LexUZ sharhi
Mazkur qaror O‘zbekistan Respublikasi Vazirlar Mahkamasining 2023-yil 26-iyuldagi 313-sonli “Alkogol va tamaki mahsulotlariga yangi namunadagi aksiz markalarini joriy etish to‘g‘risida”gi qaroriga asosan o‘z kuchini yo‘qotgan.
O‘zbekiston Respublikasi Prezidentining “Alkogolli mahsulotlarni ishlab chiqarish va sotish samaradorligini oshirishga doir qo‘shimcha chora-tadbirlar to‘g‘risida” 2006-yil 7-noyabrdagi PQ-505-son qaroriga muvofiq hamda alkogol va tamaki mahsulotlari noqonuniy ishlab chiqarilishi va sotilishiga yo‘l qo‘ymaslik yuzasidan nazoratni yanada kuchaytirish maqsadida Vazirlar Mahkamasi qaror qiladi:
1. 2020-yil 1-maydan boshlab alkogol va tamaki mahsulotlariga yangi namunadagi aksiz markalari joriy etilsin.
O‘zbekiston Respublikasida ishlab chiqariladigan va uning hududiga olib kiriladigan alkogol va tamaki mahsulotlariga aksiz markalari namunalari va tavsiflari 1 va 1a-ilovalarga muvofiq tasdiqlansin.
2. Belgilansinki, eski namunadagi aksiz markalari bilan markalangan ulgurji va chakana savdo tarmog‘idagi alkogol va tamaki mahsulotlari yangi namunadagi aksiz markalari joriy etilgan kundan boshlab to‘qqiz oy o‘tgach markalanmagan deb hisoblanadi va belgilangan tartibda olib qo‘yiladi.
Import qiluvchida eski namunadagi aksiz markalari bilan markalangan alkogol mahsulotlari mavjud bo‘lganda, eski namunadagi aksiz markalari bilan markalangan tovarlarni sotishning ruxsat etilgan muddati tugashiga qadar besh oy qolgan kunda tayyor mahsulot qoldiqlariga yangi namunadagi aksiz markalari yangidan markalanib, tovarlardan eski namunadagi aksiz markalari olib tashlanishi kerak.
Tovarlardan olib tashlangan aksiz markalari eski namunadagi aksiz markalari bilan markalangan tovarlarni sotishning ruxsat etilgan muddati tugashiga qadar besh oy qolgan kunda inventarizatsiyani o‘tkazish komissiyasi (soliq va moliya organlarining vakillari, ishlab chiqaruvchi korxonalarning xodimlaridan tashkil topadi) tomonidan kuydirish yo‘li bilan yo‘q qilinishi kerak, bu haqda tegishli dalolatnoma tuziladi.
(2-band O‘zbekiston Respublikasi Prezidentining 2020-yil 23-iyuldagi PF-6033-sonli Farmoniga asosan ikkinchi va uchinchi xatboshilar bilan to‘ldirilgan — Qonun hujjatlari ma’lumotlari milliy bazasi, 24.07.2020-y., 06/20/6033/1094-son)
3. O‘zbekiston Respublikasi Davlat soliq qo‘mitasi va Davlat bojxona qo‘mitasi 2021-yil 1-fevraldan boshlab eski namunadagi aksiz markalari bilan markalangan alkogol va tamaki mahsulotlarini aniqlash, ularning olib kirilishi, ishlab chiqarilishi hamda ulgurji va chakana savdo tarmog‘ida sotilishining oldini olish, shuningdek, ushbu mahsulotlarni belgilangan tartibda olib qo‘yish choralarini ko‘rsin.
4. O‘zbekiston Respublikasi Davlat bojxona qo‘mitasi 2020-yil 1-mayga qadar yangi namunadagi aksiz markalari joriy etilishi to‘g‘risidagi axborotni alkogol va tamaki mahsulotlarini import qiluvchilar e’tiboriga yetkazsin.
5. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari 2020-yil 1-mayga qadar:
yangi namunadagi aksiz markalari joriy etilishi to‘g‘risidagi axborotni alkogol va tamaki mahsulotlari ishlab chiqaruvchilar va savdo tashkilotlari e’tiboriga yetkazsin;
O‘zbekiston Respublikasi Davlat soliq qo‘mitasi va Davlat bojxona qo‘mitasi bilan birgalikda yangi namunadagi aksiz markalari joriy etilishi to‘g‘risida ommaviy axborot vositalari orqali tushuntirish ishlarini olib borsin.
6. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — O‘zbekiston Respublikasi iqtisodiy taraqqiyot va kambag‘allikni qisqartirish vaziri D.A. Kuchkarov zimmasiga yuklansin.
O‘zbekiston Respublikasining alkogol mahsulotlari uchun aksiz markalari 160x18 mm o‘lchovda bo‘lib, gorizontal holatda joylashgan.
Aksiz markasining chap tomonida metallograf bosma usulida binafsha rangida bosilgan naqshinkor bezak mavjud.
Naqshinkor bezakning o‘ng tomonida “O’ZBEKISTON AKSIZ MARKASI” so‘zi vertikal ko‘rinishda chop etilgan.
“O’ZBEKISTON AKSIZ MARKASI” so‘zining o‘ng tomonida kumush rangli tasvir ifodalangan. Kumush rangli tasvir ustida “2020” abbreviaturasi bo‘yoqsiz metallograf bosma usulida tasvirlangan.
Aksiz markaning markazida QR-CODE joylashgan bo‘lib, u o‘z ichiga mahsulotni ishlab chiqargan tashkilot nomi, alkogol mahsuloti nomi, tashkilot kodi, alkogol mahsuloti hajmi, aksiz markaning seriya raqamlari va individual raqam ma’lumotlari kiritilgan.
QR-CODE ning o‘ng tarafidagi oq qismining perimetri bo‘ylab joylashgan mikromatn — ko‘p marta kattalashtirilganda ko‘rinadigan matn, takrorlanuvchi “UZBEKISTAN” degan so‘z ko‘rinishida mavjud.
Aksiz markaning markazidan o‘ng tarafida mahsulot nomi, seriya raqamlari va mahsulot hajmi ifodalangan.
Mahsulot nomining o‘ng tomonida ko‘rish burchagi rangini o‘zgarganda o‘z rangini o‘zgartiradigan, “ANTISTOKS” xususiyatiga ega bo‘lgan iridissent bo‘yog‘ida trafaret bosma usulida tasvir tushirilgan bo‘lib, tasvir ustida “DSN” va “UZB” abbreviaturalari mavjud.
Aksiz markaning o‘ng tomonida ishlab chiqaruvchining kod raqamlari “O’Z20…” yoki “IM20…” ifodalangan.
O‘zbekiston Respublikasining tamaki mahsuloti uchun aksiz markalari 44x19 mm o‘lchovda bo‘lib, gorizontal holatda joylashgan.
Tamaki mahsuloti uchun aksiz markasining tangir (fon) setkasi har xil qiyalikda joylashgan chiziqlar ko‘rinishida bajarilgan.
Aksiz markaning tangir (fon) setkasidagi chiziqlar barglar ko‘rinishida tasvirlangan bo‘lib, ushbu tasvir markazida “AKSIZ” so‘zlari ifoda etilgan.
Aksiz marka o‘ng tomonining oq qismida yorug‘likda ko‘rinadigan suv belgisining elementlari joylashgan.
Aksiz markaning chap tomonida romb ko‘rinishidagi mikromatn joylashgan bo‘lib, bu mikromatn kattalashtirilganda takrorlanuvchi “AKSIZ MARKA” degan so‘zlarni ko‘rish mumkin.
Mikromatnning o‘ng tomonida, ya’ni aksiz markaning markazida gilosh naqshi tasvirlangan bo‘lib, bu naqshning ustiga optik o‘zgaruvchan “DSN” abbreviaturasi elementi iridissent bo‘yog‘ida chop etilgan.
Gilosh naqshining yuqori qismida “TAMAKI MAHSULOTLARI”, pastki qismida esa “O’ZBEKISTON AKSIZ MARKASI” degan co‘zlar va aksiz marka ishlab chiqaruvchining kod raqami “O’Z 1901” tasvirlangan.
Gilosh naqshining o‘ng tomonida maxsus himoya bo‘yog‘i bilan chop etilgan ultrabinafsha va infraqizil nurlar ostida ko‘rinadigan romb shaklidagi element aks ettirilgan.
Aksiz markaning ikki tomonida yarim aylana ko‘rinishida takrorlanuvchi mikromatn joylashgan bo‘lib, ko‘p marotaba kattalashtirilganda “TAMAKI MAHSULOTLARI” degan so‘zlarni ko‘rish mumkin.
Aksiz markaning to‘rtburchagida 450 S burchak ostida tasvirlangan chiziqlarda mikromatn mavjud bo‘lib, uni ko‘p marotaba kattalashtirilganda takrorlanuvchi “AKSIZ MARKA” degan so‘zlar ifodalangan.