LexUZ sharhi
Mazkur qaror O‘zbekiston Respublikasi Vazirlar Mahkamasining 2018-yil 3-maydagi 321-sonli “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek, ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “Ichki ishlar organlarining faoliyati samaradorligini tubdan oshirish, jamoat tartibini, fuqarolar huquqlari, erkinliklari va qonuniy manfaatlarini ishonchli himoya qilishni ta’minlashda ularning mas’uliyatini kuchaytirish chora-tadbirlari to‘g‘risida” 2017-yil 10-apreldagi PF-5005-son Farmoni)”gi qaroriga asosan o‘z kuchini yo‘qotgan.
Aholining, xalq xo‘jaligi obyektlarining ishonchli yong‘in xavfsizligini, “O‘zDEUavto” qo‘shma korxonasining temir yo‘l transportida tashiladigan mahsulotlari va boshqa qimmatli yuklarning saqlanishini ta’minlash maqsadida Vazirlar Mahkamasi qaror qiladi:
1. O‘zbekiston Respublikasi Ichki ishlar vazirligiga “O‘zDEUavto” qo‘shma korxonasining mahsulotlari va boshqa qimmatli yuklar ortilgan sostavlarni kuzatib borish bo‘yicha Asaka stansiyasida ichki ishlar liniya bo‘limini va O‘zbekiston Respublikasi Ichki ishlar vazirligining Transport ichki ishlar boshqarmasi maxsus militsiya batalonini tashkil etish uchun ilovaga muvofiq 226 nafardan iborat qo‘shimcha xodimlar ajratilsin.
2. Qoraqalpog‘iston Respublikasining Taxiatosh, Qo‘ng‘irot, Andijon viloyatining Asaka va Xorazm viloyatining Xiva shaharlarida harbiylashtirilgan yong‘in muhofazasi bo‘limlari tashkil etilsin. 1997-yil 1-yanvardan boshlab ko‘rsatib o‘tilgan shaharlarda, tegishli ravishda 182 nafar xodimdan iborat professional yong‘in muhofazasi bo‘linmalari tugatilgan holda, O‘zbekiston Respublikasi Ichki ishlar vazirligiga ko‘rsatib o‘tilgan maqsadlar uchun 200 shtat birligi ajratilsin.
3. O‘zbekiston Respublikasi Moliya vazirligi, “O‘zulgurjibirjasavdo” uyushmasi, “O‘zdavneftmahsulot” davlat-aksionerlik birlashmasi mazkur qarordan kelib chiquvchi maqsadlar uchun qo‘shimcha xodimlar ajratilishi munosabati bilan O‘zbekiston Respublikasi Ichki ishlar vazirligini moliyaviy va moddiy-texnik jihatdan ta’minlasinlar.
4. O‘zbekiston Respublikasi Ichki ishlar vazirligi qo‘shimcha ajratilgan shtatlarni xodimlar bilan butlash yuzasidan zarur choralar ko‘rsin.
5. Mazkur qarorning bajarilishini nazorat qilish Bosh vazirning o‘rinbosari B.S. Hamidov zimmasiga yuklansin.
Respublika ichki ishlar organlarini mustahkamlash uchun qo‘shimcha ravishda ajratilgan xodimlar soni
HAMMASI | — 226 nafar |
shu jumladan: | |
katta va o‘rta boshliqlar tarkibi | — 35 |
kichik boshliqlar va oddiy xodimlar tarkibi | — 189 |
ishchi va xizmatchilar | — 2 |
ulardan: | |
Asaka stansiyasida ichki ishlarning liniya bo‘limini tashkil etish uchun | — 13 |
“O‘zDEUavto” qo‘shma korxonasining mahsulotlari va boshqa qimmatli yuklar ortilgan sostavlarni kuzatib borish bo‘yicha O‘zbekiston Respublikasi Ichki ishlar vazirligi Transport ichki ishlar boshqarmasi maxsus militsiya batalonini tashkil etish uchun | — 213 |