Oʻzbekiston Respublikasining 2018-yil 26-iyuldagi OʻRQ-488-son “Iqtisodiyotning jadal rivojlanishini taʼminlashga doir qoʻshimcha chora-tadbirlar qabul qilinishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni, Oʻzbekiston Respublikasi Prezidentining 2018-yil 26-dekabrdagi PQ-4086-son “Oʻzbekiston Respublikasining 2019-yilgi asosiy makroiqtisodiy koʻrsatkichlari prognozi va Davlat budjeti parametrlari hamda 2020-2021-yillarga budjet moʻljallari toʻgʻrisida”gi qaroriga muvofiq Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi hamda Moliya vazirligi qaror qiladi:

1. Oʻzbekiston aloqa va axborotlashtirish agentligi hamda Oʻzbekiston Respublikasi Moliya vazirligining 2012-yil 1-fevraldagi 2-yu, 7-son qarori (roʻyxat raqami 2329, 2012-yil 21-fevral) (Oʻzbekiston Respublikasi qonun hujjatlari toʻplami, 2012-y., 8-9-son, 89-modda) bilan tasdiqlangan Mobil aloqa xizmatlarini koʻrsatuvchi yuridik shaxslar (uyali aloqa kompaniyalari) tomonidan abonent raqamidan foydalanganlik uchun toʻlovlarni hisoblash va toʻlash tartibi toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 6-band quyidagi tahrirda bayon etilsin:

“6. Toʻlov har bir abonent raqami uchun amalga oshiriladi. Abonent raqamlarining soni toʻlov amalga oshiriladigan oydagi oʻrtacha abonentlar soniga (kunlik abonentlar sonining yigʻindisi/oy kunlari) asosan aniqlanadi.”.

2. 11, 11¹ va 12-bandlar quyidagi tahrirda bayon etilsin:

“11. Toʻlov summasi Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Axborot-kommunikatsiya texnologiyalarini rivojlantirish jamgʻarmasi, Muhammad al-Xorazmiy nomidagi Toshkent axborot texnologiyalari universiteti huzuridagi Ilmiy-innovatsion rivojlantirish jamgʻarmasi va Sogʻliqni saqlash vazirligi huzuridagi Tez tibbiy yordamni rivojlantirish jamgʻarmasi oʻrtasida Oʻzbekiston Respublikasi Prezidentining qarorlari bilan belgilangan normativlar boʻyicha taqsimlanadi.

11¹. Hisobot oyi uchun toʻlov summasi Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Axborot-kommunikatsiya texnologiyalarini rivojlantirish jamgʻarmasining shaxsiy gʻazna hisobvaragʻiga kelib tushadi hamda belgilangan tartibda taqsimlanadi.

12. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi Axborot-kommunikatsiya texnologiyalarini rivojlantirish jamgʻarmasiga toʻlovdan kelib tushgan mablagʻlardan qonun hujjatlarida belgilangan tartibda Oʻzbekiston Respublikasining rivojlanish davlat dasturlarini hamda axborotlashtirish va telekommunikatsiya tarmoqlarini rivojlantirish dasturlarini moliyalashtirish uchun qatʼiy foydalaniladi.”.

3. 12¹-banddagi “qoshidagi” degan soʻz “huzuridagi” degan soʻz bilan almashtirilsin.

4. Quyidagi mazmundagi 12²-band bilan toʻldirilsin:

“12². Oʻzbekiston Respublikasi Sogʻliqni saqlash vazirligi huzuridagi Tez tibbiy yordamni rivojlantirish jamgʻarmasiga toʻlovdan kelib tushadigan mablagʻlardan qonun hujjatlariga muvofiq foydalaniladi.”.

5. 13-banddagi “Moliya vazirligiga” degan soʻzlar “Moliya vazirligi hamda Davlat soliq qoʻmitasiga” degan soʻzlar bilan almashtirilsin.

6. 1-ilova izohidagi “oyning oxirgi sanasi holatiga koʻra aniqlanadi” degan soʻzlar “oydagi oʻrtacha abonentlar soniga (kunlik abonentlar sonining yigʻindisi/oy kunlari) asosan aniqlanadi” degan soʻzlar bilan almashtirilsin.

7. Mazkur oʻzgartirishlar va qoʻshimcha Oʻzbekiston Respublikasi Davlat soliq qoʻmitasi bilan kelishilgan.