Oʻzbekiston Respublikasining “Oʻzbekiston Respublikasining davlat mustaqilligi asoslari toʻgʻrisida” va “Aloqa toʻgʻrisida” qonunlariga muvofiq Vazirlar Mahkamasi qaror qiladi:

Oʻzbekiston Respublikasi hududida radioelektron vositalar va yuqori chastotali qurilmalarni sotib olish (berish), loyihalash, qurish (oʻrnatish), ulardan foydalanish hamda chet eldan keltirish tartibi toʻgʻrisidagi ilova qilinayotgan Nizom tasdiqlansin.

1. Mazkur Nizom Oʻzbekiston Respublikasi hududida radioelektron vositalar va yuqori chastotali qurilmalarni sotib olish (berish), loyihalash, qurish (oʻrnatish), ulardan foydalanish hamda chet eldan keltirish tartibini belgilaydi.

Mazkur Nizomning amal qilishi:

Oʻzbekiston Respublikasi vazirliklari, davlat qoʻmitalari, idoralari, uyushmalari, konsernlari, qoʻshma korxonalari, tashkilotlari va muassasalari;

xorijiy firmalar, banklar va tashkilotlarning vakolatxonalari va delegatsiyalari;

Oʻzbekiston Respublikasi fuqarolari, xorijiy yuridik shaxslar va fuqarolar, fuqaroligi boʻlmagan shaxslar tomonidan Oʻzbekiston Respublikasi hududida sotib olinadigan (beriladigan), loyihalashtiriladigan, quriladigan (oʻrnatiladigan), foydalaniladigan hamda chet eldan keltiriladigan radioelektron vositalarga va yuqori chastotali qurilmalarga joriy qilinadi.

Mazkur Nizomning amal qilishi, shuningdek, xorijiy davlatlarning Oʻzbekiston Respublikasi hududidagi diplomatik va konsullik vakolatxonalariga oʻrnatiladigan radio uzatgichlarga ham joriy qilinadi.

2. Mazkur Nizomning amal qilishi quyidagilarga joriy etilmaydi:

a) televideniye va radioeshittirish dasturlarini qabul qilishga moʻljallangan qurilmalarga, Oʻzbekiston Respublikasi fuqarolari, xorijiy yuridik shaxslar va fuqarolar hamda fuqaroligi boʻlmagan shaxslar tomonidan sotib olinadigan (beriladigan) va foydalaniladigan maishiy elektronika buyumlariga, agar bunday qurilmalar va buyumlarni Oʻzbekiston Respublikasida savdo tarmogʻi orqali sotishga ruxsat etilgan boʻlsa;

b) Oʻzbekiston Respublikasi Mudofaa vazirligi, Oʻzbekiston Respublikasi Ichki ishlar vazirligi, “Oʻzbekiston havo yoʻllari” milliy aviakompaniyasi va Oʻzbekiston Respublikasi Milliy xavfsizlik xizmati tomonidan foydalaniladigan yoki ular uchun moʻljallangan radioelektron vositalarga.

3. Har qanday turdagi va maqsaddagi koʻchmas radioelektron vositalarni loyihalashtirish va qurish (oʻrnatish) faqat Oʻzbekiston Respublikasi Aloqa vazirligining yoki vazirlik tomonidan vakil qilingan organ tomonidan (davomi Oʻzbekiston Respublikasi Aloqa vazirligining matni boʻyicha) ruxsat berilgan hollarda amalga oshirilishi mumkin.

Bu vositalarni qurish uchun yer maydoni tanlash quriladigan vositalarning foydalanilayotgan yoki avval ushbu rayonda qurish loyihalashtirilgan radioelektron vositalar va elektr aloqasi vositalariga elektromagnit mosligi taʼminlanishi hisobga olinib, shuningdek, radiouzatuvchi va radioelektron vositalar joylashtiriladigan zonalar hisobga olingan holda Oʻzbekiston Respublikasi Aloqa vazirligining roziligi bilan amalga oshiriladi.

Radioelektron vositalarning elektromagnit mosligi ekspertizasi loyiha tashkilotlari tomonidan bu vositalarni qurish uchun maydondan foydalanish imkoniyatlarini tanlash va Oʻzbekiston Respublikasi Aloqa vazirligi bilan kelishish jarayonida bajariladi.

4. Har qanday turdagi va maqsaddagi radioelektron vositalar va yuqori chastotali qurilmalarni respublikada ishlab chiqish, modernizatsiyalash (radionurlanishlarning texnik tavsiflari oʻzgartirilgan holda), seriyali ishlab chiqarish, chet eldan sotib olish, shuningdek, radio chastotalardan foydalangan holda ilmiy-tadqiqot va tajriba-konstruktorlik ishlari oʻtkazish Oʻzbekiston Respublikasi Aloqa vazirligi tomonidan tegishli radio chastotalar ajratilgandan hamda texnikaviy topshiriqlar va texnikaviy shartlar kelishib olingandan keyin amalga oshiriladi.

