Bugungi kunda respublika boʻyicha jamoat transportida, shu jumladan, avtobus, metro, tramvay, trolleybus yoʻnalishlarida bir kunda 3 millionga yaqin, yil davomida 1,1 milliarddan ortiq yoʻlovchilarga xizmat koʻrsatilmoqda.

Joriy yilning 9 oyi mobaynida avtobus yoʻnalishlarida 808 million, metropolitenda 56 million, tramvayda 3,2 million va trolleybusda 525 ming nafar yoʻlovchi tashilib, 872 milliard soʻmlik xizmat koʻrsatilgan.

Biroq, oʻtkazilgan tahlil natijalari umumiy foydalaniladigan transportda yoʻlovchilarga xizmat koʻrsatishda qator yechimini kutib turgan muammolar mavjudligini koʻrsatmoqda. Xususan:

birinchidan, umumiy foydalaniladigan transportda, shu jumladan, avtobus, metro, tramvay, trolleybus yoʻnalishlarida koʻrsatilgan xizmatlar uchun yagona toʻlov tizimi mavjud emas;

ikkinchidan, umumiy foydalaniladigan transportning yoʻnalishlari oʻzaro maqbullashtirilmagan, koʻrsatiladigan xizmatga nisbatan, shu jumladan, masofa va vaqt koʻrsatkichlarini inobatga olgan holda aholiga yoʻnalishlar boʻyicha qulay toʻlov shartlari taklif etilmagan;

uchinchidan, umumiy foydalaniladigan transportda zamonaviy texnologiyalar asosida toʻlovlarni amalga oshirish borasida aholiga qulay shart-sharoitlar yaratilmagan va axborot-kommunikatsiya sohasidagi yangiliklar sohaga keng jalb etilmagan.

Qayd etilgan muammolarni bartaraf etish, jamoat transportida yoʻlovchilarni tashishda zamonaviy axborot-kommunikatsiya texnologiyalarini joriy etish orqali aholiga transport xizmatlari koʻrsatish sifatini yaxshilash, yoʻlkira haqini yigʻishda shaffoflikni taʼminlash, umumiy foydalaniladigan transportda yoʻlovchi tashish tizimini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Transport vazirligi, Toshkent shahar hokimligi, Aksiyadorlik tijorat “Aloqabank”ning:

umumiy foydalaniladigan transportda yoʻlovchi tashish uchun yoʻlkira haqini toʻlashning avtomatlashtirilgan tizimini (keyingi oʻrinlarda avtomatlashtirilgan tizim deb ataladi) bosqichma-bosqich joriy etish;

umumiy foydalaniladigan transportda yoʻlovchi tashish uchun yoʻlkira haqini amalga oshirishning avtomatlashtirilgan tizimini joriy etish boʻyicha ixtisoslashtirilgan kompaniyani (keyingi oʻrinlarda ixtisoslashtirilgan kompaniya deb ataladi) Transport vazirligi tarkibidagi “Oʻzavtotranstexnika” ilmiy ishlab chiqarish markazi” DUK, Aksiyadorlik tijorat “Aloqabank” muassisligida tashkil etilgan “Aloqa Aktiv” MChJ va “Yagona umumrespublika protsessing markazi” MChJ QK ishtirokida ustav fondi (kapitali)da 12 mln AQSh dollariga teng miqdorida tomonlarning tegishli ravishda 25, 24 va 51 foiz ulushi bilan masʼuliyati cheklangan jamiyat shaklida tashkil etish;

Ixtisoslashtirilgan kompaniyaning ustav fondi (kapitali)da Transport vazirligining “Oʻzavtotranstexnika” ilmiy ishlab chiqarish markazi” DUKning 3 mln AQSh dollari ekvivalenti miqdoridagi ulushini shakllantirish uchun Transport vazirligining Transport va logistika sohasini rivojlantirish jamgʻarmasi mablagʻlaridan foydalanish toʻgʻrisidagi takliflari maʼqullansin.

2. Shunday tartib oʻrnatilsinki, unga koʻra, umumiy foydalaniladigan transportda yoʻlovchi tashish uchun yoʻlkira haqini toʻlashning avtomatlashtirilgan tizimini joriy etish bosqichma-bosqich:

Toshkent shahrida “Toshshahartransxizmat” AJ va “Toshkent metropoliteni” UKning ayrim yoʻnalishlarida koʻrsatilgan yoʻlovchi tashish xizmatlari uchun — 2020-yil 1-yanvardan boshlab;

Nukus shahri va viloyat markazlarida yoʻlovchi tashish xizmatlari uchun — 2020-yil 1-avgustdan boshlab;

Oʻzbekiston Respublikasining barcha hududida yoʻlovchi tashish xizmatlari uchun — 2021-yil 1-yanvardan boshlab amalga oshiriladi.

