Oʻzbekiston Respublikasi Prezidentining “Eksportga koʻmaklashish va uni ragʻbatlantirishni kuchaytirish chora-tadbirlari toʻgʻrisida” 2018-yil 20-dekabrdagi PQ-4069-son va “Oʻzbekiston Respublikasi Investitsiyalar va tashqi savdo vazirligining faoliyatini tashkil etish toʻgʻrisida” 2019-yil 28-yanvardagi PQ-4135-son qarorlariga muvofiq Vazirlar Mahkamasi qaror qiladi:

1. Quyidagilar Oʻzbekiston Respublikasi Investitsiyalar va tashqi savdo vazirligi huzuridagi Eksportni ragʻbatlantirish agentligining asosiy vazifalari etib belgilansin:

eksportni rivojlantirish va qoʻllab-quvvatlash sohasida davlat siyosati amalga oshirilishida ishtirok etish, eksport salohiyatini rivojlantirish davlat dasturlari amalga oshirilishiga koʻmaklashish;

eksport qiluvchilarni, shu jumladan, chet elda, marketing, narx belgilash, transport logistikasi, sertifikatlash, standartlashtirish va sifat nazorati, soliq va bojxona maʼmuriyatchiligi, chet el bozorlariga “yagona darcha” prinsipi orqali kirish masalalari boʻyicha axborot va maslahat bilan qoʻllab-quvvatlash;

xorijiy xaridorni izlashga koʻmaklashish va eksport kontrakti tuzish, shu jumladan, uni tayyorlash bosqichigacha muzokaralar jarayoniga koʻmaklashish;

milliy mahsulotlarni xorijga eksport qilish boʻyicha vazirliklar, respublika idoralari, viloyatlar va tumanlar (shaharlar) hokimliklari bilan oʻzaro hamkorlikni taʼminlash hamda eksport qiluvchilarga eksportni qoʻllab-quvvatlash chora-tadbirlari, mavjud imtiyozlar va preferensiyalar, vakolatli davlat hokimiyati organlarining vazifalari va funksiyalari haqidagi maʼlumotlar bilan tanishish imkonini yaratish;

elektron tashqi savdo platformasini yuritish, mahalliy eksport qiluvchilar, ishlab chiqariladigan mahsulotlar va xizmatlar haqidagi maʼlumotlar bazasini yuritish, ishlab chiqarish va eksport faoliyati bilan shugʻullanuvchi tadbirkorlik subyektlariga yetakchi xalqaro elektron savdo maydonlariga kirishda koʻmaklashish;

mahalliy ishlab chiqaruvchilarning sifatli mahsulotlarni ishonchli yetkazib beruvchi ekanligini tasdiqlash uchun oʻzbek brendlari va mahsulotlarini xorijda targʻib qilish boʻyicha “Made in Uzbekistan” dasturini amalga oshirish, shu jumladan, “Made in Uzbekistan” milliy koʻrgazmasini, tarmoq va mintaqaviy koʻrgazmalarni va tovarlar yarmarkalarini har yili oʻtkazish, shuningdek, xalqaro koʻrgazmalar va taqdimotlarda ishtirok etish orqali amalga oshirish;

eksport qiluvchi tashkilotlar uchun oʻquv seminarlari va treninglar hamda xorijiy mamlakatlardagi tadbirkorlik subyektlari uchun tashqi savdo faoliyati masalalari boʻyicha biznes-forumlar tashkil etish va oʻtkazish;

eksport qiluvchi tashkilotlarga ham respublikada, ham xorijda standartlashtirish va sertifikatlashtirishning xalqaro tizimlarini joriy etishga, xorijiy vakolatli organlarda milliy mahsulotlarni hamda koʻrgazma stendlarini roʻyxatdan oʻtkazishga, respublika tashkilotlarining xalqaro koʻrgazmalar-yarmarkalarda ishtirok etishini, shu jumladan, anʼanaviy milliy mahsulotlar va brendlarni potensial sotish bozorlariga kiritishda taqdimotlar va reklama kompaniyalari oʻtkazilishiga moliyaviy koʻmaklashish;

3. Oʻzbekiston Respublikasi Investitsiyalar va tashqi savdo vazirligi huzuridagi Eksportni ragʻbatlantirish agentligi (keyingi oʻrinlarda Agentlik deb ataladi) toʻgʻrisidagi nizom ilovaga muvofiq tasdiqlansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari E.M. Gʻaniyev hamda investitsiyalar va tashqi savdo vaziri S.U. Umurzakov zimmasiga yuklansin.

