“Oʻzbekiston Respublikasi Prezidenti I. A. Karimovning Oliy Majlis oʻn toʻrtinchi sessiyasidagi nutqi yuzasidan” Oʻzbekiston Respublikasi Oliy Majlisining 1999-yil 14-apreldagi qaroriga muvofiq va sud-huquq islohotini chuqurlashtirish maqsadida Oʻzbekiston Respublikasi Oliy Majlisining Kengashi qaror qiladi:

1. Oʻzbekiston Respublikasi Oliy Majlisi huzurida doimiy asosda ishlaydigan Sud-huquq tizimini isloh qilish toʻgʻrisida takliflar tayyorlash komissiyasi tuzilsin (1-ilova).

2. Sud-huquq tizimini isloh qilish toʻgʻrisida takliflar tayyorlash komissiyasiga oʻzining faoliyatiga vazirliklar, idoralar, korxonalar, muassasalar, tashkilotlarning xodimlarini, olimlar va mutaxassislarni jalb etish huquqi berilsin.

3. Sud-huquq tizimini isloh qilish toʻgʻrisida takliflar tayyorlash komissiyasi haqidagi Nizom tasdiqlansin (2-ilova).

4. Sud-huquq tizimini isloh qilish toʻgʻrisida takliflar tayyorlash komissiyasi bir oylik muddat ichida oʻz faoliyatining dasturini ishlab chiqsin va tasdiqlasin.

1. Sud-huquq tizimini isloh qilish toʻgʻrisida takliflar tayyorlash komissiyasi Oʻzbekiston Respublikasi Oliy Majlisi huzurida tuziladi va doimiy asosda ish olib boradi.

2. Komissiya jamoatchilik asosida ishlaydigan Komissiya raisi, rais oʻrinbosari, kotib va aʼzolardan iborat boʻladi.

Komissiya tarkibi Oliy Majlisi Kengashi tomonidan tasdiqlanadi.

3. Komissiyaning asosiy vazifasi sud-huquq tizimini isloh qilish toʻgʻrisida takliflar tayyorlashdan iboratdir.

4. Komissiya asosiy vazifasiga muvofiq:

oʻz faoliyatining dasturini ishlab chiqadi va tasdiqlaydi;

sud hokimiyati mustaqilligini taʼminlashga, sudya kadrlarni tanlash va joy-joyiga qoʻyish mexanizmini takomillashtirishga, sud protsessining tortishuv, sudlarda ishlarni koʻrishda davlat ayblovchisi va himoyachining huquqlari tengligi prinsiplarini amaliy jihatdan roʻyobga chiqarishga qaratilgan takliflar tayyorlaydi va, zarurat boʻlganda, tegishli qonun hujjatlarining loyihalarini ishlab chiqadi;

huquqni muhofaza qilish va boshqa davlat organlari, sudlar, advokatura, ilmiy muassasalar hamda boshqa tashkilotlardan sud-huquq islohotini oʻtkazishga taalluqli hujjatlar, yozma xulosalar, hisobot maʼlumotlari va boshqa materiallarni talab qilib oladi;

takliflar va qonun hujjatlarining loyihalarini kelishib olish yoki ekspertiza oʻtkazish uchun tegishli vazirliklar, idoralar, korxonalar, muassasalar, tashkilotlarga, shuningdek olimlar va mutaxassislarga yuboradi;

zarur hollarda oʻz majlislariga sudlar, huquqni muhofaza qilish organlari, vazirliklar, idoralar, boshqa tashkilotlarning vakillarini taklif etadi hamda Komissiyaning sud-huquq tizimini isloh qilishga oid takliflari qanday bajarilayotganligi toʻgʻrisida ularning axborotini tinglaydi;

Komissiya aʼzolarining topshirilgan ishni bajarishga oid axborotlarini tinglaydi.

Komissiya oʻzining asosiy vazifasini bajarish bilan bogʻliq boshqa faoliyatni ham amalga oshiradi.

5. Komissiya oʻz ishini oshkoralik, masalalarni erkin muhokama etish va kollegial tarzda qaror qabul qilish, oʻz aʼzolarining keng tashabbuskorligi asosida olib boradi.

6. Komissiya aʼzolari Komissiya faoliyatida qatnashishlari, belgilangan vazifalar amalga oshirilishiga yordamlashishlari, Komissiya topshiriqlarini bajarishlari shart.

7. Komissiya masalalarni tayyorlash va chuqur ishlab chiqish uchun vazirliklar, idoralar, korxonalar, muassasalar, tashkilotlarning xodimlarini, olimlar va mutaxassislarni jalb etishga, shuningdek Komissiya faoliyati bilan bogʻliq u yoki bu masalalarni tayyorlash uchun ular orasidan ishchi guruhlari tuzishga haqli.

8. Komissiya majlislari zaruratga qarab, ammo har oyda kamida bir marta oʻtkaziladi.

9. Komissiya majlislari, basharti ularda Komissiya tarkibining kamida yarmi hozir boʻlgan boʻlsa, vakolatlidir. Komissiya aʼzosi majlisga kelishga imkoni boʻlmagan taqdirda bu haqda Komissiya raisini oldindan xabardor etib qoʻyadi.

10. Komissiya koʻrib chiqilayotgan masalalar yuzasidan qaror qabul qiladi. Komissiya qarori uning majlisida hozir boʻlgan Komissiya aʼzolarining oddiy koʻpchilik ovozi bilan qabul qilinadi.

11. Komissiya tomonidan tayyorlangan takliflar Oliy Majlis rahbariyatiga maʼlum qilinadi va zarur boʻlsa, Oliy Majlis Kengashi muhokamasiga kiritiladi, shuningdek tegishli davlat organlari va boshqa manfaatdor tashkilotlarga yuborilishi mumkin.

12. Davlat organlari, yuridik va jismoniy shaxslar Komissiya tomonidan yuborilgan, sud-huquq islohotini amalga oshirish bilan bogʻliq takliflarni koʻrib chiqishi hamda ularning natijalari toʻgʻrisida Komissiyaga xabar qilishi shart.

13. Komissiya raisi:

Komissiya faoliyatiga rahbarlikni amalga oshiradi;

zarur materiallarning tayyorlanishini tashkil etadi, Komissiya majlisini chaqiradi va majlislarda raislik qiladi;

Komissiya faoliyati dasturini amalga oshirish jarayoni ustidan nazorat olib boradi;

Komissiya raisining oʻrinbosari, kotib va aʼzolarga topshiriqlar beradi, ularga Komissiya faoliyati bilan bogʻliq materiallar va hujjatlar yoʻllaydi;

sud-huquq tizimini isloh qilish yuzasidan Komissiya tayyorlagan takliflar toʻgʻrisida Oliy Majlis rahbariyatiga va Oliy Majlis Kengashiga axborot beradi;

Komissiya qarorlarini imzolaydi.

14. Komissiya raisining oʻrinbosari rais topshirigʻiga binoan uning ayrim vazifalarini bajaradi hamda rais yoʻqligida yoki uning oʻz vazifalarini amalga oshirishi mumkin boʻlmagan hollarda raisning vazifasini bajarib turadi.

15. Komissiya kotibi Komissiya faoliyatining tashkiliy jihatdan taʼminlanishini amalga oshiradi hamda uning ish yurituvini olib boradi.