3. Belgilansinki:

ixtisoslashtirilgan kompaniya avtomatlashtirilgan tizimni joriy etish boʻyicha buyurtmachi hisoblanadi va avtomatlashtirilgan tizim operatori sifatida qatnashadi;

investitsiya xarajatlarini qoplash muddati davomida — 2026-yil 31-dekabrga qadar ixtisoslashtirilgan kompaniya xizmatlari uchun vositachilik toʻlovi Toshkent shahar jamoat transportida (avtobus va metro) belgilangan amaldagi cheklangan tarifdan kelib chiqqan holda, avtomatlashtirilgan tizim orqali oʻtgan barcha tranzaksiyalarning 4 foizi, 2027-yil 1-yanvardan boshlab — 3 foizi miqdorda oʻrnatiladi;

Nukus shahri va viloyat markazlari jamoat transportida (avtobus, tramvay, trolleybus) ixtisoslashtirilgan kompaniya xizmatlari uchun vositachilik toʻlovi belgilangan amaldagi cheklangan tarifdan kelib chiqqan holda, avtomatlashtirilgan tizim orqali oʻtgan barcha tranzaksiyalarning 3 foizi miqdorida oʻrnatiladi;

alohida fuqarolar toifalari uchun imtiyozli transport kartalarini shaxsiylashtirish va karta tannarxi boʻyicha sotish davlat xizmatlari markazlari orqali amalga oshiriladi;

aholiga transport xizmati koʻrsatuvchi yuridik shaxslarning (keyingi oʻrinlarda tashuvchilar deb ataladi) avtomatlashtirilgan tizimga ulanishi yoʻlovchi tashish xizmatlari koʻrsatish huquqini beruvchi tender (tanlov) boʻyicha bitimlarda aks ettiriladi;

“Yagona umumrespublika protsessing markazi” MChJ QK avtomatlashtirilgan tizimning dasturiy-apparat kompleksini ishlab chiqish, integratsiyalashtirish, joriy etishni taʼminlash boʻyicha ijrochi;

Transport vazirligi avtomatlashtirilgan tizim respublikaning barcha hududlarida joriy etilishi boʻyicha muvofiqlashtiruvchi organ;

Oʻzbekiston Respublikasi Transport vazirligi va Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari avtomatlashtirilgan tizim 2020-2021-yillarda amaliyotga toʻliq joriy etilishi uchun shaxsan masʼul hisoblanadilar.

4. Transport vazirligi Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki oy muddatda avtomatlashtirilgan tizim uchun tariflarni belgilash tartibi toʻgʻrisida Vazirlar Mahkamasiga taklif kiritsin.

Bunda, bitta toʻlov bilan bir nechta transport yoki transport turidan foydalanish imkoniyati, yoʻnalishdagi vaqt hamda masofadan kelib chiqqan holda belgilanadigan tarif rejalarini joriy etish, shuningdek, ushbu tariflar boʻyicha tushgan mablagʻlarni tashuvchilar oʻrtasida taqsimlash tartibi nazarda tutilsin.

5. Oʻzbekiston Respublikasi Markaziy bankiga toʻlov tizimlari va avtomatlashtirilgan tizimni oʻzaro integratsiyalashtirish, umumiy foydalaniladigan transportda yoʻlovchi tashish uchun yoʻlkira haqini bank plastik kartochkalari yordamida amalga oshirish, shuningdek, koʻrsatilgan xizmatlar uchun vositachilik toʻlovlarisiz tushumlar toʻliqligini taʼminlagan holda transport kartalarini toʻldirish uchun terminallar, bankomatlar va axborot kioskalari orqali toʻlovlarni qabul qilish tavsiya etilsin.

6. Oʻzbekiston Respublikasi Transport vazirligi Oʻzbekiston Milliy teleradiokompaniyasi, Oʻzbekiston Milliy axborot agentligi bilan birgalikda ushbu qarorning mazmuni va mohiyati ommaviy axborot vositalarida keng yoritilishini hamda aholi eʼtiboriga yetkazilishini taʼminlasin.

7. Oʻzbekiston Respublikasi Transport vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — transport vaziri A.J. Ramatov zimmasiga yuklansin.