1. Ushbu Nizom Oʻzbekiston Respublikasi Investitsiyalar va tashqi savdo vazirligi huzuridagi Eksportni ragʻbatlantirish agentligining (keyingi oʻrinlarda Agentlik deb ataladi) maqomi, funksiyalari, vazifalari, huquqlari, javobgarligi, faoliyatini tashkil etish tartibini, shuningdek, uning rahbarlarining funksional vazifalari va javobgarligini belgilaydi.

2. Agentlik oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, investitsiyalar va tashqi savdo vazirining buyruqlariga, shuningdek, ushbu Nizomga va boshqa qonun hujjatlariga amal qiladi.

Agentlik oʻzining vazifalari va funksiyalarini amalga oshirish doirasida eksport salohiyatini rivojlantirish masalalari boʻyicha vazirliklar, idoralar, xoʻjalik birlashmalari, mahalliy davlat hokimiyati organlari va boshqa tashkilotlar bilan oʻzaro hamkorlik qiladi.

3. Agentlik davlat muassasasi shaklidagi yuridik shaxs hisoblanadi, oʻz faoliyatini amalga oshirish uchun zarur boʻlgan Oʻzbekiston Respublikasi Moliya vazirligi Gʻaznachiligida shaxsiy gʻazna hisobvaraqlariga va bank hisob raqamlariga, shu jumladan, xorijiy valyutadagi hisob raqamlariga, shu jumladan, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga hamda Agentlik nomi va Oʻzbekiston Respublikasi Davlat gerbi tasviri tushirilgan blankalarga ega.

4. Agentlikning rasmiy nomi:

a) davlat tilida:

toʻliq nomi — Oʻzbekiston Respublikasi Investitsiyalar va tashqi savdo vazirligi huzuridagi Eksportni ragʻbatlantirish agentligi;

qisqartirilgan nomi — Eksportni ragʻbatlantirish agentligi;

b) ingliz tilida:

toʻliq nomi — Export Promotion Agency under the Ministry of Investments and Foreign Trade of the Republic of Uzbekistan;

qisqartirilgan nomi — Export Promotion Agency;

v) rus tilida:

toʻliq nomi — Agentstvo prodvijeniya eksporta pri Ministerstve investitsiy i vneshney torgovli Respubliki Uzbekistan;

qisqartirilgan nomi — Agentstvo prodvijeniya eksporta.

5. Agentlik joylashgan joy (pochta manzili): Toshkent shahri, Taras Shevchenko koʻchasi, 34-uy.

6. Quyidagilar Agentlikning asosiy vazifalari hisoblanadi:

eksportni rivojlantirish va qoʻllab-quvvatlash sohasida davlat siyosati amalga oshirilishida ishtirok etish, eksport salohiyatini rivojlantirish davlat dasturlari amalga oshirilishiga koʻmaklashish;

eksport qiluvchilarni, shu jumladan, chet elda, marketing, narx belgilash, transport logistikasi, sertifikatlash, standartlashtirish va sifat nazorati, soliq va bojxona maʼmuriyatchiligi, chet el bozorlariga “yagona darcha” prinsipi orqali kirish masalalari boʻyicha axborot va maslahat bilan qoʻllab-quvvatlash;

xorijiy xaridorni izlashga koʻmaklashish va eksport kontrakti tuzish, shu jumladan, uni tayyorlash bosqichigacha muzokaralar jarayoniga koʻmaklashish;

milliy mahsulotlarni xorijga eksport qilish boʻyicha vazirliklar, respublika idoralari, viloyatlar va tumanlar (shaharlar) hokimliklari bilan oʻzaro hamkorlikni taʼminlash hamda eksport qiluvchilarga eksportni qoʻllab-quvvatlash chora-tadbirlari, mavjud imtiyozlar va preferensiyalar, vakolatli davlat hokimiyati organlarining vazifalari va funksiyalari haqidagi maʼlumotlar bilan tanishish imkonini yaratish;

elektron tashqi savdo platformasini yuritish, mahalliy eksport qiluvchilar, ishlab chiqariladigan mahsulotlar va xizmatlar haqidagi maʼlumotlar bazasini yuritish, ishlab chiqarish va eksport faoliyati bilan shugʻullanuvchi tadbirkorlik subyektlariga yetakchi xalqaro elektron savdo maydonlariga kirishda koʻmaklashish;

