Oʻzbekiston Respublikasi “Aholini ish bilan taʼminlash toʻgʻrisida”gi Qonunining 17-moddasi hamda Oʻzbekiston Respublikasi Vazirlar Mahkamasining 2017-yil 5-dekabrdagi 965-son qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish tartibi toʻgʻrisida”gi Nizomning 10-bandi ijrosini taʼminlash maqsadida qaror qilaman:

1. Tumandagi mulkchilik shaklidan qatʼiy nazar, xodimlarning roʻyxatdagi oʻrtacha soni (ilovaga* asosan) 20 nafar kishidan ortiqni tashkil etadigan tashkilotlar sonidan kelib chiqib, Uzun tumanida ijtimoiy muhofazaga muhtoj va ish topishda qiynalayotgan shaxslar uchun 168 ta ish oʻrinlari band qilinganligi, jumladan:

oʻn toʻrt yoshgacha bolalari boʻlgan va nogiron bolalari boʻlgan yolgʻiz va koʻp bolali ota-onalar uchun 45,2 foiz (76 kishi );

umumiy oʻrta va oʻrta maxsus, kasb-hunar taʼlimi muassasalarini tamomlagan yoshlar, shuningdek, oliy taʼlim muassasalarining davlat grantlari boʻyicha taʼlim olgan bitiruvchilari uchun 40,5 foiz (68 kishi);

safarbarlik chaqiruvi zaxirasida xizmatni oʻtagan va Oʻzbekiston Respublikasi Qurolli Kuchlari saflaridan muddatli harbiy xizmatdan boʻshatilgan shaxslar uchun 6,0 foiz (10 kishi):

nogironlar uchun 3,0 foiz (5 kishi);

pensiyaoldi yoshidagi shaxslar uchun 1,7 foiz (3 kishi);

jazoni ijro etish muassasalaridan ozod qilingan yoki sudning qaroriga koʻra tibbiy tusdagi majburlov choralari qoʻllanilishidan ozod qilingan shaxslar uchun 2,4 foiz (4 kishi);

odam savdosi qurbonlari uchun 0,6 foiz (1 kishi);

atrofdagilar uchun xavf tugʻdirmaydigan ijtimoiy ahamiyatli kasalliklardan azob chekuvchi shaxslar uchun 0,6 foiz (1 kishi) miqdorida ish oʻrinlari zaxirasi korxona va tashkilotlar kesimida belgilanganligi ilovaga muvofiq tasdiqlansin.

2. Ijtimoiy muxofazaga muhtoj shaxslarning koʻrsatib oʻtilgan toifalari uchun ish oʻrinlari sanitariya-gigiyena meʼyorlariga va xodim oʻz mehnat majburiyatlarini toʻsiqsiz bajarishini taʼminlaydigan mehnat qilish sharoitlariga muvofiq tashkil etilsin.

3. 2020-yilda Uzun tumanida ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish boʻyicha korxona va tashkilotlar kesimida ish oʻrinlarini tashkil etish roʻyxati ilovaga muvofiq tasdiqlansin.

4. Ilovada koʻrsatilgan korxona va tashkilotlar rahbarlari belgilangan ish oʻrinlari tashkil etilishini toʻliq taʼminlasin.

5. Quyidagilar:

ijtimoiy muhofazaga muhtoj va ish topishda qiynalayotgan shaxslar uchun ish oʻrinlarining eng kam sonini belgilash boʻyicha ushbu qarorni bajarmagan, shuningdek, ularni ishga qabul qilishni asossiz ravishda rad etgan korxona va tashkilotlarning mansabdor shaxslariga qonun hujjatlarida belgilangan tartibda maʼmuriy javobgarlik belgilanishi;

ish oʻrinlarini band qilib qoʻyish sonidan ortiqcha ish oʻrinlari tashkil etgan korxona va tashkilotlar uchun belgilangan tartibda imtiyozlar qoʻllanilishi belgilab qoʻyilsin.

6. Tuman aholi bandligiga koʻmaklashish markazi (A. Doʻsmatov) besh kun muddatda ushbu qaror ilovasida koʻrsatilgan tashkilotlar rahbarlarining eʼtiboriga yetkazsin va ushbu qaror bajarilishi ustidan nazoratni taʼminlasin.

7. Uzun tuman hokimining 2018-yil 29-sentabrdagi Q-1710-son qarori 2020-yil 1-yanvardan oʻz kuchini yoʻqotishi belgilab qoʻyilsin.

8. Ushbu qaror rasman eʼlon qilingan kundan boshlab uch oydan soʻng kuchga kirishi belgilansin.

9. Ushbu qarorning ijrosini nazorat qilishni oʻz zimmamda qoldiraman.