5. Oʻzbekiston Respublikasi fuqarolariga, xorijiy yuridik shaxslar va fuqarolarga, shuningdek, fuqaroligi boʻlmagan shaxslarga havaskorlik radio aloqasi va sport modellarini radio orqali boshqarish uchun radioelektron vositalarni sotish ixtisoslashtirilgan magazinlar orqali Oʻzbekiston Respublikasi Aloqa vazirligining tegishli ruxsatnomasi bilan amalga oshiriladi. Ruxsatnomaga savdo tashkilotlari sotilgan mahsulotning turi va zavod raqami toʻgʻrisida belgi qoʻyishlari kerak.

6. Radioelektron vositalar va yuqori chastotali qurilmalarni sotib olish, shuningdek, ularning bir vazirliklar, idoralar, korxonalar, muassasalar, tashkilotlar, Oʻzbekiston Respublikasi fuqarolari, xorijiy yuridik shaxslar va fuqaroligi boʻlmagan shaxslar tomonidan boshqa vazirliklar, idoralar, korxonalar, muassasalar, tashkilotlarga (shu jumladan, bir vazirlik yoki idora ichida), Oʻzbekiston Respublikasi fuqarolariga, xorijiy yuridik shaxslar va fuqarolarga hamda fuqaroligi boʻlmagan shaxslarga doimiy yoki vaqtincha foydalanish uchun berish Oʻzbekiston Respublikasi Aloqa vazirligining ruxsati bilan amalga oshiriladi.

7. Radioelektron vositalarni magistral va xalqaro aloqa liniyalari uchun sotib olish, qurish va ulardan foydalanishga Oʻzbekiston Respublikasi Aloqa vazirligi tomonidan belgilangan tartibda beriladigan litsenziyalar olingandan keyin ruxsat etiladi.

8. Respublika hududida foydalanish uchun moʻljallangan har qanday turdagi va maqsaddagi (shu jumladan, komplektlovchi buyumlar sifatida har xil asbob-uskunalar va transport vositalari tarkibiga kiruvchi) radioelektron vositalar va yuqori chastotali qurilmalarni chet eldan Oʻzbekiston Respublikasi hududiga keltirish Oʻzbekiston Respublikasi Aloqa vazirligining ruxsati bilan amalga oshiriladi.

9. Oʻzbekiston Respublikasi Tashqi ishlar vazirligining ruxsatnomasi boʻyicha xorijiy firmalarning vakolatxonalari va delegatsiyalari, banklar va tashkilotlar tomonidan radioelektron vositalar va yuqori chastotali qurilmalarni Oʻzbekiston Respublikasi hududiga keltirish vakolatxona ochishga, koʻrgazmalar, yarmarkalar va boshqa tadbirlarni oʻtkazishga ruxsat bergan vazirliklar va idoralarning iltimosnomalariga koʻra belgilangan tartibda bu vositalar va qurilmalarni chet elga qaytarib olib ketish majburiyati bilan poshlinasiz amalga oshiriladi.

Xorijiy yuridik shaxslar va fuqarolar, fuqaroligi boʻlmagan shaxslar tomonidan havaskorlik radio aloqasi va sport modellarini radio orqali boshqarish boʻyicha rasmiy musobaqalarda foydalanish uchun moʻljallangan radioelektron vositalarni Oʻzbekiston Respublikasi hududiga keltirish belgilangan tartibda Oʻzbekiston Respublikasi “Vatanparvar” mudofaaga koʻmaklashish Tashkiloti Markaziy kengashining iltimosnomasi boʻyicha, qaytarib olib ketish majburiyati bilan poshlinasiz amalga oshiriladi.

Oʻzbekiston Respublikasi Aloqa vazirligining ruxsatnomasi vazirliklar, idoralar va “Vatanparvar” mudofaaga koʻmaklashish Tashkilotining qayd qilingan iltimosnomalari uchun asos boʻladi.

10. Rasmiy sport musobaqalarida, shuningdek, koʻrgazmalar va yarmarkalarda foydalanish uchun vaqtincha chet elga olib ketilgan radioelektron vositalar va yuqori chastotali qurilmalarni Oʻzbekiston Respublikasi hududiga keltirish bu vositalar va qurilmalarni qaytarib olib kelish toʻgʻrisida bojxona muassasasiga berilgan majburiyatlar asosida bajariladi.