mahalliy ishlab chiqaruvchilarning sifatli mahsulotlarni ishonchli yetkazib beruvchi ekanligini tasdiqlash uchun oʻzbek brendlari va mahsulotlarini xorijda targʻib qilish boʻyicha “Made in Uzbekistan” dasturini amalga oshirish, shu jumladan, “Made in Uzbekistan” milliy koʻrgazmasini, tarmoq va mintaqaviy koʻrgazmalarni va tovarlar yarmarkalarini har yili oʻtkazish, shuningdek, xalqaro koʻrgazmalar va taqdimotlarda ishtirok etish orqali amalga oshirish;

eksport qiluvchi tashkilotlar uchun oʻquv seminarlari va treninglar hamda xorijiy mamlakatlardagi tadbirkorlik subyektlari uchun tashqi savdo faoliyati masalalari boʻyicha biznes-forumlar tashkil etish va oʻtkazish;

eksport qiluvchi tashkilotlarga ham respublikada, ham xorijda standartlashtirish va sertifikatlashtirishning xalqaro tizimlarini joriy etishga, xorijiy vakolatli organlarda milliy mahsulotlarni hamda koʻrgazma stendlarini roʻyxatdan oʻtkazishga, respublika tashkilotlarining xalqaro koʻrgazmalar-yarmarkalarda ishtirok etishini, shu jumladan, anʼanaviy milliy mahsulotlar va brendlarni potensial sotish bozorlariga kiritishda taqdimotlar va reklama kompaniyalari oʻtkazilishiga moliyaviy koʻmaklashish;

7. Agentlik yuklangan asosiy vazifalarga muvofiq quyidagi funksiyalarni amalga oshiradi:

a) eksportni rivojlantirish va qoʻllab-quvvatlash sohasida davlat siyosati amalga oshirilishida ishtirok etish, eksport salohiyatini rivojlantirish davlat dasturlari amalga oshirilishiga koʻmaklashish sohasida:

ichki eksport infratuzilmasini takomillashtirish va eksport faoliyatini liberallashtirish, shuningdek, mahsulotlarni eksport qilishdagi toʻsiqlar va gʻovlarni bartaraf etish boʻyicha takliflarni oʻrganadi, tahlil qiladi va ishlab chiqadi;

eksportga yoʻnaltirilgan mahsulotlarni ishlab chiqarishga, shu jumladan, meva va sabzavotlarni tayyorlash, qayta ishlash va saqlashga ilmiy yondashuv joriy etilishiga koʻmaklashadi;

respublikaning eksport qiluvchi tashkilotlari mahsulotlariga tashqi sotish bozorlaridagi toʻsiqlar va cheklovlarni aniqlash boʻyicha Oʻzbekiston Respublikasining chet eldagi savdo vakolatxonalari va elchixonalari bilan oʻzaro hamkorlik qiladi hamda kamsituvchi, tarif va notarif toʻsiqlarga samarali munosabat bildirishda ishtirok etadi;

b) eksport qiluvchilarni, shu jumladan, chet elda, marketing, narx belgilash, transport logistikasi, sertifikatlash, standartlashtirish va sifat nazorati, soliq va bojxona maʼmuriyatchiligi, chet el bozorlariga “yagona darcha” prinsipi orqali kirish masalalari boʻyicha axborot va maslahat bilan qoʻllab-quvvatlash sohasida:

jahon bozorida mahsulotlarga talab va hajmlarni tahlil qilish, taqqoslash va aniqlash boʻyicha axborot taqdim etadi, shuningdek, sotish bozorlari (xablar) mahsulotlar bilan toʻldirilganligini oʻrganadi;

tadbirkorlik subyektlarining ishlab chiqarilayotgan mahsulotlarini yetkazib berish, transportda tashishning eng samarali usullarini joriy etish va xaridorlarga koʻrsatiladigan xizmatlar boʻyicha takliflarni ishlab chiqadi;

xalqaro sertifikatlar, standartlar va boshqa ruxsat beruvchi hujjatlar olinishida koʻmaklashadi;

shu jumladan, chet elda soliq va bojxona maʼmuriyatchiligi boʻyicha axborot taqdim etadi;

v) xorijiy xaridorni izlashga koʻmaklashish va eksport kontrakti tuzish, shu jumladan, uni tayyorlash bosqichigacha muzokaralar jarayoniga koʻmaklashish sohasida:

