LexUZ sharhi
Mazkur Bitim O‘zbekiston Respublikasi Prezidentining 2019-yil 29-iyuldagi PQ-4405-sonli “Xalqaro shartnomani tasdiqlash to‘g‘risida”gi qarori bilan tasdiqlangan.
O‘zbekiston Respublikasi Hukumati va Rossiya Federatsiyasi Hukumati, keyingi o‘rinlarda Tomonlar deb ataluvchilar,
O‘zbekiston Respublikasi bilan Rossiya Federatsiyasi o‘rtasida do‘stona munosabatlarni inobatga olib,
2002-yil 7-oktabrdagi Butunrossiya ko‘rgazma markazi negizida Mustaqil Davlatlar Hamdo‘stligi a’zo davlatlarining doimiy faoliyat yurituvchi ko‘rgazmalarini ochish to‘g‘risidagi Mustaqil Davlatlar Hamdo‘stligi Davlat rahbarlari kengashining qarori hamda ushbu maqsadlar uchun shartnomaviy-huquqiy asosni ishlab chiqish zaruriyatiga asoslanib,
o‘zaro manfaatli iqtisodiy hamkorlikni chuqurlashtirish, madaniy, ilmiy va ta’limga oid aloqalarni rivojlantirish maqsadida
Mazkur Bitimning maqsadi Moskva shahridagi Butunrossiya ko‘rgazma markazi hududidagi 66-pavilonda “O‘zbekiston Respublikasi ko‘rgazma madaniy markazi” ekspozitsion markazini tashkil etish hisoblanadi.
Mazkur Bitimning 1-moddasida nazarda tutilgan maqsadga asosan Rossiya tomoni O‘zbekiston tomoniga Moskva shahri “Mir” shoh ko‘chasi, 119-uy, 66-binoda joylashgan, umumiy maydoni 1478,5 kv. metrdan iborat bo‘lgan, federal ahamiyatga ega madaniy meros obyekti hisoblanadigan “Sovetskaya kultura” 66-sonli pavilonini (keyingi o‘rinlarda ― obyekt) ijara haqi yiliga 1 rossiya rubli miqdorida va obyekt egallab turgan hamda u bilan tarixan va vazifaviy bog‘liq, kadastr raqami 77:02:0018011:354 bo‘lgan yer uchastkasini (keyingi o‘rinlarda ― yer uchastkasi) 49 yil muddatga ijara haqi yiliga 1 rossiya rubli miqdorida ijaraga berilishini ta’minlaydi.
Rossiya tomoni obyekt joylashgan yer uchastkasi chegaralarini shakllantirish va uni O‘zbekiston tomoniga yer uchastkasi uchun ijara shartnomasini tuzish huquqini haq olmasdan taqdim etish uchun zarur protseduralarni amalga oshirishni ta’minlaydi.
Mazkur Bitimni amalga oshirish uchun quyidagilar Tomonlarning vakolatli tashkilotlari hisoblanadilar:
Har bir Tomon o‘zining vakolatli tashkiloti o‘zgargani to‘g‘risida boshqa Tomonni diplomatik kanallar orqali xabardor qiladi.
Mazkur Bitim kuchga kirgan kundan boshlab uch oy muddatda Tomonlarning vakolatli tashkilotlari mazkur Bitimning 2-moddasida nazarda tutilgan shartlar asosida obyekt va yer uchastkasi uchun Rossiya Federatsiyasining qonunchiligiga muvofiq ijara shartnomalarini tuzadilar.
Mazkur Bitimning 11-moddasi qoidalariga muvofiq Bitimning amal qilish muddati uzaytirilgan taqdirda, Tomonlar kelgusi 49 yil muddatga xuddi shu shartlarda yangi ijara shartnomalarini tuzadilar.
