LexUZ sharhi
Mazkur qaror O‘zbekiston Respublikasi Vazirlar Mahkamasining 2022-yil 21-iyuldagi 396-sonli “Qonunchilik bazasini yanada tizimlashtirish chora-tadbirlari to‘g‘risida”gi qaroriga asosan o‘z kuchini yo‘qotgan.
Naqd pulni g‘ayriqonuniy tarzda to‘lashga hamda pulning qadrsizlanishi kuchayishiga olib boradigan pul mablag‘larini mijozlarning hisobiga soxta bank hujjatlari bo‘yicha o‘tkazishning oldini olish maqsadida Vazirlar Mahkamasi qaror qiladi:
1. Respublika xo‘jalik yurituvchi subyektlarining bank hisobiga O‘zbekiston tashqarisidan o‘tkazilayotgan soxta bank hujjatlari bo‘yicha pul mablag‘larini o‘tkazishga yo‘l qo‘yganlik mas’uliyati O‘zbekiston Respublikasi Markaziy banki zimmasiga yuklatilsin.
O‘zbekiston Respublikasi Markaziy bank tijorat banklarining korrespondentlik hisobiga mablag‘larni “so‘m” mintaqasiga kiruvchi davlatlarning markaziy (milliy) bank muassasalarining tamg‘ali muhri bilan tasdiqlangan hujjatlar bo‘yicha va ularni puxta tekshirgandan so‘ng o‘tkazsin.
Oldingi tahrirga qarang.
(2-band O‘zbekiston Respublikasi Vazirlar Mahkamasining 1994-yil 12-avgustdagi 411-sonli qarori bilan o‘z kuchini yo‘qotgan)
3. O‘zbekiston Respublikasi Markaziy banki naqd pullarni berishni Vazirlar Mahkamasining “Pul muomalasini barqarorlashtirishga doir kechiktirib bo‘lmaydigan chora-tadbirlar to‘g‘risida” 1992-yil 6-apreldagi 166-son qaroriga qat’iy muvofiq ravishda amalga oshirsin.
4. O‘zbekiston dehqonchilik sanoati banki va O‘zbekiston sanoat-qurilish banki shu yilning 1-sentabriga qadar ular bank tizimini qayta tashkil etish davrida sobiq SSSR davlat bankidan 1988-yilning 1-yanvarigacha bo‘lgan holatda qabul qilib olgan xizmat binolari va asbob-anjomlarni O‘zbekiston Respublikasi Markaziy bankiga topshirsin.
Respublika tijorat banklari kassa xizmati ko‘rsatish bo‘limlarini ochish uchun o‘zining binolaridan va ijaraga olgan binolaridan shartnoma asosida O‘zbekiston Respublikasi Markaziy bankiga joy bersin.
Oldingi tahrirga qarang.
(4-bandning uchinchi xatboshisi O‘zbekiston Respublikasi Vazirlar Mahkamasining 1994-yil 12-avgustdagi 411-sonli qarori bilan o‘z kuchini yo‘qotgan)
5. O‘zbekiston Respublikasi Markaziy bankining 1992-yil 1-oktabrga qadar Markaziy bank, tijorat banklari va ularning joylardagi bo‘limlari rahbar xodimlarini (ularning egallab turgan lavozimiga mos yoki mos emasligi to‘g‘risida qaror qabul qilish huquqi bilan) ishlab chiqilgan Nizomga muvofiq attestatsiyadan o‘tkazish to‘g‘risidagi taklifi qabul qilinsin.
6. O‘zbekiston Respublikasi Markaziy bankiga ikki hafta muddat ichida, mulkchilik shaklidan qat’i nazar, barcha muassasalar, korxonalar va tashkilotlarga xalq xo‘jaligida kassa a’mollarini yuritishning yangi tartibini yetkazish tavsiya qilinsin.
Muassasalar, korxonalar va tashkilotlarning rahbarlari kassa a’mollarini yuritishning belgilangan tartibi qat’iy bajarilishini ta’minlasinlar.
7. Respublika Adliya vazirligi Moliya vazirligi, Davlat soliq bosh boshqarmasi hamda O‘zbekiston Respublikasi Markaziy banki bilan birgalikda O‘zbekiston Respublikasi Markaziy banki tasdiqlagan kassa a’mollarini yuritish tartibini buzganlik uchun korxonalar, tashkilotlar va muassasalarning rahbarlari va bosh buxgalterlarining javobgarligi to‘g‘risidagi takliflarni tayyorlasin va O‘zbekiston Respublikasi Oliy Kengashiga taqdim etsin.
8. O‘zbekiston Respublikasi Markaziy banki, Moliya vazirligi, O‘zbekiston jamg‘armalar banki, O‘zbekiston sanoat-qurilish banki, O‘zbekiston dehqonchilik sanoati banki va O‘zbekiston Respublikasi Tashqi iqtisodiy faoliyat milliy banki zimmasiga mulkchilikning barcha shakllaridagi korxonalar, tashkilotlar va muassasalardan pul o‘tkazish yo‘li bilan fuqarolarning shaxsiy hisobiga kelib tushayotgan mablag‘larni hisobga olish hamda naqd pul berish tartibini uch hafta muddat ichida ishlab chiqsinlar va tasdiqlasinlar.
Oldingi tahrirga qarang.
(9-band O‘zbekiston Respublikasi Vazirlar Mahkamasining 2000-yil 24-martdagi 104-sonli qarori bilan o‘z kuchini yo‘qotgan)
10. O‘zbekiston Respublikasi Markaziy banki, O‘zbekiston sanoat-qurilish banki “O‘zbekiston havo yo‘llari” milliy aviakompaniyasi va O‘rta Osiyo temir yo‘llar boshqarmasi, boshqa manfaatdor vazirliklar va idoralar bilan birgalikda xizmat safariga yuboriladigan shaxslar uchun muassasalar, korxonalar va tashkilotlarga fuqaro aviatsiyasi, temir yo‘l transporti chiptalarini naqd pulsiz hisob-kitob qilish yo‘li bilan sotishga o‘tish tartibi va muddatlari to‘g‘risidagi kelishib olingan takliflarni ikki oy muddat ichida Vazirlar Mahkamasiga takdim etsin.
11. O‘zbekiston Respublikasi Markaziy banki tijorat banklarining bank faoliyati bilan, shu jumladan, tashqi iqtisodiy faoliyat bilan shug‘ullanishlari uchun ana shunday banklarni tegishli mintaqa hududida barpo etishga jiddiy iqtisodiy zarurat bo‘lgan taqdirdagina va O‘zbekiston Respublikasining “Banklar va bank faoliyati to‘g‘risida”gi Qonuni talablariga qat’iy rioya etilganidagina litsenziyalar berilsin.
12. Kredit zaxiralari va naqd pulning ko‘plab yetishmayotganini hisobga olib, O‘zbekiston Respublikasi Markaziy bankining savdo-vositachilik va savdo-xarid a’mollarini amalga oshirish (davlat ehtiyojlarini hamda hukumat qarorlariga muvofiq ravishda aholini ijtimoiy himoyalashni ta’minlash bundan mustasnodir) uchun qarz berishni 1993-yilning 1-iyuliga qadar vaqtincha to‘xtatish to‘g‘risidagi taklifi qabul qilinsin.