Internet tarmogʻida izlash, muzokaralar va yozishmalarga kirishish, elchixonalar va savdo vakolatxonalari bilan oʻzaro hamkorlik, shuningdek, Oʻzbekiston Respublikasiga taklifnomalarni, shu jumladan, viza bilan qoʻllab-quvvatlashni rasmiylashtirish va xorijiy delegatsiyalarning Oʻzbekiston Respublikasida boʻlishi dasturlarini tayyorlash yoʻli bilan xaridorlarni jalb etadi;

xorijiy sheriklar bilan muzokaralar oʻtkazishda, eksport kontraktini tuzish, shu jumladan, eksport kontraktlari va bitimlari loyihalarini tayyorlash bosqichiga qadar mahsulotni yetkazib berish shartlarini muhokama qilishda tadbirkorlik subyektlariga koʻmaklashadi;

g) milliy mahsulotlarni xorijga eksport qilish boʻyicha vazirliklar, respublika idoralari, viloyatlar va tumanlar (shaharlar) hokimliklari bilan oʻzaro hamkorlikni taʼminlash hamda eksport qiluvchilarga eksportni qoʻllab-quvvatlash chora-tadbirlari, mavjud imtiyozlar va preferensiyalar, vakolatli davlat hokimiyati organlarining vazifalari va funksiyalari haqidagi maʼlumotlar bilan tanishish imkonini yaratish sohasida:

eksport qiluvchilarni eksportni qoʻllab-quvvatlash chora-tadbirlari, vakolatli davlat hokimiyati organlarining vazifavlari va funksiyalari toʻgʻrisida xabardor qilish yoʻli bilan chet elda milliy eksport mahsulotlarining kirishi boʻyicha respublika vazirliklari va idoralari, Qoraqalpogʻiston Respublikasi Vazirlar Kengashi, viloyatlar va tumanlar (shaharlar) hokimliklari bilan oʻzaro hamkorlik qiladi;

tadbirkorlik subyektlarini amaldagi soliq va bojxona imtiyozlari va preferensiyalari, shu jumladan, xorijiy mamlakatlarning imtiyozlari va preferensiyalari bilan tanishtiradi;

d) elektron tashqi savdo platformasini yuritish, mahalliy eksport qiluvchilar, ishlab chiqariladigan mahsulotlar va xizmatlar haqidagi maʼlumotlar bazasini yuritish, ishlab chiqarish va eksport faoliyati bilan shugʻullanuvchi tadbirkorlik subyektlariga yetakchi xalqaro elektron savdo maydonlariga kirishda koʻmaklashish sohasida;

mahalliy eksport qiluvchilar, ishlab chiqariladigan mahsulotlar va koʻrsatiladigan xizmatlar toʻgʻrisidagi maʼlumotlar bazasini yuritgan holda tegishli elektron tashqi savdo maydonchasini taʼminlaydi;

ishlab chiqarish va eksport faoliyatini amalga oshiruvchi tadbirkorlik subyektlariga elektron savdoning yetakchi xalqaro maydonlariga kirish, shu jumladan, tijorat takliflarini tayyorlash va ularni yetakchi elektron savdo maydonchalarida joylashtirish boʻyicha koʻmaklashadi;

e) mahalliy ishlab chiqaruvchilarning sifatli mahsulotlarni ishonchli yetkazib beruvchi ekanligini tasdiqlash uchun oʻzbek brendlari va mahsulotlarini xorijda targʻib qilish boʻyicha “Made in Uzbekistan” dasturini amalga oshirish, shu jumladan, “Made in Uzbekistan” milliy koʻrgazmasini, tarmoq va mintaqaviy koʻrgazmalarni va tovarlar yarmarkalarini har yili oʻtkazish, shuningdek, xalqaro koʻrgazmalar va taqdimotlarda ishtirok etish orqali amalga oshirish sohasida;

shu jumladan, import qiluvchilarni, xorijiy mehmonlar va mutaxassislarni jalb etish, shuningdek, xorijiy va mahalliy ishbilarmon doiralar vakillari ishtirokida mavzuli seminarlar, sessiyalar, konferensiyalar va boshqa tadbirlarni tashkil etish yoʻli bilan “Made in Uzbekistan” milliy koʻrgazmasini har yili tashkil etadi va oʻtkazadi;

eksport qiluvchi tashkilotlarning ishlab chiqariladigan mahsulotlar namunalari va tarqatma axborot materiallari bilan ishtirok etishi uchun xalqaro koʻrgazmalar va yarmarkalarida Oʻzbekiston pavilionini tashkil etadi;

