LexUZ sharhi
Mazkur qaror O‘zbekistan Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
“Umumiy harbiy majburiyat va harbiy xizmat to‘g‘risida” O‘zbekiston Respublikasi Qonuniga muvofiq Qurolli Kuchlarni texnik ixtisosliklarni egallagan harbiy xizmat yoshidagilar bilan butlash va harbiy-amaliy ahamiyatga ega bo‘lgan ommaviy texnik kasblar kadrlari tayyorlash zarurligini hisobga olib Vazirlar Mahkamasi qaror qiladi:
1. O‘zbekiston Respublikasi Mudofaa vazirligining 1995/96 o‘quv yilida Qurolli Kuchlar uchun O‘zbekiston Respublikasi mudofaaga yordam beruvchi “Vatanparvar” tashkiloti maktablari va O‘zbekiston Respublikasi Xalq ta’limi vazirligining hunar-texnika o‘quv yurtlarida umumiy soni ilovaga* muvofiq 9610 kishi bo‘lgan texnik mutaxassislarni tayyorlash to‘g‘risidagi taklifi qabul qilinsin.
Shuningdek, sportning texnik va harbiy-amaliy turlari bo‘yicha sportchilar tayyorlash Qurolli Kuchlar uchun texnik mutaxassislar tayyorlashning tarkibiy qismi deb hisoblansin.
2. Harbiy-amaliy ahamiyatga ega bo‘lgan ommaviy texnik kasblar kadrlari (avtomobil haydovchilari, traktorchilar, buldozerchilar va boshqalar) tayyorlash “O‘zistiqbolstat” davlat qo‘mitasi bilan kelishilgan holda O‘zbekiston Respublikasi mudofaaga yordam beruvchi “Vatanparvar” tashkiloti maktablari va klublarida o‘zini o‘zi mablag‘ bilan ta’minlash shartlarida amalga oshirilsin.
3. Qoraqalpog‘iston Respublikasi Vazirlar Kengashi viloyatlar va Toshkent shahar hokimliklari, O‘zbekiston Respublikasi mudofaaga yordam beruvchi “Vatanparvar” tashkilotlarini ularning fuqarolarni vatanparvarlik ruhida tarbiyalash Qurolli Kuchlar uchun texnik mutaxassislar, harbiy-amaliy ahamiyatga ega bo‘lgan ommaviy texnik kasblar kadrlari tayyorlash sportning texnik va harbiy-amaliy turlarini rivojlantirish ishida doimiy ravishda qo‘llab-quvvatlasinlar hamda ularning o‘quv-moddiy bazasi zarur darajada rivojlantirilishini ta’minlasinlar.
4. “O‘zistiqbolstat” davlat qo‘mitasi texnik mutaxassislar tayyorlash va sportning harbiy-amaliy turlarini rivojlantirish rejalariga muvofiq O‘zbekiston Respublikasi mudofaaga yordam beruvchi “Vatanparvar” tashkiloti va O‘zbekiston Respublikasi Xalq ta’limi vazirligining buyurtmalarini ta’minlash uchun hukumatlararo bitimlarga binoan, O‘zbekiston Respublikasiga yetkazib berilayotgan mahsulotlarga kvota ajratishni nazarda tutsin.
“O‘zulgurjibirjasavdo” uyushmasi ajratilgan kvotalarga muvofiq moddiy-texnika resurslari yetkazib berilishini ta’minlasin va mahsulotlar to‘g‘ridan to‘g‘ri tijorat shartnomalari bo‘yicha kontrakt asosida olinishiga ko‘maklashsin.
5. “O‘zdavneftmahsulot” birlashmasi va respublikaning boshqa ta’minot tashkilotlari texnik mutaxassislar tayyorlash hamda sportning harbiy-amaliy turlarini rivojlantirish rejalariga muvofiq Mudofaaga yordam beruvchi “Vatanparvar” tashkiloti va O‘zbekiston Respublikasi Xalq ta’limi vazirligining buyurtmalari bajarilishini nazarda tutsinlar.
6. O‘zbekiston Respublikasi Mudofaa vazirligi, Moliya vazirligi, “O‘zistiqbolstat” davlat qo‘mitasi, “O‘zdavneftmahsulot” birlashmasi, “O‘zulgurjibirjasavdo” uyushmasi, Mudofaaga yordam beruvchi “Vatanparvar” tashkiloti, Qurolli Kuchlar uchun mutaxassislar tayyorlashni mablag‘ bilan ta’minlashni va moddiy-texnika ta’minotini bundan keyin Mudofaa vaziri bilan kelishilgan va uning tomonidan tasdiqlangan reja asosida amalga oshirsinlar.