Rossiya tomoni “ROSIZO” FDMBM DMKM (“ROSIZO” FGBUK GMBS)ning obyektga nisbatan huquqlari tugatilishini, shuningdek, ijara shartnomalarini tuzish sanasiga qadar obyekt va shakllantirilgan yer uchastkasi qarzlardan, boshqa uchinchi shaxslarning huquqlaridan holi, garovga qo‘yilmagan va ulardan mazkur Bitimda nazarda tutilgan maqsadlarda foydalanishga to‘sqinlik qilishi mumkin bo‘lgan biror boshqacha tarzda qiyinchilik tug‘dirmaydigan holda bo‘lishini kafolatlaydi.
Obyekt va yer uchastkasi faqat mazkur Bitimning 1-moddasida nazarda tutilgan maqsad uchun, ko‘rgazma-savdo faoliyatini amalga oshirish, ommaviy madaniy va konsert tadbirlarini tashkillashtirish, milliy oshxona restorani (kafe) ochish yo‘li bilan foydalaniladi.
Tomonlarning huquqlari va majburiyatlari, shu jumladan, obyektning ichki va tashqi qismlarini ta’mirlash protseduralari va muddatlari, uni asrash va madaniy meros obyektlarining asl holatini saqlash Toshkent shahar hokimiyati va Moskva shahri Hukumati o‘rtasida tuziladigan ijara shartnomalari doirasida amalga oshiriladi.
Obyektni asrash, saqlash, undan foydalanish, davlat tomonidan muhofaza qilish va obyektning holati, uni saqlash, asrash, undan foydalanish, uni ommalashtirish va madaniy meros obyektlarining davlat muhofazasi ustidan davlat nazorati sohasidagi yerdan foydalanish va shaharsozlik faoliyati bilan bog‘liq bo‘lgan munosabatlar Rossiya Federatsiyasining yer qonunchiligi, Rossiya Federatsiyasining shaharsozlik va arxitektura faoliyati to‘g‘risidagi qonunchiligi, Rossiya Federatsiyasining atrof muhitni muhofaza qilish to‘g‘risidagi qonunchiligi, shuningdek, Rossiya Federatsiyasi xalqlarining madaniy meros obyektlarini (tarixiy va madaniy yodgorliklarni) saqlash, ulardan foydalanish va ularni muhofaza qilish sohasidagi Rossiya Federatsiyasi qonunchiligi bilan tartibga solinadi.
Rossiya tomoni obyektning O‘zbekiston tomoniga topshirilguniga qadar uning ichki qismini ta’mirlash va ta’mirlash-tiklash ishlarini ta’minlaydi.
O‘zbek tomoni obyektning tashqi qismini (obyektning tashqi fasadi) joriy ta’mirlashni amalga oshiradi.
Mazkur Bitimni amalga oshirishda Tomonlar o‘rtasida kelib chiqadigan nizoli masalalar Tomonlar o‘rtasida maslahatlashuvlar va muzokaralar o‘tkazish yo‘li bilan hal etiladi.
Tomonlarning kelishuviga asosan mazkur Bitimga alohida bayonnomalar bilan rasmiylashtiriladigan o‘zgartirishlar kiritilishi mumkin.
Mazkur Bitim imzolangan kundan 30 kun o‘tgach vaqtinchalik qo‘llanila boshlaydi va Tomonlar uning kuchga kirishi uchun zarur bo‘lgan davlat ichki protseduralarini bajarganliklari to‘g‘risida so‘nggi yozma xabarnoma diplomatik kanallar orqali olingan sanadan kuchga kiradi.
Mazkur Bitim 49 yil muddatga tuziladi, basharti Tomonlardan biri mazkur Bitimni tugatish niyati to‘g‘risida boshqa Tomonni keyingi muddat tugashidan bir yil oldin yozma shaklda xabardor qilmasa, u o‘z-o‘zidan keyingi xuddi shunday muddatlarga uzayaveradi.
Obyekt va yer uchastkalari uchun ijara shartnomalari muddatidan avval tugatilganda yoki bekor qilingan taqdirda mazkur Bitimning amal qilishi tugatiladi.