tijorat takliflarini va mahsulotlar namunalarini taqdim etgan holda xalqaro koʻrgazmalar va taqdimotlarda mahalliy eksport qiluvchi tashkilotlar nomidan ishtirok etadi;

j) eksport qiluvchi tashkilotlar uchun oʻquv seminarlari va treninglar hamda xorijiy mamlakatlardagi tadbirkorlik subyektlari uchun tashqi savdo faoliyati masalalari boʻyicha biznes-forumlar tashkil etish va oʻtkazish sohasida:

savdo vakolatxonalari va yetakchi xorijiy oʻquv markazlari bilan hamkorlikda eksport qiluvchi tashkilotlar uchun xorijiy taʼlim seminarlarini va treninglarni oʻtkazadi;

tajribali xorijiy mutaxassislar va ekspertlarni jalb etgan holda eksport qiluvchilar uchun ilgʻor taʼlim dasturlari asosida taʼlim seminarlari va treninglarni tashkil etadi;

z) eksport qiluvchi tashkilotlarga ham respublikada, ham xorijda standartlashtirish va sertifikatlashtirishning xalqaro tizimlarini joriy etishga, xorijiy vakolatli organlarda milliy mahsulotlarni hamda koʻrgazma stendlarini roʻyxatdan oʻtkazishga, respublika tashkilotlarining xalqaro koʻrgazmalar-yarmarkalarda ishtirok etishini, shu jumladan, anʼanaviy milliy mahsulotlar va brendlarni potensial sotish bozorlariga kiritishda taqdimotlar va reklama kompaniyalari oʻtkazilishiga moliyaviy koʻmaklashish sohasida;

ham respublikada, ham chet elda standartlashtirish va sertifikatlashning xalqaro tizimlarini joriy etish boʻyicha eksport qiluvchi tashkilotlarga moliyaviy koʻmaklashadi, xorijiy vakolatli organlarda milliy mahsulotlarni ushbu yoʻnalishlarda xarajatlarning tegishli qismini qoplash yoʻli bilan roʻyxatdan oʻtkazadi;

koʻrgazma stendlarini tashkil etishda va xalqaro koʻrgazmalar-yarmarkalarda ishtirok etishda, taqdimotlar va reklama kampaniyalarini oʻtkazishda, shu jumladan, anʼanaviy milliy mahsulotlarning potensial sotish bozorlariga kirishda eksport qiluvchilarni moliyaviy qoʻllab-quvvatlaydi;

8. Agentlik yuklangan vazifalar va funksiyalarni bajarish uchun quyidagi huquqlarga egadir:

mahalliy ishlab chiqaruvchilarning eksport mahsulotlari xorijiy bozorlarga kirishi masalalari boʻyicha statistik maʼlumotlar, takliflar, xulosalar va boshqa zarur materiallarni belgilangan tartibda olish, shuningdek, Agentlikka yuklangan vazifalar va funksiyalarni bajarish bilan bogʻliq masalalar boʻyicha yozishmalar olib borish;

Oʻzbekiston Respublikasi investitsiyalar va tashqi savdo vaziri bilan kelishgan holda oʻxshash xorijiy agentliklar va tashkilotlar bilan texnik va iqtisodiy axborotni ayirboshlash, vazirliklar, idoralar va tashqi iqtisodiy faoliyat subyektlaridan zarur axborotni belgilangan tartibda soʻrash;

Oʻzbekiston Respublikasi investitsiyalar va tashqi savdo vaziri bilan kelishgan holda Oʻzbekiston Respublikasi hududida va uning tashqarisida mahalliy, xorijiy va xalqaro tashkilotlar bilan hamkorlik qilish, aloqalar va munosabatlar oʻrnatish;

Oʻzbekiston Respublikasi Investitsiyalar va tashqi savdo vazirligi rahbariyatiga Agentlikka yuklangan vazifalar va funksiyalarni bajarish bilan bogʻliq takliflarni belgilangan tartibda kiritish;

oʻzaro hamkorlik qilish, ishlarni bajarishga va xizmatlar koʻrsatishga muzokaralar olib borish va shartnomalar tuzish;

Agentlikka yuklangan vazifalar va funksiyalarni amalga oshirishga mahalliy va Oʻzbekiston Respublikasi investitsiyalar va tashqi savdo vaziri bilan kelishgan holda xorijiy ekspertlarni belgilangan tartibda jalb etish;

qonun hujjatlariga muvofiq eksportga yoʻnaltirilgan mahsulotlarni ishlab chiqarish, saqlash, qayta ishlashni tashkil etish uchun tadbirkorlik subyektlari muassislari (ishtirokchilari) tarkibiga kirish;

budjetdan tashqari mablagʻlarni tijorat banklarining depozitlariga joylashtirish;

Agentlik qonun hujjatlariga muvofiq boshqa huquqlarga ham ega boʻlish mumkin.

