Oʻzbekiston Respublikasi bank tizimini qabul qilingan xalqaro normalarga muvofiq yanada takomillashtirish va jadal rivojlantirish maqsadida Vazirlar Mahkamasi qaror qiladi:

1. Oʻzbekiston Banklari uyushmasining birinchi Taʼsis syezdida qabul qilingan Oʻzbekiston bank tizimini rivojlantirishning kompleks dasturini amalga oshirishga doir chora-tadbirlar* maʼqullansin.

2. Oʻzbekiston Respublikasi Markaziy banki, Tashqi iqtisodiy faoliyat milliy banki, Moliya vazirligi, “Oʻzistiqbolstat” davlat qoʻmitasi, Tashqi iqtisodiy aloqalar vazirligi, Aloqa vazirligi, Adliya vazirligi, Oliy va oʻrta maxsus taʼlim vazirligi, Xalq taʼlimi vazirligi Banklar uyushmasi, manfaatdor vazirliklar, idoralar, konsernlar va uyushmalar bilan birgalikda Dasturning har bir boʻlimini bajarish boʻyicha aniq tashkiliy-texnik tadbirlarni ishlab chiqsinlar va amalga oshirsinlar.

3. Moliya vazirligining Vazirlar Mahkamasining 1994-yil 13-iyuldagi 362-son qarori amalda boʻlishi muddatini 1997-yil 31-dekabrgacha uzaytirish toʻgʻrisidagi taklifi qabul qilinsin. Belgilab qoʻyilsinki, banklarning soliq olishdan ozod qilingan mablagʻlari Oʻzbekiston Banklari uyushmasi orqali Dasturni amalga oshirishni mablagʻ bilan maqsadli taʼminlashga hamda tijorat banklarini rivojlantirishga teng ulushlarda yoʻnaltiriladi. Mazkur qoida xususiy tijorat banklarini daromad soligʻi toʻlashdan ozod qilish qismida ularga joriy qilinmaydi (koʻrsatib oʻtilgan mablagʻlar ularning moddiy-texnika bazalarini mustaxkamlash va infratuzilmalarni rivojlantirishga yoʻnaltiriladi).

Oʻzbekiston Respublikasi Davlat soliq qoʻmitasi Markaziy banki bilan birgalikda ajratilayotgan mablagʻlarning Banklar uyushmasi va tijorat banklari tomonidan maqsadli foydalanilishi ustidan qatʼiy nazoratni taʼminlasin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston bank tizimini rivojlantirishning kompleks dasturiga muvofiq Banklar uyushmasi ishtirokida tashkil etiladigan tuzilmalar faoliyati uchun zarur shart-sharoitlar yaratishga, shu jumladan, tegishli binolarning birinchi navbatda ajratilishiga koʻmaklashsinlar.

Toshkent shahar hokimligi Uyushma Kengashini va Bosh direksiyasini Toshkent shahar, Yakub Kolas koʻchasi, 24-uyga joylashtirsin, ushbu binoni qoldiq balans qiymati boʻyicha Banklar uyushmasiga bersin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.