Oʻzbekiston Respublikasi Prezidentining “Jizzax viloyatini kompleks rivojlantirishni davlat tomonidan tartibga solish va boshqarishning samarali modelini ishlab chiqish toʻgʻrisida” 2019-yil 3-yanvardagi PF-5609-son Farmoni ijrosini taʼminlash va “Ilgʻor hudud” sinov loyihasini amalga oshirish doirasida, shuningdek, respublika aholisiga tibbiy xizmat koʻrsatishni yaxshilash va Jizzax viloyati sogʻliqni saqlash tizimiga xorijiy investitsiyalarni faol jalb qilish, umumeʼtirof etilgan xalqaro standartlar hamda innovatsiya texnologiyalarini joriy qilish maqsadida Vazirlar Mahkamasi qaror qiladi:

1. Oʻzbekiston Respublikasi Prezidenti huzuridagi Loyiha boshqaruvi milliy agentligi (keyingi oʻrinlarda Agentlik deb ataladi), Oʻzbekiston Respublikasi Sogʻliqni saqlash vazirligi va Jizzax viloyati hokimligining:

Jizzax viloyatining Gʻallaorol tumanida aholiga yuqori sifatli tibbiy yordam koʻrsatishni tashkil etish, xorijiy va mahalliy investitsiyalarni, xalqaro moliya institutlari, investitsiya fondlari mablagʻlarini, banklar kreditlari, shu jumladan xorijiy banklar kreditlarini jalb qilish hisobidan tibbiyot kadrlarini tayyorlash, qayta tayyorlash hamda ularning malakasini oshirishni nazarda tutuvchi zamonaviy tibbiyot klasterini tashkil qilish boʻyicha investitsiya loyihasini (keyingi oʻrinlarda loyiha deb ataladi) amalga oshirish;

loyihaning amalga oshirilishi uchun masʼul boʻlgan “Medical care cluster” (keyingi oʻrinlarda “Medical care cluster” MChJ deb ataladi) masʼuliyati cheklangan jamiyatini tashkil etish;

“Medical care cluster” MChJ ustav kapitalini “Raqamli ishonch” raqamli iqtisodiyotni rivojlantirishni qoʻllab-quvvatlash jamgʻarmasining ulushi hisobidan shakllantirish toʻgʻrisidagi takliflariga rozilik berilsin.

2. Belgilab qoʻyilsinki, “Medical care cluster” MChJ:

loyihaning amalga oshirilishini uslubiy, tashkiliy, ekspert-tahliliy va axborot bilan taʼminlaydi;

loyihaning boshqa ishtirokchilari bilan kelishilgan holda, tibbiyot klasterining bino va inshootlarini loyihalashtirish uchun texnik topshiriqlar ishlab chiqadi;

tibbiyot klasterining bino va inshootlarini joylashtirish uchun zarur boʻlgan maydonlar qurilishini tashkil qiladi;

manfaatdor tashkilotlar bilan birgalikda qurilish obyektlariga muhandislik-kommunikatsiya infratuzilmasini ulash va oʻtkazishni amalga oshiradi, shuningdek, kirish yoʻllarini barpo etadi;

tibbiyot klasteri bino va inshootlarining maydonlarini investorlarga ijaraga beradi;

loyiha ishtirokchilari reyestrini yuritadi va uni tibbiyot klasteri rasmiy veb-saytida joylashtiradi;

loyiha ishtirokchilariga oʻz faoliyatini amalga oshirish uchun zarur boʻlgan xizmatlar (shu jumladan, yuridik va maslahat xizmatlari, buxgalteriya hisobini yuritish xizmatlari) koʻrsatishni tashkil qiladi;

loyiha ishtirokchilarining faoliyatini muvofiqlashtiradi, birgalikdagi oʻzaro hamkorligini taʼminlaydi;

Oʻzbekiston Respublikasi Sogʻliqni saqlash vazirligi va Innovatsion sogʻliqni saqlash milliy palatasi bilan birgalikda loyiha ishtirokchilari manfaatlari uchun tibbiyot xodimlarini tayyorlash va ularning stajirovka oʻtashini, shuningdek, ularga qoʻshimcha kasbiy taʼlim berilishini tashkil qiladi;

loyiha ishtirokchilariga bozorda tovarlarni (ishlar va xizmatlarni) taklif qilishda koʻmaklashadi;

loyiha ishtirokchilari tomonidan tibbiyot klasteri hududida tibbiy faoliyatning amalga oshirilishi boshlangani toʻgʻrisidagi bildirishnomani, shu jumladan qoʻllaniladigan qoidalar, talablar, reglamentlar va normativlar, foydalaniladigan dori vositalari va tibbiyot buyumlari haqidagi maʼlumotlarni belgilangan tartibda yuboradi;

intellektual faoliyat natijalari uchun huquqlarni rasmiylashtirishga koʻmaklashadi.

