Jizzax viloyatida meva-sabzavot mahsulotlarini chuqur qayta ishlashni jadal rivojlantirish, yuqori sifatli va raqobatbardosh tayyor mahsulotlar ishlab chiqarishni kengaytirish, kelgusida ularni yirik xorijiy bozorlarga yo‘naltirish, shuningdek, yangi ish o‘rinlari yaratishni ta’minlash maqsadida Vazirlar Mahkamasi qaror qiladi:
1. “BMB Trade Group” (O‘zbekiston) va “Natsionalnaya rezervnaya korporatsiya” (Rossiya Federatsiyasi) kompaniyalarining Jizzax viloyati Sharof Rashidov tumanida zamonaviy agrologistika kompleksini barpo etish maqsadida mas’uliyati cheklangan jamiyati shaklidagi “BMB-NRC Agrologistics” O‘zbekiston-Rossiya qo‘shma korxonasini (keyingi o‘rinlarda agrologistika kompleksi deb ataladi) tashkil etish to‘g‘risidagi quyidagilarni nazarda tutuvchi taklifi ma’qullansin:
xorijiy investorlar mablag‘larini jalb qilish hisobiga 10 ming tonna sig‘imga ega bo‘lgan muzlatkichli kameralar va omborlar tashkil etish hamda shok usulda muzlatish, qayta ishlash, kalibrlash, saralash, qadoqlash va meva-sabzavotlarni quritish uskunalarini o‘rnatish;
meva-sabzavot va boshqa qishloq xo‘jaligi mahsulotlarini yetishtirish, saqlash, shuningdek, bojxona, bank, logistika, ekspress-laboratoriya, fitosanitar, veterinar, sanitar-epidemiologik, sertifikatlashtirish va boshqa xizmatlarni “yagona darcha” tamoyili bo‘yicha ko‘rsatish, Rossiya Federatsiyasi va boshqa xorijiy davlatlar bozorlariga xo‘l va qayta ishlangan tayyor mahsulotlarning eksportini amalga oshirish;
xorijiy investitsiyalarni, xalqaro moliya institutlari mablag‘larini jalb qilish va boshqa manbalar hisobiga qishloq xo‘jaligi mahsulotlarini birlamchi va chuqur qayta ishlash hamda jamg‘arishni tashkil etish, shuningdek, raqobatbardosh mahsulotlarni ishlab chiqarish.
2. Jizzax viloyati hokimligi O‘zbekiston Respublikasi Iqtisodiyot va sanoat vazirligi, boshqa manfaatdor vazirlik va idoralar bilan birgalikda agrologistika kompleksi hududigacha transport, ishlab chiqarish va muhandislik-kommunikatsiya infratuzilmalarini jadal rivojlantirish dasturini bir oy muddatda tasdiqlash uchun Vazirlar Mahkamasiga kiritsin.
3. “Jizzax viloyatida zamonaviy agrologistika kompleksini tashkil etish” loyihasini amalga oshirish bo‘yicha “yo‘l xaritasi” ilovaga muvofiq tasdiqlansin.
4. Bojxona rasmiylashtiruvi tartib-taomillarini tezkor amalga oshirish hamda agrologistika kompleksi hududida barcha turdagi xizmatlar “yagona darcha” tamoyili asosida ko‘rsatilishini ta’minlash maqsadida bir oy muddatda agrologistika kompleksi hududida:
Vazirlar Mahkamasi huzuridagi O‘simliklar karantini davlat inspeksiyasi — o‘simliklar karantini sohasida ruxsat beruvchi hujjatlarni rasmiylashtirish va berish punktini;
Sog‘liqni saqlash vazirligi huzuridagi Sanitariya-epidemiologik osoyishtalik agentligi va “O‘zstandart” agentligi — xalqaro standartlarga muvofiq oziq-ovqat va qishloq xo‘jaligi mahsulotlarini to‘laqonli sinovdan o‘tkazish hamda tegishli sertifikat va sanitariya-epidemiologiya ekspertizasi xulosalarini berishni ta’minlovchi zamonaviy sinov laboratoriyasini;
“O‘zbekekspertiza” AJ — tashqi iqtisodiy faoliyat tovar nomenklaturasi kodlari bo‘yicha tovarlarni tasniflash bo‘yicha xizmat ko‘rsatish, ro‘yxatdan o‘tkazish va tovarning kelib chiqish sertifikatlarini berish punktini tashkil etish to‘g‘risida O‘zbekiston Respublikasi Vazirlar Mahkamasiga takliflar kiritsin.
O‘zbekiston Respublikasida ishlab chiqarilmaydigan va agrologistika kompleksi tomonidan ishlab chiqarish ehtiyojlari uchun belgilangan tartibda tasdiqlanadigan ro‘yxat bo‘yicha olib kelinadigan xomashyo, uskunalar, maxsus transport vositalari va texnikalar uchun bojxona to‘lovlari (qo‘shilgan qiymati solig‘i va bojxona rasmiylashtiruvi yig‘imlaridan tashqari) to‘lashdan;
agrologistika kompleksiga chet eldan jalb qilinadigan mutaxassislar — jismoniy shaxslardan olinadigan foyda solig‘i to‘lashdan ozod etilsin.
6. Mazkur qarorning bajarilishini nazorat qilish O‘zbekiston Respublikasi Bosh vazirining agrar va oziq-ovqat sohalarini rivojlantirish masalalari bo‘yicha maslahatchisi A.D. Vaxabov, O‘zbekiston Respublikasi qishloq xo‘jaligi vaziri J.A. Xodjayev va Jizzax viloyati hokimi E.A. Saliyev zimmasiga yuklansin.