9. Agentlik unga yuklangan vazifalar va funksiyalar samarali bajarilishi uchun javob beradi.

10. Quyidagilar Agentlik direktorining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilish;

Agentlik faoliyatiga umumiy rahbarlik qilish, Oʻzbekiston Respublikasi Prezidentining hujjatlari, Vazirlar Mahkamasining qarorlari va boshqa qonun hujjatlari bilan Agentlikka yuklangan vazifalar va funksiyalar bajarilishini tashkil etish;

Oʻzbekiston Respublikasi Prezidentining hujjatlari, Oʻzbekiston Respublikasi Vazirlar Mahkamasining qarorlari bilan tasdiqlangan Agentlik faoliyatini yanada takomillashtirish boʻyicha kompleks dasturlar va tadbirlar ijrosini chuqur va tanqidiy tahlil qilish;

Oʻzbekiston Respublikasi Prezidentining, Oʻzbekiston Respublikasi Bosh vazirining, uning oʻrinbosarlari va maslahatchilarining, shuningdek, Oʻzbekiston Respublikasi investitsiyalar va tashqi savdo vazirining topshiriqlarini ijro etish;

faoliyatning ayrim uchastkalariga rahbarlik qilish uchun Agentlik mansabdor shaxslarining vakolatlarini aniqlash va ularning shaxsiy javobgarligi darajasini belgilash;

Agentlik faoliyati rejalashtirilishini tashkil etish, Agentlik va uning mansabdor shaxslarining har choraklik ish rejalarini tasdiqlash, ular bajarilishi ustidan nazoratni taʼminlash;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining hujjatlari va topshiriqlari ijrosini tashkil etish va monitoringini olib borish, Agentlik faoliyatida ijro intizomini mustahkamlash boʻyicha kompleks amaliy chora-tadbirlarni amalga oshirish;

Agentlik xodimlarini lavozimga tayinlash va lavozimdan ozod qilish;

Agentlikda kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, Agentlikning kadrlar zaxirasini shakllantirish;

Agentlik xodimlarini tayyorlash, qayta tayyorlash va ularning malakasini oshirish tizimini tashkil etish;

ishni tashkil etishning zamonaviy shakllari Agentlik faoliyatiga joriy etilishini taʼminlash;

Agentlik rahbarlari va xodimlarining xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlish samaradorligi va xorijiy delegatsiyalarning Oʻzbekiston Respublikasiga tashriflarini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga toʻliq muvofiq tashkil etish va amalga oshirish, xizmat safarlarining asosliligini, samaradorligi va natijadorligini taʼminlash, xizmat safari sarf-xarajatlari uchun ajratiladigan mablagʻlardan maqsadli va oqilona foydalanish;

Agentlik xodimlari tomonidan Agentlik xodimlarining Odob-axloq qoidalari talablariga rioya qilishini taʼminlash;

Agentlik tizimida “Korrupsiyaga qarshi kurashish toʻgʻrisida”gi Oʻzbekiston Respublikasi Qonunining talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyoti va qonunchilikni takomillashtirish boʻyicha chora-tadbirlarni ishlab chiqish va amalga oshirish yoʻli bilan ularni aniqlash, tahlil qilish, ularning sabablari va shartlarini bartaraf etish;

Agentlik vakolatiga kiradigan masalalar boʻyicha jismoniy va yuridik shaxslarning murojaatlari toʻgʻrisidagi qonun hujjatlarini ijro etish, elektron hujjatlar aylanishi tizimini keng joriy etish va undan samarali foydalanish, yuridik va jismoniy shaxslarning tushayotgan murojaatlari boʻyicha maʼlumotlar bazasini shakllantirish boʻyicha ishlarni nazorat qilish va muvofiqlashtirish, ularni koʻrib chiqish natijalari hisobga olinishi va kuzatib borilishini taʼminlash;

Agentlik xodimlari tomonidan bajarilishi majburiy boʻlgan buyruqlar chiqarish va koʻrsatmalar berish;