11. Respublika fuqarolari, xorijiy yuridik shaxslar va fuqarolar, fuqaroligi boʻlmagan shaxslar tomonidan radioelektron vositalar va yuqori chastotali qurilmalarni Oʻzbekiston Respublikasi hududiga keltirish taʼminlanadi, mazkur Nizomning 2-bandi “a” kichik bandida, 9 va 10-bandlarida koʻrsatilgan vositalar va qurilmalar bundan mustasnodir.

12. Oʻzbekiston Respublikasi hududida radioelektron vositalar va yuqori chastotali qurilmalardan foydalanish Oʻzbekiston Respublikasi Aloqa vazirligining ruxsatnomasi boʻyicha bevosita, xorijiy firmalar vakolatxonalari, banklar, tashkilotlar, xorijiy fuqarolar va fuqaroligi boʻlmagan shaxslar tomonidan esa — ularni Oʻzbekiston Respublikasida sotib olishga ruxsat bergan vazirliklar va idoralarning tegishli xizmatlari orqali amalga oshiriladi.

13. Xorijiy davlatlarning Oʻzbekiston Respublikasi hududidagi diplomatik va konsullik vakolatxonalariga oʻrnatiladigan radio uzatkichlardan Oʻzbekiston Respublikasi Aloqa vazirligining ruxsati boʻyicha Oʻzbekiston Respublikasi Tashqi ishlar vazirligi orqali foydalaniladi.

14. Vazirliklar, idoralar, korxonalar, muassasalar va tashkilotlar tomonidan tegishli ruxsatnomalarsiz tayyorlangan va sotib olingan radioelektron vositalar va yuqori chastotali qurilmalar Oʻzbekiston Respublikasi Aloqa vazirligining yozma koʻrsatmasi bilan, bu vositalar va qurilmalarning egalari tomonidan sotilishi yoki agar ulardan foydalanish uchun ruxsat berilishi mumkin boʻlmasa, qiymati toʻlanmasdan vazirlik tomonidan musodara qilinadi.

Musodara qilingan radioelektron vositalar va yuqori chastotali qurilmalarni foydali suratda ishlatish tartibi Oʻzbekiston Respublikasi Aloqa vazirligi tomonidan belgilanadi.

15. Radioelektron vositalar va yuqori chastotali qurilmalar ishini davlat nazoratidan oʻtkazish Oʻzbekiston Respublikasi Aloqa vazirligi tomonidan belgilangan tartibda amalga oshiriladi. Oʻzbekiston Respublikasi Aloqa vazirligi boʻlinmalarining vakil qilingan xodimlari vazirliklar va idoralar, korxonalar, muassasalar va tashkilotlar ishlatayotgan radioelektron vositalar va yuqori chastotali qurilmalar oʻrnatilgan joylarga bemalol kirish huquqiga ega boʻladilar hamda Oʻzbekiston Respublikasi qonunchiligiga muvofiq huquqlardan foydalanadilar.

16. Vazirliklar, idoralar, korxonalar, tashkilotlar va muassasalarning rahbarlari Oʻzbekiston Respublikasi Aloqa vazirligining mansabdor shaxslariga ularning mazkur Nizom bilan belgilangan vazifalarni muvaffaqiyatli bajarishlari uchun zarur boʻlgan har tomonlama yordamni koʻrsatishga majburdirlar.

17. Vazirliklar va idoralar oʻzlariga qarashli korxonalar, muassasalar va tashkilotlarning mazkur Nizomning talablarini amaldagi qonunchilikka muvofiq bajarishlari uchun javob beradilar.

18. Davlat avtomobil inspeksiyasi avtomobil transporti vositalarini vaqti-vaqti bilan texnik koʻrikdan oʻtkazish paytida Oʻzbekiston Respublikasi Davlat avtomobil inspeksiyasi nazorati ostidagi avtomobillar va boshqa transport vositalarida radioelektron vositalarni oʻrnatishga Oʻzbekiston Respublikasi Aloqa vazirligi tomonidan berilgan ruxsatnomaning bor-yoʻqligini nazorat qilishni amalga oshiradi.

19. Oʻzbekiston Respublikasi Ichki ishlar vazirligi organlari radioelektron vositalar va yuqori chastotali qurilmalardan qonunga zid ravishda foydalanish hollariga barham berishda hamda Oʻzbekiston Respublikasi korxonalari, muassasalari, tashkilotlari, fuqarolari tomonidan tegishli ruxsatnomasiz tayyorlangan, sotib olingan yoki foydalanilayotgan ana shunday vositalar va qurilmalarni musodara qilishda Oʻzbekiston Respublikasi Aloqa vazirligining mansabdor shaxslariga belgilangan tartibda zarur yordam koʻrsatadilar.