Xalqimizning koʻp asrlik boy va sermazmun tarixi, madaniyati, anʼanalari, ilmiy-badiiy kashfiyotlarini, Oʻzbekistonning jahon sivilizatsiyasi taraqqiyotidagi oʻrnini toʻlaligicha va munosib ilmiy aks ettirish, hozirgi kunda respublikamizning zamonaviy va ilgʻor davlatni shakllantirish va taraqqiy toptirish boʻyicha olib borayotgan ulkan bunyodkorlik faoliyatini yoritib berish, shu maqsadlarda lozim boʻlgan maʼlumotlarni jamlash, umumlashtirish hamda keng ommaga yetkazish maqsadida Vazirlar Mahkamasi qaror qiladi:

1. Jahon qomuschiligining boy tajribalarini oʻrganish asosida “Oʻzbekiston Respublikasi Qomusi”ning ilmiy konsepsiyasini ishlab chiqish va shunga muvofiq yangi qomusni yaratish boʻyicha ishchi guruh tarkibi ilovaga* binoan tasdiqlansin.

Mazkur ishchi guruhning yangi qomus ilmiy konsepsiyasi va bosh tahrir hayʼati tarkibi boʻyicha takliflarini uch oy muddat ichida umumlashtirish va Vazirlar Mahkamasiga taqdim qilish qomuslar bosh tahririyatiga yuklatilsin.

2. Oʻzbekiston Respublikasi Fanlar akademiyasi hamda Oliy va oʻrta maxsus taʼlim vazirligi boshqa vazirliklar, idoralar, ilmiy va ijodiy uyushmalar bilan hamkorlikda “Oʻzbekiston Respublikasi Qomusi” jildlari maqolalarini tayyorlash va tegishli taqrizlar uyushtirish jarayoniga atoqli olimlar va yetakchi mutaxassislarni jalb qilsinlar.

“Oʻzbekiston Respublikasi Qomusi” uchun yozilgan maqolalar ilmiy ish sifatida baholansin.

3. Oʻzbekiston Respublikasi Davlat matbuot qoʻmitasi Fanlar akademiyasi bilan birgalikda 1997—2005-yillar davomida oʻzbek tilida koʻp jildli “Oʻzbekiston Respublikasi Qomusi” oliy ilmiy saviyada tayyorlanishini va 50 ming nusxada yuqori sifatli nashr etilishini taʼminlasin.

4. Oʻzbekiston Respublikasi Moliya vazirligi 1997-yildan boshlab har yili “Oʻzbekiston Respublikasi Qomusi” jildlarini tayyorlash va nashr etish xarajatlarining 50 foizini respublika budjeti hisobidan qoplashni nazarda tutsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S. Saidqosimov zimmasiga yuklansin.