Agentlik xodimlarini ragʻbatlantirish va intizomiy javobgarlikka tortish masalalarini hal etish, shu jumladan, ularning egallab turgan lavozimda bundan buyon boʻlishining maqsadga muvofiqligi toʻgʻrisidagi masalalarni koʻrib chiqish, ularning shaxsiy javobgarligi chora-tadbirlarini amalga oshirish;

Agentlikning tuzilmasini va shtatdagi xodimlari sonini oʻzgartirish toʻgʻrisida Oʻzbekiston Respublikasi investitsiyalar va tashqi savdo vaziriga takliflar kiritish;

qonuniylik va mehnat intizomining yoʻl qoʻyilgan buzilishlari holatlari boʻyicha oʻz vakolatlari doirasida xizmat surishtiruvlari oʻtkazilishini tayinlash;

Qonun hujjatlarida belgilangan tartibda Agentlik mol-mulkini boshqarish.

11. Quyidagilar Agentlik direktorining oʻrinbosari va tarkibiy boʻlinmalari rahbarlarining asosiy funksional vazifalari hisoblanadi:

Agentlik tarkibiy boʻlinmalari xodimlari tomonidan Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilinishini taʼminlash;

mutasaddilik qilinadigan tarkibiy boʻlinmalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalar bajarilishini tashkil etish;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining, shuningdek, Oʻzbekiston Respublikasi Investitsiyalar va tashqi savdo vazirligi rahbariyatining hujjatlari va topshiriqlari ijrosini taʼminlash;

ijro intizomini mustahkamlash boʻyicha kompleks amaliy chora-tadbirlarni amalga oshirish, topshiriqlar oʻz vaqtida va sifatli ijro etilishi uchun tarkibiy boʻlinmalar xodimlarining shaxsiy javobgarligini oshirish chora-tadbirlarini koʻrish;

Agentlik qarorlari, direktorning buyruqlari va topshiriqlari oʻz vaqtida va sifatli ijro etilishini taʼminlash;

tarkibiy boʻlinmalarning har choraklik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifalar va tadbirlar oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalar bajarilishini nazorat qilish va muvofiqlashtirish;

tarkibiy boʻlinmalar faoliyati masalalari boʻyicha qonun hujjatlarini takomillashtirish boʻyicha takliflarni ishlab chiqish va ularni koʻrib chiqish uchun Agentlik rahbariyatiga kiritish hamda keyinchalik Oʻzbekiston Respublikasi Investitsiyalar va tashqi savdo vazirligi rahbariyatiga kiritish;

Agentlik tarkibiy boʻlinmalarida kadrlarni tanlash va joy-joyiga qoʻyishda direktorga takliflarni taqdim etish, ularning kasbiy mahoratini, oʻz ishini bilishini, amaliy tajribasini, ishbilarmonlik va maʼnaviy-axloqiy sifatlarining yuqari darajasini taʼminlash, ularning kasbiy malakasini oshirish chora-tadbirlarini koʻrish, tarkibiy boʻlinmalarda kadrlar zaxirasini shakllantirish;

Agentlik tarkibiy boʻlinmalari xodimlari va rahbarlari faoliyati samaradorligi va natijadorligini tanqidiy tahlil qilish, yigʻilishlarda ularning shaxsiy hisobotlarni eshitish, yakunlar boʻyicha zarur chora-tadbirlar koʻrish;

Agentlik xodimlarining Odob-axloq qoidalari talablariga rioya qilish;

“Korrupsiyaga qarshi kurashish toʻgʻrisida” Oʻzbekiston Respublikasi Qonuni talablariga muvofiq Agentlikning tarkibiy boʻlinmalarida korrupsiya va boshqa huquqbuzarliklarning oldini olish chora-tadbirlarini koʻrish, shuningdek, huquqni qoʻllash amaliyoti va qonunchilikni takomillashtirish chora-tadbirlarini ishlab chiqish va amalga oshirish yoʻli bilan korrupsiya va boshqa huquqbuzarliklarni aniqlash, tahlil qilish, ular sodir etilishiga koʻmaklashuvchi sabablar va shart-sharoitlarni bartaraf etish;

davlat sirlariga va maxfiy axborotga taalluqli axborot bilan ishlashda qonun hujjatlari talablariga rioya qilish.

12. Agentlikka Oʻzbekiston Respublikasi investitsiyalar va tashqi savdo vazirining taqdimnomasi boʻyicha Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan direktor boshchilik qiladi.

