Yopiq harbiy shaharchalarda va uzoqdagi garnizonlarda yashovchi harbiy xizmatchilar va ularning oila aʼzolari taʼminotini yaxshilash maqsadida Vazirlar Mahkamasi qaror qiladi:

1. “Oʻzistiqbolstat” davlat qoʻmitasi, “Oʻzdonmahsulot”, “Oʻzbaliq” davlat korporatsiyalari, “Oʻzbeksavdo”, “Oʻzgoʻshtsutsanoat”, “Yogʻmoytamakisanoat”, “Oziqovqatsanoat” uyushmalari harbiy xizmatchilarga va ularning oila aʼzolariga harbiy doʻkonlar tarmoqlari orqali sotish uchun moʻljallangan tegishli turdagi mahsulotlarni prognoz parametrlarida nazarda tutsinlar hamda ularning toʻliq hajmda birinchi navbatda yetkazib berilishini taʼminlasinlar.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, “Oʻzbeksavdo” davlat uyushmasi, Oʻzbekbirlashuv va “Oʻzmaishiyxizmatuyushma” harbiy xizmatchilar va ularning oila aʼzolari hayot faoliyati uchun zarur sharoitlarni yaratishda harbiy savdo korxonalari va tashkilotlariga amaliy yordam koʻrsatish tavsiya etilsin, eng zarur sanoat va oziq-ovqat tovarlari turlari bilan toʻliq hajmda taʼminlasinlar, maishiy xizmat koʻrsatish va harbiy savdo korxonalariga ega boʻlmagan uzoqdagi va kam sonli garnizonlarda ularga maishiy xizmatlar koʻrsatishga koʻmaklashsinlar.

2. Markaziy bankka hamda Mudofaa vazirligi, Milliy xavfsizlik xizmati va Ichki ishlar vazirligi korxonalari va tashkilotlariga xizmat koʻrsatuvchi tijorat banklariga xalq isteʼmol tovarlari sotib olish uchun joylarda oʻz boʻlimlari orqali ularga Oʻzbekiston Respublikasi Markaziy banki qayta mablagʻ bilan taʼminlash stavkasi doirasida kredit berilishini taʼminlash tavsiya etilsin.

3. Oʻzbekiston Respublikasi Moliya vazirligi Oʻzbekiston Respublikasi Mudofaa vazirligi Savdo bosh boshqarmasiga 1996-yilning toʻrtinchi choragida 25 mln. soʻm miqdorida aylanma mablagʻlar ajratsin.

4. “Oʻzistiqbolstat” davlat qoʻmitasi 1997-yilgi adresli dasturni shakllantirishda 1-ilovaga* muvofiq harbiy doʻkonlar, zobitlar oshxonalari va askarlar choyxonalari qurilishiga kapital mablagʻlar limitini nazarda tutsin.

5. Joylardagi harbiy savdo organlariga ular tomonidan nooziq-ovqat tovarlarini Oʻzbekiston Respublikasi Mudofaa vazirligi, Milliy xavfsizlik xizmati va Ichki ishlar vazirligi qismlari, muassasalari, korxonalari va tashkilotlaridagi harbiy doʻkonlar tarmogʻi orqali naqd pulsiz hisob-kitob boʻyicha sotishga ruxsat berilsin.

6. Andijon, Samarqand, Toshkent viloyatlari hokimliklari bir oy muddatda 2-ilovaga* muvofiq harbiy savdo obyektlarini balansdan Oʻzbekiston Respublikasi Mudofaa vazirligi balansiga tekin bersinlar.

Berilayotgan inshootlar joylashgan yer uchastkalaridan foydalanish huquqiga oid tegishli davlat dalolatnomalari belgilangan tartibda rasmiylashtirilsin va Oʻzbekiston Respublikasi Mudofaa vazirligiga berilsin.

7. Mazkur qarorning bajarilishini nazorat qilish Bosh vazirning oʻrinbosari M.Z. Usmonov zimmasiga yuklansin.