Vazirlar Mahkamasining “Respublikada savdoni erkinlashtirish chora-tadbirlari toʻgʻrisida” 1994-yil 14-dekabrdagi 604-son qarori bilan tovarlarning, shu jumladan oziq-ovqat tovarlarning narxlari erkinlashtirilishini tugallash va 1995-yil 1-yanvardan boshlab toʻliq erkinlashtirishni taʼminlash nazarda tutilgan edi.

Shu bilan birga aholini eng zarur tovarlar bilan taʼminlashda uzilishlarga yoʻl qoʻymaslik va savdo xodimlari tomonidan suiisteʼmol qilishlarning oldini olish maqsadida kundalik ehtiyoj tovarlarining savdoda erkin narxlar boʻyicha mavjud boʻlishi va sotilishi uchun shaxsiy javobgarlik viloyatlar, shaharlar va tumanlarning birinchi rahbarlari va Bosh vazirning oʻrinbosari M. Z. Usmonov zimmasiga yuklangan edi.

Vazirlar Mahkamasi qayd etadiki, mazkur qarorning bajarilishini taʼminlash, aholi taʼminotida qatʼiy tartib oʻrnatish, qishga zarur oziq-ovqat zaxiralari toʻplash oʻrniga viloyatlar, shaharlar va tumanlarning ayrim rahbarlari savdo korxonalarining rahbarlari bilan birgalikda tovarlarni belgilab qoʻyilgan shakllarda sotishga qaytishga qaratilgan qarorlar qabul qilmoqdalar va bu bilan joylarda aholiga xizmat koʻrsatishning bozor shakllariga oʻtishni tushunmasliklarini, baʼzan esa xohlamasliklarini yana bir bor koʻrsatmoqdalar.

Vazirlar Mahkamasi qaror qiladi:

1. Viloyatlar, shaharlar va tumanlar hokimlari manfaatdor tashkilotlar ishtirokida joylarda zarur tekshirishlar oʻtkazsinlar hamda Vazirlar Mahkamasining “Respublikada savdoni erkinlashtirish chora-tadbirlari toʻgʻrisida” 1994-yil 14-dekabrdagi 604-son qarori soʻzsiz bajarilishini taʼminlasinlar.

2. Viloyatlar, shaharlar va tumanlar hokimlari koʻrsatib oʻtilgan qarorning tovarlar narxlari toʻliq erkinlashtirilishini taʼminlash yuzasidan soʻzsiz bajarilishi uchun shaxsan javobgar ekanliklari haqida ogohlantirilsinlar, aybdorlar esa javobgarlikka tortilib, egallab turgan lavozimlaridan boʻshatilishi nazarda tutilsin.

3. Bosh vazir A. M. Mutalov, Bosh vazirning oʻrinbosari M. Z. Usmonov savdoda bozor normalariga rioya qilish va aholiga xizmat koʻrsatish boʻyicha zarur choralarni koʻrsinlar hamda qabul qilingan qonunlar va normativ hujjatlarning bajarilishi uchun javobgarlikni oshirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vaziri A. M. Mutalov zimmasiga yuklansin.