Direktorning Oʻzbekiston Respublikasi investitsiyalar va tashqi savdo vaziri tomonidan lavozimga tayinlanadigan va lavozimdan ozod qilinadigan bir nafar oʻrinbosari boʻladi.

13. Direktor ish tashkil etilishini taʼminlaydi va Agentlik faoliyatiga umumiy rahbarlik qiladi, shuningdek, Agentlik faoliyatining sifati va pirovard natijalari uchun javob beradi va Oʻzbekiston Respublikasi investitsiyalar va tashqi savdo vaziri bilan kelishgan holda Agentlikni xalqaro munosabatlarda ifodalaydi;

Agentlik direktori boʻlmaganida uning vakolatlarini direktor oʻrinbosari amalga oshiradi.

14. Agentlikning xorijiy mamlakatlardagi vakolatxonalari Oʻzbekiston Respublikasi investitsiyalar va tashqi savdo vaziri bilan kelishgan holda Agentlik direktori tomonidan tashkil etiladi.

Xorijiy mamlakatlardagi vakolatxonalar faoliyati Oʻzbekiston Respublikasi Investitsiyalar va tashqi savdo vazirligi tomonidan belgilanadigan tartibga binoan muvofiqlashtiriladi va boshqariladi.

15. Agentlik faoliyati, uning samaradorligi va natijadorligi yuzasidan muntazam baholanishi kerak.

16. Agentlik faoliyati samaradorligi va natijadorligini baholash Oʻzbekiston Respublikasi investitsiyalar va tashqi savdo vaziri tomonidan tasdiqlanadigan Agentlik faoliyati samaradorligi va natijadorligini baholash mezonlari va ishchi indikatorlari asosida amalga oshiriladi.

17. Agentlik faoliyati samaradorligi va natijadorligini baholash yakunlari boʻyicha Oʻzbekiston Respublikasi Investitsiyalar va tashqi savdo vazirligi tomonidan:

Agentlik rahbarlari va xodimlariga nisbatan ragʻbatlantirish (mukofotlash) yoki tegishli intizomiy javobgarlik choralarini koʻrish;

aniqlangan kamchiliklarni bartaraf etish va Agentlik faoliyatini yanada takomillashtirish chora-tadbirlari koʻriladi.

18. Agentlik faoliyati samaradorligi va natijadorligini baholash tartibi va metodikasi qonun hujjatlari bilan belgilanadi.

19. Quyidagilar Agentlik faoliyatini moliyalashtirish manbalari hisoblanadi:

Oʻzbekiston Respublikasi Davlat budjeti mablagʻlari, xalqaro va xorijiy hukumat, xalqaro moliyaviy tashkilotlar, moliyaviy institutlar va boshqa donorlarning grantlari va kreditlari (qarzlari);

yuridik va jismoniy shaxslar — Oʻzbekiston Respublikasi rezidentlari va norezidentlarining xayriya ehsonlari;

qonun hujjatlarida taqiqlanmagan boshqa manbalar.

20. Agentlik xodimlarining ish haqi lavozim maoshi, mukofotlar, qonun hujjatlarida nazarda tutilgan qoʻshimcha haqlar va ustamalardan iborat boʻladi.

21. Agentlik xodimlarini moddiy ragʻbatlantirish qonun hujjatlariga muvofiq amalga oshiriladi.

22. Agentlik xodimlariga Oʻzbekiston Respublikasi Investitsiyalar va tashqi savdo vazirligi tomonidan tasdiqlanadigan tartibga muvofiq uzluksiz ish staji (uzoq muddat uzluksiz xizmati uchun) ustamalar toʻlanadi.

23. Oʻzbekiston Respublikasi investitsiyalar va tashqi savdo vaziri tomonidan Agentlik xodimlari uchun qonun hujjatlarida nazarda tutilgan boshqa toʻlovlardan qatʼi nazar asosiy egallab turgan lavozimi boʻyicha Agentlikning budjetdan tashqari mablagʻlari hisobiga lavozim maoshlariga (tarif stavkalariga) ustamalar va boshqa ragʻbatlantiruvchi toʻlovlar belgilanishi mumkin.

Agentlikning ayrim tashabbuskor va yuqori malakali xodimlariga belgilangan tartibda lavozim maoshiga (tarif stavkasiga) shaxsiy ustamalar belgilanishi mumkin.

24. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.