fazilatlarni, xizmat-jangovar vazifalarni bajarishda toʻgʻrilik va pok vijdonlilikni shakllantirish;

qurol-yarogʻ va jangovar texnikaga, harbiy va xalq mulkiga ehtiyotlik bilan munosabatda boʻlish masʼuliyatini tarbiyalash.

Shaxsiy tarkib bilan ishlash boʻyicha qayd qilib oʻtilgan tuzilmalar mavjud xodimlar soni va ular uchun ajratilgan mablagʻlarning Oʻzbekiston Respublikasi Vazirlar Mahkamasi tomonidan tasdiqlangan doirasida tashkil etilsin.

2. Oʻzbekiston Respublikasi Mudofaa vaziri oʻrtoq Ahmedov, Ichki ishlar vaziri oʻrtoq Almatov, Milliy xavfsizlik xizmati raisi oʻrtoq Aliyev boʻlajak jangchilarni vatanparvarlik va baynalmilallik, xalqlar doʻstligi, oʻz Vataniga cheksiz sadoqat, yuksak hushyorlik, intizom, uyushqoqlik va kollektivizm ruhida tarbiyalashni birinchi darajali vazifa deb hisoblasinlar. Bu ishda oʻzbek xalqining qahramonona anʼanalaridan dadil foydalanilsin, ajdodlarimizning eng yuksak orzulari, prinsiplari va qadriyatlari faol qaror toptirilsin. Shu maqsadda:

shaxsiy tarkib bilan ishlash boʻyicha organlar toʻgʻrisidagi Nizom ishlab chiqilsin va bir oy muddat ichida Vazirlar Mahkamasining koʻrib chiqishi uchun kiritilsin. Nizomda shaxsiy tarkib bilan ish olib boruvchi xizmatlar va mansabdor shaxslarning tuzilmasi, vazifalari va huquqlari belgilansin;

1992/93 oʻquv yilidan boshlab Oʻzbekiston Respublikasi Mudofaa vazirligi, Milliy xavfsizlik xizmati va Ichki ishlar vazirligi harbiy-oʻquv yurtlarida shaxsiy tarkib bilan ishlash boʻyicha kadrlar tayyorlash yoʻlga qoʻyilsin, ana shu maqsadlarda maxsus fakultetlar va kafedralar tashkil etilsin.

Zobitlar uylari, klublar, kutubxonalar, shaxsiy tarkibning ijtimoiy-siyosiy axborot xonalari hamda tarbiyaviy va madaniy-dam olish ishlarini oʻtkazish moʻljallangan boshqa obyektlar uchun zarur boʻlgan madaniy-maʼrifiy mol-mulk meʼyorlari tasdiqlansin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

respublika yoshlarini harbiy xizmatga tayyorlash va milliy zobit kadrlar tayyorlashni kengaytirish boʻyicha uzoq muddatli dasturni ishlab chiqsinlar va tasdiqlasinlar. Bu dasturda:

barcha umumiy taʼlim maktablari, hunar-texnika bilim yurtlari, boshqa oʻrta maxsus oʻquv yurtlarida harbiy kabinetlar, sport zallari hamda boshlangʻich harbiy va jismoniy tayyorgarlik boʻyicha amaliy mashgʻulotlar oʻtkazish uchun boshqa zarur obyektlar tashkil etish hamda yoshlarning boshlangʻich harbiy tayyorgarlik bilan toʻla qamrab olinishini va amaldagi dasturlar hajmida uning yuqori sifatli boʻlishini taʼminlash;

harbiy xizmat qilishdan bosh tortishga va qochoqlikka qarshi kurashni kuchaytirish, buning uchun jamoatchilik, ishlab chiqarish ilgʻorlarining obroʻ-eʼtiboridan va qonunning kuchidan toʻla darajada foydalanish;

harbiy xizmatchilarning hayot va turmush sharoitlarini oʻrganish, ular bilan tarbiyaviy ishlar olib borish uchun hokimliklar, tashkilotlar, korxonalar, jamoatchilik vakillarining viloyatlarda xizmatga chaqirilganlar xizmat qiladigan harbiy qismlarda muntazam boʻlishlarini tashkil etish, bu qismlarni otaliqqa olishni tashkil etish va oʻzaro hamkorlik toʻgʻrisida zarur shartnomalar tuzish nazarda tutilsin.

4. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, “Vatanparvar” mudofaaga koʻmaklashish jamiyati:

harbiy mutaxassislar, harbiy ish oʻqituvchilari va zaxiradagi zobitlarning tayyorgarlik sifatini yaxshilash, shuningdek, qayd qilib oʻtilgan mutaxassisliklar tayyorlash boʻyicha moddiy-texnikaviy negizni takomillashtirish va mustahkamlash chora-tadbirlari majmuini ishlab chiqsinlar va amalga oshirsinlar.

5. Oʻzbekiston Respublikasi Madaniyat ishlari vazirligi Oʻzbekiston Respublikasi Mudofaa vazirligi, Ichki ishlar vazirligi va Milliy xavfsizlik xizmati bilan birgalikda ijodiy va harbiy jamoalarning chambarchas hamkorligini mustahkamlashning kompleks rejasini tuzsinlar.

Harbiy xizmatchilar va ularning oila aʼzolari oʻrtasida olib boriladigan madaniy-maʼrifiy ishlarni aniq mazmun bilan toʻldirishda, ularning madaniy va estetik ehtiyojlarini toʻlaroq qondirishda yordam koʻrsatsinlar.

6. Oʻzbekiston yozuvchilar, rassomlar va kompozitorlar uyushmalari harbiy-vatanparvarlik mavzuyida adabiyot va sanʼatning eng yaxshi asarlari uchun tanlov oʻtkazsinlar. Harbiy xizmatchilarni estetik tarbiyalashda, ular uchun uchrashuvlar, koʻrgazmalar va konsertlar oʻtkazishda yordam koʻrsatsinlar.

7. Oʻzbekiston Respublikasi Davlat kinokompaniyasi Oʻzbekiston Respublikasi Mudofaa vazirligi, Ichki ishlar vazirligi va Milliy xavfsizlik xizmati bilan birgalikda Qurolli Kuchlar ichki va chegara qoʻshinlariniig qaror topishi, hayoti va faoliyati toʻgʻrisida filmlar tayyorlash boʻyicha repertuar rejasini tuzsin, ularni suratga olish va namoyish qilishni tashkil etsin.

8. Oʻzbekiston Respublikasi Davlat televideniye va radio-eshttirish kompaniyasi, respublika, viloyat va shahar gazeta va jurnallari tahririyatlari Mudofaa vazirligi, Ichki ishlar vazirligi va Milliy xavfsizlik xizmati bilan birgalikda “Mudofaa toʻgʻrisida”, “Umumiy harbiy majburiyat va harbiy xizmat toʻgʻrisida” Oʻzbekiston Respublikasi qonunlari, harbiy xizmat ilgʻor tajribasi, harbiy xizmatchilarni Konstitutsiyaga, Vatanga qasamyodga, ustavga, toʻgʻrilik va oʻz xalqiga sodiqlik ruhida tarbiyalash keng yoritilishini tashkil qilsinlar.

Berilayotgan va eʼlon qilinayotgan materiallar sifati oshirilsin, respublikaning suvereniteti va mustaqilligini himoya qilish boʻyicha respublika fuqarolarining konstitutsion burchlari yorqin va ishonarli yoritilsin.

9. Oʻzbekiston Respublikasi Adliya vazirligi Oʻzbekiston Respublikasi Mudofaa vazirligi bilan birgalikda harbiy jinoyatlar boʻyicha jinoyat qonunchiligiga oʻzgartishlar kiritish toʻgʻrisidagi taklifni belgilangan tartibda Oʻzbekiston Respublikasi Oliy Kengashiga kiritsin.

10. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Davlat matbuot qoʻmitasi 1992 — 1995-yillarda harbiy, huquqiy, axloqiy va estetik tarbiya masalalari boʻyicha badiiy, pedagogik va oʻquv-metodik adabiyotlar tayyorlashda Mudofaa vazirligiga, Ichki ishlar vazirligiga va Milliy xavfsizlik xizmatiga yordam koʻrsatsinlar.

11. Mazkur qarorning bajarilishini nazorat qilish Oʻzbekiston Respublikasi Mudofaa vaziri, Ichki ishlar vaziri va Milliy xavfsizlik xizmati raisi zimmasiga yuklatilsin.