3. Jizzax viloyati hokimligi:

Oʻzbekiston Respublikasi Qurilish vazirligi, Yer resurslari, geodeziya, kartografiya va davlat kadastri davlat qoʻmitasi bilan birgalikda “Medical care cluster” MChJga loyihani amalga oshirish uchun doimiy egalik qilish va foydalanish, shu jumladan bino va inshootlar, klinikalar, shifoxonalar, taʼlim kampuslari va boshqa obyektlar qurish huquqi bilan Jizzax viloyatining Gʻallaorol tumanida joylashgan, qishloq xoʻjaligiga moʻljallanmagan umumiy maydoni 10 gektar yer uchastkasi bir oy muddatda ajratilishini taʼminlasin;

Oʻzbekiston Respublikasi Uy-joy kommunal xizmat koʻrsatish vazirligi, Energetika vazirligi, “Oʻztransgaz” AJ va “Oʻzbektelekom” AK bilan birgalikda tasdiqlangan loyiha-smeta hujjatlariga muvofiq qurilish obyektlariga muhandislik-kommunikatsiya infratuzilmasi (elektr, gaz, suv taʼminoti, kanalizatsiya, telefon aloqasi va boshqalar) oʻtkazilishini oʻzining va/yoki jalb qilingan mablagʻlar hisobidan belgilangan tartibda taʼminlasin.

4. Agentlik “Medical care cluster” MChJ bilan birgalikda tibbiyot klasteri hududida amalga oshiriladigan va perinatal, klinik-tashhis qoʻyish, reabilitatsiya markazlari, kardiologiya va onkologiya klinikalari, bolalar jarrohligi va travmatologiya kliniklari, shuningdek, tibbiyot universitetini tashkil etishni nazarda tutuvchi loyihalarni moliyalashtirish uchun investorlar jalb qilinishini taʼminlasin.

5. Quyidagilarga, istisno tariqasida:

a) “Medical care cluster” MChJga:

loyihani amalga oshirish doirasida tender savdolari va tanlovlari oʻtkazmasdan, eng yaxshi takliflarni tanlab olish asosida loyiha va pudrat tashkilotlarini belgilash;

ishga qabul qilingan malakali xorijiy mutaxassislar uchun ish haqi va boshqa toʻlovlar miqdorlarini belgilash;

b) loyihani amalga oshirish doirasida “Medical care cluster” MChJ tomonidan jalb qilinadigan pudrat va subpudrat tashkilotlariga:

tasdiqlangan texnik topshiriqlarga muvofiq klinikalar, shifoxonalar va taʼlim kampuslarini;

tibbiyot klasterining bino va inshootlarini, boshqa obyektlarini qurilish sohasida tegishli litsenziya va (yoki) ruxsatnoma olmasdan, pudrat va loyiha tashkilotlari oʻrtasida konsorsium tashkil etish orqali hamda konsorsium ishtirokchilariga loyihaning sifatli va oʻz vaqtida amalga oshirilishi uchun birgalikda javobgarlik yuklash sharti bilan “fast-track” uslubida, “tayyor holda topshirish” shartlarida qurishga ruxsat berilsin.

6. 2022-yil 1-yanvargacha boʻlgan muddatga:

a) “Medical care cluster” MChJ va loyihani amalga oshirish doirasida MChJ tomonidan jalb etiladigan pudrat tashkilotlari:

yuridik shaxslar daromad soligʻi va qoʻshilgan qiymat soligʻini;

Oʻzbekiston Respublikasida ishlab chiqarilmaydigan, tibbiyot klasterini qurish, jihozlash va faoliyatini taʼminlash uchun moʻljallangan materiallar, xomashyo, uskunalar, texnologik hujjatlar, alohida maxsus qurilish materiallari, butlovchi buyumlar va ehtiyot qismlarni belgilangan tartibda shakllantiriladigan roʻyxatlar boʻyicha olib kirishda bojxona toʻlovlari (bojxona yigʻimlaridan tashqari) toʻlashdan;

b) loyiha ishtirokchilari tibbiyot klasteri faoliyatini tashkil qilish uchun, xususan, tibbiyot xodimi sifatida jalb qilinadigan xorijiy mutaxassislar mehnatiga haq toʻlash fondidan yagona ijtimoiy toʻlov toʻlashdan ozod etilsin.

7. Belgilansinki, Jahon sogʻliqni saqlash tashkiloti tomonidan maʼqullangan xalqaro klinik protokollar hamda kasalliklar va holatlarga tashxis qoʻyish hamda ularni davolashning tibbiy uslublari tibbiyot klasteri hududida moslashtirilmasdan hamda Oʻzbekiston Respublikasi Sogʻliqni saqlash vazirligining tegishli ruxsatnomasini olmasdan qoʻllanilishi mumkin.

8. Agentlik manfaatdor vazirlik va idoralar bilan birgalikda:

tibbiyot klasteri faoliyatini samarali tashkil qilish uchun yetakchi xorijiy boshqaruv kompaniyalarini jalb qilish boʻyicha uch oy muddatda muzokaralar oʻtkazsin va amaliy choralar koʻrsin;

xalqaro kompaniyani jalb etgan holda, “Raqamli ishonch” raqamli iqtisodiyotni rivojlantirishni qoʻllab-quvvatlash jamgʻarmasi mablagʻlari hisobidan tibbiy-texnik topshiriqni ikki oy muddatda ishlab chiqsin;

oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov va Jizzax viloyati hokimi E.A. Saliyev zimmasiga yuklansin.